ត្រីរាជមួយក្បាល ទម្ងន់ ១៣២គីឡូក្រាម និងប្រវែងដងខ្លួនជាង២.២ម៉ែត្រ ត្រូវបានប្រលែងចូលបឹងធម្មជាតិវិញ ក្រោយពីអ្នកនេសាទចាប់បាន ក្នុងខណ្ឌជ្រោយចង្វារ នាពេលថ្មីៗនេះ។ រូបថត រដ្ឋបាលជលផល
ភ្នំពេញៈ មន្រ្តីជំនាញរដ្ឋបាលជលផលបានលើកឡើងថា ប្រភេទត្រីកម្រ ឬត្រីកំពុងតែមានពងមួយក្បាល អាចកើតកូនបានរហូតដល់ទៅពី៦០ម៉ឺនក្បាលទៅ១លានក្បាល ហើយវាជាការបាត់បង់មច្ឆាជាតិមួយដ៍សំខាន់ នៅពេលដែលមានការបំផ្លាញ ឬបរិភោគត្រីពង ជាពិសេសគឺ ប្រភេទត្រីកម្រ ដូចជា ត្រីរាជជាដើម។
ការលើកឡើងនេះត្រូវបានធ្វើឡើង ក្នុងរដូវបើកការនេសាទ ដែលជាសារអប់រំ ផ្សព្វផ្សាយមួយ ដើម្បីជម្រុញនិងលើកទឹកចិត្តដល់ប្រជាពលរដ្ឋ ក៏ដូចជាប្រជានេសាទឱ្យធ្វើការដោះលែងប្រភេទត្រី កម្រ និងជិតផុតពូជ ជាពិសេសគឺត្រីពង។
តាមការសិក្សារបស់វិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋបាលជលផល របស់ក្រសួងកសិកម្ម ត្រីពងមួយក្បាល គឺវាអាចមានកូនចន្លោះពី៦០ម៉ឺនក្បាល ទៅ១លានកូន។ នេះជាការថ្លែងរបស់ លោក ថាច់ ផាណារ៉ា ប្រធានមន្ទីរពិសោធន៍ នៃវិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប ក្នុងពិធីប្រលែងត្រីរាជមួយក្បាល ទម្ងន់ ១៣២គីឡូក្រាម និងប្រវែងដងខ្លួនជាង២.២ម៉ែត្រ ចូលបឹងធម្មជាតិវិញ ក្នុងខណ្ឌជ្រោយចង្វារ នាពេលថ្មីៗនេះ។
លោកមានប្រសាសន៍ដូច្នេះថា៖«យើងហូបត្រីមួយក្បាល ស្មើនឹងយើងហូបត្រី១លានកូន។ អញ្ជឹងសូមកុំចាប់ត្រីនៅរដូវពងកូន ទុកឱ្យវាពងកូន ហើយរដូវបើកនេសាទ សូមបងប្អូនរកចុះ។ កុំប្រើឧបករណ៍នេសាទខុសច្បាប់ ស្បៃមុង ឬឧបករណ៍ឆក់»។
លោកបានឱ្យដឹងថា ជាទូទៅមន្រ្តីរដ្ឋបាលជលផល តែងតែចុះទៅធ្វើការផ្សព្វផ្សាយដល់ប្រជានេសាទទាំងអស់តាមទន្លេសាប ចាប់ពីរដូវបើកនេសាទ គឺថ្ងៃទី១ ខែតុលា ឱ្យពួកគាត់ប្រលែងត្រីកម្រ រឺត្រីពងចូលបឹងធម្មជាតិវិញ ព្រោះថា ពេលនេះ គឺពេលវេលាត្រីចុះ ហើយគន្លងដាយត្រីចាប់ផ្តើមដាក់ផងដែរ។
លោកអំពាវនាវថា៖«បើគាត់ចាប់បានឱ្យផ្តល់ឱ្យរដ្ឋបាលជលផល ដើម្បីចុះមកកិបស្លាកសញ្ញា ដើម្បីលែងវាចូលធម្មជាតិវិញ ទុកសម្រាប់វាបន្តពូជ ទៅឆ្នាំក្រោយៗទៀត ព្រោះត្រីរាជ ជាត្រីធំជាងគេ នៅទន្លេមេគង្គយើងនេះ»។
