ក្រុងឡុងដ៍៖ លោក Gareth Southgate បានទទួលស្គាល់ថា ក្រុមតោកំណាចអង់គ្លេសអាចមិនមានការតវ៉ាអ្វីឡើយចំពោះការមានប្រតិកម្មទាំងកំហឹងពីអ្នកគាំទ្រ ដែលបានហ៊ោចំអក (សម្ដែងការមិនពេញចិត្ត) ដល់ក្រុមរបស់លោក បន្ទាប់ពីលេងត្រឹមស្មើដោយគ្មានគ្រាប់បាល់ជាមួយក្រុមគូប្រជែងស្លាប់រស់ស្កុតឡេនក្នុងព្រឹត្តិការណ៍ Euro 2020។
ក្រុមរបស់លោក Southgate ត្រូវបានអ្នកគាំទ្រស្រែកដាក់ដោយការមិនពេញចិត្តនៅពេលដែលសំឡេងកញ្ចែចុងក្រោយបន្លឺឡើងក្នុងកីឡដ្ឋាន Wembley កាលពីថ្ងៃសុក្រ ដោយសារការលេងទល់នឹងក្រុមស្កុតឡេននោះ មិនសូវបានល្អ ដោយមានការស៊ុតចំគោលដៅតែម្ដងប៉ុណ្ណោះ។
៥ ថ្ងៃក្រោយពីការចាប់ផ្ដើមយុទ្ធនាការក្នុងពូល D របស់ខ្លួនជាមួយនឹងជ័យជម្នះប្រផិតប្រផើយ ១-០ លើក្រុមក្រូអាស៊ី ជាថ្មីម្ដងទៀត ក្រុមតោកំណាច មិនអាចធ្វើឱ្យមានការចាប់អារម្មណ៍នៅតំបន់ប្រយុទ្ធរបស់ខ្លួននោះឡើយ។
ក្រុមអង់គ្លេសនៅតែស្ថិតលើផ្លូវនៃការបានឆ្លងទៅវគ្គ ១៦ ក្រុមចុងក្រោយ មុននឹងទៅធ្វើការប្រកួតចុងក្រោយប្រចាំពូលរបស់ខ្លួនទល់ក្រុមលេខ ១ សា.ឆែក នាថ្ងៃអង្គារនេះ។
ប៉ុន្តែពួកគេត្រូវតែធ្វើឱ្យបានល្អប្រសើរជាងនេះ បើចង់ឈ្នះជើងឯកពីព្រឹត្តិការណ៍ដ៏ធំនេះ ហើយអ្នកចាត់ការក្រុមអង់គ្លេស លោក Southgate បានថ្លែងថា លោករំពឹងនឹងមានការតបតយ៉ាងរហ័ស ដែលទទួលបានពីអារម្មណ៍ក្នុងការប្រកួតជាមួយក្រុមស្កុតឡេននេះ។
លោក Southgate បានប្រាប់ថា៖ «នេះ គឺការប្រកួតប្រជែងមួយ ហើយរឿងសំខាន់អ្នកមិនឈ្នះ តែមិនចាញ់។ ពិតមែនវាមានអារម្មណ៍តឹងតែង នៅ ១៥ នាទីចុងក្រោយ ក្នុងហ្គេមមួយ ដែលអ្នកគាំទ្រចង់បានយ៉ាងខ្លាំងឱ្យអ្នកតម្រង់ឆ្ពោះទៅមុខ ហើយកុំខ្វល់ពីអ្វីទាំងអស់ ព្រោះនោះ គឺស្កុតឡេន ដូច្នេះមានអារម្មណ៍ដូចស្ថិតក្នុងឱកាសដ៏ពិសេសមួយ»។
គ្រូបង្វឹកវ័យ ៥០ ឆ្នាំ បានបន្តថា៖ «តែយើងនៅតែត្រូវចូលឱ្យដល់បរិបទនោះ ដែលថា ១ ពិន្ទុ គឺនៅតែជាជំហានដ៏សំខាន់ ក្នុងការឆ្ពោះទៅរកការបានឆ្លងផុតពីវគ្គក្នុងពូល ហើយចុងក្រោយ ការបានសិទ្ធិទៅជុំបន្តឯណោះទេ ដែលជាគោលដៅចម្បងរបស់ពួកយើង»។
លោក Southgate ទទួលអារម្មណ៍ដឹងថា មានការមិនពេញចិត្តពីអ្នកគាំទ្រ នៅពេលដែលគាត់ប្ដូរកីឡាករដ៏សំខាន់ Phil Foden របស់ក្រុម Manchester City នៅដើមវគ្គទី២ ក៏ដូចជាដាក់កីឡាករ Marcus Rashford ជំនួសខ្សែប្រយុទ្ធធ្លាក់ទម្រង់ Harry Kane ផងដែរ។ លើសពីនេះទៀត លោកក៏ដឹងដែរ សម្ពាធនឹងកាន់តែកើនឡើងលើក្រុមអង់គ្លេស ប្រសិនបើរកមិនឃើញចង្វាក់នៃការលេងដ៏ល្អប្រសើរទល់នឹងក្រុមសា.ឆែកទេនោះ។
លោក Southgate បានបន្ថែមទៀតថា៖ «នេះ គឺតែងតែជាបញ្ហា ដែលខ្ញុំដឹងថា យើងនឹងត្រូវតែធ្វើការដោះស្រាយ ហើយនោះនឹងកា្លយជាបទពិសោធមួយ សម្រាប់កីឡាករទាំងអស់ប្រឈមជាមួយ។ ខ្ញុំបាននិយាយពីមុនរួចហើយ មិនមែនព្រោះតែអ្នកលេងក្នុងផ្ទះខ្លួនឯង ហើយមានន័យថា អ្នកឈ្នះរួចហើយនោះទេ។ អ្នកត្រូវតែឈ្នះ»។
លោក Southgate ប្រាប់ទៀតថា៖ «កាលពីថ្ងៃអាទិត្យ យើងលេងបានល្អ ហើយបានលទ្ធផល ដែលសមនឹងទទួលបាន។ តែលើកនេះ យើងលេងអត់ល្អ ដូច្នេះ យើងត្រូវទទួលយកលទ្ធផលនេះ។ ខ្ញុំទទួលយកលទ្ធផលនោះ ក្នុងនាមជាអ្នកចាត់ការក្រុម។ យើងត្រូវរៀនសូត្រពីបទពិសោធនេះ ហើយយើងនឹងយកទៅកែលម្អទល់នឹងក្រុមឆែក»៕ AFP/VN