ក្មេងម្នាក់ផឹកភេសជ្ជៈផ្អែម ដែលឥឡូវហាមលក់ក្នុងបរិវេណសាលារៀន។ រូបថត ភ្នំពេញប៉ុស្ដិ៍
ភ្នំពេញ៖ លោកនាយករដ្ឋមន្ដ្រី ហ៊ុន ម៉ាណែត បានបញ្ជាក់ជាថ្មី និងប្រកាសអាសន្នចំពោះការទទួលទានភេសជ្ជៈផ្អែមរបស់កុមារតូចៗ ដែលប៉ះពាល់សុខភាពរបស់ពួកគេ ជាពិសេសពេលឈានដល់មជ្ឈិមវ័យ។
លោកបានព្រមានថា៖ «ទឹកប៉ូវកម្លាំងមិនមែនសម្រាប់ក្មេងៗ តែ [ពួកគេ] ប្រើច្រើន។ រឿងនេះគឺជារឿងមួយដែលត្រូវប្រកាសអាសន្ន ហើយវាជាបញ្ហារយៈពេលវែង។ បើឈឺជំងឺទឹកនោមផ្អែម វាក្លាយជាបន្ទុកហើយ វាមិនមែនជាទ្រព្យទេ»។
លោកនាយករដ្ឋមន្ដ្រី បានក្រើនរំឭក និងព្រមានពីហានិភ័យសុខភាពរបស់កុមារនៅក្នុងពិធីបិទសន្និបាតបូកសរុបការងារអប់រំ យុវជន និងកីឡា ឆ្នាំសិក្សា ២០២៣-២០២៤ និងទិសដៅឆ្នាំសិក្សា ២០២៤-២០២៥ ក្រោមប្រធានបទ «អភិវឌ្ឍមូលធនមនុស្សឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០» នៅថ្ងៃទី ២៦ ម្សិលមិញ។
លោកបានស្នើសុំឪពុកម្ដាយ ប្រជាពលរដ្ឋ អ្នកផ្ដល់ការអប់រំ រួមទាំងអ្នកលក់ដូរគិតគូរអំពីបញ្ហានេះ ដោយលោកបានលើកឡើងថា នៅមន្ទីរពេទ្យគន្ធបុប្ផាមានក្មេងៗកើតជំងឺទឹកផ្អែមច្រើន។
លោកបានថ្លែងថា ពេលខ្លះ វាពាក់ព័ន្ធទៅនឹងការយល់ដឹងរបស់ឪពុកម្ដាយ ដែលមិនយកចិត្ដទុកដាក់ចំពោះការទទួលទានភេសជ្ជៈផ្អែមរបស់កូននៅតូច ដែលវានឹងជះឥទ្ធិពលដល់សុខភាពរបស់ពួកគេនៅពេលធំពេញវ័យ។
លោកនាយករដ្ឋមន្ដ្រី បានថ្លែងថា៖ «ខ្ញុំបានជួបគ្រូពេទ្យស្គាល់គ្នាម្នាក់នៅសិង្ហបុរី ដោយគាត់និយាយថា លោកសង្កេតឃើញថា នៅប្រទេសកំពុងអភិវឌ្ឍ មនុស្សអាយុ ៣០ -៤០ ឆ្នាំ កើតជំងឺទឹកនោមផ្អែម។ យើងគិតថា មនុស្សអាយុប៉ុណ្ណឹងបានចេះផឹក និងកើតជំងឺទឹកនោមផ្អែម។ វាមិនមែនទេ! [ពួកគេផឹក] តាំងពីក្មេង»។
លោកស្រីវេជ្ជបណ្ឌិត អ៊ីវ ម៉ាឡែន អនុប្រធានមន្ទីរពេទ្យគន្ធបុប្ផាភ្នំពេញ ពិគ្រោះជាមួយក្រុមគ្រួសារនៅមន្ទីរពេទ្យគន្ធបុប្ផា ខេត្តសៀមរាប។ រូបថត សហការី
ក្តីបារម្ភចំពោះភេសជ្ជៈមានជាតិស្ករលើសុខភាពកុមារ
