លោក លី ធុជ ទេសរដ្ឋមន្ត្រី អនុប្រធានទី១ អាជ្ញាធរមីន និងជាប្រធានអនុសញ្ញាអូតាវ៉ា ជួបជាមួយសម្តេចប៉ាប ហ្វ្រង់ស៊ីសនៅវិមានវ៉ាទីកង់ កាពីថ្ងៃទី២១ ខែកញ្ញាកន្លងទៅ រូបថត CMAA
សម្តេចប៉ាប ហ្វ្រង់ស៊ីស នឹងបញ្ជូនគណ:ប្រតិភូមកចូលរួមកិច្ចប្រជុំកំពូលសៀមរាប-អង្គរនៅខែវិច្ឆិកាខាងមុខនេះ និងបានកោតសរសើរកម្ពុជាលើកិច្ចការងារមនុស្សធម៌ដើម្បីលុបបំបាត់គ្រោះថ្នាក់ដោយសារគ្រាប់មីន។
ការបញ្ជាក់របស់សម្ដេចប៉ាប ហ្វ្រង់ស៊ីស អំពីការចូលរួមរបស់បុរីវ៉ាទីកង់ ធ្វើឡើងក្នុងជំនួបជាមួយសម្ដែងការគួរសមរបស់លោក លី ធុជ ទេសរដ្ឋមន្ត្រី អនុប្រធានទី១ អាជ្ញាធរមីន និងជាប្រធានអនុសញ្ញាអូតាវ៉ា ជាមួយស្ដេច ប៉ាប នៅវិមានវ៉ាទីកង់ កាពីថ្ងៃទី២១ ខែកញ្ញាកន្លងទៅ។ នេះបើតាមការបញ្ជាក់របស់អាជ្ញាធរមីន។
កម្ពុជាកំពុងរៀបចំដើម្បីធ្វើជាម្ចាស់ផ្ទះនៃកិច្ចប្រជុំកំពូលសៀមរាប-អង្គរ នៃអនុសញ្ញាអូតាវ៉ា និងធ្វើជាប្រធានរៀបចំកិច្ចប្រជុំត្រួតពិនិត្យឡើងវិញលើកទី៥ នៃអនុសញ្ញាអូតាវ៉ា នៅសប្ដាហ៍ទី៤ នៃខែវិច្ឆិកា។
ក្នុងជំនួបនោះ លោក លី ធុជ បានថ្លែងអំណរគុណដល់សម្តេចប៉ាប និងប្រទេសវ៉ាទីកង់ ក៏ដូចជារដ្ឋាភិបាល Holy See ដែលតែងតែផ្តល់ការគាំទ្រដល់ការអភិវឌ្ឍសង្គមនៅកម្ពុជា តាមរយៈអង្គការមនុស្សធម៌បែបសាសនា។
អាជ្ញាធរមីនបានបញ្ជាក់ថា៖ «សម្តេចប៉ាប ហ្វ្រង់ស៊ីស កោតសរសើរកម្ពុជាដែលចូលរួមយ៉ាងសស្រាក់សស្រាំបំផុតលើកិច្ចការងារមនុស្សធម៌ដើម្បីលុបបំបាត់គ្រោះថ្នាក់ដោយសារគ្រាប់មីននៅលើពិភពលោក និងការជួយសង្គ្រោះជនរងគ្រោះថ្នាក់ដោយសារគ្រាប់មីន ជាពិសេសការដឹកនាំកិច្ចប្រជុំអនុសញ្ញាអូតាវ៉ាដ៏មានសារសំខាន់ដែលនឹងនាំឱ្យមនុស្សជាតិមានស្មារតីចាកឆ្ងាយពីសង្គ្រាម និងឈានមកស្រលាញ់សន្តិភាព»។
អាជ្ញាធរមីនបន្តថា៖ «សម្តេច ប៉ាប បានសង្កត់ធ្ងន់លើពាក្យ យើងត្រូវប្រយុទ្ធដើម្បីសន្តិភាព យើងត្រូវប្រយុទ្ធដើម្បីជួយជនរងគ្រោះដោយសារមីន យើងទាំងអស់គ្នាត្រូវការជំរុញឱ្យមានសន្តិភាព»។
ក្នុងជំនួបបោះ លោក លី ធុជ បានលើកឡើងថា កម្ពុជា ជាប្រទេសស្រលាញ់សន្តិភាព ហើយកម្ពុជាមានមោទនភាពជាខ្លាំង ដែលទទួលបានការគាំទ្រឱ្យធ្វើជាប្រធាន និងម្ចាស់ផ្ទះរៀបចំកិច្ចប្រជុំត្រួតពិនិត្យឡើងវិញលើកទី៥ នៃអនុសញ្ញាអូតាវ៉ា។
លោកថា ការធ្វើជាម្ចាស់ផ្ទះនៃកិច្ចប្រជុំនេះ ឆ្លុះបញ្ចាំងអំពីសមត្ថភាពរបស់កម្ពុជា ក្នុងការដឹកនាំ និងរៀបចំកិច្ចប្រជុំកម្រិតសកលដ៏សំខាន់នេះ។
លោកបានថ្លែងអំណរគុណដល់បុរីវ៉ាទីកង់ ដែលផ្តល់ការគាំទ្រដល់អនុសញ្ញាអូតាវ៉ា និងបានជួយផ្សព្វផ្សាយ រំលឹកដល់មនុស្សជាតិទាំងអស់ អំពីកាតព្វកិច្ចក្នុងការការពារភពផែនដី និងការពារសន្តិភាព។
លោកក៏បានស្នើដល់បុរីវ៉ាទីកង់ បន្តគាំទ្រដល់អនុសញ្ញាអូតាវ៉ា និងបន្តអំពាវនាវ ដល់ពិភពលោកទាំងមូលឱ្យរួបរួមគ្នាលុបបំបាត់ការរងទុក្ខវេទនារបស់មនុស្ស ដែលបង្កដោយគ្រាប់មីន ដោយបញ្ឈប់ការផលិត និងការប្រើប្រាស់មីនប្រឆាំងមនុស្ស និងបង្កើនកិច្ចខិតខំប្រឹងប្រែងក្នុងការបោសសម្អាតតំបន់មានមីន និងកិច្ចសង្គ្រោះជនរងគ្រោះដោយសារមីន៕
