.jpg)
ការប្រកួតកីឡាហែលទឹក ក្នុងព្រឹត្តិការណ៍កីឡាជាតិ លើកទី៣ និងកីឡាជនពិការ លើកទី១ ឆ្នាំ ២០២២។ រូបថត សហការី
ភ្នំពេញ៖ មន្រ្តីជំនាញរបស់សហព័ន្ធខ្មែរកីឡាហែលទឹក លោក ហែម គីរី បានអះអាងថា ការប្រកួតកីឡាហែលទឹក ក្នុងព្រឹត្តិការណ៍កីឡាជាតិ លើកទី៣ និងកីឡាជនពិការជាតិ លើកទី១ ឆ្នាំ ២០២២ នេះ សហព័ន្ធបានទទួលទាំងធនធានកីឡាករ កីឡាការិនី និងការពង្រឹងទៅសមត្ថភាពរបស់គណៈកម្មការបច្ចេកទេស សម្រាប់ត្រៀមឆ្ពោះទៅធ្វើជាម្ចាស់ផ្ទះស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ ២០២៣ នៅកម្ពុជា។
ដោយសារការប្រកួតកីឡាជាតិលើកទី៣ ឆ្នាំ ២០២២ នេះ ក្រសួងអប់រំ យុវជន និងកីឡា បានដាក់បញ្ចូលឱ្យមានការប្រកួតកីឡាជនពិការជាតិ ជាលើកដំបូងដែរនោះ គឺសហព័ន្ធខ្មែរកីឡាហែលទឹក បានសហការជាមួយភាគីព័ន្ធ ក្នុងការរៀបចំការប្រកួតកីឡាហែលទឹកទាំងក្រុមអត្តពលិកមិនពិការ និងពិការជាមួយគ្នាតែម្តង ហើយជាលទ្ធផល ត្រូវបានលោក ហែម គីរី បញ្ជាក់ថា ទទួលបានជោគជ័យ។
ជាមួយគ្នានេះ អគ្គលេខាធិការសហព័ន្ធខ្មែរកីឡាហែលទឹក លោក ហែម គីរី បានផ្តោតខ្លាំងទៅលើការប្រកួតកីឡាជនពិការជាតិ ជាលើកដំបូង ក្នុងព្រឹត្តិការណ៍កីឡាជាតិនេះ ដោយលោកបានចាត់ទុកថា ការប្រកួតនេះ បានផ្តល់នៅបទពិសោធបន្ថែមដល់សហព័ន្ធ ក៏ដូចជាផ្តល់ឱកាសដល់ក្រុមអត្តពលិកជនពិការ បានប្រកួតប្រជែងគ្នា ដើម្បីពង្រឹងសមត្ថភាព ក្នុងការត្រៀមខ្លួនទៅកាន់ការប្រកួតអាស៊ានប៉ារ៉ាហ្គេម ឆ្នាំ ២០២៣។
លោក ហែម គីរី បានថ្លែង នៅក្នុងពិធីការប្រកួត កាលពីល្ងាចថ្ងៃទី ២៣ ខែវិច្ឆិកាថា៖ «ទោះបីជាយើងបានរៀបចំការប្រកួតជារៀងរាល់ឆ្នាំ ជាពិសេសព្រឹត្តិការណ៍កីឡាជាតិនេះ វាជាលើកទី៣ ហើយ ប៉ុន្តែអ្វីដែលយើងកត់សម្គាល់នោះ គឺការរៀបចំកីឡាជនពិការជាតិ លើកទី១ នេះ វាជាបទពិសោធថ្មី ដែលយើងទទួលបាន ដូចជាធនធានកីឡា បច្ចេកទេសនៃការប្រកួត ជាពិសេសការរៀបចំការប្រកួត ដោយសារការប្រកួតកីឡាជនពិការ វាខុសប្លែកគ្នាពីការប្រកួតរបស់កីឡាករ កីឡាការិនី មិនពិការ»។
ជាមួយបច្ចេកទេសរៀបចំការប្រកួតហែលទឹកជនពិការ ដែលត្រូវបានកំណត់ខុសៗគ្នា ទៅតាមប្រភេទនៃពិការភាព គឺទី១ ពិការភាពផ្នែកកាយសម្បទា ទី២ ពិការភ្នែក និងទី៣ ពិការផ្នែកបញ្ញានោះ ត្រូវបាន លោក ហែម គីរី យល់ថា ជាចំណុចសំខាន់ ដែលគណៈកម្មការបច្ចេកទេស ត្រូវយល់ឱ្យបានច្បាស់ មុនពេលឈានទៅរៀបចំការប្រកួតអាស៊ានប៉ារ៉ាហ្គេម លើកទី១២ ឆ្នាំ ២០២៣។