ការថ្លែងរបស់លោកនាយករដ្ឋមន្ត្រីធ្វើឡើងជាថ្មីម្ដងទៀត ស្របពេលដែលប្រទេសកម្ពុជាប្រឈមនឹងការកើនឡើងនៃការព្រួយបារម្ភផ្នែកសុខភាព ជាពិសេសក្នុងចំណោមប្រជាជនវ័យក្មេង។
នៅក្នុងខែធ្នូ ឆ្នាំ ២០២៤ ក្រសួងអប់រំ យុវជន និងកីឡា បានចាត់វិធានការដោយចេញសេចក្តីណែនាំមួយដើម្បីហាមឃាត់ការប្រើប្រាស់ ចែកចាយ តាំងបង្ហាញ និងពាណិជ្ជកម្មនៃផលិតផលភេសជ្ជៈប៉ូវកម្លាំងនៅក្នុង និងជុំវិញគ្រឹះស្ថានអប់រំសាធារណៈ និងឯកជន។
សេចក្តីណែនាំនេះដែលមានគោលបំណងទប់ស្កាត់វិបត្តិសុខភាពសាធារណៈបានអនុវត្តតាមវិធានការ របស់រដ្ឋាភិបាលក្នុងការលើកកម្ពស់សុខភាព អនាម័យ និងសុវត្ថិភាពចំណីអាហារនៅក្នុងសាលារៀន។
នៅមន្ទីរពេទ្យគន្ធបុប្ផា ការកើនឡើងនៃចំនួនកុមារដែលត្រូវបានធ្វើរោគវិនិច្ឆ័យថាមានជំងឺទឹកនោមផ្អែមបានធ្វើឱ្យមានការភ្ញាក់ផ្អើល។
ក្នុងរយៈពេល ៣ ទសវត្សរ៍កន្លងមកនេះ កុមារជិត ៧០០ នាក់ត្រូវបានធ្វើរោគវិនិច្ឆ័យថាមានជំងឺទឹកនោមផ្អែមប្រភេទទី ១ នៅទូទាំងសាខារបស់មន្ទីរពេទ្យក្នុងរាជធានីភ្នំពេញ និងខេត្តសៀមរាប។
ខណៈពេលដែលចំនួនករណីថ្មីមានស្ថិរភាព មន្ទីរពេទ្យនៅតែមានការព្រួយបារម្ភអំពីផលប៉ះពាល់នៃជម្រើសរបៀបរស់នៅលើសុខភាពកុមារ។
លោកវេជ្ជបណ្ឌិត យ៉ៃ ចន្ទនា ប្រធានមន្ទីរពេទ្យជ័យវរ្ម័នទី៧ បានឱ្យដឹងថា មូលហេតុដែលនាំឱ្យកុមារកើតជំងឺទឹកនោមផ្អែមប្រភេទ១ គឺបណ្ដាលមកពីប្រព័ន្ធការពារក្នុងខ្លួនទៅបំផ្លាញកោសិកា បែតា ដែលស្ថិតនៅក្នុងលំពែង មានតួនាទីផលិតអាំងស៊ុយលីន។
លោកបានពន្យល់ថា ជំងឺទឹកនោមផ្អែមប្រភេទ១ មិនបណ្ដាលមកពីកុមារមានប្រវត្ដិទទួលទានស្ករច្រើនមកទេ។ ប៉ុន្ដែនៅពេលកុមារមានផ្ទុកជំងឺទឹកនោមផ្អែមប្រភេទ១ ហើយចាប់ផ្ដើមការព្យាបាលដោយការចាក់អាំងស៊ុយលីន របបអាហាររបស់កុមារត្រូវមានការផ្ទៀងផ្ទាត់ឱ្យបានត្រឹមត្រូវ គឺមិនឱ្យលើសជាតិស្ករច្រើន ជាតិខ្លាញ់ច្រើន ដែលទទួលបានការណែនាំពីគ្រូពេទ្យ។
