ក្រុងសៃតាម៉ា: អ្នកចាត់ការក្រុមជម្រើសជាតិជប៉ុន Hajime Moriyasu បានជំរុញឱ្យកូនក្រុមរបស់លោក ជ្រើសយកជ័យជម្នះ ២-១ លើក្រុមអូស្ត្រាលី ធ្វើជាគំរូក្នុងប្រកួតខាងមុខ ដើម្បីឱ្យក្ដីសង្ឃឹមនៅ World Cup មិនបាត់បង់ ខណៈដែលខ្សែប្រយុទ្ធ Son Heung-min ជាអ្នកស៊ុតបញ្ចូលទី ក្នុងលទ្ធផល ដែលក្រុមកូរ៉េខាងត្បូង ស្មើ ១-១ ជាមួយក្រុមអ៊ីរ៉ង់។
ក្រុមសាមូរ៉ៃជប៉ុន បានចាញ់ការប្រកួត ២ ដង ក្នុងចំណោម ៣ ហ្គេមដំបូង សម្រាប់យុទ្ធនាការវគ្គជម្រុះ ប្រចាំទ្វីបអាស៊ីនេះ តែការដណ្ដើមបាន ៣ ពិន្ទុ ដែលបានមកពីគ្រាប់បាល់ជ័យជម្នះ ដោយសារការធ្វើឱ្យចូលទីខ្លួនឯងពីខ្សែការពារ Aziz Behich នៅនាទីទី៨៥ គឺមានតម្លៃខ្លាំងណាស់។
ជប៉ុនកំពុងតាមពីក្រោយអូស្ត្រាលី និងអារ៉ាប៊ីសាអ៊ូឌីត សម្រាប់ការប្រកួតប្រជែងដណ្ដើមចំណាត់ថ្នាក់ទី១ និងទី២ ក្នុងពូល ដើម្បីមានសិទ្ធិស្វ័យប្រវត្តិទៅបង្ហាញមុខនៅប្រទេសកាតា ឆ្នាំ ២០២២ តែជ័យជម្នះនេះ ធ្វើឱ្យពូល B កាន់តែបើកទូលាយ និងបានបញ្ចប់កំណត់ត្រារបស់ក្រុមភ្ញៀវ ដែលឈ្នះ ១១ លើកជាប់ៗគ្នា ពីការទាត់វគ្គជម្រុះ World Cup តែ ១ ប៉ុណ្ណោះ។
គ្រូបង្វឹកក្រុមជប៉ុន លោក Moriyasu បានប្រាប់ថា៖ «ពួកយើងនៅតែបន្តការប្រយុទ្ធរហូតដល់ទីបញ្ចប់ និងមិនចុះចាញ់ជាដាច់ខាត។ យើងបានប្ដេជ្ញាថា នឹងឡើងទៅ World Cup ឱ្យបាន ហើយយើងបានបង្ហាញឱ្យឃើញនៅយប់នេះ»។
«វាជាជ័យជម្នះដ៏អស្ចារ្យ តែយើងនៅមានហ្គេមដ៏តានតឹងជាច្រើនទៀត នៅខាងមុខ។ យើងត្រូវប្រាកដថា យើងយកជ័យជម្នះនេះ ជាគំរូដើម្បីទៅបន្តនៅហ្គេមខាងមុខ»។ នេះជាការបន្ថែមរបស់លោក Moriyasu។
បណ្ដាញសារព័ត៌មាននៅជប៉ុនបានធ្វើសេចក្ដីរាយការណ៍ថា លោក Moriyasu អាចនឹងបាត់បង់តួនាទីរបស់គាត់ ប្រសិនបើក្រុមរបស់លោក មិនអាចយកឈ្នះក្រុមកំពុងឡើងជើងអូស្ត្រាលីបានទេនោះ តែអ្នកចាត់ការវ័យ ៥៣ ឆ្នាំ ប្រឹងប្រែងរហូតទទួលបានការទះដៃពីអ្នកគាំទ្រ បន្ទាប់ពីសំឡេងកញ្ចែចុងក្រោយបន្លឺឡើង។
ក្រុមជប៉ុនឈរនៅលេខ ៣ ក្នុងពូល B ដោយមាន ៦ ពិន្ទុ ពោលគឺតាមពីក្រោយក្រុមលេខ ២ អូស្ត្រាលី ៣ ពិន្ទុ និងក្រុមលេខ ១ អារ៉ាប៊ីសាអ៊ូឌីត ៦ ពិន្ទុ ខណៈការប្រកួតនៅសល់ ៦ លើកទៀត។
ក្នុងពូល A ក្រុមកូរ៉េខាងត្បូង បាត់ឱកាសឡើងទៅឈរជាប្រធានពូល ដោយសារមិនអាចការពារគ្រាប់បាល់នាំមុខរបស់កីឡាករ Son នៅនាទីទី៤៨ ព្រោះត្រូវក្រុមម្ចាស់ផ្ទះអ៊ីរ៉ង់ តាមស្មើនៅ១៥ នាទីចុងក្រោយ។
ក្រោយអាចគេចផុតពីបរាជ័យ ក្នុងហ្គេមទី ៤ នេះ ក្រុមអ៊ីរ៉ង់រក្សាតំណែងលេខ ១ ក្នុងពូលដដែល ដោយមាន ១០ ពិន្ទុ ខណៈក្រុមកូរ៉េខាងត្បូង ដែលតាមពីក្រោយ ២ ពិន្ទុ ឈរនៅលេខ ២ ហើយក្រុមនៅលេខ ៣ លីបង់ មាន ៥ ពិន្ទុ៕ AFP/VN