ក្រុងហ្សួរិច: សហព័ន្ធបាល់ទាត់ពិភពលោក (FIFA) បានរំពឹងកាន់តែខ្ពស់ថា នឹងមានការធ្វើជាម្ចាស់ផ្ទះរួមពីប្រទេសអ៊ីស្រាអែល សម្រាប់ព្រឹត្តិការណ៍ World Cup នាពេលខាងមុខ ដោយរដ្ឋបាលរបស់នាយករដ្ឋមន្ត្រីអ៊ីស្រាអែល លោក Naftali Bennett កំពុងពិចារណាលទ្ធភាពនៃការដេញថ្លៃសុំសិទ្ធិរៀបចំការប្រកួតប្រជែងដ៏ធំផ្នែកបុរសនេះ ក្នុងឆ្នាំ ២០៣០។
ប្រធាន FIFA លោក Gianni Infantino បានបញ្ចប់ទស្សនកិច្ចរយៈពេល ២ ថ្ងៃ ក្នុងប្រទេសអ៊ីស្រាអែល នៅថ្ងៃអង្គារ ដោយការជួបជាមួយលោកនាយកមន្ត្រី Bennett និងប្រធានាធិបតី លោក Isaac Herzog។
អ្នកដឹកនាំស្ថាប័នគ្រប់គ្រងបាល់ទាត់ពិភពលោករូបនេះ ត្រូវបានសួរក្នុងដំណើរទស្សនកិច្ចរបស់គាត់ ពីលទ្ធភាពរបស់ប្រទេសអ៊ីស្រាអែល ក្នុងការធ្វើជាម្ចាស់ផ្ទះរៀបចំព្រឹត្តិការណ៍ដ៏ធំរបស់ FIFA នេះ។
តាមសេចក្ដីប្រកាសរបស់ FIFA លោក Infantino បានឱ្យដឹងថា៖ «អ្នកត្រូវតែមានទស្សនវិស័យ ក្ដីស្រមៃ និងមហិច្ឆតា។ នៅប៉ុន្មានខែកន្លងទៅថ្មីៗនេះ ខ្ញុំស្ថិតនៅឯក្រុងឌូបៃ ដែលនៅទីនោះ សហព័ន្ធបាល់ទាត់អេមីរ៉ាតអារ៉ាប់រួម និងសហព័ន្ធបាល់ទាត់អ៊ីស្រាអែល បានឈានដល់កិច្ចព្រមព្រៀងជាប្រវត្តិសាស្ត្រមួយ»។
«ខ្ញុំគិតថា ការធ្វើជាសហម្ចាស់ផ្ទះ នៅពេលអនាគត ដូច្នេះហេតុអ្វីមិនសាកល្បងស្រមៃ និងគិតពីរឿងនេះលមើល ពោលគឺមិនថា ក្នុងកម្រិតយុវជន ឬក៏កម្រិតមនុស្សពេញវ័យ បុរស ឬក៏ស្ត្រីនោះឡើយ ពីព្រោះព្រឹត្តិការណ៍ FIFA World Cup មាននូវថាមពលអាថ៌កំបាំងពិសេស ក្នុងការនាំឱ្យប្រជាជនមករួមគ្នា និងនាំឱ្យមនុស្សសាមគ្គីគ្នាជាធ្លុងមួយ»។
ក្នុងសេចក្ដីប្រកាសរបស់ប្រទេសអ៊ីស្រាអែល រដ្ឋបាលរបស់លោក Bennett បានឱ្យដឹងថា៖ «ប្រធាន FIFA បានលើកឡើងនូវគំនិតថា ប្រទេសអ៊ីស្រាអែល គួរតែធ្វើជាម្ចាស់ផ្ទះ World Cup ក្នុងឆ្នាំ ២០៣០ រួមជាមួយប្រទេសណាមួយ ក្នុងតំបន់ ដែលនាំមុខដោយប្រទេសអេមីរ៉ាតអារ៉ាប់រួម»។
តំបន់មជ្ឈិមបូព៌ាកំពុងត្រៀមខ្លួនធ្វើជាម្ចាស់ផ្ទះការប្រកួតបាល់ទាត់ផ្នែកបុរសដណ្ដើមពាន World Cup 2022 ក្នុងប្រទេសកាតា ដែលនឹងរៀបចំឡើងក្នុងចន្លោះខែវិច្ឆិកា និងខែធ្នូ នាឆ្នាំក្រោយ។
FIFA មានគម្រោង ក្នុងការជ្រើសរើសប្រទេស ដែលនឹងទទួលបានសិទ្ធិធ្វើជាម្ចាស់ផ្ទះឆ្នាំ ២០៣០ ក្នុងឆ្នាំ ២០២៤ ខាងមុខនេះ ហើយជាមួយគ្នានេះនៅឯសន្និសីទសារព័ត៌មាន ដែលរៀបចំដោយកាសែត Jerusalem Post លោក Infantino បានគូសបញ្ជាក់ពីទំហំនៃការដំណើរការក្នុងការធ្វើជាម្ចាស់ផ្ទះ សម្រាប់ព្រឹត្តិការណ៍ World Cup ផងដែរ៕ AFP/VN