ក្រុងឡូសអេនជឺលេស៖ ក្រុមបាល់ទាត់ជម្រើសជាតិសហរដ្ឋអាមេរិកបានឈ្នះពាន CONCACAF Gold Cup ជាលើកទី៧ កាលពីយប់ថ្ងៃអាទិត្យ ជាមួយនឹងជ័យជម្នះយ៉ាងប្រផិតប្រផើយ ១-០ ក្នុងម៉ោងបន្ថែមពិសេស ១៥ នាទី ២ ដង លើក្រុមជើងឯកចាស់ ម៉ិកស៊ិក អំឡុងការប្រកួតក្នុងវគ្គផ្ដាច់ព្រ័ត្រ នាក្រុងឡាសវេហ្គាស។
ខ្សែការពារ Miles Robinson ជាអ្នករកបាននូវគ្រាប់បាល់ជ័យជម្នះនៅនាទីទី១១៧ ដោយការលោតយ៉ាងខ្ពស់ពីលើខ្សែការពារ Edison Alvarez របស់ម៉ិកស៊ិក រួចតែតបាល់យ៉ាងពេញកម្លាំងបំប៉ោងសំណាញ់ទី ខណៈដែលអ្នកចាំទី Alfredo Talavera មិនអាចរារាំងបាន ហើយគ្រាប់បាល់នោះ បង្កើតបាននូវសំឡេងអបអររីករាយយ៉ាងក្លៀវក្លា នាកីឡដ្ឋាន Allegiant។
ការរកបាន ១ គ្រាប់ យ៉ាងមានន័យ ដើម្បីជួយឱ្យក្រុមអាមេរិកឈ្នះពាននេះ កីឡាករ Robinson បាននិយាយថា៖ «ខ្ញុំរីករាយណាស់ ដែលយើងទទួលបានជ័យជម្នះ។ ពិតជាអស្ចារ្យណាស់ ហើយមានអារម្មណ៍អន្ទះអន្ទែងមែនទែន។ ខ្ញុំដឹងថា បើសិនខ្ញុំអាចគេចចេញពីការបិទរបស់គេបាន ហើយធ្វើចលនាឱ្យលឿនកន្លះជំហាន អ៊ីចឹងខ្ញុំអាចបញ្ចប់ទីបានហើយ»។
ចំណែកអ្នកចាំទី Matt Turner ក៏ជាអ្នកយាមបង្គោលទីដ៏ឆ្នើមប្រចាំព្រឹត្តិការណ៍នេះផងដែរ ដែលជួយឱ្យក្រុមអាមេរិកបញ្ចប់យុទ្ធនាការ ដោយមិនមានស្គាល់ពាក្យបរាជ័យសូម្បី ១ ប្រកួត សម្រាប់ការប្រកួតប្រជែងប្រចាំតំបន់អាមេរិកខាងជើង ដែលធ្វើឡើងរៀងរាល់ ២ ឆ្នាំម្ដងនេះ។
សម្រាប់ការឈ្នះពាន Gold Cup នេះ វាជាលើកដំបូងរបស់ក្រុមអាមេរិក គិតតាំងពីឆ្នាំ ២០១៧ ហើយវាជាការសងសឹកបានសម្រេច ទៅលើក្រុមម៉ិកស៊ិក ដែលធ្លាប់បានយកឈ្នះពួកគេក្នុងវគ្គផ្ដាច់ព្រ័ត្រ កាលពីឆ្នាំ ២០១៩។
ក្រុមអាមេរិកពេលនេះ បានបំបាក់ក្រុមម៉ិកស៊ិកក្នុងការប្រកួតបន្តបន្ទាប់គ្នាជាលើកដំបូង ដោយនៅមុននេះ ពួកគេបានយកឈ្នះម៉ិកស៊ិក ក្នុងម៉ោងបន្ថែមពិសេសអ៊ីចឹងដែរ ក្នុងវគ្គផ្ដាច់ព្រ័ត្រនៃកម្មវិធី CONCACAF Nations League កាលពីដើមខែមិថុនា៕ AFP/VN