.jpg)
មន្ត្រី និងថ្នាក់ដឹកនាំវិស័យកីឡា និងកីឡាករ កីឡាការិនី ដែលបានប្រកូតឈ្នះមេដាយ ក្នុងការប្រកួតកីឡាជាតិ លើកទី៣ ឆ្នាំ២០២២ ប្រភេទកីឡាសូហ្វតិន្នីស ដែលបានចាប់ផ្តើមពីថ្ងៃទី២៣ វិច្ឆិកា និងបញ្ចប់ នាថ្ងៃទី២៧ វិច្ឆិកា។ រូបថត ឈន ណន
ភ្នំពេញៈ មន្រ្តីក្រសួងមហាផ្ទៃ ប្រាប់ទៅកីឡាករ កីឡាការិនីសូហ្វតិន្នីសទាំងអស់ ដែលទើបបានបញ្ចប់ការប្រកួតក្នុងព្រឹត្តិការណ៍កីឡាជាតិ លើកទី៣ និងកីឡាជនពិការជាតិ លើកទី១ ឆ្នាំ ២០២២ ត្រូវចៀសឆ្ងាយពីគ្រឿងញៀនជាដាច់ខាត តែត្រូវផ្តោតឱ្យបានកាន់តែខ្លាំង ទៅលើការពង្រឹងសមត្ថភាពខ្លួនឯង ដើម្បីអាចឈានទៅបង្កើតបាននូវមោទនភាពជូនជាតិ គឺការដណ្តើមយកមេដាយ ពេលកម្ពុជា ធ្វើជាម្ចាស់ផ្ទះស៊ីហ្គេម លើកទី៣២ ឆ្នាំ ២០២៣។
លោក សរ សិទ្ធិ អនុរដ្ឋលេខាធិការក្រសួងមហាផ្ទៃ ទទួលជួយការងារដឹកនាំអគ្គលេខាធិការដ្ឋាននៃក្រុមប្រឹក្សាកីឡាក្រសួងមហាផ្ទៃ បានបង្ហាញពីមោទនភាពចំពោះកីឡាករ កីឡាការិនីរបស់ក្រសួងមហាផ្ទៃ ដែលដណ្តើមបានមេដាយមាសច្រើន ជាងគេពីការប្រកួតប្រជែងក្នុងព្រឹត្តិការណ៍កីឡាជាតិលើកទី៣នេះ។ ចំណែកក្រុមអត្តពលិកផ្សេងទៀត ក៏បានប្រឹងប្រែងប្រកួតដោយឆន្ទៈ ដើម្បីស្វែងរកបានមេដាយជូនដល់ក្រសួង និងរាជធានី-ខេត្តរបស់ពួកគេដូចគ្នា។
ទោះយ៉ាងណា លោកបានជំរុញឱ្យក្រុមអត្តពលិកទាំងអស់ ត្រូវបង្កើនការហ្វឹកហាត់ឱ្យបានខ្លាំងថែមទៀត ទើបអាចឈានទៅដណ្តើមយកជ័យជម្នះកាន់តែធំ និងកាន់តែអស្ចារ្យដែលជាមោទនភាពសម្រាប់ប្រទេសជាតិ ក្នុងការប្រកួតស៊ីហ្គេមលើកទី៣២ ឆ្នាំ ២០២៣។ លោកអះអាងថា ព្រឹត្តិការណ៍នេះ នៅសល់ពេលមិនច្រើនទៀតទេ សម្រាប់ក្រុមកីឡាករ កីឡាការិនីសូហ្វតិន្នីសកម្ពុជា ក្នុងការត្រៀមខ្លួន។
នៅចំពោះមុខប្រតិភូកីឡាសូហ្វតិន្នីស លោកសរ សិទ្ធិ បានថ្លែងថា៖ «ការប្រកួតកីឡាជាតិនេះជាការត្រៀមខ្លួនរបស់កីឡាករ កីឡាការិនី សម្រាប់ស៊ីហ្គេមនៅឆ្នាំក្រោយ ដែលយើងនៅសល់ពេលមិនយូរទេ។ បើគិតពីពេលនេះទៅ យើងមានពេលត្រៀមខ្លួនតែ ៥ ខែទៀតទេ»។
លោកបន្តថា៖«អ៊ីចឹងកូនៗក្មួយៗជាកីឡាករ កីឡាការិនី ត្រូវយកចិត្តទុកដាក់ហ្វឹកហាត់ទាំងកាយសម្បទា និងស្មារតី ដើម្បីយើងត្រៀមចូលរួមការប្រកួតស៊ីហ្គេម ឆ្នាំ ២០២៣។ នេះជាព្រឹត្តិការណ៍ ជាប្រវត្តិសាស្រ្ត ដែលយើងត្រូវខំប្រឹងប្រែងទាំងអស់គ្នា ដើម្បីមោទនភាពជាតិរបស់យើង ក្នុងនាមយើងជាខ្មែរ»។
