សិស្សសាលារៀនតូចៗទទួលទានភេសជ្ជៈប៉ូវកម្លាំងដែលមានជាតិស្កខ្ពស់។ រូបថត សហការី
ភ្នំពេញ៖ ក្រសួងអប់រំ យុវជន និងកីឡាកាលពីថ្ងៃទី១០ ខែធ្នូ បានចេញសេចក្ដីណែនាំដោយហាមឃាត់ការទទួលទាន ការចែកចាយ ការតាំងលក់ និងការផ្សព្វផ្សាយពាណិជ្ជកម្ម ផលិតផលភេសជ្ជៈប៉ូវកម្លាំងគ្រប់ប្រភេទ នៅក្នុង និងជុំវិញជាប់បរិវេណគ្រឹះស្ថានសិក្សា ចំណេះទូទៅសាធារណៈ និងឯកជន និងគ្រឹះស្ថានអប់រំបច្ចេកទេស។
យោងតាមសេចក្ដីណែនាំ បានឱ្យដឹងថា៖ «កន្លងមក ក្រសួងអប់រំ យុវជន និងកីឡា បានចេញសេចក្តីណែនាំជាបន្តបន្ទាប់ពាក់ព័ន្ធនឹងការលើក កម្ពស់សុខភាព អនាម័យ និងសុវត្ថិភាពចំណីអាហារតាមសាលារៀន នៅតាមគ្រឹះស្ថានសិក្សាសាធារណៈ និង ឯកជន និងសេចក្តីណែនាំស្តីពី ការពង្រឹងវិធានការអនុវត្តក្នុងការលើកកម្ពស់សុវត្ថិភាព និងសុខុមាលភាពចំណី អាហារនៅតាមគ្រឹះស្ថានសិក្សាចំណេះទូទៅសាធារណៈនិងឯកជន»។
ទន្ទឹមនឹងនេះ ក្រសួងក៏សង្កេតឃើញការអនុវត្តនៅមិនទាន់បានគ្រប់ជ្រុងជ្រោយតាមសេចក្តីណែនាំនៅឡើយ។
ក្រសួងបានបន្ដថា៖ «វិធានការនេះត្រូវបានធ្វើឡើងស្របតាមអនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងការឱ្យយកចិត្តទុកដាក់បន្ថែមលើសុខភាព របស់សិស្ស រួមទាំងការបង្ការហានិភ័យនៃជំងឺមិនឆ្លង ជាពិសេសជំងឺទឹកនោមផ្អែម ដែលពាក់ព័ន្ធនឹងទម្លាប់ ទទួលទានចំណីអាហារ ភេសជ្ជៈផ្អែម និងភេសជ្ជៈប៉ូវកម្លាំង»។
យោងតាមសេចក្ដីណែនាំ មន្ទីរអប់រំ យុវជន និងកីឡារាជធានី ខេត្ត ការិយាល័យអប់រំ យុវជន និងកីឡានៃ រដ្ឋបាលក្រុង ស្រុក ខណ្ឌ និងគ្រប់គ្រឹះស្ថានសិក្សាសាធារណៈនិងឯកជន និងគ្រឹះស្ថានអប់រំបច្ចេកទេសនៅ ទូទាំងប្រទេស ត្រូវហាមឃាត់ដាច់ខាតនូវការទទួលទាន ការចែកចាយ ការតាំងលក់ និងការផ្សព្វផ្សាយពាណិជ្ជកម្មផលិតផលភេសជ្ជៈប៉ូវកម្លាំងគ្រប់ប្រភេទ នៅក្នុង និងជុំវិញជាប់បរិវេណគ្រឹះស្ថានសិក្សា។
សាលារៀនក៏មានភារកិច្ចក្នុងការពង្រឹងបទប្បញ្ញត្តិសុវត្ថិភាពចំណីអាហារ និងរួមបញ្ចូលការហាមឃាត់ទៅក្នុងក្រមសីលធម៌ផ្ទៃក្នុងរបស់ពួកគេ។
