ក្រុងមុយនិច៖ គ្រូបង្វឹករបស់ក្រុមជម្រើសជាតិអាល្លឺម៉ង់លោក Joachim Loew បាននិយាយក្នុងបំណងចង់កាត់បន្ថយអារម្មណ៍ដែលកំពុងរីករាយរបស់អ្នកគាំទ្រនៅក្នុងព្រឹត្តិការណ៍ Euro 2020 បន្ទាប់ពីជ័យជម្នះដ៏រំភើប ៤-២ លើក្រុមព័រទុយហ្គាល់ បានជួយផ្ដល់ឱកាសដ៏ធំឱ្យក្រុមរបស់គាត់់ក្នុងការបានឆ្លងទៅវគ្គចាញ់ធ្លាក់។
ក្រុមឥន្ទ្រីដែកអាល្លឺម៉ង់បានត្រឡប់មកប្រសើរឡើងវិញយ៉ាងឆាប់រហ័ស បន្ទាប់ពីចាញ់ក្នុងការប្រកួតបើកឆាកក្នុងពូល F ក្រោមថ្វីជើងក្រុមជើងឯកពិភពលោកបារាំង ដោយការយកឈ្នះយ៉ាងអស្ចារ្យលើក្រុមជើងឯកចាស់នៅតំបន់អឺរ៉ុប កាលពីថ្ងៃសៅរ៍ ជាមួយនឹងភាពលេចធ្លោរបស់ខ្សែបម្រើប្រយុទ្ធ Kai Havertz និង Robin Gosens។
លទ្ធផលពីក្រុងមុយនិចនេះ បានធ្វើឱ្យពូល ដែលត្រូវបានចាត់ទុកថា ជាពូលមរណៈកាន់តែបើកទូលាយឡើង តែអាល្លឺម៉ង់ ដើម្បីធានាថា នឹងបានឡើងទៅវគ្គ ១៦ ក្រុមចុងក្រោយយ៉ាងពិតប្រាកដ ចាំបាច់ត្រូវតែឈ្នះហុងគ្រី ដែលបង្កើតឱ្យមានការភ្ញាក់ផ្អើលរួចហើយ ដោយការលេងស្មើ ១-១ ជាមួយក្រុមបារាំង។
«ហ្គេមបន្ទាប់ ទំនងជានឹងតឹងតែងជាងនេះទៀត ព្រោះក្រុមហុងគ្រី លេងការពាររហូតដល់ទៅ ៨ ឬ ៩ នាក់»។ នេះជាការលើកឡើងក្នុងន័យព្រមានរបស់គ្រូបង្វឹកក្រុមអាល្លឺម៉ង់ លោក Loew។
កាលពីយប់ថ្ងៃសៅរ៍ ដងវិថី នៅកណ្ដាលទីក្រុងមុយនិច ណែនណាប់តាន់តាប់ដោយអ្នកគាំទ្រដ៏រីករាយសប្បាយចិត្ត ដែលមកធ្វើពិធីឆ្លងចំពោះជ័យជម្នះនោះ បន្ទាប់ពីក្រុមបានបង្ហាញឱ្យឃើញនូវទម្រង់លេងដ៏ល្អបំផុត ដែលអាចជាលើកដំបូង គិតតាំងពីពួកគេធ្វើបែបហ្នឹង ពេលឈ្នះពាន World Cup 2014 នៅប្រេស៊ីល។
តែអ្នកចាត់ការ លោក Loew វ័យ ៦១ ឆ្នាំ ដែលនេះជាការធ្វើតួនាទីចុងក្រោយរបស់លោក បានព្យាយាមនិយាយសម្រាលនូវការរំពឹងទាំងនោះ។
លោក Loew បានលើកបន្ថែមថា៖ «គ្មានអ្វីពិសេសកើតឡើងនោះទេ។ យើងគ្រាន់តែឈ្នះការប្រកួតមួយប៉ុណ្ណោះ តែឥឡូវនេះ កើតមាននូវបញ្ហាប្រឈមបន្ថែមទៀត ដែលនឹងកា្លយដូចជាការតេស្តសាកល្បងសម្រាប់ពួកយើង»។
ការលើកឡើងបែបនេះពីលោក Loew ដោយសារក្រុមអាល្លឺម៉ង់ធ្លាប់ទទួលបានបទពិសោធជូរចត់ កាលពីនៅ World Cup 2018 ដែលរៀបចំប្រទេសរុស្ស៊ី ដោយពេលនោះ ក្រុមរបស់លោកធ្លាក់ត្រឹមវគ្គសន្សំពិន្ទុនេះ ក្នុងនាមជាក្រុមបាតពូល។
ក្នុងព្រឹត្តិការណ៍ នាពេលនោះ ប្រកួតទី១ ក្រុមអាល្លឺម៉ង់បានចាញ់ក្រុមម៉ិកស៊ិក ១-០ ហើយបន្ទាប់មកក្នុងប្រកួតទី២ យកឈ្នះស៊ុយអែត ២-១ តែហ្គេមទី៣ បែរជារងបរាជ័យទាំងមិនគួរឱ្យជឿ ដោយសារក្រុមទៅពីអាស៊ីកូរ៉េខាងត្បូង ២-០ ទៅវិញ៕ AFP/VN