កម្មវិធីឧបត្ថម្ភសាច់ប្រាក់របស់រដ្ឋាភិបាលដល់ប្រជាពលរដ្ឋក្រីក្រ ដោយប្រើប្រាស់ថ្នាលឌីជីថល គឺបានផ្តល់សាច់ប្រាក់ជូនគ្រួសារក្រីក្រប្រមាណ ២,៧ លាននាក់ក្នុងអំឡុងពេលផ្ទុះជំងឺកូវីដ ១៩ ដែលនេះគឺជាសក្ខីភាពមួយបង្ហាញថា ព្រះរាជាណាចក្រកម្ពុជាជួយសម្រាលបន្ទុកពលរដ្ឋងាយរងគ្រោះបានដោយជោគជ័យ អំឡុងពេលមានវិបត្តិ។
របៀបវារៈគាំពារសង្គមក្នុងការឧបត្ថម្ភសាច់ប្រាក់ដោយផ្ទាល់ដល់គ្រួសារក្រីក្រ ត្រូវបានធ្វើឡើងដោយជោគជ័យក្នុងនោះទឹកប្រាក់ប្រមាណ ៣២២ លានដុល្លារត្រូវបានផ្តល់ជូនគ្រួសារក្រីក្រចំនួន ៦៩៣ ០០០ គ្រួសារក្នុងរយៈពេល ១ ឆ្នាំ ដែលជាមធ្យមត្រូវចំណាយប្រមាណ ៣០ លានដុល្លារក្នុង ១ ខែ។
របៀបវារៈចម្បង
«គោលដៅរបស់យើងគឺកាត់បន្ថយបន្ទុករបស់គ្រួសារក្រីក្រ និងងាយរងគ្រោះ ប៉ុន្តែមិនមែនដើម្បីជំនួសប្រាក់ ចំណូលរបស់ពួកគេដែលបានបាត់បង់ក្នុងពេលមានជំងឺរាតត្បាតនេះទេ។ កញ្ចប់ថវិការគឺត្រូវរៀបចំឡើងសម្រាប់មនុស្ស ៣ ក្រុម គឺអ្នកនៅទីប្រជុំជនក្នុងរាជធានីភ្នំពេញ អ្នកនៅទីប្រជុំជនក្រៅរាជធានីភ្នំពេញ និងសម្រាប់ប្រជាពលរដ្ឋដែលរស់នៅតំបន់ជនបទ»។
ឯកឧត្តមបណ្ឌិត ចន ណារិទ្ធ អនុរដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ និងជាអគ្គលេខាធិការក្រុមប្រឹក្សាជាតិគាំពារសង្គមបានឱ្យកាសែតភ្នំពេញប៉ុស្តិ៍ដឹងថា៖ «កម្មវិធីនេះត្រូវបានចាត់ទុកថាជាកម្មវិធីជំនួយសង្គមពិសេស ពីព្រោះវានៅក្រៅកម្មវិធីឧបត្ថម្ភទៀងទាត់ផ្សេងទៀតក្នុងគោលបំណងចម្បងគឺដាក់ចេញនូវវិធានការសម្រាលបន្ទុកអំឡុងពេលផ្ទុះជំងឺកូវីដ»។
រដ្ឋាភិបាលបានដាក់ចេញនូវកម្មវិធីឧបត្ថម្ភសាច់ប្រាក់ សម្រាប់គ្រួសារក្រីក្រ និងងាយរងគ្រោះក្នុងអំឡុងពេលផ្ទុះជំងឺកូវីដ ១៩ នេះកាលពីខែមិថុនា ឆ្នាំ ២០២០ ដើម្បីទប់ស្កាត់ផលប៉ះពាល់សេដ្ឋកិច្ចសង្គម ដោយសារជំងឺរាតត្បាតមួយនេះនៅក្នុងចំណោមអ្នកដែលមានបណ្ណសមធម៌ (IDPoor)។
