ភ្នំពេញៈ ក្រសួងវប្បធម៌និងវិចិត្រសិល្បៈរៀបចំការប្រឡងប្រជែងស្នាដៃសិល្បៈចម្លាក់ស្មិត សូនរូបជាក្បាច់គុនបុរាណខ្មែរល្បុក្កតោ ដើម្បីជំរុញ លើកទឹកចិត្តដល់សិល្បករ សិស្ស-និសិ្សត អង្គការសមាគម ក្នុងការអភិវឌ្ឍសមត្ថភាព និងការបង្កើតគំនិតច្នៃប្រឌិត ដើម្បីរួមចំណែកអភិរក្សនិងអភិវឌ្ឍវិស័យសិល្បៈសូនរូប និងសិល្បៈសិប្បកម្មឱ្យបានគង់វង្ស។
លោក ឈឹម សុធី ប្រធាននាយកដ្ឋានសិល្បៈសូនរូប និងសិល្បៈសិប្បកម្ម បានឱ្យដឹងនៅថ្ងៃទី៦ ខែមិថុនាថា មហោស្រពជាតិ សិល្បៈចម្លាក់ស្មិត ឆ្នាំ២០២៣ ក្រោមប្រធានបទ«ក្បាច់គុនបុរាណខ្មែរល្បុក្កតា» នឹងប្រព្រឹត្តទៅមានរយៈពេល៣ថ្ងៃ ចាប់ពីថ្ងៃទី១៦ ដល់១៨ ខែវិច្ឆិកា ឆ្នាំ២០២៣ នៅបរិវេណបណ្ណាល័យជាតិ រាជធានីភ្នំពេញ។ លោកថា ចាប់ពីការផ្សព្វផ្សាយជូនដំណឹងថ្ងៃទី២៣ ខែឧសភា រហូតមកដល់ថ្ងៃទី៦ ខែមិថុនា មានអ្នកដាក់ពាក្យចូលរួមប្រឡងប្រជែងចម្លាក់ស្មិតជាង ១០ស្នាដៃហើយ ដែលអ្នកទាំងនោះមកពីខេត្តកណ្តាល ខេត្តសៀមរាប ខេត្តព្រៃវែង និងខេត្តកំពង់ស្ពឺ។
លោកថ្លែងថា៖«ប្រធានបទនេះ ទី១យើងលើកស្ទួយដល់ក្បាច់គុណល្បុកតោខ្មែរ ដែលបានដាក់ចូលបញ្ជីបេតិកភណ្ឌពិភពលោក ទី២លើកស្ទួយសិល្បៈចម្លាក់ស្មិត ដែលធ្លាប់ល្បីល្បាញពីមុនមក ប៉ុន្តែឥឡូវអ្នកធ្វើស្មិតរាងថយចុះ អ៊ីចឹងយើងលើកកម្ពស់ពួកគាត់ឱ្យបន្តការធ្វើទៀត»។
លោកប្រាប់ថា ស្នាដៃចូលរួមប្រកួតប្រជែងដែលឈ្នះជយលាភីចំណាត់ថ្នាក់លេខ១នឹងទទួលបានទឹកប្រាក់ចំនួន៤ ០០០ ០០០រៀល អមដោយបណ្ណជយលាភី។ ចំណាត់ថ្នាក់លេខ២ នឹងទទួលបានទឹកប្រាក់ចំនួន៣ ០០០ ០០០ រៀល អមដោយបណ្ណជយលាភី និងចំណាត់ថ្នាក់លេខ៣ នឹងទទួលបានទឹកប្រាក់ចំនួន២ ៥០០ ០០០រៀល អមដោយបណ្ណជយលាភី។
លោកថ្លែងថា៖«ជយលាភីលេខ១ ដល់លេខ៣ ក្រសួងទុកដើម្បីធ្វើការរៀបចំពិព័រណ៍ជាតិ អន្តរជាតិ ផ្សេងៗ ចំណែកជយលាភីលើកទឹកចិត្ត ដែលអត់បានលេខ១ ដល់លេខ៣ នឹងប្រគល់ជូនពួកគាត់វិញ អមដោយបណ្ណសរសើរ នឹងទឹកប្រាក់មួយចំនួន»។
បើតាមសេចក្តីជូនដំណឹងរបស់ក្រសួងវប្បធម៌ និងវិចិត្រសិល្បៈ រាល់ស្នាដៃទាំងអស់ដែលដាក់ចូលរួមប្រឡងប្រជែងក្នុងមហោស្រពជាតិសិល្បៈចម្លាក់ស្មិតឆ្នាំ២០២៣ ត្រូវគោរពតាមលក្ខខណ្ឌដូចជា៖បេក្ខជន-បេក្ខនារីត្រូវមានសញ្ជាតិខ្មែរទំហំស្នាដៃដែលត្រូវចូលរួមប្រកួតប្រជែងមានកម្ពស់សរុបរូបចម្លាក់៦០សង់ទីម៉ែត្រ ដោយបូករួមទាំងជើងទម្រ៥សង់ទីម៉ែត្រ ។
ស្នាដៃដែលដាក់ចូលរួមប្រកួតប្រជែង ត្រូវបង្កើតនៅក្នុងឆ្នាំ២០២៣នេះ ជាទម្រង់បុរាណឬសម័យក៏បាន។រាល់ស្នាដៃចម្លាក់មិនដែលធ្លាប់យកទៅដាក់តាំងបង្ហាញនៅកន្លែងដទៃ ហើយអត្ថន័យគឺឆ្លុះបញ្ចាំងពីទិដ្ឋភាពដែលបង្កប់នូវក្បាច់គុនបុរាណខ្មែរជាអត្តសញ្ញាណសិល្បៈជាតិ ភាពច្នៃប្រឌិតនិងសោភណភាពនិងប្រណីតភាពផ្ដោតលើភាពប៉ិនប្រសប់ប្រកបដោយទេពកោសល្យខ្ពស់របស់សិល្បករដោយបង្កប់នូវបច្ចេកទេសរស់រវើក។
ប្រភពដដែលបានឱ្យដឹងថា អ្នកចូលរួមត្រូវភ្ជាប់ជាមួយនូវពាក្យសុំចូលរួមប្រឡង ១ច្បាប់ ភ្ជាប់មកជាមួយនូវប្រវត្តិរូបសង្ខេប ១ច្បាប់ រូបថត ៤ x ៦ចំនួន ២សន្លឹកលិខិតបញ្ជាក់ទីលំនៅឬអត្តសញ្ញាណប័ណ្ណថតចម្លង (ផ្លូវការ) ចំនួន ១សន្លឹក។ បេក្ខជនអាចដាក់ពាក្យនៅមន្ទីរវប្បធម៌ និង វិចិត្រសិល្បៈ រាជធានី-ខេត្ត ឬនៅនាយកដ្ឋានសិល្បៈសូនរូប និងសិល្បៈសិប្បកម្ម (ទីស្ដីការក្រសួងវប្បធម៌ និងវិចិត្រសិល្បៈ)។
ការទទួលស្នាដៃពីបេក្ខជន-បេក្ខនារី នឹងបញ្ចប់នៅថ្ងៃទី១៦ ខែតុលាឆ្នាំ២០២៣ ហើយគណៈកម្មការនឹងពិនិត្យ និងវាយតម្លៃ នៅថ្ងៃទី២៣ ខែតុលា៕