ភ្នំពេញ៖ លោកនាយករដ្ឋមន្រ្តី ហ៊ុន សែន បានប្រតិកម្ម និងចាត់ទុកការសម្រេចលើកពេលការប្រកួតដ៏ចម្រូងសម្រាស រវាង ម៉ឺន មេឃា និង ឃីម បូរ៉ា នៅលើសង្វៀន CNC ថា ជារឿងខុស ដែលបានបង្ហាញពីភាពកម្សោយរបស់សហព័ន្ធកីឡាប្រដាល់គុនខ្មែរ ដោយនៅតែទុកឱកាសឱ្យមន្រ្តីបច្ចេកទេសខិលខូចរបស់ខ្លួនមួយចំនួន ប្រព្រឹត្តនៅទង្វើខុស ទៅនឹងលក្ខខណ្ឌនៃការប្រកួតបែបនេះ។
ជាមួយភាពអសកម្ម និងការអនុវត្តផ្ទុយពីបញ្ហា និងច្បាប់នៃការប្រកួត ដែលបានកំណត់ដោយសហព័ន្ធកីឡាប្រដាល់គុនខ្មែរ ខ្លួនឯងនេះ លោកនាយករដ្ឋមន្រ្តី បានលើកឡើងថា តើយើងត្រូវពង្រឹងអាជ្ញាកណ្តាលកីឡាប្រដាល់ ឬត្រូវបង្កើតក្បាច់គុនថ្មី ដោយកំណត់លក្ខខណ្ឌប្រកួតថ្មី?។
ជុំវិញនឹងភាពចម្រូងចម្រាសនៃការលើកពេលប្រកួតរវាង ម៉ឺន មេឃា និង ឃីម បូរ៉ា កាលពីថ្ងៃសៅរ៍កន្លងមកនេះ លោកនាយករដ្ឋមន្រ្តី ហ៊ុន សែន បានសរសេរបង្ហោះនៅលើផេចហ្វេសប៊ុករបស់លោក កាលពីយប់ថ្ងៃអាទិត្យថា៖ «ដោយអត់ទ្រាំមិនបាន ខ្ញុំសូមចេញមកនិយាយក្នុងនាមជាពលរដ្ឋខ្មែរម្នាក់ ដែលស្រឡាញ់វិស័យកីឡា។ តើយើងត្រូវពង្រឹងអាជ្ញាកណ្តាលកីឡាប្រដាល់ ឬត្រូវបង្កើតក្បាច់គុនថ្មី ដោយកំណត់លក្ខខណ្ឌប្រកួតថ្មី? វាយខុសក្បួនហើយ មិនព្រមប្រកាសលទ្ធផល និងលើកពេល ទៅប្រកួតនៅពេលក្រោយ»។
ប្រមុខដឹកនាំប្រទេសរូបនេះ បានបន្ថែមថា៖ «តើឱ្យកីឡាប្រដាល់យើងឈានទៅមុខម្តេចបាន បើសហព័ន្ធកីឡាប្រដាល់យើង ទុកឱកាសឱ្យអាជ្ញាកណ្តាលធ្វើបែបនេះ? តើមានក្បួនមកពីណា វាយខុសក្បួនខ្នាតហើយ សម្រេចលើកពេលទៅប្រកួតពេលក្រោយ សូម្បីតែបាល់ទាត់ បើទាត់ខុស ត្រូវពិន័យកាតលឿង ឬកាតក្រហម ដោយដេញចេញ ឬពិន័យបាល់ ១១ ម៉ែត្រភ្លាមៗ ដោយមិនទុកពេលឱ្យតវ៉ានោះទេ»។
លោកនាយករដ្ឋមន្រ្តី ហ៊ុន សែន បានបញ្ជាក់តាមរយៈសាសព្ទនោះ ជាចុងក្រោយថា៖ «ខ្ញុំមិនបន្ទោសកីឡាករទេ ព្រោះពួកគាត់ស្តាប់តាមការកាត់ក្តីរបស់អាជ្ញាកណ្តាល។ អ្វីដែលខ្ញុំសុំ គឺអាជ្ញាកណ្តាល ត្រូវតែមានយុត្តិធម៌ក្នុងខ្លួន»។
