ភ្នំពេញៈ គម្រោងអភិវឌ្ឍន៍បុរីអង្គរលែនម៉ាក្ស (Angkor Land Mark) ដំណាក់កាលទី១ ដែលមានផ្ទៃដីជាង ២០០ ហិកតា ចម្ងាយ ១៥ គីឡូម៉ែត្រពីក្នុងក្រុងសៀមរាប គ្រោងនឹងចាប់ផ្តើមសាងសង់ជាផ្លូវការនៅចុងឆ្នាំ ២០២១ នេះ បន្ទាប់ពីក្រុមហ៊ុនទទួលបានអនុក្រឹត្យ និង ស.ជ.ណ ពីរដ្ឋាភិបាលកាលពីពេលថ្មីៗនេះ។ នេះបើតាមលោក ទូស សាភឿន អគ្គនាយកក្រុមហ៊ុន Angkor Land Mark។
Angkor Land Mark មានទីតាំងនៅឃុំខ្នារសណ្តាយ ស្រុកបន្ទាយស្រី ខេត្តសៀមរាប។ គម្រោងនេះនឹងចែកចេញជាដំណាក់កាល ដោយដំណាក់កាលទី ១ នឹងសាងសង់លើផ្ទៃដីទំហំ ២១៧ ហិកតា រួមមាន លំនៅឋានបែបលម្ហែ ភោជនីយដ្ឋាន កន្លែងកម្សាន្តកម្រិតផ្កាយ ៥ និងផ្សារបណ្តែតទឹក (សហការជាមួយវិនិយោគិនមកពីប្រទេសថៃ)។ សម្រាប់ផ្ទៃដីគម្រោងទាំងមូល មានជាង ៥០០ ហិកតា។
លោក ទូស សាភឿន បានប្រាប់ភ្នំពេញប៉ុស្តិ៍កាលពីថ្ងៃទី ៨ ខែកញ្ញាថា បន្ទាប់ពីទទួលបានការយល់ព្រមពីរដ្ឋាភិបាលលោកនឹងចាប់ផ្តើមអភិវឌ្ឍហេដ្ឋារចនាសម្ព័ន្ធ និងសាងសង់តាមប្លង់មេរបស់ក្រុមហ៊ុន ដោយការសាងសង់នឹងធ្វើឡើងជា ៥ ជំហាន ផ្សេងគ្នារួមមាន លំនៅឋានប្រណីត អាហារដ្ឋាន សួនកម្សាន្ត និងផ្សារនៅលើទឹកជាដើម។ លោកបន្តថា Angkor Land Mark នឹងក្លាយជាគម្រោងអភិវឌ្ឍន៍លេចធ្លោមួយក្នុងខេត្តសៀមរាប ក៏ដូចជាប្រទេសកម្ពុជាទាំងមូល។
លោកថ្លែងថា៖ «បច្ចុប្បន្នយើងកំពុងកសាងហេដ្ឋារចនាសម្ព័ន្ធ និងផ្ទះគំរូជាបណ្តើរៗ ដោយយើងនឹងចាប់ផ្តើមសាងសង់លំនៅឋានប្រណីតនៅក្នុងគម្រោងនេះជាផ្លូវការនៅអំឡុងចុងឆ្នាំ ២០២១ នេះ។ ការអភិវឌ្ឍគម្រោងដំណាក់កាលទី១ នេះនឹងត្រូវប្រើពេលសាងសង់ប្រហែល ២ ឆ្នាំ»។
លោកប្រាប់ទៀតថា ក្រៅពីផ្តល់នូវកន្លែងរស់នៅដ៏ស្រស់បំព្រងប្រកបដោយភាពទាក់ទាញ Angkor Land Mark ក៏នឹងជួយបង្កើតការងារសម្រាប់ប្រជាជនក្នុងតំបន់ និងសេដ្ឋកិច្ចជាតិបានមួយកម្រិតដែរ។
លោកអះអាងថា៖ «មិនត្រឹមតែជួយដល់ប្រជាជនក្នុងតំបន់ប៉ុណ្ណោះទេ ប៉ុន្តែ Angkor Land Mark ក៏អាចបង្កើនភាពទាក់ទាញភ្ញៀវទេសចរបរទេសឱ្យមកកម្សាន្តនៅកម្ពុជាកាន់តែច្រើនផងដែរ»។
ដើម្បីលើកកម្ពស់សក្តានុពលវិស័យទេសចរណ៍ខេត្តសៀមរាប រដ្ឋាភិបាលកាលពីចុងឆ្នាំ ២០២០ បានបញ្ចេញថវិកាជាតិប្រមាណ ១៥០ លានដុល្លារ សម្រាប់កែលម្អផ្លូវចំនួន ៣៨ ខ្សែក្នុងក្រុងសៀមរាប។ តាមផែនការគម្រោងនេះនឹងត្រូវបញ្ចប់នៅចុងឆ្នាំ ២០២១។
អគ្គនាយកក្រុមហ៊ុនអចលនទ្រព្យ KFA លោក នួន រិទ្ធី បានប្រាប់ ភ្នំពេញ ប៉ុស្តិ៍ថា ការអភិវឌ្ឍហេដ្ឋារចនាសម្ព័ន្ធផ្លូវថ្នល់ គម្រោងអភិវឌ្ឍន៍ព្រលានយន្តហោះថ្មី និងការប្រកាសពីគម្រោងវិនិយោគក្នុងវិស័យអចលនទ្រព្យ គឺជាសញ្ញាវិជ្ជមានសម្រាប់កំណើនសេដ្ឋកិច្ច និងវិស័យអចលនទ្រព្យនៅខេត្តសៀមរាប។
លោកបន្តថា ពេលមានផ្លូវល្អ ការធ្វើដំណើរពីកន្លែង ១ ទៅកន្លែង ១ កាន់តែងាយ ដូច្នេះតម្រូវការអចលនទ្រព្យក៏មានច្រើនដែរ។
លោកប្រាប់ថា៖ «អចលនទ្រព្យនៅខេត្តសៀមរាបនឹងមានសម្ទុះឡើងវិញឆាប់ៗ ពិសេសបន្ទាប់ពីវិស័យទេសចរណ៍មានចលនាឡើងវិញ»។
បច្ចុប្បន្ននេះក្រសួងទេសចរណ៍ និងវិស័យឯកជនកំពុងសហការគ្នាយ៉ាងសកម្មក្នុងការរៀបចំផែនការ ក៏ដូចជាដាក់ចេញវិធានការថ្មីៗជាច្រើនដើម្បីត្រៀមបើកទទួលភ្ញៀវទេសចរអន្តរជាតិចាក់វ៉ាក់សាំងក្នុងពេលឆាប់ៗ។
ការស្រាវជ្រាវរបស់ក្រុមហ៊ុនអចលនទ្រព្យ ឃី រៀលអ៊ីស្ទេត ឱ្យដឹងថា នៅដើមឆ្នាំ ២០២១ ដីក្នុងក្រុងសៀមរាបមានតម្លៃ ១ ៥២០ ដុល្លារ ក្នុង ១ ម៉ែត្រការ៉េ ធ្លាក់ចុះ ៥,០ ភាគរយធៀបនឹងដើមឆ្នាំ ២០២០៕ LA