.jpg)
Pereira (ឆ្វេង) របស់ព័រទុយហ្គាល់ លោតប្រជែងយកបាល់ជាមួយ Sane របស់អាល្លឺម៉ង់ អំឡុងការប្រកួត នៅ Euro 2020 កាលពីថ្ងៃសៅរ៍។ AFP
ក្រុងប៉ារីស៖ ក្រុមជម្រើសជាតិអាល្លឺម៉ង់ ចាប់មានដង្ហើមដកវិញហើយ សម្រាប់យុទ្ធនាការនៅ Euro 2020 របស់ខ្លួន បន្ទាប់ពីបានវាយបកយកឈ្នះ ៤-២ លើក្រុមម្ចាស់ជើងឯកចាស់ព័រទុយហ្គាល់ អំឡុងការប្រកួតនាក្រុងមុយនិច កាលពីថ្ងៃសៅរ៍ ទោះបីជាតារាឆ្នើម Cristiano Ronaldo កំពុងកៀកនឹងការធ្វើបានកំណត់ត្រាក្នុងនាមជាអ្នកស៊ុតគ្រាប់បាល់ជម្រើសជាតិបានច្រើនជាងគេក៏ដោយ ខណៈក្រុមជើងឯកពិភពលោកបារាំង សំណាងល្អ ដែលបាន ១ ពិន្ទុពីហុងគ្រី។
ក្រុមឥន្ទ្រីដែកដឹងថា បរាជ័យដោយសារព័រទុយហ្គាល់ក្នុងការប្រកួតនៅឯកីឡដ្ឋាន Allianz Arena នឹងនាំឱ្យពួកគេនៅលើមាត់ជ្រោះនៃការធ្លាក់ចេញពីពូល F បន្ទាប់ពីធ្លាប់មានប្រវត្តិក្នុងការឆ្លងមិនផុតវគ្គសន្សំពិន្ទុតាមពូលហ្នឹងម្ដងហើយកាលពី World Cup 2018។
ក្រុមការពារជើងឯកព័រទុយហ្គាល់ ត្រូវបានឡើងទៅវគ្គ ១៦ ក្រុមចុងក្រោយ ជាមួយនឹងជ័យជម្នះ ហើយក្ដីសង្ឃឹមផ្ដើមមានកាន់តែខ្ពស់នៅពេលមានឱកាសនាំមុខនៅនាទីទី១៥ ពីការស៊ុតបាល់ស្រួលៗរបស់កីឡាករ Ronaldo ក្រោយ Diogo Jota បញ្ជូនឱ្យ។
វាជាកំណត់ត្រារបស់កីឡាករវ័យ ៣៦ ឆ្នាំ ដែលរកគ្រាប់បាល់ ១០២ គ្រាប់ ក្នុងយុទ្ធនាការនៃការប្រកួតប្រជែងជើងឯកអឺរ៉ុបជុំចុងក្រោយនេះ ហើយក៏ជាគ្រាប់ទី ១០៧ ពីការចូលលេងលើកទី១៧៧ ឱ្យក្រុមជម្រើសជាតិរបស់រូបគេផងដែរ។ ១ គ្រាប់នោះ នាំឱ្យខ្សែប្រយុទ្ធរបស់ក្រុម Juventus រូបនេះ នៅខ្វះតែ ២ គ្រាប់ទៀតប៉ុណ្ណោះ នឹងស្មើកំណត់ត្រារបស់អតីតកីឡាករ Ali Daei ដែលស៊ុតបាន ១០៩ គ្រាប់ ឱ្យក្រុមអ៊ីរ៉ង់។
តែក្រុមអាល្លឺម៉ង់ ក្នុងនាមជាម្ចាស់ផ្ទះ ចាប់ផ្ដើមមានស្ថានការណ៍ប្រសើរឡើងវិញ មុនចប់វគ្គទី១ ដោយសារខ្សែការពាររបស់ព័រទុយហ្គាល់ គឺ Ruben Dias និង Raphael Guerreiro ស្កាត់បាល់ប្លាតចូលទីខ្លួនឯងម្នាក់ ១ គ្រាប់។
