មន្ទីរពិសោធន៍ជាតិលើកដំបូងបង្អស់នៅក្នុងព្រះរាជាណាចក្រកម្ពុជាសម្រាប់វិស័យសំណង់ ដែលត្រូវបានបង្កើតឡើងរួមគ្នាក្រោមកិច្ចសហការរវាងក្រុមហ៊ុនឯកជន និងរដ្ឋ ពោលគឺរវាងគណៈវិស្វករកម្ពុជា (គ.វិ.ក) និងក្រុមហ៊ុន CAST Laboratories Pte Ltd របស់ប្រទេសសិង្ហបុរីបាននាំនូវការណែនាំនូវស្តង់ដាថ្មី និង ការអនុវត្តប្រកបដោយគុណភាពខ្ពស់បំផុតនៅក្នុងឧស្សាហកម្មសំណង់។
មន្ទីរពិសោធន៍គណៈវិស្វករកម្ពុជា ដែលទើបនឹងបង្កើតថ្មី ហើយដែលត្រូវបានសម្ពោធនៅក្នុងខែកក្កដាបានត្រៀមរួចរាល់ក្នុងការធ្វើតេស្តលើផលិតផល ការផ្ទៀងផ្ទាត់ ការត្រួតពិនិត្យ និងការផ្តល់វិញ្ញាបនបត្របញ្ជាក់សម្រាប់វិស័យសំណង់អគារ។
ក្នុងនាមជាផ្នែកមួយនៃមន្ទីរពិសោធន៍ជាតិ ធ្វើតេស្ត និងត្រួតពិនិត្យរបស់ប្រទេសកម្ពុជា មន្ទីរពិសោធន៍គណៈវិស្វករកម្ពុជា និងជួយធានាឱ្យបាននូវគុណភាព និងសុចរិតភាពនៃគម្រោងសាងសង់នៅកម្ពុជា តាមរយៈការផ្តល់សេវាកម្មធ្វើតេស្ត និងត្រួតពិនិត្យគម្រោងសាងសង់ ប្រកបដោយការជឿទុកចិត្តខ្ពស់បំផុត។ ការបង្កើតមន្ទីរពិសោធន៍គណៈវិស្វករកម្ពុជា គឺពិតជាមានសារៈសំខាន់ណាស់ ដើម្បីឆ្ពោះទៅរកការសម្រេចឱ្យបាននូវឧស្សាហកម្មសំណង់កាន់តែមានសុវត្ថិភាពជាងមុននៅក្នុងប្រទេសកម្ពុជា។
ខាសថ៍ លេបប័ររេថឹរី ត្រូវបានគេស្គាល់តាមរយៈសេវាកម្ម និងសមត្ថភាពដែលត្រូវបានទទួលស្គាល់គុណភាពក្នុងការបំពេញតាមស្តង់ដានៃការធ្វើតេស្ត និងការត្រួតពិនិត្យគុណភាពដ៏តឹងរ៉ឹងរបស់ប្រទេសសិង្ហបុរី។ ជាមួយនឹងការបង្កើតមន្ទីរពិសោធន៍គណៈវិស្វករកម្ពុជា ស្ថិតក្រោមការចង្អុលបង្ហាញរបស់គណៈវិស្វករកម្ពុជា យើងមានគោលបំណងពង្រឹងការសាងសង់ និងការអភិវឌ្ឍហេដ្ឋារចនាសម្ព័ន្ធនៅក្នុងប្រទេសកម្ពុជា តាមរយៈដំណើរការធ្វើតេស្ត និងការត្រួតពិនិត្យប្រកបដោយទំនុកចិត្តខ្ពស់។
លោក Gary Ng Kin Choy ប្រធានក្រុមហ៊ុនខាសថ៍ លេបប័ររេថឹរី ខេមបូឌា បានប្រាប់ឱ្យភ្នំពេញប៉ុស្តិ៍ដឹងថា៖ «ទាំងនេះនឹងជួយបង្កើនការជឿជាក់ និងទំនុកចិត្តដល់វិនិយោគិនក្នុងស្រុក និងបរទេសនៅកម្ពុជា ដោយសម្រេចបាននូវសេដ្ឋកិច្ចប្រកបដោយនិរន្តរភាព ព្រមទាំងធ្វើឱ្យគុណភាពជីវិតរបស់ប្រជាជនកម្ពុជាមានភាពប្រសើរឡើង»។ លោកក៏បានបន្ថែមថា៖ «ភាពជាដៃគូរវាងប្រទេសនៅក្នុងតំបន់អាស៊ាន បានអនុញ្ញាតឱ្យភាគីទាំង ២ ចែករំលែកជំនាញឯកទេសក្នុងការបង្កើតមន្ទីរពិសោធន៍ដែលមាន ការទទួលស្គាល់ដែលនឹងជួយអ្នកសាងសង់ក្នុងការអនុវត្តស្តង់ដាកម្រិតខ្ពស់ និងលើកកម្ពស់គុណភាពនៅក្នុងវិស័យសំណង់»។
