ភ្នំពេញ៖ ក្រុមប្រតិភូកីឡាកម្ពុជាបានបញ្ចប់បេសកកម្មរបស់ខ្លួននៅក្នុងការចូលរួមប្រកួតកីឡាអូឡាំពិក ទីក្រុងតូក្យូ ឆ្នាំ ២០២០ នៅប្រទេសជប៉ុន ជាផ្លូវការហើយ ហើយនាយបេសកកម្មលោក វ៉ាត់ ចំរើន បានធ្វើការវាយតម្លៃជារួមថា កម្ពុជាយើងទទួលបានជោគជ័យយ៉ាងត្រចះត្រចង់នៅក្នុងដំណាក់កាលកូវីដ ១៩ ប៉ុន្តែយើងនៅតែខិតខំជម្នះទៅចូលរួម ដែលវាប្រសើរជាងប្រទេសមួយចំនួន គឺដោយសារតែការភ័យខ្លាចនឹងជំងឺកូវីដមិនបានទៅចូលរួមកីឡាអូឡាំពិក ដើម្បីបង្ហាញពីកាតព្វកិច្ច និងសាមគ្គីភាពជាមួយប្រទេសផ្សេងៗទៀត នៅលើពិភពលោក ជាពិសេសម្ចាស់ផ្ទះជប៉ុន ដែលជាមិត្តល្អរបស់កម្ពុជា។
លោក វ៉ាត់ ចំរើន បានប្រាប់ ភ្នំពេញ ប៉ុស្តិ៍ថា៖ «ជាលទ្ធផលបច្ចេកទេស យើងបានដឹងហើយ ដោយកីឡាករ កីឡាការិនីរបស់យើងបានប្រឹងប្រែង និងធ្វើបានសមរម្យទៅតាមសមត្ថភាព ដែលគាត់មានតាមរយៈការហ្វឹកហាត់នៅក្នុងស្រុក អ៊ីចឹងជាការវាយតម្លៃ គឺពួកគាត់ទទួលបានអ្វីដែលថ្មី បានបង្កើតនូវចិត្តសាស្រ្តកីឡារបស់គាត់ និងជំរុញទឹកចិត្តគាត់បានច្រើនបន្ថែមទៀត ដើម្បីឱ្យគាត់ខិតខំបន្ថែមទៀត ក្នុងការឆ្ពោះទៅស៊ីហ្គេម ដែលជាគោលដៅរបស់យើង»។
តាមការប្រកួតកីឡាអូឡាំពិកលើកនេះ កីឡាការិនីហែលទឹក ឃឺន ប៊ុនពេជ្រមរកត និងកីឡាករ ហែម ប៉ុច សុទ្ធតែបានបំបែកថិរវេលាចាស់របស់ខ្លួនឯង នៅក្នុងការប្រកួតហែលសេរី ៥០ ម៉ែត្រ ដូចគ្នា ដោយក្នុងនោះ ប៊ុនពេជ្រមរកត ធ្វើបាន ២៩:៤២ វិនាទី ល្អជាងឯតទគ្គកម្មចាស់ ដែលនាងធ្លាប់ធ្វើបាន ២៩:៩៩ វិនាទី ចំណែកកីឡាករ ហែម ប៉ុច ធ្វើបានក្នុងថិរវេលា ២៤:៩១ វិនាទី គឺបានបំបែកសិទ្ធផលចាស់ ២៤:៩២ វិនាទី ដូចគ្នា។ ប៉ុន្តែកីឡាករអត្តពលិកម្ម ប៉ែន សុគង់ ធ្វើបានក្នុងថិរវេលា ១១.០២ វិនាទី ក្នុងការរត់ចម្ងាយ ១០០ ម៉ែត្រ គឺមានការធ្លាក់ចុះ ជាងឯតទគ្គកម្មចាស់របស់ខ្លួន ដែលធ្វើបានត្រឹម ១០.៨៧ វិនាទី។
យ៉ាងណាក៏ដោយ លោក វ៉ាត់ ចំរើន បានបន្តថា៖ «បើគិតទៅលើយុទ្ធសាស្រ្ត សម្រាប់យើង គឺកីឡាអូឡាំពិកនេះ វាមិនទាន់ជាគោលដៅស្វែងរកមេដាយមាសនៅឡើយទេ ដោយពេលនេះយើងឆ្ពោះបាញ់ទៅរកការប្រជែងរកមេដាយ នៅស៊ីហ្គេម និងអាស៊ីហ្គេម ប៉ុន្តែអ្វីដែលលើសពីការចូលរួម និងការសម្រិតសម្រាំងស្វែងរកបទពិសោធ និងបច្ចេកទេសល្អៗ ពីកីឡាករខ្លាំងៗនៅជុំវិញពិភពលោក គឺយើងទទួលបាននូវអ្វីផ្សេងៗទៀត ដែលជាគុណផលនៃកិត្តិយសជាតិ និងកិត្តិយសសម្រាប់យើងទាំងអស់គ្នាសម្រាប់ការមកប្រកួតនៅលើឆាកអន្តរជាតិនេះ»។
អគ្គលេខាធិការ NOCC រូបនេះ បានបន្ថែមថា៖ «យើងបានបំពេញកាតព្វកិច្ចជាពលរដ្ឋខ្មែរនៅក្នុងចំណោមប្រទេសជាសមាជិកពេញសិទ្ធិនៃចលនាអូឡាំពិកអន្តរជាតិ តាមរយៈការបញ្ជូនក្រុមអត្តពលិកទៅចូលរួមកីឡាអូឡាំពិក នាពេលនេះ។ អ៊ីចឹងលើសពីអ្វីដែលយើងរំពឹងទុក គឺយើងបានខិតខំជម្នះរាល់ឧបសគ្គទាំងឡាយ ដើម្បីមកចូលរួម ដែលនេះជោគជ័យ ១ ទៀត នៅលើឆាកអន្តរជាតិ»។
លោក វ៉ាត់ ចំរើន បានបញ្ជាក់ថា៖ «ជារួមយើងទទួលបានជោគជ័យយ៉ាងត្រចះត្រចង់ ព្រោះបើទោះជាស្ថិតក្នុងដំណាក់កាលកូវីដបែបនេះក្តី តែយើងបានចូលរួមដោយជោគជ័យជាមួយប្រទេសផ្សេងៗទៀត គឺវាល្អជាងប្រទេសខ្លះ ដោយសារតែខ្លាចកូវីដ អត់បានចូលរួម អត់មានសាមគ្គីភាពជាមួយនឹងប្រទេសផ្សេងៗ ពិសេសមិនបានលើកទឹកចិត្តដល់ម្ចាស់ផ្ទះជប៉ុន ជាមិត្តល្អរបស់កម្ពុជា ដែលបានខិតខំរៀបចំព្រឹត្តិការណ៍ដ៏ធំនេះ។ ហេតុនេះ ជាការវាយតម្លៃរួម គឺយើងបានបំពេញមុខមាត់ និងវត្តមានរបស់ខ្លួននៅលើឆាកអន្តរជាតិបានយ៉ាងល្អប្រសើរ»៕