ប្រហែល ២ ភាគ ៣ នៃគ្រួសារដែលកាន់បណ្ណសមធម៌ ប្រាក់ចំណូលរបស់ពួកគេបានធ្លាក់ចុះប្រមាណ ៣១ ភាគរយ ដោយសារវីរុសរាតត្បាតកូរ៉ូណា។
ឯកឧត្តម ណារិទ្ធ ថ្លែងថា គ្រួសារដែលមានមានបណ្ណសមធម៌ (ក្រ១ និងក្រ២) និងគ្រួសារដែលរងផលប៉ះពាល់ ដោយជំងឺកូវីដ ១៩ រួមទាំងប្រជាពលរដ្ឋដែលបាត់បង់ការងារ ឬប្រាក់ចំណូលដែលអាចធ្លាក់ចូលក្នុងភាពក្រីក្រនោះពួកគេនឹងមានសិទ្ធិទទួលបានជំនួយនៅក្រោមកម្មវិធីនេះ។
កម្មវិធីផ្តល់បណ្ណសមធម៌ ឬប្រព័ន្ធកំណត់អត្តសញ្ញាណគ្រួសារក្រីក្រត្រូវបានបង្កើតឡើងក្នុងឆ្នាំ ២០០៦ ដោយក្រសួងផែនការ គឺជាកិច្ចខិតខំប្រឹងប្រែងជាបន្តបន្ទាប់ ដើម្បីកាត់បន្ថយភាពក្រីក្រ និងគាំទ្រដល់ការអភិវឌ្ឍសេដ្ឋកិច្ចសង្គមនៅទូទាំងប្រទេស។
វិធីសាស្ត្រអនុវត្តន៍
ឯកឧត្តម ណារិទ្ធ មានប្រសាសន៍ថាការប្រើប្រាស់រចនាសម្ព័ន្ធគាំពារសង្គមរបស់រដ្ឋាភិបាលដែលមានស្រាប់ ដើម្បីជួយដល់ក្រុមងាយរងគ្រោះតាមរយៈការប្រើបច្ចេកវិទ្យានៅលើថេប្ល៊ិត (Tablet) សម្រាប់ការចុះឈ្មោះ និងផ្ទៀងផ្ទាត់ និងប្រព័ន្ធទូទាត់ប្រាក់តាមទូរស័ព្ទដៃ និងភ្នាក់ងារវីង ដើម្បីបញ្ជូនសាច់ប្រាក់ឆាប់រហ័ស ដែលបានធ្វើឱ្យកម្មវិធីនេះអាចអនុវត្តទៅបានប្រកបដោយប្រសិទ្ធភាព។
បុគ្គលិក និងមន្ត្រីពាក់ព័ន្ធដែលចូលរួមក្នុងគម្រោងនេះបានខិតខំប្រឹងប្រែងយ៉ាងខ្លាំងក្នុងការកំណត់អត្តសញ្ញាណគ្រួសារក្រីក្រដែលត្រូវការជំនួយមិនត្រឹមតែពិនិត្យមើលលើប្រាក់ចំណូលរបស់ពួកគេប៉ុណ្ណោះទេ ប៉ុន្តែក៏ពិនិត្យមើលលក្ខខណ្ឌផ្ទះសំបែង ទ្រព្យសម្បត្តិ គ្រួសារ អចលនទ្រព្យ និងប្រភពចំណូលផងដែរ។
នៅពេលដែលគ្រួសារក្រីក្រ និងងាយរងគ្រោះត្រូវបានមន្ត្រី ភូមិ ឃុំ កំណត់អត្តសញ្ញាណ និងពិនិត្យរួចរាល់នោះសាច់ប្រាក់នឹងត្រូវបានផ្ទេរដោយផ្ទាល់ពីរតនាគារជាតិ ទៅឱ្យអ្នកដែលមានសិទ្ធិទទួលសាច់ប្រាក់តាមរយៈភ្នាក់ងារវីង។