«ការចាប់ដៃគូជាមួយគណៈវិស្វករកម្ពុជា ដើម្បីបង្កើតមន្ទីរពិសោធន៍ គណៈវិស្វករកម្ពុជា អនុញ្ញាតឱ្យយើងរួមបញ្ចូលសមត្ថភាពរបស់យើង ដើម្បីជួយសម្រួលដល់ការធ្វើតេស្តលើគុណភាព និងត្រួតពិនិត្យស្តង់ដាអគារ និងសំណង់នៅក្នុងប្រទេសកម្ពុជា។ គណៈវិស្វករកម្ពុជា និងក្រុមហ៊ុន ខាសថ៍ លេបប័ររេថឹរី មានបេសកកម្មរួមមួយ ពោលគឺកសាងបរិស្ថានមួយប្រកបដោយសុវត្ថិភាព និងមាននិរន្តរភាព សម្រាប់វិស័យសំណង់នៅក្នុងប្រទេសកម្ពុជា»។
«ប្រទេសកម្ពុជា គឺជាប្រទេសមួយក្នុងចំណោមប្រទេសដែលមានកំណើនសេដ្ឋកិច្ចលឿនបំផុតនៅក្នុងតំបន់អាស៊ីភាគអាគ្នេយ៍ ជាមួយនឹងរាជរដ្ឋាភិបាល ប្រកបដោយការប្តេជ្ញាខ្ពស់ចំពោះវិបុលភាពរបស់ប្រទេសជាតិ»។
លោក Ng មានប្រសាសន៍ថា៖ «ដោយទទួលស្គាល់ថា សេវាកម្មរបស់យើងនឹងមានគុណតម្លៃលើការគាំទ្រ និងលើកកម្ពស់គុណភាព និងសុវត្ថិភាពក្នុងវិស័យសំណង់ ខាសថ៍ លេបប័ររេថឹរី បានបង្កើតក្រុមហ៊ុនបុត្រសម្ព័ន្ធមួយនៅក្នុងប្រទេសកម្ពុជា ដើម្បីបង្កើតមន្ទីរពិសោធន៍គណៈវិស្វករកម្ពុជានេះឡើង ដែលជាមន្ទីរពិសោធន៍ ផ្តល់សេវាធ្វើតេស្ត ត្រួតពិនិត្យ និងផ្តល់វិញ្ញាបនបត្របញ្ជាក់ពីសុវត្ថិភាព ដែលឈានមុខគេនៅក្នុងប្រទេសកម្ពុជា»។ ត្រូវបានបង្កើតឡើងក្នុងឆ្នាំ ១៩៨១ នៅប្រទេសសិង្ហបុរី ខាសថ៍ លេបប័ររេថឹរី គឺជាមជ្ឈមណ្ឌលធ្វើតេស្ត និងត្រួតពិនិត្យគុណភាពឯករាជ្យឈានមុខគេមួយ ដែលផ្តល់ជូននូវការធ្វើតេស្តនៅមន្ទីរពិសោធន៍ និងនៅការដ្ឋានសាងសង់ សេវាកម្មត្រួតពិនិត្យ និងចេញវិញ្ញាបនបត្រដល់វិស័យអគារ និងសំណង់ ប្រេង និង ឧស្ម័ន និងកន្លែងផលិតកប៉ាល់។
មន្ទីរពិសោធន៍បានផ្តល់នូវសេវាកម្មធ្វើតេស្ត និងត្រួតពិនិត្យជាង ២៥០ សេវាកម្មនៅប្រទេសសិង្ហបុរី និងបណ្តាប្រទេសដទៃទៀតក្នុងតំបន់អាស៊ាន ហើយបានប្រតិបត្តិការនៅព្រះរាជាណាចក្រកម្ពុជាអស់រយៈពេល ៦ ឆ្នាំមកហើយ។ នៅក្នុងប្រទេសកម្ពុជា ក្រុមហ៊ុននឹងចាប់ផ្តើមផ្តល់សេវាកម្មជាច្រើន ជាដំណាក់កាលដោយចាប់ផ្តើមជាមួយនឹងការធ្វើតេស្តលើសម្ភារសំណង់ស៊ីវិល រួមទាំងមានការធ្វើតេស្តបេតុងដែលមិនបង្កការខូចខាត (NDT) ការធ្វើតេស្តលើដែកថែបដែលមិនបង្កការខូចខាត និងការធ្វើតេស្តដី ក៏ដូចជាធ្វើតេស្តបេតុងលាយស្រេច និងវិធីសាស្ត្រនៃការលាយជាដើម។