លោក គីរី បានបញ្ជាក់ថា៖ «យើងត្រូវគិតគូរពីការរៀបចំការប្រកួតអាស៊ានប៉ារ៉ាហ្គេម ដែលយើងត្រូវធ្វើជាម្ចាស់ផ្ទះ ហើយបទពិសោធនេះ ក៏យើងត្រូវពង្រឹងបន្ថែមទៅលើគណៈកម្មការបច្ចេកទេសជាពិសេស ព្រោះពួកគាត់ នៅមានភាពថ្មីថ្មោង ក្នុងការដឹកនាំការប្រកួតផ្នែកជនពិការនេះ នៅឡើយទេ ហើយចំណុចសំខាន់មួយទៀត គឺយើងត្រូវការធនធានកីឡាករ កីឡាការិនីជនពិការឱ្យបានកាន់តែច្រើន ក្នុងការត្រៀមខ្លួនធ្វើជាម្ចាស់ផ្ទះអាស៊ានប៉ារ៉ាហ្គេម ឆ្នាំ២០២៣នេះ»។
សម្រាប់ការប្រកួតកីឡាហែលទឹកជនពិការ ក្នុងព្រឹត្តិការណ៍កីឡាជាតិ លើកទី៣ និងកីឡាជនពិការជាតិ លើកទី១ ឆ្នាំ ២០២២ នេះ មានការប្រកួតចំនួន ៩ វិញ្ញាសា ហើយជាលទ្ធផល ក្រុមអត្តពលិកជនពិការរបស់ខេត្តកំពត ឈរនៅលេខ ១ ដោយដណ្តើមបានមេដាយមាស ៣ ប្រាក់ ១ លេខ ២ ខេត្តកំពង់ចាម បានមាស ២ សំរឹទ្ធ ៣ លេខ ៣ រាជធានីភ្នំពេញ និង ខេត្តកំពង់ឆ្នាំង បានមេដាយមាស ១ ប្រាក់ ១ សំរឹទ្ធ ១ ដូចគ្នា។ ចំណែក ខេត្តកណ្តាល បានមាស ១ សំរឹទ្ធ ២ ខេត្តកែប មាស ១ សំរឹទ្ធ ១ ខេត្តត្បូងឃ្មុំ បានមេដាយប្រាក់ ៥ សំរឹទ្ធ ១ ខេត្តកំពងើស្ពឺ បានប្រាក់ ១ ប៉ុន្តែខេត្តតាកែវ មិនបានមេដាយទេ។
ចំណែកការប្រហែលទឹក មិនមែនជនពិការវិញ ខេត្តព្រៃវែង បានទទួលលេខ១ ដោយឈ្នះបានមេដាយមាស ៧ ប្រាក់ ៥ សំរឹទ្ធ ២ លេខ ២ ក្រសួងមហាផ្ទៃ បានមាស ៤ ប្រាក់ ៥ សំរឹទ្ធ ៣ លេខ ៣ រាជធានីភ្នំពេញ បានមាស ៤ ប្រាក់ ១ សំរឹទ្ធ ១ លេខ៤ ខេត្តកណ្តាល បានមាស ៣ ប្រាក់ ៣ សំរឹទ្ធ ៤ លេខ៥ ខេត្តបាត់ដំបង បានមាស ៣ ប្រាក់ ៣ សំរឹទ្ធ ២ លេខ៦ ក្រសួងសេដ្ឋកិច្ច និងហិរញ្ញវត្ថុ បានមាស ២ ប្រាក់ ៣ សំរឹទ្ធ ៧ លេខ៧ ខេត្តកោះកុង បានមាស ១ ប្រាក់ ២ និងសំរឹទ្ធ ១ ហើយខេត្តកំពង់ចាម បានប្រាក់ ២ និងមេដាយសំរឹទ្ធ ៣។
ជាមួយលទ្ធផលនេះ លោក ហែម គីរី បាននិយាយថា៖ «យើងឃើញថា កីឡាករ កីឡាការិនីវ័យក្មេងរបស់យើង មានលទ្ធភាព ក្នុងការបង្កើតសិទ្ធផលថ្មីៗ ហើយអ្វីយើងរំភើបចិត្តនោះគឺ បណ្តាខេត្តទាំងអស់ អាចដណ្តើមបានមេដាយមាស ប្រាក់ បានច្រើន ជាពិសេសខេត្តព្រៃវែង ឃើញដណ្តើមបានមេដាយមាសច្រើន ចំណែកខេត្តផ្សេងទៀត ក៏ដណ្តើមបានមេដាយផងដែរ ដោយសមាគម ខេត្ត និងក្រសួងចូលរួមទាំងអស់ មានធនធានកីឡាករល្អៗ ដែលដណ្តើមបានមេដាយមាសច្រើន»។
លោកអគ្គលេខាធិការសហព័ន្ធខ្មែរកីឡាហែលទឹករូបនេះ បានបន្ថែមថា៖ «សម្រាប់ការប្រកួតកីឡាជាតិ លើកទី១ និងលើកទី២ កន្លងមក យើងឃើញថា ក្រសួងខ្លះ អាចដណ្តើមបានមេដាយមាស ដាច់ឆ្ងាយពីបណ្តាខេត្ត ប៉ុន្តែលើកនេះ ទាំងខេត្ត និងក្រសួង ទទួលបានមេដាយប្រដំប្រសងគ្នា ហេតុនេះវាបានបង្ហាញថា វិញ្ញាសាកីឡាហែលទឹក មានការរីកចម្រើនច្រើន ទៅលើបណ្តាខេត្ត ក៏ដូចជាក្រសួង»៕