ក្រោយពីមានការចុះផ្សព្វផ្សាយជារៀងរាល់ឆ្នាំមក រដ្ឋបាលជលផលបានសង្កេតឃើញថា ប្រជានេសាទកាន់តែច្រើនបានយល់ដឹង ហើយចូលរួមក្នុងការ អភិរក្សត្រីកកម្រទាំងនេះ។
លោកពុំ សុថា ប្រតិភូរាជរដ្ឋាភិបាល ទទួលបន្ទុក ប្រធានរដ្ឋបាលជលផល បានឱ្យដឹងថា ប្រជាពលរដ្ឋមួយចំនួនបានប្រែក្លាយពីការរិះគន់ ទៅជាចូលរួមសហការជាមួយអាជ្ញាធរ ក៏ដូចជាមន្រ្តីជលផលវិញ តាមរយៈការរាយការណ៍ នៅពេលដែលឃើញបទល្មើសនេសាទកើតឡើង។ បន្ថែមពីនោះ ការប្រលែងប្រភេទត្រីកម្រក៏កាន់តែមានច្រើនផងដែរ។
លោកមានប្រសាសន៍ថា៖«ជារឿងល្អមួយទៀត ដែលប្រជាពលរដ្ឋចូលរួម ប្រាប់ពីបទល្មើស។ ចំណុចសំខាន់គឺគាត់ចាប់បានហើយ លែងទៅវិញតែម្តង ដើម្បីការពារ នូវត្រីកម្រ ត្រីពូជ»។
ត្រីរាជមួយក្បាលនេះ ត្រូវអ្នកនេសាទចាប់បានដោយចៃដន្យ នៅដាយត្រីគន្លងលេខ៣A ស្ថិតក្នុងខណ្ឌជ្រោយចង្វារ រាជធានីភ្នំពេញកាលពីថ្ងៃទី៦ខែធ្នូនេះ។ បន្ទាប់មក លោកលី សារី ជាម្ចាស់អាជីវកម្មឡូលេខ៣Aបានទាក់ទងទៅមន្រ្តីរដ្ឋបាលជលផល ដើម្បីធ្វើការដោះលែងទៅក្នុងបឹងធម្មជាតិវិញ ក្រោមកិច្ចសហការជាមួយនឹងគម្រោងអច្ឆរិយភាពទន្លេមេគង្គ។
លោកលី សារី ដែលបើកអាជីវកម្មនេសាទជិត២០ឆ្នាំ តពីឪពុក និងជីតា តាំងពីសម័យសង្គមរាស្រ្តនិយមបានអំពាវនាវថា៖«ពេលបងប្អូនប្រជានេសាទនេសាទចាប់បានត្រីកម្រនេះហើយ សូមទាក់ទងទៅរដ្ឋបាលជលផល ដើម្បីចូលរួមប្រលែង ដើម្បីអភិរក្សត្រីប្រភេទកម្រនេះទាំងអស់គ្នា ឱ្យវាមានច្រើន សម្បូរដូចពីមុនវិញ»។
វិទ្យាស្ថានស្រាវជ្រាវ និងអភិវឌ្ឍន៍ជលផលទឹកសាប នៃរដ្ឋបាលជលផល សហការជាមួយគម្រោងអច្ឆរិយភាពទន្លេមេគង្គ ក៏បានលែងត្រីរាជមួយចំនួន ៤ក្បាល ចូលទៅក្នុងបឹងធម្មជាតិវិញផងដែរ នៅថ្ងៃទី១០ ខែធ្នូនេះ។
ប្រភេទដែលកំពុងតែរងគ្រោះថ្នាក់ មាន៥៨ប្រភេទ ដែលក្នុងនោះ ត្រី២៩ប្រភេទ ជាប្រភេទត្រីទឹកប្រៃ និងត្រី២៩ប្រភេទទៀត ជាត្រីទឹកសាប។ ក្នុងនោះរួមមាន ត្រីគល់រាំង ត្រីរាជ ត្រីត្រសក់ បបែល ត្រីប៉ាសាណាក ត្រីកន្រ្តប់ខ្លា ឬប្រភេទត្រីកម្រផ្សេងទៀតជាដើម។ នេះបើយោងតាមរដ្ឋបាលជលផល៕
