អាជ្ញាធរប្រើបាវខ្សាច់ចំនួន៣០០បាវ ដើម្បីទប់ស្កាត់ការបាក់ច្រាំងទន្លេបន្ត នៅក្នុងស្រុកកោះសូទិន ក្នុងអំឡុងជំនន់ទឹកទន្លេមេគង្គ។ រូបថតៈ គ.ជ.គ.ម
ភ្នំពេញៈ ជំនន់ទឹកភ្លៀងបង្កផលប៉ះពាល់យ៉ាងហោចណាស់ខេត្តចំនួន៩ ក្នុងនោះខេត្តក្រចេះមានការប៉ះពាល់ពលរដ្ឋច្រើនជាងគេ រហូតដល់ទៅជាង១ម៉ឺនគ្រួសារចាប់ទាំងពីថ្ងៃទី៥ ខែកញ្ញានេះមក។
អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក សុទ្ធ គឹមកុលមុនីបានឱ្យដឹងថា ខេត្តដែលប៉ះពាល់ពីជំនន់ទឹកភ្លៀងមានចំនួន៩ដូចជា ខេត្តក្រចេះ ស្ទឹងត្រែង ព្រះសីហនុ មណ្ឌលគិរី សៀមរាប ត្បួងឃ្មុំ រតនគិរី កំពង់ចាម និងកំពង់ធំ។ ក្នុងនោះ ខេត្តក្រចេះមានការប៉ះពាល់ច្រើនជាងគេ។
លោកបញ្ជាក់ថា៖«ខេត្តទាំង៩នេះរងផលប៉ះពាល់ពីជំនន់ទឹកភ្លៀង ក៏ដូចជាជំនន់ទឹកទន្លេ ប៉ុន្តែមិនមានសភាពអីធ្ងន់ធ្ងរទេ។ ដោយឡែកខេត្តក្រចេះមានផលប៉ះពាល់ច្រើនជាងគេ។ ខេត្តខ្លះប៉ះពាល់តិចតួចទេ»។
ខេត្តក្រចេះមានការប៉ះពាល់ក្រុងស្រុកចំនួន៦ ស្មើនឹង ៣៦ឃុំ និងភូមិចំនួន ១៨៩ភូមិ ក្នុងនោះមានប្រជាពលរដ្ឋប៉ះពាល់សរុបចំនួន១២ ៩២៤គ្រួសារ ស្មើនឹង ៥១ ៧៥៦នាក់ ដែលធ្វើឱ្យពលរដ្ឋចំនួន១៣១គ្រួសារត្រូវបានជម្លៀសចេញពីផ្ទះទៅកាន់ទីទួលសុវត្ថិភាព។
បន្ថែមពីនោះក៏មានសាលារៀនចំនួន៣៧កន្លែង មណ្ឌលសុខភាពចំនួន២កន្លែង វត្តអារាមចំនួន១៦កន្លែង អណ្តូងស្នប់៣៣គ្រឿង បង្គន់អនាម័យ២៧៨ និង អគារដ្ឋបាលឃុំចំនួន៦កន្លែងផងដែរ។
លើសពីនោះ ជំនន់ទឹកភ្លៀងនេះក៏បានលិចស្រូវសន្ទូង និងពង្រោះសរុបចំនួន៧ ៩៣៤ហិកតាផងដែរ។ ក្នុងនោះ បង្កការខូចខាតចំនួន៣ ៩៩៤ហិកតា។ រីឯ ដំណាំចម្ការ និងដំណាំរួមផ្សំចំនួន៥៩៦ ហិកតា ក្នុងចំណោម៧៩៤ហិកតាត្រូវបានខូចខាត។
លោកបានបន្តថា ចំពោះជំនន់ទឹកភ្លៀងនៅខេត្តមួយចំនួនបានស្រកទៅវិញហើយ ដែលនៅសល់តែជំនន់តាមទន្លេ ដែលលិចចូលវាលតែប៉ុណ្ណោះដោយសារតែ ទឹកធ្លាក់មកពីប្រទេសឡាវ និងវៀតណាមមក។
លោកថ្លែងថា៖«ទឹកធ្លាក់មកពីលើ ធ្វើឱ្យទឹកទន្លេយើងឡើង..នៅទីវាលកម្ពុជាយើងនៅមានធាទទួលបានច្រើនតាមព្រែក។ ការឡើងនេះល្អវិញទេ ដែលវាអាចបែកវាលចូលព្រែក ទំនាបគ្រប់គ្រាន់ ដើម្បីនាំជីជាតិ សម្លាប់សត្វចង្រៃផ្សេងៗ ហើយក៏បានលាងជាតិពុលមួយចំនួនដែរ»។
ដោយឡែកក្នុងខេត្តកំពង់ចាម ការហក់ឡើងនៃទឹកទន្លេនេះបានបង្កការបាក់ច្រាំងទន្លេប្រវែង៧ ៥០៣ម៉ែត្រផងដែរនៅក្នុងស្រុក ស្ទឹងត្រង់ កំពង់សៀម កោះសូទិន កងមាស និងស្រីសន្ធរ។ កម្លាំងអាជ្ញាធរបានធ្វើអន្តរាគមន៍ ដោយច្រកខ្សាច់ក្នុងបាវចំនួន៣០០ ដើម្បីទប់ច្រាំងនៅស្រុកកោះសូទិន។
លោកទេសរដ្ឋមន្ត្រី គន់ គីម អនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ និងអាជ្ញាធរខេត្តកំពង់ចាម ក៏បានចុះត្រួតពិនិត្យស្ថានភាពទឹកជំនន់ទន្លេមេគង្គ និងសួរសុខទុក្ខពលរដ្ឋ ក្នុងស្រុកកោះសូទិនផងដែរ នាថ្ងៃ ទី២៦ ខែកញ្ញានេះ។ គណៈកម្មាធិការជាតិគ្រប់គ្រងគ្រោះមហន្តរាយគ្រប់លំដាប់ថ្នាក់ និងអាជ្ញាធរពាក់ព័ន្ធបានត្រៀមលក្ខណៈជាស្រេច ដើម្បីឆ្លើយតបទៅនឹងស្ថានជំនន់ទឹកភ្លៀងនេះ៕
