ភ្នំពេញ៖ ពេលវេលានៃការប្រកួតសងសឹកដ៏សំខាន់រវាងកីឡាករជើងខ្លាំង ឡៅ ចន្ទ្រា ជាមួយអ្នកលេងកណ្តាប់ដៃធ្ងន់ ថៃ រិទ្ធី នឹងត្រូវធ្វើឡើងនៅលើសង្វៀនបាយ័ន នាល្ងាចថ្ងៃអាទិត្យចុងសប្តាហ៍នេះ ហើយជំនួបសងសឹកដណ្តើមប្រាក់លាននេះ បានក្លាយជាការប្រកួតដ៏ធំ ដែលមានការទាក់ទាញខ្លាំងបំផុត ព្រោះគ្រប់គ្នាចង់ដឹងថា តើ ចន្ទ្រា អាចសងសឹក រិទ្ធី បានឬទេ ឬក៏បន្តសន្លប់ធំជាលើកទី២?។
វាស្ទើរជារឿងដែលគ្រប់គ្នា មិនចង់ជឿនៅពេលជើងខ្លាំងលំដាប់កំពូលនៅកម្ពុជា ឡៅ ចន្ទ្រា បានសន្លប់ធំក្រោមកណ្តាប់ដៃរបស់កីឡាករគុនចម្រុះ ថៃ រិទ្ធី ក្នុងទឹកទី៣ សម្រាប់ការជួបគ្នាជាលើកដំបូងនៅលើសង្វៀនបាយ័ននេះ កាលពីថ្ងៃទី ២៦ ខែ មិថុនា ឆ្នាំ ២០២១ ខណៈដែល ថៃ រិទ្ធី ស្ទើរតែមានបញ្ហាក្រោមជង្គង់ ពិសេសការទាត់សន្ធាប់ធ្ងន់ៗរបស់ ឡៅ ចន្ទ្រា ទៅហើយនោះ។
យ៉ាងណាក៏ដោយ សម្រាប់ជំនួបលើកទី២ នេះ ថៃ រិទ្ធី បានតាំងចិត្តរួចហើយថា នឹងវ៉ៃប្តូរ ដោយគ្មានការបារម្ភអ្វីទាំងអស់ ហើយរូបគេក៏បានដឹងពីក្បាច់ប្រកួតរបស់ ឡៅ ចន្ទ្រា ដែលត្រូវយកមកប្រើលើកនេះហើយផងដែរ។ «បើទោះបីជាលើកនេះ ឡៅ ចន្ទ្រា អាចហ្វឹកហាត់ និងត្រៀមខ្លួនបានល្អជាងមុន ប៉ុន្តែខ្ញុំដឹងថា គាត់នឹងប្រើក្បាច់វ៉ៃមកវ៉ៃខ្ញុំ សម្រាប់ការប្រកួតសងសឹកនេះ»។
យ៉ាងណាក៏ដោយ ថៃ រិទ្ធី មិនបានទម្លាយពីចំណុច ដែលរូបគេអាចចាប់ក្បាច់ ឡៅ ចន្ទ្រា បានមុនការប្រកួតនោះទេ តែបានអះអាងថា រូបគេមានការជឿជាក់ខ្លាំងទៅលើខ្លួនឯង។ «គោលជំហររបស់ខ្ញុំ គឺវ៉ៃ ដឹងវ៉ៃ ហើយខ្ញុំមានការជឿជាក់ទៅលើខ្លួនឯង និងជឿជាក់ទាំងទៅលើកណ្តាប់ដៃ កែង ជង្គង់ និងការទាត់របស់ខ្ញុំ ហើយខ្ញុំមិនគិតពីការភ្លាត់ចាញ់ ដោយប្រការណាមួយនោះទេ»។
ថៃ រិទ្ធី ដែលបានផ្តួលជើងខ្លាំង ធឿន ធារ៉ា ឱ្យសន្លប់នៅក្នុងទឹកទី៣ ដែរនោះ បានបញ្ជាក់ថា៖ «ខ្ញុំមិនដែលគិតពីចំណុចខ្សោយខ្លួនឯងនោះទេ ខ្ញុំគិតតែពីចំណុចខ្សោយដៃគូប្រកួត ព្រោះការប្រកួតវាតែងមានការប៉ះពារ គេចមិនផុតនោះទេ អ៊ីចឹងយើងក៏ឈឺសាច់ គេក៏ឈឺដូចគ្នា ហើយខ្ញុំក៏មិនបារម្ភទៅលើការចាញ់ឈ្នះនោះដែរ។ ខ្ញុំដឹងតែពីខំប្រឹងវ៉ៃអស់ពីសមត្ថភាព ហើយខ្ញុំតែងធ្វើបែបនេះ តាំងតែពីដើមមក»។
ចំណែកអតីតអ្នកប្រដាល់ជើងខ្លាំង ឡៅ ស៊ីណាត ដែលជាបងប្រុសបង្កើត និងជាអ្នកបង្ហាត់ ឡៅ ចន្ទ្រា ដោយផ្ទាល់នោះ បានអះអាងថា ការប្រកួតសងសឹកលើកនេះ ឡៅ ចន្ទ្រា ហ្វឹកហាត់ត្រៀមបានខ្លាំងជាងមុន ហើយក៏មានរំពឹងច្រើនក្នុងការយកឈ្នះបានវិញផងដែរ ហើយ ស៊ីណាត ប្រាប់ទៀតថា គូនេះមិនអាចបញ្ចប់ដល់ ៥ ទឹកនោះទេ។
ឡៅ ស៊ីណាត បានប្រាប់ ភ្នំពេញ ប៉ុស្តិ៍ កាលពីថ្ងៃអង្គារថា៖ «ឡៅ ចន្ទ្រា ហ្វឹកហាត់ត្រៀមខ្លាំងជាងការប្រកួតសព្វដង ព្រោះនេះជាការប្រកួតសងសឹក អ៊ីចឹងយើងមានសង្ឃឹមច្រើនដែរ ក្នុងការទទួលបានជ័យជម្នះត្រឡប់មកវិញ ហើយគូនេះ ខ្ញុំគិតថា នឹងអាចមានអ្នកសន្លប់ គឺមិនអាចចប់ដល់ ៥ ទឹកនោះទេ»។
នៅពេលប្រាប់ពីការអះអាងរបស់ ថៃ រិទ្ធី ថា បានដឹងក្បាច់ ឡៅ ចន្ទ្រា អស់ទៅហើយនោះ ឡៅ ស៊ីណាត បានឆ្លើយតបបកទៅវិញថា៖ «យើងក៏បានដឹងពីក្បាច់ប្រកួតរបស់ ថៃ រិទ្ធី ដែរ គឺដឹងដូចតែគ្នាទេ ប៉ុន្តែលើកនេះ ខ្ញុំបានបន្ថែមក្បាច់ថ្មី និងបច្ចេកទេសប្រកួតថ្មីមួយចំនួនទៀតដល់ ចន្ទ្រា អ៊ីចឹងគ្រាប់គ្នានឹងបានឃើញនៅពេលប្រកួតជាក់ស្តែង ហើយអ្នកណាសន្លប់ក៏ដឹង នៅពេលនោះដែរ ព្រោះខ្ញុំគិតថា ករណីភ្លាត់នៅតែអាចកើតមានឡើង គ្រាន់តែថា មិនដឹងលើកនេះ អ្នកណាជាអ្នកភ្លាត់ ហើយត្រូវសន្លប់»៕