ពិធីចុះហត្ថលេខាលើអនុស្សរណៈនៃការយោគយល់រវាងក្រុមហ៊ុនអ៊ីមមើស៊ីវអង្គរ និងអាជ្ញាធរជាតិអប្សារា នៅថ្ងៃទី២៦ ខែកញ្ញា។ សហការី
ខេត្តសៀមរាបនិងមានផលិតផលទេសចរណ៍ឌីជីថលទំនើបមួយនៅចុងឆ្នាំ២០២៥ នោះគឺ «សារមន្ទីរ អ៊ីមមើស៊ីវអង្គរ» ដែលនឹងអាចទទួលអ្នកទស្សនាបាន ១៥០០នាក់ក្នុងមួយថ្ងៃ ដើម្បីទស្សនាប្រវត្តិសាស្ត្រ និង វប្បធម៌ខ្មែរ ជាពិសេសនៅតំបន់អង្គរ។
ក្រុមហ៊ុនអ៊ីមមើស៊ីវ អង្គរ បានចាប់ដៃគូជាមួយអាជ្ញាធរជាតិអប្សារាតាមរយៈអនុស្សរណៈនៃការយោគយល់គ្នាមួយដែលត្រូវបានចុះហត្ថលេខានៅថ្ងៃទី២៦ ខែកញ្ញានេះ ដើម្បីបង្កើតបទពិសោធន៍ផ្នែកវប្បធម៌ប្លែក ដែលធ្វើឱ្យប្រវត្តិសាស្រ្តអង្គរមានភាពរស់រវើក ដោយប្រើប្រាស់បច្ចេកវិជ្ជាទំនើប។ នេះបើតាមសេចក្ដីប្រកាសព័ត៌មានរួម។
អាជ្ញាធរជាតិអប្សរានឹងផ្តល់ការណែនាំផ្នែកវិទ្យាសាស្ត្រ ដើម្បីធានានូវភាពត្រឹមត្រូវនៃប្រវត្តិសាស្រ្ត និងបញ្ហារសើបផ្នែកវប្បធម៌ ខណៈដែល ក្រុមហ៊ុនអ៊ីមមើស៊ីវអង្គរ នឹងអភិវឌ្ឍ និងគ្រប់គ្រងសារមន្ទីរនេះ។
លោក ហង់ ពៅ អគ្គនាយកនៃអាជ្ញាធរជាតិអប្សរាមានបានថ្លែងថា៖ «ការធ្វើការជាមួយក្រុមហ៊ុនអ៊ីមមើស៊ីវអង្គរ អនុញ្ញាតឱ្យយើងធ្វើឱ្យបទពិសោធន៍សម្រាប់អ្នកទស្សនាប្រសើរឡើង និងរួមចំណែកដល់កិច្ចខិតខំប្រឹងប្រែងអភិរក្សបែបឌីជីថល ធ្វើឱ្យអង្គរជារូបតំណាងផ្នែកវប្បធម៌ពិភពលោកដ៏រឹងមាំ»។
លោក កែប៊ិន សូរស្មី នាយកប្រតិបត្តិក្រុមហ៊ុនអ៊ីមមើស៊ីវអង្គរ កិច្ចសហការនេះមានសារសំខាន់សម្រាប់ចែករំលែកប្រវត្តិសាស្រ្តអង្គរតាមរយៈបច្ចេកវិទ្យាថ្មី។ លោកថា សារមន្ទីរអ៊ីមមើស៊ីវ អង្គរ នឹងផ្តល់ជូននូវការធ្វើដំណើរឆ្លងកាត់ពេលវេលា ធ្វើឱ្យអ្នកទស្សនាយល់ដឹងកាន់តែស៊ីជម្រៅអំពីបេតិកភណ្ឌវប្បធម៌របស់កម្ពុជា ស្របពេលជាមួយគ្នានោះក៏ធានាបាននូវការអភិរក្សកេរដំណែលនៃបេតិកភណ្ឌវប្បធម៌។
ដើម្បីទទួលបានទម្រង់ឌីជីថលអំពីប្រាសាទអង្គរ ក្រុមការងារនឹងស្កែនប្រាសាទទ្រង់ទ្រាយធំដើម្បីបង្កើតរក្សាទុកនៅក្នុងបណ្ណាល័យឌីជីថល ដែលអាចធានាបាននូវកេរដំណែលរបស់ប្រាសាទសម្រាប់មនុស្សជំនាន់ក្រោយ។ ក្រុមហ៊ុនអ៊ីមមើស៊ីវអង្គរ នឹងបណ្តុះបណ្តាលដល់ក្រុមរបស់អាជ្ញាធរជាតិអប្សរាអំពីបច្ចេកវិទ្យាស្កែនថ្មីបំផុត ដែលធ្វើឱ្យមានការផ្ទេរចំណេះដឹងជាធាតុផ្សំដ៏សំខាន់នៃគម្រោងនេះ។
យោងតាមសេចក្ដីប្រកាសព័ត៌មានដែល គម្រោងត្រូវបានបង្ហាញទៅគណៈកម្មាធិការសម្របសម្រួលអន្តរជាតិសម្រាប់ការការពារ និងអភិវឌ្ឍន៍រមណីយដ្ឋានប្រវត្តិសាស្ត្រអង្គរ (ICC Angkor) កាលពីខែធ្នូ ឆ្នាំ ២០២២។
លោក សូរស្មី ថ្លែងថា៖ «យើងត្រៀមខ្លួនរួចជាស្រេចដើម្បីចាប់ផ្តើមការងារ ដោយការអភិវឌ្ឍខ្លឹមសារកំពុងដំណើរការទៅមុខយ៉ាងល្អ។ យើងមានបំណងបើកសារមន្ទីរនៅចុងឆ្នាំ២០២៥។ ខណៈពេលដែលយើងផ្តោតសំខាន់ទៅលើការធ្វើឱ្យអ៊ីមមើស៊ីវ អង្គរ ជោគជ័យ យើងតែងតែរិះរកមធ្យោបាយដើម្បីលើកកម្ពស់ការផ្តល់ជូនផ្នែកវប្បធម៌របស់សៀមរាបបន្ថែមទៀត»។
លោកនាយករដ្ឋមន្ត្រី ហ៊ុន ម៉ាណែត ធ្លាប់បានគាំទ្រគម្រោងនេះក្នុងពេលលោកជួបជាមួយតំណាងក្រុមហ៊ុននៅប្រទេសបារាំង កាលពីខែមករា កន្លងទៅ។ លោកចាត់ទុកគម្រោងនេះថាជាគម្រោងមួយល្អ ក្នុងការជួយផ្ដល់ចំណេះដឹងអំពីមរតកវប្បធម៌ និងអរិយធម៌ខ្មែរ៕
