ទីក្រុងឡាសវេហ្គាស៖ Manny Pacquiao ត្រូវការពេលវេលាបន្តិច មុននឹងធ្វើការសម្រេចចំពោះអនាគតរបស់ខ្លួន តែកាលពីថ្ងៃសៅរ៍កន្លងទៅ បានបញ្ជាក់ថា រូបគេទំនងជាមិនវិលមកឡើងសង្វៀនប្រដាល់វិញនោះទេ ក្រោយរងបរាជ័យក្រោមថ្វីដៃរបស់គូបដិបក្ខ Yordenis Ugas។
អ្នកប្រដាល់និមិត្តរូបរបស់ប្រទេសហ្វីលីពីនវ័យ ៤២ ឆ្នាំ Pacquiao បានបញ្ជាក់ឱ្យដឹងថា រូបគេមានគម្រោងផែនការបង្វែរការផ្ដោតអារម្មណ៍ទៅកាន់ការធ្វើនយោបាយក្នុងប្រទេសរបស់ខ្លួនវិញ ក្រោយបញ្ចប់ការប្រកួតដែលបានចាញ់ Ugas ដោយពិន្ទុជាឯកច្ឆន្ទ។
Pacquiao បានប្រាប់ថា៖ «នាពេលអនាគត អ្នកប្រហែលជាមិនអាចបានឃើញ Manny Pacquiao ឡើងប្រកួតលើសង្វៀនទៀតទេ មើលទៅ? ខ្ញុំមិនដឹង! ខ្ញុំបានផ្ដល់អ្វីៗជាច្រើនសម្រាប់ប្រដាល់ ហើយប្រដាល់បានផ្ដល់អ្វីៗជាច្រើនដល់ខ្ញុំ។ ខ្ញុំទន្ទឹងរង់ចាំ ដើម្បីបានចំណាយពេលវេលាជាមួយក្រុមគ្រួសាររបស់ខ្ញុំ ហើយគិតពីអនាគតរបស់ខ្ញុំក្នុងវិស័យប្រដាល់»។
ប្រសិនបើបរាជ័យ កាលពីថ្ងៃសៅរ៍ គឺជាការប្រកួតចុងក្រោយ វាជាការបង្ហាញឱ្យឃើញពីការបញ្ចប់នូវអាជីពដ៏រុងរឿងរយៈពេល ២៦ ឆ្នាំ របស់ Pacquiao ដែលបានធានារួចហើយថា ជនជាតិហ្វីលីពីននឹងត្រូវបានកត់ត្រាជាមនុស្សម្នាក់ក្នុងចំណោមជនជាតិដ៏អស្ចារ្យបំផុតក្នុងកំណត់ត្រា។
តែយ៉ាងណាក្ដី ការប្រឈមទល់នឹងអ្នកប្រដាល់គុយបា Ugas កាលពីចុងសប្ដាហ៍កន្លងមក ឃើញថា ចុងក្រោយវ័យរបស់ Pacquiao ប្រហែលជាពិបាកក្នុងការឱ្យគេបន្តអាជីពទៀត ខណៈដែលរូបគេ មិនអាចផ្ដួល និងចាញ់ប្រៀបគូប្រកួតដែលរឹងមាំ និងក្មេងជាង។
ទោះបីជា Ugas បាននិយាយថា រូបគេមានបំណងចង់ឱ្យ Pacquiao ប្រកួតសងសឹកក៏ដោយ ក៏វាពិបាកនឹងមើលឃើញថា តើការប៉ះគ្នាលើកទី២ នឹងត្រូវបញ្ចប់ដោយលទ្ធផលខុសគ្នាយ៉ាងដូចម្ដេច?
លើសពីនោះទៀត អ្នកប្រដាល់ផ្សេងទៀត ក្នុងប្រភេទទម្ងន់មធ្យមនេះ ដូចជា Errol Spence Jr. និង Terence Crawford សុទ្ធតែបង្កការគ្រោះថ្នាក់ខ្លាំងដល់ស៊ុបភើរស្តារចាស់វស្សាហ្វីលីពីនរូបនេះ បានដូចគ្នា។
«ក្នុងបេះដូងរបស់ខ្ញុំ ខ្ញុំចង់បន្តការប្រកួតប្រដាល់ទៀត តែបញ្ហា គឺខ្ញុំក៏ត្រូវគិតគូរពិចារណាពីរាងកាយរបស់ខ្ញុំផងដែរ»។ Pacquiao បានបន្ត។
Pacquiao ពេលនេះ ត្រូវបានគេរំពឹងថា នឹងបង្វែរការផ្ដោតអារម្មណ៍របស់ខ្លួនទៅការធ្វើនយបាយវិញ។ ក្នុងនាមជាសមាជិកសភារបស់ប្រទេសហ្វីលីពីន រួចហើយនោះ Pacquiao ត្រូវបានគេជឿថា កំពុងតែពិចារណាក្នុងការឈេរឈ្មោះប្រជែងតំណែងប្រធានាធិបតី។
«មានរឿងជាច្រើនណាស់ ដែលខ្ញុំត្រូវធ្វើដើម្បីជួយប្រជាជន ហើយនោះ គឺជាកិច្ចការរបស់ខ្ញុំ។ ខ្ញុំចង់ក្លាយជាអ្នកជំរុញលើកទឹកចិត្តម្នាក់ សម្រាប់ប្រជាជនហ្វីលីពីនគ្រប់រូប ទាំងនៅក្នុង និងក្រៅសង្វៀន»។
គួរបញ្ជាក់ថា កាលពីថ្ងៃសៅរ៍នោះ Ugas រារាំងមិនឱ្យ Pacquiao ដណ្ដើមខ្សែក្រវាត់ស្ថាប័ន WBA បានសម្រេច ក្រោយការប្រកួតទាំង ១២ ទឹក អ្នកប្រដាល់វ័យ ៣៥ ឆ្នាំរូបនេះ ឈ្នះដោយពិន្ទុជាឯកច្ឆន្ទពីចៅក្រមទាំង ៣ រូប គឺ ១១៥-១១៣ ១១៦-១១២ និង ១១៦-១១២៕ AFP/VN