ក្រុងប៊្រូចឆ៍៖ កីឡាករ Lionel Messi ទីបំផុត បានបង្ហាញខ្លួន ក្នុងជម្រើសដំបូង លើកទី១ ឱ្យក្រុម Paris Saint-Germain (PSG) ហើយ កាលពីថ្ងៃពុធ តែក្រុមយក្សរបស់បារាំង ដែលមានសុទ្ធតែស៊ុបភើស្តារ មួយនេះ បានត្រឹមស្មើ ១-១ ជាមួយក្រុម Club Brugge នៅបែលហ្ស៊ិក ពីការប្រកួតបើកឆាក ក្នុងក្របខ័ណ្ឌ UEFA Champions League (UCL)។
កីឡាករ Ander Herrera ជួយឱ្យក្រុម PSG ធ្វើការនាំមុខយ៉ាងឆាប់រហ័ស នៅដើមវគ្គទី១ នៃការប្រកួត នាកីឡដ្ឋាន Jan Breydel នេះ តែមិនទាន់បានប៉ុន្មាននាទីផង ពោលគឺនៅ ១២ នាទីបន្ទាប់ពីនោះ ខ្សែប្រយុទ្ធ Hans Vanaken ទម្លុះសំណាញ់ទីឱ្យក្រុមម្ចាស់ផ្ទះ Brugge ស្មើវិញ។
ខ្សែប្រយុទ្ធអន្តជាតិអាហ្សង់ទីន Messi ដែលចូលលេងបានត្រឹមតែ ២៤ នាទី ក្នុងនាមជាកីឡាករបម្រុង មុនហ្គេមនេះ នៅតែទន្ទឹងរង់ចាំគ្រាប់បាល់ដំបូងរបស់ខ្លួនជាមួយក្លិបថ្មី ខណៈដែលក្នុងការប្រកួតនេះ រាល់ការស៊ុតរបស់គេ បានត្រឹមបុករបារទី និងត្រូវរារាំងដោយអ្នកចាំទី Simon Mignolet របស់ក្លិប Brugge។
តែយ៉ាងណា នេះមិនមែនជាទម្រង់លេងដ៏គួរឱ្យសរសើររបស់ក្រុម ទៅពីក្រុងប៉ារីសឡើយ ខណៈដែលគ្រូបង្វឹកលោក Mauricio Pochettino បានរៀបចំតំបន់ប្រយុទ្ធ ដោយការឱ្យ Messi, Neymar និង Kylian Mbappe លេងជាមួយគ្នាជាលើកដំបូង។
«យើងត្រូវការពេលវេលា ដើម្បីឱ្យពួកគេស្វែងយល់ពីគ្នាទៅវិញទៅមក»។ នេះជាការបញ្ជាក់របស់លោក Pochettino ដែលសំដៅដល់ខ្សែប្រយុទ្ធទាំង ៣ រូប។
ខ្សែប្រយុទ្ធអន្តរជាតិបារាំង Mbappe ត្រូវបានដូរចេញ ដោយសារមានរបួស នៅវគ្គទី២ ហើយក្រុម PSG បើទោះបីជាបានសាងក្រុមមួយជាមួយនឹងបំណងចង់ឈ្នះពាន UCL ក៏ដោយ ក៏បានធ្វើឱ្យកាន់តែច្របូកច្របល់ឡើង ព្រោះត្រឹមតែឱកាសឆ្លងផុតពីពូល Aរបស់ខ្លួននេះ មើលទៅមិនជាស្រួលប៉ុន្មានឡើយ។
ប្រកួតបន្ទាប់ ក្រុម PSG ត្រូវបើកទ្វារកីឡដ្ឋាន Parc des Princes ស្វាគមន៍ក្រុមយក្សអង់គ្លេស Manchester City ជាក្រុម ដែលទម្លាក់ពួកគេ ក្នុងវគ្គ ៨ ក្រុមចុងក្រោយ កាលពីរដូវកាលមុន ហើយដែលចាប់ផ្ដើមយុទ្ធនាការរដូវកាលថ្មីជាមួយនឹងជ័យជម្នះភ្លូកទឹកភ្លូកដី ៦-៣ លើក្រុមរបស់អាល្លឺម៉ង់ RB Leipzig។
«ខ្ញុំពេញចិត្តនឹងការខំប្រឹងប្រែងរបស់ក្រុម។ វាអាចមិនមែនជាពេលល្ងាចដ៏គួរឱ្យពេញចិត្តសម្រាប់ពួកយើង តែពួកយើងត្រូវតែបន្តរក្សាភាពស្ងប់ស្ងាត់ និងបន្តការងាររបស់យើង។ រឿងសំខាន់បំផុត គឺត្រូវរកឱ្យឃើញនូវពេលវេលាដ៏ចាំបាច់។ យើងនឹងព្យាយាមធ្វើឱ្យប្រសើរជាងនេះ»។ លោក Pochettino បានបន្ថែម៕ AFP/VN