ឯកឧត្តម ណារិទ្ធ ថ្លែងថា៖ «យើងបានដាក់ឱ្យអនុវត្តកម្មវិធីកំណត់អត្តសញ្ញាណពលរដ្ឋក្រីក្រអស់រយៈពេល ១៣ ឆ្នាំមកហើយ និងកម្មវិធីជំនួយសង្គមផ្សេងទៀត ដូចជាកម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុក្រោម ២ ឆ្នាំ។
«នៅពេលមានតម្រូវការជំនួយថ្មីក្នុងអំឡុងពេលនៃការរីករាលដាលនៃជំងឺកូវីដ ១៩ យើងបានកែសម្រូលកម្មវិធីដែលមានស្រាប់ ដើម្បីធ្វើឱ្យវាកាន់តែទូលំទូលាយ និងដាក់ចេញដើម្បីអនុវត្ត»។
«នេះគឺជាអ្វីដែលប្រព័ន្ធគាំពារសង្គមមានន័យសម្រាប់ប្រទេសជាតិ ដែលមានរចនាសម្ព័ន្ធត្រឹមត្រូវរួចរាល់ ទោះបីយើងស្ថិតក្នុងដំណាក់កាលក្មេងខ្ចីនៅឡើយក្តី»។
ឯកឧត្តម ណារិទ្ធ បន្ថែមថា៖ «វាគឺជាគម្រោងមិនធ្លាប់មានពីមុនដែលត្រូវបានអនុវត្តនៅទូទាំងប្រទេស ដោយមានការសហការពីក្រសួងជាច្រើន រួមទាំងក្រសួង សង្គមកិច្ច អតីតយុទ្ធជន និងយុវនីតិសម្បទា។
វាគឺជាកិច្ចខិតខំប្រឹងប្រែងដ៏ខ្លាំងក្លាដោយយើងមានពេល ៣ សប្តាហ៍ ដើម្បីកំណត់អត្តសញ្ញាណអ្នកត្រូវទទួលជំនួយសម្រាប់កម្មវិធីនេះ។ ការវាយតម្លៃឯករាជ្យបានបង្ហាញថា ការអនុវត្តកម្មវិធីនេះទទួលបានពិន្ទុពេញចិត្តចំនួន ៩,៨ លើ ១០។
កម្មវិធីផ្តល់ជំនួយជាសាច់ប្រាក់នេះបានជួយបង្កើនកម្រិតនៃការចំណាយរបស់ទទួលម្នាក់ៗរហូតដល់ ៨៧ ភាគរយ បើមិនដូច្នេះទេការចំណាយរបស់ពួកគេនឹងធ្លាក់ចុះក្នុងអំឡុងពេលបិទខ្ទប់។
ឯកឧត្តម ណារិទ្ធ មានប្រសាសន៍ថា៖ «សាច់ប្រាក់ភាគច្រើនគឺត្រូវបានចំណាយទៅលើស្បៀងអាហារ ការថែទាំសុខភាព និងសម្លៀកបំពាក់ ហើយអ្នកទទួលខ្លះថែមទាំងអាចសន្សំប្រាក់បានខ្លះថែមទៀតផង»។
ប្រមាណ ៨៨ ភាគរយនៃគ្រួសារដែលត្រូវទទួលជំនួយជាសាច់ប្រាក់ គឺអាចទទួលការឧបត្ថម្ភសាច់ប្រាក់លើកដំបូងរបស់ពួកគេនៅក្នុងខែដដែល បន្ទាប់ពីការត្រួតពិនិត្យរួចរាល់។
វិធីសាស្ត្រថ្មីនៃការផ្តល់ជំនួយសង្គមជាសាច់ប្រាក់នេះគឺកំពុងបង្ហាញនូវភាពជោគជ័យ ពោលគឺដោះស្រាយនូវការរាំងស្ទះក្នុងអំឡុងពេលផ្តល់ជំនួយ ការកំណត់អត្តសញ្ញាណអ្នកត្រូវទទួលពិតប្រាកដ និងល្បឿននៃការផ្ទេរសាច់ប្រាក់តាមប្រព័ន្ធឌីជីថល៕