លោកនាយករដ្ឋមន្ត្រី ហ៊ុន ម៉ាណែត ថ្លែងក្នុងពិធីបើកការដា្ឋនសាងសង់ស្ពានអាកាសភ្លោះ ចំណុចប្រសព្វ «មហាវិថី សម្ដេចតេជោ ហ៊ុន សែន» និងផ្លូវជាតិលេខ២ ស្ថិតនៅព្រំប្រទល់រាជធានីភ្នំពេញ និងខេត្តកណ្តាល នាថ្ងៃទី១៧ មិថុនា។ ហ្វេសប៊ុក លោក ហ៊ុន ម៉ាណែត
ភ្នំពេញៈ លោកនាយករដ្ឋមន្ត្រី ហ៊ុន ម៉ាណែត ថ្លែងថា កម្ពុជាមិនទាន់មានការចាំបាច់ក្នុងការហាមឃាត់ការនាំចូលរថយន្តចាស់ៗនោះទេ ប៉ុន្តែលោកណែនាំឱ្យពង្រឹងការត្រួតពិនិត្យបច្ចេកទេសរថយន្តឱ្យបានច្បាស់វិញ។
លោកថ្លែងថា កាលពីកន្លងមក មន្ត្រីរាជរដ្ឋាភិបាលបានលើកយោបល់ទៅកាន់លោកក្នុងការគិតគូរអំពីការនាំចូលរថយន្តកំណត់ឆ្នាំ ប៉ុន្តែលោកច្រានចោលយោបល់នេះ ហើយលោកណែនាំឱ្យពង្រឹងប្រព័ន្ធឆែកបច្ចេកទេសរថយន្ត (ឆៀក) ឱ្យបានរឹងមាំវិញ។
លោក ហ៊ុន ម៉ាណែត ថ្លែងថា៖ «កាលមុនមានប្រជុំ ដល់ឧត្តម អូន ព័ន្ធមុនីរ័ត្ន [ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ] ដាក់សុំយោបល់ខ្ញុំ។ មានប្រជុំលើកយោបល់ ដោយសារគិតគូពីរឿងបរិស្ថាន។ អ៊ីចឹង ក៏បានគិតគូស្នើសុំថា ឥឡូវគួរតែហាម។ ឆ្នាំ ២០២៤ នេះហាមមិនឱ្យនាំចូលរថយន្តដែលលើសអាយុ ១០ឆ្នាំ។ ដល់ឆ្នាំ ២០៣០ ហាមមិនឱ្យនាំចូលរថយន្តលើសអាយុ ៥ឆ្នាំដើម្បីយើងធានារថយន្តឱ្យមានល្អ ហើយកុំឱ្យខូចបរិស្ថាន។ ខ្ញុំថា ដកចោលទៅ»។
លោកថ្លែងដូច្នេះ ក្នុងពិធីបើកការដា្ឋនសាងសង់ស្ពានអាកាសភ្លោះ ចំណុចប្រសព្វ «មហាវិថី សម្ដេចតេជោ ហ៊ុន សែន» និងផ្លូវជាតិលេខ២ ស្ថិតនៅព្រំប្រទល់រាជធានីភ្នំពេញ និងខេត្តកណ្តាល នាថ្ងៃទី១៧ មិថុនា។
លោក ហ៊ុន ម៉ាណែត ថ្លែងបន្តថា៖ «មកដល់ម៉ោងនេះ មិនទាន់មានការចាំបាច់។ ព្រោះអ្នកខ្លះ សូម្បីឡានរត់តាក់ស៊ីមួយចំនួនគាត់មិនអាចទៅរកអា ៥ឆ្នាំមកទេ! វាថ្លៃ។ ត្រូវពង្រឹងប្រព័ន្ធឆែកបច្ចេកទេស ព្រោះ១ឆ្នាំយើងឆៀករថយន្តម្ដង។ ទោះរថយន្តហ្នឹងក្រោម ៥ឆ្នាំ ក្រោម ១០ឆ្នាំ តែបើបច្ចេកទេសវាអត់ត្រូវ កុំឱ្យវារត់ ព្រោះអ្នកខ្លះឥឡូវជួនកាលយករថយន្តពីជំនាន់ដើម Mercedes អីឆ្នាំ៦៨ [១៩៦៨] យកមកជិះពេញហ្នឹង!»។
លោកបញ្ជាក់ថា៖ «ខ្ញុំយល់ពីការថែទាំបរិស្ថាន។ យើងមិនចង់ឱ្យយករថយន្តដែលចាស់យកមកពិបាក ខុសបច្ចេកទេសអាចគ្រោះថ្នាក់អីផ្សេងៗ។ អ៊ីចឹង ខ្ញុំថាមិនបាច់ដាក់កំណត់ឆ្នាំទេ ប៉ុន្តែពង្រឹងការត្រួតពិនិត្យបច្ចេកទេសរថយន្តឱ្យបានច្បាស់ នេះទើបត្រឹមត្រូវ ហើយយើងធ្វើបែបនេះទៅ»។
លោកនាយករដ្ឋមន្ត្រីបានលើកឡើងថា ប្រទេសមួយចំនួនបានហាមមិនឱ្យនាំចូលរថយន្តចាស់នោះទេ ដើម្បីលើកស្ទួយជីវភាព និងកម្រិតនៃឧស្សាហកម្មរថយន្តនៅក្នុងប្រទេសដែលដំឡើងរថយន្ត។ ប៉ុន្តែចំពោះកម្ពុជា លោកថា មិនចាំបាច់ហាមមិនឱ្យនាំចូលរថយន្តចាស់នោះទេ ហើយថា ក្រុមហ៊ុនថ្មីដែលមកដំឡើងរថយន្តនៅក្នុងប្រទេសកម្ពុជាក៏រាជរដ្ឋាភិបាលលើកទឹកចិត្ត ប៉ុន្តែត្រូវមានសិទ្ធិប្រកួតប្រជែងជាមួយនឹងការនាំចូលរថយន្តប្រើ «មួយទឹក»។
លោកថ្លែងថា៖ «គាត់ត្រូវធានាថា តម្លៃរបស់គាត់សមរម្យ ធ្វើបានល្អ ប្រជាជនទិញហើយកុំពិបាកពេក! យើងចង់ឱ្យបានរថយន្តល្អ តម្លៃកាន់តែធូរ ឱ្យប្រជាពលរដ្ឋយើងមានលទ្ធភាពទិញឱ្យបានច្រើន។ ប្រើប្រាស់ទៅ! កម្ពុជាមិនទាន់ឈានទៅដល់ការហាមមិនឱ្យផ្ទះមួយត្រូវតែមានឡានប៉ុន្មាន មិនឱ្យលើសប៉ុន្មានទេ។ យើងមិនមានទេ។ រដ្ឋមានតែខិតខំដើម្បីដោះស្រាយបញ្ហាគមនាគមន៍ឱ្យបានល្អជូនប្រជាពលរដ្ឋ។ បើគាត់មានលទ្ធភាព ទិញទៅ!»៕