ចូលដល់វគ្គទី២ ប្រមាណជា ៦ នាទី ខ្សែបម្រើ Robin Gosens បញ្ជូនកាត់ចូលឱ្យ Kai Havertz ស៊ុតបន្ថែមការនាំមុខ ៣-១ ហើយបន្ទាប់មកនៅនាទីទី៦០ ក៏តែតបញ្ចូលទីគ្រាប់ទី៤ ឱ្យអាល្លឺម៉ង់ដោយខ្លួនឯង មុននឹង Jota កាត់បន្ថយការនាំមុខឱ្យក្រុមព័រទុយហ្គាល់មកត្រឹម ៤-២ នៅនាទីទី៦៧ ដែលវាជាលទ្ធផលផ្លូវការតែម្ដង។
បរាជ័យនេះ កំពុងធ្វើឱ្យក្រុម «The Navigators» (ក្រុមអ្នករុករក) ប្រឈមនឹងហានិភ័យក្នុងការមិនបានឆ្លងទៅជុំបន្ត រីឯក្រុមឥន្រ្ទីដែក ឥឡូវនេះ ហាក់ត្រៀមខ្លួនរួចជាស្រេចសម្រាប់ការប្រកួតក្នុងវគ្គចាញ់ធ្លាក់។
«យើងត្រូវបានអនុញ្ញាតឱ្យទទួលនូវអារម្មណ៍រីករាយតិចតួច»។ នេះជាសម្ដីខ្លីៗខ្សែបម្រើប្រយុទ្ធ Thomas Mueller របស់ក្រុមអាល្លឺម៉ង់។
១ គូទៀត ក្នុងពូល D នេះដែរ ក្រុមមាន់គកបារាំង ដែលមុនព្រឹត្តិការណ៍ចាប់ផ្ដើម ត្រូវបានចាត់ទុកជាក្រុមមានសិទ្ធិខ្ពស់ ក្នុងការឈ្នះពាន បែរជាលេងស្មើជាមួយក្រុមមិនសូវខ្លាំងហុងគ្រី ១-១ ពីការប្រកួត ដែលធ្វើឡើង នាក្រុងប៊ុយដាប៉ែស។
នៅចំពោះមុខអ្នកគាំទ្រជិត ៥៦ ០០០ នាក់ ក្នុងកីឡដ្ឋាន Puskas Arena ដែលជាទីកន្លែងគ្មានការកំណត់ចំនួនអ្នកចូលទស្សនាតែ ១ គត់ សម្រាប់ព្រឹត្តិការណ៍ Euro 2020 កីឡាករ Attila Fiola ជួយឱ្យក្រុមម្ចាស់ផ្ទះនាំមុខដ៏គួរឱ្យភ្ញាក់ផ្អើល ក្នុងម៉ោងបន្ថែមមានរបួសនៃវគ្គទី១។
ប៉ុន្តែខ្សែប្រយុទ្ធ Antoine Griezmann ដែលជាម្ចាស់ជយលាភីស្បែកជើងមាស កាលពី Euro 2016 បានជួយឱ្យក្រុមបារាំងតាមស្មើ ១-១ នៅនាទីទី៦៦ ហើយលទ្ធផលនេះ បានធ្វើឱ្យក្រុមមាន់គក គេចផុតពីបរាជ័យក្នុងយុទ្ធនាការនេះជាលើកដំបូងគិតតាំងពីឆ្នាំ ២០១៩ មក។
ក្រោយការប្រកួតបញ្ចប់ទៅ លោក Didier Deschamps គ្រូបង្វឹករបស់បារាំងបានថ្លែងថា៖ «ពិន្ទុនេះ មិនជាអ្វី ដែលយើងរំពឹងចង់បានពីការប្រកួតនេះនោះឡើយ តែយើងនឹងទទួលយកវា តាមស្ថានភាពជាក់ស្ដែង»។
ក្រុមបារាំងឈរលេខ ១ ក្នុងពូល ដោយមាន ៤ ពិន្ទុ ពោល គឺនាំមុខអាល្លឺម៉ង់ និងព័រទុយហ្គាល់ ១ ពិន្ទុដូចគ្នា។ ចំណែកឯហុងគ្រីនៅបាតពូល ជាមួយនឹង ១ ពិន្ទុ៕ AFP/VN