ទន្ទឹមនឹងនេះដែរ លោក Lim Eng Heng នាយកប្រតិបត្តិក្រុមហ៊ុន CAST Group បានលើកឡើងថា ប្រវត្តិសាស្ត្របានបង្ហាញថា ការវាយតម្លៃគុណភាពបែបនេះ គឺនឹងបង្កើនប្រាក់ចំណេញលើការវិនិយោគ។
លោកបន្តថា៖ «ប្រទេសកម្ពុជាកំពុងឆ្លងកាត់ដំណាក់កាលនៃវិស័យសំណង់ដូចប្រទេសសិង្ហបុរីបានឆ្លងកាត់ដែរ។ នៅពេលដែលសង្គមកាន់តែរីកចម្រើន សំណង់អគារខ្ពស់ៗត្រូវបានសាងសង់ ប្រជាជនតែងមានការព្រួយបារម្ភអំពីសុវត្ថិភាព»។
«ដូច្នេះជាមួយនឹងការធ្វើតេស្តប្រកបដោយភាពតឹងរ៉ឹងជាងមុន សាធារណៈជន ភ្នាក់ងាររាជរដ្ឋាភិបាល និងភាគីពាក់ព័ន្ធផ្សេងទៀតត្រូវបានធានាជាមួយនឹងសំណង់ប្រកប ដោយគុណភាព ដែលនេះធ្វើឱ្យតម្លៃនៃអចលនទ្រព្យកាន់តែមានភាពប្រសើរឡើង»។
លោកបន្ថែមថា៖ «ប្រសិនបើអាគារមានស្នាមប្រេះ ហើយអគារមិនរឹងមាំ នោះនឹងគ្មាននរណាម្នាក់ចង់ទិញ អចលនទ្រព្យរបស់អ្នកទេ ហើយតម្លៃនឹងធ្លាក់ចុះ។ មន្ទីរពិសោធន៍ធ្វើតេស្តនេះ នឹងជួយជំរុញឱ្យទីផ្សារអចលនទ្រព្យ និងសំណង់របស់កម្ពុជាមានតម្លៃខ្ពស់ជាងមុន»។
ក្រសួងសេដ្ឋកិច្ច និងហិរញ្ញវត្ថុ និងក្រសួងការងារ និងបណ្តុះបណ្តាលវិជ្ជាជីវៈបានផ្តល់សម្បទានរយៈពេល ៣០ ឆ្នាំដល់មន្ទីរពិសោធន៍គណៈវិស្វករកម្ពុជា ដើម្បីបម្រើសេវាកម្មរបស់ខ្លួននៅក្នុងព្រះរាជាណាចក្រកម្ពុជា។
លោក Lim ថ្លែងថាការកើនឡើងនូវទំនុកចិត្តទាំងនេះនឹងជួយជំរុញវិស័យសំណង់នៅកម្ពុជាទៅមុខបន្ថែមទៀត ដែលជាកត្តាជំរុញដ៏សំខាន់ដល់កំណើនសេដ្ឋកិច្ចរបស់កម្ពុជា និងជួយដល់ការអភិវឌ្ឍសេដ្ឋកិច្ចរបស់ខ្លួន។
«អគារ និងហេដ្ឋារចនាសម្ព័ន្ធប្រកបដោយនិរន្តរភាព គឺមានភាពចាំបាច់ណាស់សម្រាប់ការអភិវឌ្ឍសេដ្ឋកិច្ច និងនគរូបនីយកម្មរបស់ប្រទេសកម្ពុជា។ ជាមួយនឹងការរីកលូតលាស់យ៉ាងឆាប់រហ័ស នៃវិស័យសំណង់នៅក្នុងប្រទេសកម្ពុជា ការអនុលោមតាមបទដ្ឋានស្តង់ដារអគារគឺមិនត្រូវមើលរំលងឡើយ»។
«មន្ទីរពិសោធន៍គណៈវិស្វករកម្ពុជា នឹងធានាថារាល់គម្រោងសាងសង់ទាំងអស់នៅក្នុងប្រទេសកម្ពុជា គឺបំពេញតាមស្តង់ដារសុវត្ថិភាពខ្ពស់បំផុត តាមរយៈការតម្រូវឱ្យធ្វើតេស្ត និងត្រួតពិនិត្យផ្សេងៗ»។
លោក Lim មានប្រសាសន៍ថា៖ «ការធ្វើបែបនេះនឹងជួយបង្កើនទំនុកចិត្តដល់ភាគីពាក់ព័ន្ធទាំងអស់ និងជួយលើកកម្ពស់ការរីកចម្រើនឥតឈប់ឈរនៅក្នុងទីផ្សារសំណង់នៅកម្ពុជា»៕