លោកនាយករដ្ឋមន្ត្រី ហ៊ុន ម៉ាណែត ថ្លែងថា ឥឡូវនេះប្រជាពលរដ្ឋខ្មែរមានឯកភាពជាតិ ហើយក្រុមប្រឆាំងអស់គ្រាប់បាញ់រដ្ឋាភិបាល បន្ទាប់ពីកម្ពុជាបានដកខ្លួនចេញពីតំបន់ត្រីកោណអភិវឌ្ឍន៍កម្ពុជា ឡាវ វៀតណាម (CLV-DTA) កាលពីថ្ងៃទី២០ ខែកញ្ញា។
លោកថ្លែងថា៖ «ឥឡូវប្រជាពលរដ្ឋខ្មែរទូទាំងប្រទេសមូលគ្នាហើយ ឯកភាពគ្នាហើយ។ ឥឡូវកុំឲ្យវាហ្មងសៅអារឿង DTA ហ្នឹង ទៅ [ដកទៅ] តែយើងត្រូវរួមគ្នាអភិវឌ្ឍខ្លួនឯង រួមជាមួយដៃគូផ្សេងៗ ធ្វើតាមលទ្ធភាពដែលអាចធ្វើបានទៅ ឥឡូវអស់កង្វល់។ ខ្មែររួមគ្នា ឯកភាពគ្នា អស់អារឿងតូចតាចហ្នឹងទៀត អីចឹងគឺឯកភាពគ្នា។ ដូច្នេះ អ្នកដែលចង់ចិញ្ចឹមចលនានោះនឹងអស់គ្រាប់ហើយ អស់ដាវហើយ»។
លោកលើកឡើងបែបនេះក្នុងពិធីចែកសញ្ញាប័ត្រដល់និស្សិតសាកលវិទ្យាល័យភូមិន្ទនីតិសាស្ត្រនិងវិទ្យាសាស្ត្រសេដ្ឋកិច្ចនៅព្រឹកថ្ងៃទី២៦ ខែកញ្ញានេះ។
កម្ពុជាបានជូនដំណឹងទៅភាគីឡាវ និង វៀតណាម កាលពីថ្ងៃទី២០ ខែកញ្ញា អំពីការសម្រេចដកខ្លួនពីកិច្ចសហប្រតិបត្តិការដែលមានរយៈពេល ជាង ២០ឆ្នាំនេះ ក្រោយមានមតិមិនគាំទ្រពីប្រជាពលរដ្ឋខ្លះ រួមទាំងក្រុមអ្នកប្រឆាំងដែលភាគច្រើនមានមូលដ្ឋាននៅក្រៅប្រទេស។
ទាំងលោក ហ៊ុន ម៉ាណែត និងលោក ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា និងប្រធានគណបក្សប្រជាជនកម្ពុជាដែលកាន់អំណាច បានថ្លែងថា ការដកខ្លួនពីកិច្ចសហប្រតិបត្តិការនេះគឺដើម្បីដកអាវុធពីក្រុមប្រឆាំង មិនឲ្យយកបញ្ហានេះធ្វើជាលេសដើម្បីវាយប្រហាររាជរដ្ឋាភិបាល ដោយលើកឡើងពីការបារម្ភរឿងបាត់បង់ទឹកដី។
លោក ហ៊ុន ម៉ាណែត ថ្លែងថា៖ «ឥឡូវមិនបាច់ចាញ់អារឿង DTA ឬមិន DTA នៅឬមិននៅទៀតទេ។ ឥឡូវទៅ ធ្វើម៉េចអភិវឌ្ឍខេត្តទាំង៤របស់យើង ទៅលេងខេត្តទាំង៤ ធ្វើផ្លូវបន្ថែមទៀតតាមព្រំដែន រុញឲ្យដល់កន្ទុយនាគដើម្បីយើងបានដោះមីនឲ្យអស់ ហើយបង្កើតភូមិនៅតំបន់នោះទៅ។ នេះវាសំខាន់ជាង»។
លោកបន្តទៀតថា៖ «ឥឡូវតោះ ចូលភ្ជុំបិណ្ឌហើយ ដើរលេងទាំងអស់គ្នា ហើយរួមគ្នាសប្បាយ សាមគ្គីឯកភាពជាតិរបស់យើង»៕