ភ្នំពេញៈ លោក ភិរម្យ ដារ៉ា ធ្លាប់ប្រកួតប្រជែងនៅអក្សរសិល្ប៍ពុទ្ធសាសនបណ្ឌិត្យ ឆ្នាំ ២០២១ បានទទួលជយលាភីលេខ ២ ផ្នែកកំណាព្យរឿង និងនៅឆ្នាំ ២០២២ នេះលោកបានទទួលជយលាភីលេខ៣ផ្នែកំណាព្យរឿងសម្រាប់ការប្រកួតអក្សរសិល្ប៍នៅពុទ្ធសាសនបណ្ឌិត្យ ប៉ុន្តែលោកបានទទួលជយលាភីលេខ ១ ពានរង្វាន់ព្រះនាងឥន្ទ្រទេវី ឆ្នាំ ២០២២ ផ្នែកកំណាព្យរឿង «គុណការងារ»។
លោកបានប្រាប់ពីបទពិសោធន៍ដែលឈានដល់ការដណ្ដើមបានជយលាភីបន្តបន្ទាប់ដូច្នេះថា ៖ «សម្រាប់បទពិសោធន៍ខ្លួនខ្ញុំផ្ទាល់ដើម្បីយកពានមួយនេះ ខ្ញុំត្រូវគិតទៅលើឆ្អឹងរឿងជាមុន ថាតើមានរូបារម្មណ៍កម្រិតណា អត្ថន័យបែបណា អត្ថរសបែបណា? បានជួយអ្វីខ្លីដល់ខ្លួនឯង ដល់គ្រួសារ ជាពិសេសដល់សង្គមជាតិ»។
លោកថា ការសង្កត់ធ្ងន់លើតម្លៃវប្បធម៌ អភិរក្ស និងអភិវឌ្ឍន៍ក្រោយពេលចេញឆ្អឹងរឿងហើយ ពិនិត្យខ្លួនឯងថាគ្រប់គ្រាន់ហើយទើបបញ្ចូលជាភាសាកាព្យ ដោយចែកតាមវគ្គ តាមបទឱ្យស្របនឹងបរិយាកាសបទនីមួយៗ។ ការប្រើប្រាស់សម្ផស្សកាព្យឱ្យល្អិតល្អន់ តែមិនរឹតត្បិតពេកទេខ្លាចខូចរូបារម្មណ៍សាច់រឿង និយាយរួមកុំឱ្យណែងណងជ្រុលដូចគោះត្រឡោក ព្រោះនេះជាកំណាព្យរឿង មិនមែនកំណាព្យឧបទេសកថាទេ។ មួយទៀតគឺការយកចិត្តទុកដាក់លើអក្ខរាវិរុទ្ធឱ្យបានគ្រប់ជ្រុងជ្រោយ។
លោកក៏បានផ្ដាំផ្ញើជូនអ្នកដែលមានបំណងចង់ចូលរួមប្រកួតប្រជែងដណ្ដើមពានរង្វាន់ផ្នែកនិពន្ធផងដែរថា ដើម្បីចូលរួមលើកស្ទួយវិស័យតែងនិពន្ធ យុវជនគួរមានស្នាដៃចូលរួមប្រកួតឱ្យច្រើន ស្នាដៃនោះ ទោះជាកំណាព្យរឿងក៏ដោយ ជាប្រលោមលោកក៏ដោយ ក៏ត្រូវផ្ដោតសំខាន់លើសាច់រឿងដូចគ្នា គ្រាន់តែផ្នែកំណាព្យគិតពិន្ទុពិសេសលើរចនាប័ទ្ម និងភាពត្រឹមរបស់កំណាព្យថែមមួយកម្រិតទៀត។
លោក ភិរម្យ ដារ៉ា បានបន្តថា ចំពោះបេក្ខជនដែលចូលប្រឡងដើម្បីបានជយលាភី គួរតែសម្រិតសម្រាំងសាច់រឿងឱ្យស៊ីជម្រៅ ឱ្យបានគ្រប់ចំណុចដែលមានក្នុងសេចក្ដីប្រកាសប្រកួតប្រជែង។
សម្រាប់ឆ្នាំថ្មីនេះផ្នែកកំណាព្យរឿង លោកភិរម្យ ដារ៉ា នឹងមិនចូលរួមប្រកួតប្រប្រជែងទៀតទេ ដោយឡែកផ្នែកប្រលោមលោកខ្នាតខ្លី លោកមិនទាន់សម្រេចចិត្តនៅឡើយ។
សូមរំឭកថា លោកភិរម្យ ដារ៉ា កើតនៅស្រុកសេសាន ខេត្តស្ទឹងត្រែង។ ក្រោយពេលបញ្ចប់មធ្យមសិក្សាក្នុងឆ្នាំ ២០០២ នៅវិទ្យាល័យព្រះរាជបូជនីយកិច្ច ក្នុងខេត្តស្ទឹងត្រែង លោកបានបន្តការសិក្សានៅសាកលវិទ្យាល័យភូមិន្ទភ្នំពេញ ឯកទេសគណិតវិទ្យា ហើយបានបញ្ចប់បរិញ្ញាបត្រក្នុងឆ្នាំ ២០០៦ ។
លុះដល់ឆ្នាំ ២០១៤ លោកបានបន្តថ្នាក់បរិញ្ញាបត្រជាន់ខ្ពស់ បន្ថែមទៀតពីសាកលវិទ្យាល័យបៀលប្រាយ នៅខេត្តស្ទឹងត្រែង ឯកទេសគ្រប់គ្រងធុរកិច្ច។ លោក ភិរម្យ ដារ៉ា ចេះនិងអាចប្រើភាសាបរទេសបានដូចជា អង់គ្លេស ថៃ និងឡាវ។ បច្ចុប្បន្នលោក ជាមន្ត្រីរាជការនៅមន្ទីរការងារ និងបណ្តុះបណ្តាលវិជ្ជាជីវៈខេត្តស្ទឹងត្រែងផងដែរ។
ក្រៅពីស្នាដៃចូលរួមប្រកួតប្រប្រជែង លោកភិរម្យ ដារ៉ា ក៏មានស្នាដៃដែលបានចូលរួមចំណែកក្នុងវិស័យតែងនិពន្ធនេះបន្ថែមដែរ គឺនៅឆ្នាំ ២០២០ លោកបានចូលរួមចងក្រងសៀវភៅប្រលោមកំណាព្យ ១ ក្បាល មានអ្នកនិពន្ធ ១០ នាក់ និងមានរហូតដល់ ១០ រឿងក្នុងនោះ ហើយលោកក៏មានបំណងចងក្រងបោះពុម្ពបន្ថែមទៀតដែរ។
សូមបញ្ជាក់ផងដែរថា ការប្រឡងពានរង្វាន់ព្រះនាងឥន្ទ្រទេវី លើស្នាដៃតែងនិពន្ធសម្រាប់ឆ្នាំ ២០២២ នេះមានបេក្ខជនដាក់ស្នាដៃប្រឡង ចំនួន ១០៤ ស្នាដៃ ហើយឆ្នាំនេះ ក៏ជាឆ្នាំទី ២២ នៃការប្រឡងស្នាដៃតែងនិពន្ធប្រលោមលោក និងកំណាព្យរឿង ហើយក៏ជាឆ្នាំទី ៨ នៃការប្រគល់ពានរង្វាន់ព្រះនាងឥន្ទ្រីទេវីផងដែរ៕