ភ្នំពេញ: គណៈកម្មាធិការប្រតិបត្តិ នៃសហព័ន្ធកីឡាបាល់ទាត់កម្ពុជា (FFC) ក្រោមការដឹកនាំរបស់លោកនាយឧត្តមសេនីយ៍ សៅ សុខា បានប្រកាសសម្រេចតែងតាំងលោក សាតូស៊ី សៃតូ (Satoshi Saito) ឱ្យធ្វើជានាយកប្រតិបត្តិនៃក្រុមហ៊ុនលីគបាល់ទាត់កម្ពុជា ដែលទើបត្រូវបានបង្កើតឡើង ដើម្បីធានានូវការអភិវឌ្ឍ និងភាពជោគជ័យ សម្រាប់បាល់ទាត់កម្ពុជា នៅថ្ងៃអនាគត រួមទាំងគោលដៅ ដែលបានកំណត់ទុក សម្រាប់ការប្រកួតកីឡាស៊ីហ្គេម ក្នុងឆ្នាំ ២០២៣ នៅកម្ពុជា។
លោក សៅ សុខា បានថ្លែង តាមសេចក្តីប្រកាសរបស់ FFC កាលពីថ្ងៃព្រហស្បតិ៍ថា៖ «នេះ គឺជាយុគសម័យថ្មីមួយនៃបាល់ទាត់កម្ពុជា ហើយបើយើងសម្លឹងមើលប្រទេស ដែលមានបាល់ទាត់ឈានមុខ ជុំវិញពិភពលោក គឺការមានលីគអាជីពប្រកបដោយគុណភាពខ្ពស់ នឹងរួមចំណែកនូវភាពជោគជ័យរបស់ក្រុមជម្រើសជាតិ និងពង្រឹងប្រព័ន្ធអេកូបាល់ទាត់ (Football Ecosystem) បានកាន់តែប្រសើរទៀតផង»។
ប្រធាន FFC រូបនេះ បានបញ្ជាក់ថា៖ «ខ្ញុំជឿជាក់ថា លោក សាតូស៊ី ដែលមានបទពិសោធច្រើន ក្នុងការគ្រប់គ្រងកីឡាបាល់ទាត់ ជាបុគ្គល ១ រូប ដែលស័ក្តិសមបំផុត ក្នុងការតម្រង់អនាគតរបស់ក្រុមហ៊ុនលីគបាល់ទាត់កម្ពុជា ដែលទើបបង្កើតថ្មីនេះ និងធ្វើការយ៉ាងជិតស្និទ្ធជាមួយភាគីពាក់ព័ន្ធរបស់យើង ដើម្បីភាពជោគជ័យថ្មីមួយទៀត នៅក្នុងវិស័យបាល់ទាត់កម្ពុជា»។
ជាមួយគ្នានេះដែរ នាយកប្រតិបត្តិក្រុមហ៊ុនលីគបាល់ទាត់កម្ពុជា លោក សាតូស៊ី សៃតូ ដែលមានបទពិដសោធ ធ្លាប់ធ្វើជាអ្នកគ្រប់គ្រងផ្នែកទីផ្សារនៅក្លិប FC Barcelona, ធ្វើជាអនុប្រធាននៃការិយាល័យបេសកកម្មពិសេស នៅសមាគមកីឡាបាល់ទាត់ជប៉ុន (JFA), ធ្វើជានាយកទីផ្សារ នៅសហព័ន្ធកីឡាបាល់ទាត់អាស៊ី (AFC) និងជាទីផ្សារប្រឹក្សារបស់ FIFA ហើយក៏ទើបតែបានបង្កើតការិល័យតំណាងនៅជប៉ុន សម្រាប់ទីផ្សារ GMR ដែលជាទីភ្នាក់ងារកីឡាមានឯកទេស ក្នុងសកម្មភាពឧបត្ថម្ភ សម្រាប់កីឡាអូឡាំពិកនៅទីក្រុងតូក្យូដែរនោះ បានប្តេជ្ញាថា នឹងជួយនាំយកភាពជោគជ័យបន្ថែមទៀតដល់បាល់ទាត់ខ្មែរ។
លោក សាតូស៊ី បានលើកឡើងថា៖ «ខ្ញុំបានឃើញពីការផ្លាស់ប្ដូររបស់បាល់ទាត់កម្ពុជាក្នុងរយៈពេល ៨ ឆ្នាំចុងក្រោយនេះ។ វាគឺជាកិត្តិយសដ៏ធំធេងរបស់ខ្ញុំ ដែលបានចូលរួមក្នុងដំណើរនេះដើម្បីនាំមកនូវភាពរុងរឿងដល់បាល់ទាត់កម្ពុជា។ ខ្ញុំសូមសម្ដែងនូវសេចក្ដីអរគុណយ៉ាងក្រៃលែង ចំពោះទំនុកចិត្ត និងភាពជឿជាក់ដ៏ធំធេងលើរូបខ្ញុំ ពីឯកឧត្តមប្រធាន និងសមាជិកគណៈកម្មាធិការប្រតិបត្តិរបស់ FFC»។
លោក សាតូស៊ី សៃតូ បានបញ្ជាក់ពីការប្តេជ្ញាចិត្តយ៉ាងដូច្នេះថា៖ «ដំណើរឆ្ពោះទៅមុខក្នុងស្ថានភាពជំងឺរាតត្បាតនេះ អាទិភាពរបស់ខ្ញុំ គឺការវាយតម្លៃឡើងវិញ អំពីការរៀបចំលីគ ក្នុងនោះមានទាំងរចនាសម្ព័ន្ធ ដើម្បីធ្វើឱ្យកាន់តែប្រសើរឡើងនូវការគ្រប់គ្រង និងសហការជាមួយក្លិបជាសមាជិក ដើម្បីលើកកម្ពស់ និងពង្រឹងនៃប្រតិបត្តិការទូទៅ និងបង្កើនចំណងមិត្តភាពរបស់យើងនៅក្នុងកិច្ចទំនាក់ទំនងជាមួយភាគីពាក់ព័ន្ធ ដើម្បីរួមគ្នាផ្លាស់ប្ដូរ និងអភិវឌ្ឍវិស័យបាល់ទាត់កម្ពុជារបស់យើង ប្រកបដោយចីរភាព និងនិរន្ដរភាព។ ខ្ញុំប្តេជ្ញាចំពោះផែនការនេះ ហើយបានត្រៀមខ្លួនជាស្រេច ដើម្បីធ្វើការជាមួយក្លិបសមាជិក និងអ្នកពាក់ព័ន្ធទាំងអស់ ដើម្បីនាំយកនូវភាពជោគជ័យបន្ថែមទៀត ដល់បាល់ទាត់កម្ពុជា»៕