ក្រុងប៉ារីស: ក្រុមជម្រើសជាតិដាណឺម៉ាក បានក្លាយជាក្រុមទី២ ដែលមានសិទ្ធិទៅលេងជុំចុងក្រោយ នៅក្នុងព្រឹត្តិការណ៍ World Cup 2022 បន្ទាប់ពីបានយកជ័យជម្នះលើក្រុមអូទ្រីសជាមួយនឹងគ្រាប់បាល់តែ ១ គ្រាប់ កាលពីថ្ងៃអង្គារ ខណៈដែលក្រុមអង់គ្លេស ត្រូវបាន ក្រុមហុងគ្រីធ្វើឱ្យខកចិត្ត សម្រាប់ការប្រកួតវគ្គជម្រុះ ប្រចាំតំបន់អឺរ៉ុប នៅឯពហុកីឡដ្ឋាន Wembley។
១ គ្រាប់ ពីខ្សែបម្រើ Joakim Maehle ក្នុងនាទីទី៥៣ បានជួយបញ្ជូនដាណឺម៉ាក ឱ្យទៅបង្ហាញវត្តមាននៅប្រទេសកាតា នាឆ្នាំក្រោយ ខណៈដែលក្រុមរហស្សនាម «ក្រហម-ស» បានបង្កើតឱ្យមាននូវការធ្វើដំណើរដ៏គួរឱ្យភ្ញាក់ផ្អើលមួយ កាលពីព្រឹត្តិការណ៍ Euro 2020 នៅរដូវក្ដៅ ដោយការឡើងទៅដល់វគ្គ ៤ ក្រុមចុងក្រោយ។
«អ្នកអាចត្រឹមតែមានក្ដីស្រមៃប៉ុណ្ណោះពីលទ្ធផលដូចនេះ។ វាពិតជារំភើបណាស់។ វាធំធេងណាស់ សម្រាប់ខ្ញុំ សម្រាប់ក្រុម សម្រាប់វិស័យបាល់ទាត់ដាណឺម៉ាក និងសម្រាប់ប្រជាជាតិដាណឺម៉ាក។
ជាមួយនឹងជំនាន់ ព្រមទាំងគុណភាព ដែលយើងមាន ពួកយើងនឹងប្រសើរឡើងៗជាលំដាប់ជាមិនខាន»។ នេះជាសម្ដីរបស់ខ្សែបម្រើរបស់ក្រុមដាណឺម៉ាក Pierre-Emile Hojbjerg។
លទ្ធផលនេះ បានន័យថា ដាណឺម៉ាកដែលឈរលេខ ១ ក្នុងពូល F ដោយមាន ២៤ ពិន្ទុ នឹងចូលរួមជាមួយក្រុមឥន្ទ្រីដែកអាល្លឺម៉ង់ ដែលទទួលបានសិទ្ធិមុនគេ កាលពីថ្ងៃចន្ទ ក្នុងជុំចុងក្រោយ នៅប្រទេសកាតា ដែលបានលេងដោយស្វ័យប្រវត្តិក្នុងនាមជាម្ចាស់ផ្ទះ។
ចំណែកឯក្រុមអង់គ្លេស ដែលស្ទើរតែរប៉ាត់រប៉ាយដោយសារការប្រយុទ្ធរបស់ក្រុមហុងគ្រី ទទួលបានលទ្ធផលស្មើ ១-១ តែប៉ុណ្ណោះ សម្រាប់ការប្រកួត ប្រចាំពូល I ខណៈដែលការប្រកួតនោះ ត្រូវបានធ្វើឱ្យអាប់អួជាមួយនឹងរូបភាពដ៏អាក្រក់ ក្នុងពហុកីឡដ្ឋាន Wembley ដោយសារអ្នកគាំទ្ររបស់ក្រុមភ្ញៀវ ប៉ះទង្គិចជាមួយក្រុមអ្នករក្សាសន្តិសុខ និងប៉ូលិស។
ក្រុមតោកំណាចរបស់លោក Gareth Southgate តាមពីក្រោយហុងគ្រី ជាមួយនឹងគ្រាប់បាល់ ដែលបានមកពីការទាត់បាល់ប៉េណាល់ទីរបស់កីឡាករ Roland Sallai នៅនាទីទី២៤ តែខ្សែការពារ John Stones មានឱកាសទម្លុះសំណាញ់ទីឱ្យក្រុមម្ចាស់ផ្ទះតាមស្មើវិញនៅនាទីទី៣៧។
ខ្សែប្រយុទ្ធ Harry Kane មិនអាចស៊ុតបញ្ចូលទីបានសោះ ក្នុងវគ្គជម្រុះនេះជាលើកដំបូង ក្នង ១៦ ហ្គេម ហើយត្រូវបានប្ដូរចេញនៅប្រមាណជា ១៥ នាទីចុងក្រោយ ខណៈដែលការការពារដ៏រឹងមាំរបស់ក្រុមហុងគ្រី បានធ្វើឱ្យក្រុមអង់គ្លេសមិនអាចចូលកៀកនឹងបង្គោលទីរបស់ខ្លួនឡើយ បើទោះជាព្យាយាមយ៉ាងណាក៏ដោយ។
ក្រោយក្រុមអង់គ្លេសមិនអាចដណ្ដើម ៣ ពិន្ទុ បានគ្រូបង្វឹកលោក Southgate បានលើកឡើងយ៉ាងខ្លីថា៖ «យើងមិនបានល្អ ក្នុងកម្រិត ដែលយើងត្រូវការនោះឡើយ ពោលគឺធម្មតាៗ ដូចឃើញនោះ»។
ដោយសារមិនអាចមានជ័យជម្នះ អ៊ីចឹងក្រុមជើងឯករង នៅ Euro 2020 អង់គ្លេស នៅមិនទាន់អាចលេងដោយស្រួលជើង ឬធ្វេសប្រហែសបានឡើយ ក្នុង ២ ហ្គេមចុងក្រោយ ទោះបីជាពេលនេះ ឈរលេខ ១ ក្នុងពូល ដោយមាន ២០ ពិន្ទុក៏ដោយ ព្រោះក្រុមលេខ ២ ប៉ូឡូញ កំពុងតាមពីក្រោយ ៣ ពិន្ទុ។
តែយ៉ាងណា ក្ដីសង្ឃឹមក្នុងការកក់កៅអី ១ នៅប្រទេសកាតា របស់ក្រុមជើងឯក World Cup ឆ្នាំ ១៩៦៦ នៅតែខ្ពស់ដដែល ដោយសារគូប្រកួត ២ ក្រុមចុងក្រោយរបស់ខ្លួនមិនជាខ្លាំងប៉ុន្មាន ជាពិសេសក្នុងជំនួបចុងក្រោយ ជាមួយក្រុមម្ចាស់ផ្ទះសាំងម៉ារ៉ាំង៕ AFP/VN