ក្រុងឡងដ៍៖ ក្រុមបិសាចក្រហម Manchester United (United) បានធ្លាក់ចេញពីការប្រកួតប្រជែង ក្នុងកម្មវិធីលីគខាប់ (League Cup) ហើយ កាលពីថ្ងៃពុធ ខណៈដែលក្រុម West HamUnited សងសឹក្រុមរបស់លោក Ole Gunnar Solskjaer បានសម្រេច ជាមួយនឹងជ័យជម្នះ ១-០ រីឯក្រុមរួមក្រុងឡុងដ៍ Chelsea និង TottenhamHotspur (Spurs) អាចឆ្លងទៅជុំទី៤ ដោយសារឈ្នះវគ្គប៉េណាល់ទីកាត់ក្ដី។
ក្រុមញញួរធំ West Ham បានរងបរាជ័យយ៉ាងរំជួលចិត្ត ២-១ ដោយសារក្រុម United សម្រាប់ការប្រកួត នៅក្របខ័ណ្ឌ Premier League កាលពីថ្ងៃអាទិត្យចុងសប្ដាហ៍កន្លងមក ដោយសារអ្នកចាំទី David De Gea បានជួយសង្គ្រោះការទាត់បាល់ពិន័យ ១១ ម៉ែត្ររបស់ខ្សែបម្រើ Mark Noble បន្ទាប់ពីមានគ្រាប់បាល់នាំមុខ ដែលស៊ុតដោយខ្សែបម្រើប្រយុទ្ធ Jesse Lingard នៅនាទីទីចុងក្រោយនៃការប្រកួតនោះ។
តែក្រុម West Ham របស់លោក David Moyes ដឹងច្បាស់ពីវិធីដើម្បីសងសឹកវិញ ក្នុងរយៈពេល ៣ ថ្ងៃបន្ទាប់ ខណៈដែលគ្រាប់បាល់តែ ១ គ្រាប់របស់ខ្សែបម្រើ Manuel Lanzini នៅខាងដើមវគ្គទី១ គ្រប់គ្រាន់ល្មម ទម្លាក់ក្រុមបិសាចក្រហម ពីការប្រកួតប្រជែងដណ្ដើមពានកម្រិតទី៣ របស់អង់គ្លេសនេះ ក្នុងជុំទី៣។
លទ្ធផលនេះ មិនត្រឹមតែជួយឱ្យលោក Moyes អាចដណ្ដើមបានជ័យជម្នះជាលើកទី១ ពីក្រុម United គិតតាំងពីក្រុមយក្សមួយនេះ បានដេញរូបលោក ក្នុងឆ្នាំ ២០១៤ ទាំងដែលលោកធ្វើតួនាទីមិនទាន់បានពេញ ១ រដូវកាលប៉ុណ្ណោះទេ តែថែមទាំងជាការឈ្នះលើកទី១ របស់ក្រុម West Ham ក្នុងកីឡដ្ឋាន Old Trafford គិតតាំងពីឆ្នាំ ២០០៧ ទៀតផង។
គ្រូបង្វឹកលោក Solskjaer បានរិះគន់ក្រុម United របស់លោក ចំពោះការចាប់ផ្ដើមហ្គេម ដោយស្ទាក់ស្ទើរ ដោយលោកលើកឡើងថា៖ «ជាការចាប់ផ្ដើមដោយយឺតៗ ហើយចំណុចនោះ ត្រូវតែកែលម្អ។ ដោយជាក់ស្ដែង ខ្ញុំមិនដែលឈ្នះការប្រកួត ក្នុងកម្មវិធីនេះឡើយ ដូច្នេះ ការដេញតាម នឹងនៅតែបន្ត»។
«តែយើងបានធ្វើការសម្រេចចិត្ត ដើម្បីមាននូវក្រុម ដែលមានទម្រង់លេងតាមកម្រិតចង់បាន សម្រាប់រដូវកាលនៅសល់។ ពេលខ្លះអ្នកត្រូវតែហ៊ានប្រថុយប្រថានដែរ»។ នេះជាបន្ថែមរបស់លោក Solskjaer ដែលផ្លាស់ប្ដូរកីឡាករទាំងអស់ សម្រាប់ជម្រើស ១១ នាក់ដំបូង។
ចំណែកឯការប្រកួត នៅកីឡដ្ឋាន Stamford Bridge ឯណោះវិញ ក្រុម Chelsea បានធ្វើដំណើរទៅវគ្គ ១៦ ក្រុមចុងក្រោយ ដោយការយកឈ្នះក្រុម Aston Villa ៤-៣ ក្នុងវគ្គប៉េណាល់កាត់ក្ដី បន្ទាប់ពីការប្រកួត ក្នុងម៉ោងធម្មតាស្មើគ្នា ១-១។
គ្រាប់នាំមុខរបស់ក្រុម Chelsea ដែលបានមកពីការតែតរបស់ខ្សែប្រយុទ្ធ Timo Werne នៅនាទីទី៥៤ ត្រូវបានក្រុម Villa តាមស្មើវិញនៅ ១០ នាទីបន្ទាប់ ដែលបានមកពីការតែតកៀកនឹងបង្គោលទីរបស់ខ្សែប្រយុទ្ធ Cameron Archer។
សម្រាប់គូនៅកីឡដ្ឋាន Molineux ឃើញថា ក្រុមភ្ញៀវ Spurs បានទម្លាក់ក្រុមម្ចាស់ផ្ទះ Wolverhampton ជាមួយនឹងជ័យជម្នះ ក្នុងវគ្គប៉េណាល់ទី ៣-២ ខណៈដែលក្នុងម៉ោងធម្មតា ស្មើគ្នា ២-២ ហើយជាមួយគ្នានេះ ខ្សែប្រយុទ្ធ Harry Kane ទីបំផុត អាចស៊ុតបញ្ចូលទីគ្រាប់ដំបូងហើយ គិតតាំងពីចូលលេង ក្រោមការដឹកនាំរបស់លោក Nuno Espirito Santo៕ AFP/VN