គួររំឭកថា សម្រាប់ការប្រកួត នៅវគ្គផ្តាច់ព្រ័ត្រ ដណ្តើមខ្សែក្រវាត់គោលជល់ អមដោយទឹកប្រាក់ចំនួន ៥ ០០០ ដុល្លារ នៅលើសង្វៀន CNC កាលពីថ្ងៃសៅរ៍ កន្លងមកនេះ កីឡាករម៉ឺន មេឃា ដែលទំនងចាញ់ប្រៀបពិន្ទុ ឃីម បូរ៉ា ទៅហើយនោះ ចាប់បោក ឃីម បូរ៉ា ដូចការប្រកួតកីឡាកាស បណ្តាលឱ្យ ឃីម បូរ៉ា សន្លប់ធំ នៅក្នុងទឹកទី៣។
ទង្វើរបស់ ម៉ឺន មេឃា ត្រូវបានគេមើលឃើញច្បាស់ថា បានប្រព្រឹត្តខុស និងល្មើសទៅនឹងបទបញ្ជា និងច្បាប់នៃការប្រកួតរបស់សហព័ន្ធកីឡាប្រដាល់គុនខ្មែរ ដែលត្រូវតែកំណត់ឱ្យចាញ់ ដោយស្វ័យប្រវត្តិ និងផ្តល់ជ័យជម្នះទៅឱ្យកីឡាកររងគ្រោះ ឃីម បូរ៉ា។ ប៉ុន្តែផ្ទុយទៅវិញ គណៈកម្មការគ្រប់គ្រងការប្រកួតនេះ របស់សហព័ន្ធ បែរជាសម្រេចមិនប្រកាសលទ្ធផល ហើយលើកពេលការប្រកួតនេះ ទៅធ្វើឡើងវិញ នៅ ២ សប្តាហ៍ក្រោយទៀត ទៅវិញ។
ការសម្រេចនេះ បានធ្វើឱ្យមានការរិះគន់ និងប្រតិកម្មយ៉ាងខ្លាំងពីមហាជន និងមជ្ឈដ្ឋានទូទៅ នៅក្នុងប្រទេសកម្ពុជា ចំណែកលោក ហេង ប៊ុនឃីម ជាគ្រូធំក្រុមជម្រើសជាតិប្រដាល់គុនខ្មែរ និងជាឪពុកបង្កើតរបស់ ឃីម បូរ៉ា ក៏បានសម្តែងការមិនពេញចិត្តទៅនឹងទង្វើនេះផងដែរ។
លោកបានប្រាប់ថា៖ «វាគ្មានសំខាន់លើលុយរង្វាន់ ឬខ្សែក្រវាត់នោះទេ ប៉ុន្តែអ្វីដែលខ្ញុំព្រួយបារម្ភនោះ គឺខ្ញុំខ្លាចកូនមានគ្រោះថ្នាក់ ក្លាយជាពិការ ឬបាក់កស្លាប់ទៅវិញទេ ព្រោះទង្វើនេះ មិនមែនចិត្តជាអ្នកកីឡាករទេ»។
ការចាប់បោកដូចកីឡាកាសរបស់ ម៉ឺន មេឃា បណ្តាលឱ្យ ឃីម បូរ៉ា សន្លប់ធំនេះ វាជាករណីថ្មី ដែលមិនធ្លាប់កើតមាន នៅលើសង្វៀនប្រដាល់គុនខ្មែរ កន្លងមកនោះទេ ប៉ុន្តែភាពចម្រូងចម្រាស ដែលកើតចេញពីការកាត់សេចក្តី បែបគ្មានមូលដ្ឋានច្បាស់លាស់របស់មន្រ្តីគណៈកម្មការសហព័ន្ធកីឡាប្រដាល់គុនខ្មែរ វាតែងតែកើតមានឡើងជាបន្តបន្ទាប់។
បើទោះបីជាថ្នាក់ដឹកសហព័ន្ធកីឡាប្រដាល់គុនខ្មែរ ធ្លាប់បានបញ្ជាក់អះអាងម្តងហើយម្តងទៀត ទៅលើការលុបបំបាត់ភាពអសកម្ម និងភាពមិនប្រក្រតី នៅក្នុងចង្កោមមន្រ្តីខិលខូចរបស់ខ្លួនមួយចំនួនក្តី ប៉ុន្តែការដាក់ទណ្ឌកម្មទៅលើមន្រ្តីជាអាជ្ញាកណ្តាលចៅក្រម ដែលប្រព្រឹត្តខុស ពេលខ្លះ ត្រូវបានគេមើលឃើញថា ធ្វើឱ្យតែបានៗ យកតែរួចខ្លួន និងដើម្បីគេចឱ្យផុតពីការរិះគន់មួយគ្រាៗប៉ុណ្ណោះ ដ្បិតអីភាពមិនប្រក្រតី នៅតែបន្តកើតមានឡើង គ្រាន់តែមានចំនួនថយចុះជាងពេលកន្លងមក។