សេចក្តីណែនាំនេះកំណត់យុទ្ធនាការអប់រំសុខភាព ដើម្បីជូនដំណឹងដល់សិស្សានុសិស្សអំពីគ្រោះថ្នាក់នៃភេសជ្ជៈប៉ូវកម្លាំង រួមទាំងតាមរយៈពិធីលើកទង់ជាតិ និងការប្រជុំនានា។
លើសពីនេះទៀត សាលារៀនត្រូវបានលើកទឹកចិត្តឱ្យចូលរួមជាមួយសិស្ស និងបុគ្គលិកក្នុងការបង្កើតសារការយល់ដឹងអំពីសុខភាព។
ក្រសួងនឹងត្រួតពិនិត្យការអនុលោមតាមច្បាប់ ដោយមានវិធានការកែតម្រូវ រួមទាំងការដកផលិតផល និងការបញ្ចប់កិច្ចសន្យា។
សិស្សទិញនំចំណីនៅខាងក្រៅសាលាបឋមសិក្សាក្នុងសង្កាត់ព្រែកលៀប ខណ្ឌជ្រោយចង្វារកាលពីឆ្នាំ២០២១។ រូបថត ភ្នំពេញប៉ុស្ដិ៍
គោលដៅចុងក្រោយគឺបង្កើត «គ្រឹះស្ថានសិក្សា គ្មានភេសជ្ជៈប៉ូវកម្លាំង» ដោយមានការសហការពីអាជ្ញាធរគ្រប់លំដាប់ថ្នាក់ ដើម្បីធានាការអនុវត្តប្រកបដោយប្រសិទ្ធភាព។
វិធានការនេះគឺជាផ្នែកមួយនៃយុទ្ធសាស្ត្រជាតិដ៏ទូលំទូលាយមួយ ដើម្បីទប់ស្កាត់ការកើនឡើងនៃជំងឺមិនឆ្លង ដែលកំពុងតែក្លាយជាកង្វល់ផ្នែកសុខភាពសាធារណៈដ៏សំខាន់នៅក្នុងប្រទេសកម្ពុជា។
កាលពីថ្ងៃទី២៧ ខែវិច្ឆិកា ឆ្នាំ២០២៤ លោកស្រី ឱ វណ្ណឌីន រដ្ឋលេខាធិការក្រសួងសុខាភិបាល បានធ្វើជាអធិបតីក្នុងសិក្ខាសាលាផ្សព្វផ្សាយស្តីពីការអប់រំសុខភាព ដែលផ្តោតលើការដោះស្រាយហានិភ័យនៃជំងឺមិនឆ្លង រួមទាំងបញ្ហាទាក់ទងនឹងរបបអាហារមិនល្អ និងការទទួលទានគ្រឿងស្រវឹង។
ក្នុងសុន្ទរកថា លោកស្រីបានលើកឡើងពីតម្រូវការសម្រាប់ការអប់រំសុខភាពសាធារណៈកាន់តែច្រើន និងសារៈសំខាន់នៃការកាត់បន្ថយការទទួលទានអាហារដែលមានជាតិស្ករ ខ្លាញ់ និងអំបិលខ្ពស់។
លោកស្រី វណ្ណឌីន បានថ្លែងថា៖ «ការលើកកម្ពស់ទម្លាប់នៃការទទួលទានអាហារដែលមានសុខភាពល្អ និងសកម្មភាពរាងកាយទៀងទាត់គឺចាំបាច់ដើម្បីប្រយុទ្ធប្រឆាំងនឹងការរីករាលដាលនៃជំងឺមិនឆ្លង។ យើងក៏ត្រូវតែធ្វើការដើម្បីកាត់បន្ថយការប្រើប្រាស់គ្រឿងស្រវឹង និងលើកកម្ពស់គោលនយោបាយដែលបង្កើតបរិយាកាសគាំទ្រសម្រាប់សុខភាពកាន់តែប្រសើរឡើង»៕
