ក្រុមបាល់ទាត់ជម្រើសជាតិអាល្លឺម៉ង់ នឹងត្រូវប្រយុទ្ធដើម្បីស្រោចស្រង់ក្នុងព្រឹត្តិការណ៍ World Cup នៅរាត្រីថ្ងៃអាទិត្យ ទី ២៧ ខែវិច្ឆិកា នេះ ក្នុងការប្រកួតដែលត្រូវតែឈ្នះជាដាច់ខាត ជាមួយនឹងក្រុមជម្រើសជាតិអេស្ប៉ាញ ស្របពេលដែលក្រុមជម្រើសជាតិបែលហ្ស៊ិក និងជប៉ុន នឹងសម្លឹងរកការឈ្នះកៅអីទៅលេងវគ្គ ១៦ ក្រុមចុងក្រោយ។
ក្រុមជម្រើសជាតិអាល្លឺម៉ង់ នឹងរងការធ្លាក់ចេញយ៉ាងអាម៉ាស់ពីយុទ្ធនាការ World Cup វគ្គចែកពូលជាលើកទី ២ ជាប់ៗគ្នា ប្រសិនបើពួកគេរងបរាជ័យក្នុងការប្រកួតពូល E ជាមួយនឹងក្រុមឡើងទម្រង់លេងអេស្ប៉ាញ នាកីឡដ្ឋាន Al Bayt។
ក្រុមម្ចាស់ជើងឯក ៤ សម័យកាលមួយនេះ ត្រូវបានធ្វើឲ្យប្រឈមមុខនឹងការធ្លាក់ចេញ ក្រោយពីបានរងបរាជ័យដ៏មិននឹកស្មានដល់ក្នុងលទ្ធផល ២-១ ក្រោមស្នាដៃក្រុមជម្រើសជាតិជប៉ុន ក្នុងការប្រកួតបើកឆាកនៃពូលរបស់ពួកគេ កាលពីថ្ងៃពុធ ទី ២៣ ខែវិច្ឆិកា កន្លងទៅ។
ការធ្លាក់ចេញយ៉ាបឆាប់រហ័សរបស់អាល្លឺម៉ង់ ពោលគឺក្នុងរយៈពេល ៤ ឆ្នាំ ក្រោយមកការធ្លាក់ចេញត្រឹមវគ្គចែកពូលដូចនេះ នាព្រឹត្តិការណ៍ World Cup នៅប្រទេសរុស្ស៊ី មិនត្រូវបានរំពឹងទុកឡើយ នៅមុនពេលយុទ្ធនាការនេះ។
លោក Hansi Flick គ្រូបង្វឹកនៃក្រុមជម្រើសជាតិអាល្លឺម៉ង់ បាននិយាយកាលពីថ្ងៃសៅរ៍ ទី ២៦ ខែវិច្ឆិកា ថា ក្រុមរបស់លោកមានគុណភាពក្នុងការស្រោចស្រង់វិញ នៅពេលប្រកួតជាមួយនឹងជើងខ្លាំងអេស្ប៉ាញ ដែលបានលត់ក្រុមជម្រើសជាតិកូស្តារីកា យ៉ាងចាស់ដៃក្នុងលទ្ធផល ៧-០ ក្នុងការប្រកួតបើកឆាករបស់ពួកគេ។
លោក Flick បានឲ្យដឹងថា៖ «យើងមានក្រុមមួយដែលមានគុណភាព និងអាចអនុវត្តន៍វិធីសាស្ត្រនានា ដែលយើងកំពុងតែរៀបចំបាន ហើយយើងពិតជាមានវិជ្ជមានលើការប្រកួតនេះ។ យើងត្រូវតែធ្វើដំណើរទៅកាន់ការប្រកួតទាំងភាពក្លាហាន និងការជឿជាក់លើគុណភាពរបស់យើងសម្រាប់ការប្រកួតនេះពេលប៉ះអេស្ប៉ាញ»។
ស្របពេលជាមួយគ្នានេះ លោក Luis Enrique គ្រូបង្វឹកនៃក្រុមជម្រើសជាតិអេស្ប៉ាញ បាននិយាយថា ក្រុមរបស់លោក ត្រូវប្រឈមមុខនឹងប្រកួតដ៏ខ្លាំងក្លាមួយ ក្នុងពេលពួកគេព្យាយាមស្វែងរកជ័យជម្នះ ដែលនឹងជួយឲ្យពួកគេទៅវគ្គ១៦ក្រុមចុងក្រោយ។ ប៉ុន្តែ ទោះបីជាយ៉ាងណា លោក Enrique បានបញ្ជាក់ថា សមត្ថភាពរបស់អាល្លឺម៉ង់ ក្នុង World Cup មានន័យថា អេស្ប៉ាញ មិនអាចមើលស្រាលទៅលើក្រុមម្ចាស់ជើងឯក ៤ សម័យកាលមួយនេះបានឡើយ។
គ្រូបង្វឹកអេស្ប៉ាញរូបនេះ បានឲ្យដឹងថា៖ «ពួកគេគឺជាម្ចាស់ជើងឯកពិភពលោក។ នៅពេលដែលអ្នកក្រឡេកមើលអាវរបស់ពួកគេ មានផ្កាយចំនួន៤លើអាវរបស់ពួកគេ។ ខ្ញុំពិតជាគោរពដល់ក្រុមកីឡាកររបស់ពួកគេណាស់។ ពួកគេជាកីឡាករកម្រិតពិភពលោក»។
បើអេស្ប៉ាញ ឈ្នះ នោះមានន័យថា ជប៉ុន ក៏នឹងឈ្នះកៅអីទៅវគ្គ ១៦ ក្រុមចុងក្រោយផងដែរ ប្រសិនបើពួកគេផ្តួលក្រុមជម្រើសជាតិកូស្តារីកា៕
កម្មវិធីប្រកួតនៅថ្ងៃនេះ៖
ជប៉ុន v កូស្តារីកា ម៉ោង 5 ល្ងាច
បែលហ្ស៊ិក v ម៉ារ៉ុក ម៉ោង 8 យប់
ក្រូអាស៊ី v កាណាដា ម៉ោង 11 យប់
អេស្ប៉ាញ v អាល្លឺម៉ង់ ម៉ោង 2 ទៀបភ្លឺ