យ៉ាងណាមិញ ចំពោះភាពចម្រូងចម្រាសលើការប្រកួតរវាង ម៉ឺន មេឃា និង ឃីម បូរ៉ា នេះ លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ ក៏បានប្រតិកម្ម និងមិនគាំទ្រទៅលើការប្រព្រឹត្តខុសរបស់កីឡាករ ម៉ឺន មេឃា ផងដែរ ដោយលោកបានចាត់ចែងឱ្យគណៈកម្មការបច្ចេលទេស ប្រជុំវាយតម្លៃឡើងវិញ ដើម្បីរកឱ្យឃើញនៃបទល្មើស និងកំហុសថា ជាចេតនា ឬអចេតនា។
លោក តែម ម៉ឺន បានប្រាប់ ភ្នំពេញ ប៉ុស្តិ៍ថា៖ «ក្នុងនាមថ្នាក់ដឹកនាំសហព័ន្ធ ខ្ញុំមិនគាំទ្រកីឡាករធ្វើខុសនោះទេ។ មួយវិញទៀតការងារនេះ គឺមានក្រុមបច្ចេកទេស មិនមែនប្រធានសហព័ន្ធ ទៅវិនិច្ឆ័យផ្ទាល់នោះឡើយ ប៉ុន្តែនៅពេលកើតមានរឿងដូច្នេះ យើងត្រូវរួមគ្នាពិនិត្យ និងប្រជុំសម្រេចជាគោលការណ៍ ទៅតាមច្បាប់ ហើយក្នុងនោះក៏មានការស្តាប់នូវសំណូមពររបស់ខាងទូរទស្សន៍ និងស្ពនស័រ ដើម្បីយកមកពីចារណាដែរថា តើគេព្រមទទួលយកការប្រគល់ខ្សែក្រវាត់ឱ្យកីឡាករ ដោយគ្មានការប្រកួតទៀត ឬយ៉ាងណា? ឬគេព្រមព្រៀងគ្នា ដើម្បីរកពេលប្រកួតឡើងវិញ? អ៊ីចឹងយើងត្រូវឆ្លងកាត់ការប្រជុំវាយតម្លៃឡើងវិញ»។
យ៉ាងណាក៏ដោយ នៅក្រោយការប្រជុំវាយតម្លៃឡើងវិញ ទៅលើភាពចម្រូងចម្រាសនៃការប្រកួតរវាង ឃីម បូរ៉ា និង ម៉ឺន មេឃា ក្រោមការរិះគន់ស្ទើរមួយចំហៀងប្រទេសនេះ ពិសេសដោយមានការចូលរួមរិះគន់ ដើម្បីស្ថាបនារបស់ព្រះមុខដឹកនាំប្រទេស លោកនាយករដ្ឋមន្រ្តី ហ៊ុន សែន នោះ សហព័ន្ធកីឡាប្រដាល់គុនខ្មែរ រួមជាមួយស្ថានីយទូរទស្សន៍ CNC បានសម្រេច មិនលើកពេលប្រកួតផ្តាច់ព្រ័ត្រនេះទេ ដោយបានសម្រេចប្រគល់ជយលាភីឱ្យទៅ ឃីម បូរ៉ា តែម្តង ហើយពិធីប្រគល់ខ្សែក្រវាត់ និងប្រាក់រង្វាន់ ទើបតែត្រូវបានធ្វើឡើង កាលពីព្រឹកថ្ងៃចន្ទនេះ នៅស្ថានីយទូរទស្សន៍ CNC ផ្ទាល់តែម្តង។
តែទោះបីជាយ៉ាងណា គេនៅមិនទាន់ប្រាកដថា ភាពអសកម្ម និងភាពមិនប្រក្រតី នៅក្នុងវិស័យកីឡាប្រដាល់គុនខ្មែរនេះ នឹងត្រូវបញ្ចប់ត្រឹមពេលនេះ តាមរយៈការកែទម្រង់ដ៏ពិតប្រាកដ ទៅតាមការចង្អុលបង្ហាញរបស់លោកនាយករដ្ឋមន្រ្តី ហ៊ុន សែន ឬក៏ស្ងប់ស្ងាត់បានតែមួយរយៈ រួចក៏ចាប់ផ្ទុះឡើងវិញជាថ្មី នៅពេលខាងមុខ ដូចគ្រាកន្លងមកនោះទេ៕