.jpg)
ក្រុមLille នាំគ្នាអបអរលើកពាន Trophee des Champions ក្រោយឈ្នះ PSG ១-០ ពីថ្ងៃអាទិត្យ។ AFP
ក្រុងតែលអាវីវ៖ ក្រុមដែលទើបគ្រងជើងឯកលីគកំពូលរបស់បារាំងដ៏គួរឱ្យភ្ញាក់ផ្អើល Lille បានយកឈ្នះក្រុមម្ចាស់ជើងឯកខាប់ Paris Saint-Germain ១-០ ដើម្បីលើកដណ្ដើមពាន Champions Trophy (Trophee des Champions) ដែលត្រូវបានធ្វើឡើង ដើម្បីត្រៀមបើករដូវកាលថ្មីនៃក្របខ័ណ្ឌ Ligue 1 ផ្លូវការនាសប្ដាហ៍បន្ទាប់។
សម្រាប់ការប្រកួត ដែលរៀបចំឡើងនៅក្រុងតែលអាវីវ Tel Aviv របស់ប្រទេសអ៊ីស្រាអែល កាលពីថ្ងៃអាទិត្យនោះ ឃើញថា ខ្សែបម្រើសញ្ជាតិព័រទុយហ្គាល់ Xeka គឺជាអ្នកស៊ុតគ្រាប់បាល់ជ័យជម្នះនេះ នៅចុងម៉ោងនៃវគ្គទី១ ដោយការទាត់បាល់ពេញជើងពីក្រៅប្រអប់គ្រោះថ្នាក់ធ្វើឱ្យអ្នកចាំទី Keylor Navas របស់ក្រុម PSG មិនអាចរារាំងគ្រាប់បាល់នោះបាន។
ក្រោយការប្រកួតបញ្ចប់ទៅ កីឡាករ Xeka របស់ក្រុម Lille បាននិយាយថា៖ «យើងបានបង្ហាញថា ពួកយើងជានរណា! ហើយពួកយើងសមនឹងទទួលបានពានរង្វាន់មួយនេះ។ រយៈពេល ២-៣ ខែ ក្រោយឈ្នះពានលីគកំពូល ពួកយើងអាចអបអរនឹងពានរង្វាន់ថ្មីមួយនេះទាំងអស់គ្នាបាន។ ការប្រឹងប្រែងបានផ្ដល់ផលឱ្យពួកយើង ហើយនោះ គឺជាវិធីដែលយើងចង់បន្តទៅ»។
ដោយធ្លាប់លើកពាននេះចំនួន ៨ លើករួចមកហើយ ក្រុម PSG បានធ្វើដំណើរមកកាន់ក្រុងតែលអាវីវ កាលពីថ្ងៃសៅរ៍ ដោយមិនមានវត្តមានស៊ុបភើស្តារ Kylian Mbappe, Neymar និង Angel di Maria ព្រមទាំងកីឡាករចំណូលថ្មី ដូចជាខ្សែការពារសញ្ជាតិអេស្ប៉ាញ Sergio Ramos និងអ្នកចាំទីអ៊ីតាលី Gianluigi Donnarumma នោះឡើយ។
គ្រូបង្វឹករបស់ក្រុម PSG លោក Mauricio Pochettino បានថ្លែងថា៖ «ជារួម ខ្ញុំគិតថា យើងជាក្រុមល្អជាង នៅយប់នេះ។ តែយើងមិនអាចស៊ុតបញ្ចូលទីបាន នៅពេលដែលយើងមានឱកាសល្អៗ។ យើងគ្រប់គ្រងហ្គេមស្ទើរទាំងស្រុង។ ខ្ញុំយល់ថា ទម្រង់លេងរបស់ក្រុមទាំងមូល គឺល្អ»។
មានការបង្ហាញខ្លួនលើកដំបូងប្រកប ដោយភាពរស់រវើកផងដែរ នៅរយៈពេល ២០ នាទីចុងក្រោយ សម្រាប់ខ្សែបម្រើ Georginio Wijnaldum ដែលមកចូលរួមជាមួយក្រុមអ្នកមាននៅបារាំង PSG ដោយការចាកចេញពីក្រុមហង្សក្រហម Liverpool ក្នុងលក្ខខណ្ឌ គ្មានតម្លៃខ្លួន។
គ្រូបង្វឹកថ្មីរបស់ក្រុម Lille លោក Jocelyn Gourvennec បានអរគុណដល់គ្រូបង្វឹកចាស់លោក Christophe Galtier សម្រាប់ការបន្សល់ទុក នូវក្រុមមួយដ៏ល្អបែបនេះ ហើយលោកប្រាប់ទៀតថា ការឈ្នះពានថ្មីនេះ គឺជាចំណែករបស់អ្នកចាត់ការក្រុមចាស់រូបនោះដែរ។
លោក Gourvennec បានថ្លែងថា៖ «ក្រុម PSG បានលេងនូវហ្គេមប្រកបដោយតិចនិកដ៏អស្ចារ្យ តែក្រុមរបស់យើងត្រៀមខ្លួនបានយ៉ាងខ្លាំងក្លា ហើយការលេងជារួម គឺតឹងតែងណាស់។ ក្រុមដឹងច្បាស់ថា អ្វីកំពុងកើតឡើង»។
សម្រាប់ការប្រកួតនេះ អ្នកគាំទ្រប្រមាណជា ២៧ ៥០០ នាក់ ត្រូវបានអនុញ្ញាតឱ្យចូលមើលហ្គេមនៅឯកីឡដ្ឋាន Bloomfield ដែលជាផ្ទះរួមរបស់ក្រុម Hapoel Tel Aviv និងក្រុម Maccabi Tel Aviv។ ចំណែកការប្រកួតរដូវកាលថ្មី នៃក្របខ័ណ្ឌ Ligue 1 របស់ប្រទេសបារាំង នឹងចាប់ផ្ដើម នៅចុងសប្ដាហ៍ក្រោយនេះហើយ ដោយក្រុម PSG ត្រូវទៅលេងនៅផ្ទះរបស់ក្រុម Troyes ហើយ ក្រុម Lille ធ្វើដំណើរទៅសួរសុខទុក្ខក្រុម Metz៕ AFP/VN