លោកវេជ្ជបណ្ឌិតបានបន្ដថា៖ «នៅពេលរករោគវិនិច្ឆ័យឃើញថា កុមារនោះមានជំងឺទឹកនោមផ្អែមប្រភេទទី ១ វិធីព្យាបាលតែមួយគត់គឺគឺអាំងស៊ុយលីននេះឯង ហើយអាំងស៊ុយលីននេះគឺជាអ័រម៉ូន បង្កើតឡើងដោយលំពែងរបស់យើង។ កូនក្មេងកើតជំងឺទឹកនោមផ្អែម ត្រូវការចាក់អាំងស៊ុយលីនមួយជីវិត»។
ឥទ្ធិពលសកលនៃភេសជ្ជៈមានជាតិស្ករ
គ្រោះថ្នាក់នៃភេសជ្ជៈមានជាតិស្ករមានឥទ្ធិពលខ្លាំងមិនត្រឹមតែនៅប្រទេសកម្ពុជាប៉ុណ្ណោះទេ ដោយការសិក្សាជាសកលបានបង្ហាញពីផលប៉ះពាល់ដ៏អាក្រក់របស់វា។
អង្គការសុខភាពពិភពលោក (WHO) រាយការណ៍ថា ភេសជ្ជៈមានជាតិស្ករ (SSBs) ត្រូវបានផ្សារភ្ជាប់ទៅនឹងជំងឺធាត់ ការពុកធ្មេញ និងបញ្ហាសុខភាពផ្សេងៗទៀត។
អង្គការសុខភាពពិភពលោកបានផ្តល់អនុសាសន៍ថា កុមារកាត់បន្ថយការទទួលទានជាតិស្ករមកតិចជាង ១០ភាគរយនៃការប្រើប្រាស់ថាមពលសរុបរបស់ពួកគេ ជាមួយនឹងអត្ថប្រយោជន៍សុខភាពបន្ថែមដែលអាចសម្រេចបានដោយកាត់បន្ថយការទទួលទានស្ករនេះឱ្យនៅខាងក្រោម ៥ភាគរយ។
វិធានការបង្ការ
អង្គការសុខភាពពិភពលោក ស្នើឱ្យផ្តល់ទឹក និងទឹកដោះគោដល់កុមារអាយុក្រោមមួយឆ្នាំ បង្កើតទម្លាប់ដុសធ្មេញជាប្រចាំ និងកំហិតការទទួលទានភេសជ្ជៈផ្អែម ដើម្បីលើកកម្ពស់ជម្រើសអាហារដែលមានសុខភាពល្អ។
អង្គការសុខភាពពិភពលោក បានណែនាំយុទ្ធសាស្ត្រជាច្រើនដើម្បីជួយកុមារជៀសវាងភេសជ្ជៈមានជាតិស្ករ និងបង្កើតទម្លាប់ដែលមានសុខភាពល្អតាំងពីតូច។
បង្កើតទម្លាប់កុមារឱ្យផឹកពីពែងជំនួសឱ្យដបអាចជួយកាត់បន្ថយការប៉ះពាល់យូរទៅនឹងភេសជ្ជៈដែលមានជាតិស្ករ ដែលអាចរួមចំណែកដល់ការពុកធ្មេញ។
លើសពីនេះ ការកំណត់ភេសជ្ជៈមានជាតិស្ករអាចជួយរក្សាចំណង់អាហាររបស់កុមារសម្រាប់អាហារដែលមានជីវជាតិកាន់តែច្រើន លើកកម្ពស់សុខភាព និងសុខុមាលភាពទូទៅ។
ជាផ្នែកមួយនៃកិច្ចខិតខំប្រឹងប្រែង ដើម្បីការពារសុខភាពសាធារណៈ សាររបស់លោកនាយករដ្ឋមន្ត្រី ហ៊ុន ម៉ាណែត បានគូសបញ្ជាក់ពីសារៈសំខាន់នៃកិច្ចសហការរវាងមាតាបិតា អ្នកអប់រំ និងភ្នាក់ងាររដ្ឋាភិបាលក្នុងការទប់ស្កាត់ការកើនឡើងនៃបញ្ហាសុខភាពទាក់ទងនឹងការទទួលទានភេសជ្ជៈមានជាតិស្ករ៕