ក្រៅពីជំរុញឱ្យក្រុមអត្តពលិកពង្រឹងសមត្ថភាព តាមរយៈការបង្កើនការហ្វឹកហាត់ ដើម្បីត្រៀមការប្រកួតស៊ីហ្គេម លោក សរ សិទ្ធិ បានប្រាប់ក្រុមអត្តពលិកទាំងអស់ ត្រូវចៀសឱ្យឆ្ងាយដាច់ខាតពីគ្រឿងញៀន។ «ប្អូនៗ ត្រូវតែចៀសឆ្ងាយពីគ្រឿងញៀន ជាដាច់ខាត ព្រោះកាលណាប្អូនៗទៅចូលរួមការប្រកួតស៊ីហ្គេម គេធ្វើតេស្ត។ អ៊ីចឹងយើងត្រូវលាងខ្លួន និងសម្អាតខ្លួនពីឥឡូវនេះទៅឱ្យហើយ បើសិនជាយើងមានពាក់ព័ន្ធនឹងបញ្ហាគ្រឿងញៀន»។
លោកអនុរដ្ឋលេខាធិការបន្ថែមថា៖ «ខ្ញុំសូមផ្តាំផ្ញើដល់ប្អូនៗជាកីឡាករ កីឡាការិនី ជាពិសេសតែម្តង គឺបញ្ហាគ្រឿងញៀនត្រូវចៀសឱ្យឆ្ងាយ ព្រោះបើកាលណាប្អូនៗជាប់ពាក់ព័ន្ធនឹងគ្រឿងញៀន វានឹងធ្វើឱ្យអនាគតរបស់យើងអាប់អួ នាំឱ្យបាត់បង់នូវកិត្តិយសខ្លួនយើង សង្គមគ្រួសារ និងកិត្តិយសរបស់ប្រទេសជាតិយើង។ ដូច្នេះយើងត្រូវចៀសវាងឱ្យឆ្ងាយពីគ្រឿងញៀន ជាដាច់ខាត»។
របាយការណ៍របស់គណៈកម្មការរៀបចំការប្រកួត ឱ្យដឹងថា ការប្រកួតកីឡាសូហ្វតិន្នីស ក្នុងព្រឹត្តិការណ៍កីឡាជាតិ លើកទី៣ ឆ្នាំ ២០២២ នេះ បានចាប់ផ្តើមតាំងពីថ្ងៃទី២៣ និងបានបញ្ចប់ កាលពីល្ងាចថ្ងៃទី ២៧ ខែវិច្ឆិកា ដោយមានប្រតិភូចូលរួមសរុបចំនួន ៨១ នាក់ ក្នុងនោះមានកីឡាករ ៣៨ នាក់ កីឡាការិនី ២៥ នាក់ ព្រមទាំងអ្នកដឹកនាំ និងគ្រូបង្វឹកចំនួន ១៨ នាក់ តំណាងឱ្យក្រសួង និងរាជធានី-ខេត្តចំនួន៧។
ជាលទ្ធផល សម្រាប់ការប្រកួតលើវិញ្ញាសាទាំង៧ រយៈពេល ៥ ថ្ងៃ កីឡាករ កីឡាការិនីរបស់ក្រសួងមហាផ្ទៃ បានក្រសោបយកមេដាយស្ទើរទាំងអស់តែម្តង ដោយពួកគេបានមេដាយមាស ៦ និងសំរឹទ្ធ ១ ដើម្បីឈរនៅចំណាត់ថ្នាក់លេខ ១។ រីឯលេខ ២ ខេត្តត្បូងឃ្មុំ ដោយបានមេដាយមាស ១ សំរឹទ្ធ ២ លេខ ៣ ខេត្តកណ្តាល បានមេដាយប្រាក់៣ សំរឹទ្ធ ១ លេខ ៤ ក្រសួងការពារជាតិ បានមេដាយប្រាក់២ លេខ៥ ខេត្តកំពង់ស្ពឺ បានប្រាក់ ១ សំរឹទ្ធ ២ លេខ ៦ ខេត្តព្រៃវែង បានប្រាក់ ១ និងលេខ ៧ ចុងក្រោយគេ ក្រុមអត្តពលិកខេត្តកំពង់ឆ្នាំង ឈ្នះបានមេដាយសំរឹទ្ធ ១។
ជាមួយគ្នានេះ លោក តុង សុផល អគ្គលេខាធិការរង និងជាប្រធានស្តីទីរបស់សហព័ន្ធកីឡាសូហ្វតិន្នីសកម្ពុជាបានថ្លែង ក្នុងពិធីប្រកួត កាលពីថ្ងៃទី ២៧ ខែវិច្ឆិកាថា ការប្រកួតកីឡាសូហ្វតិន្នីស ក្នុងព្រឹត្តិការណ៍កីឡាជាតិ រយៈពេល ៥ ថ្ងៃមកនេះ ជាការផ្តល់ឱកាសឱ្យកីឡាករ កីឡាការិនីម្នាក់ៗ បានបញ្ចេញនូវទេពកោសល្យ និងសមត្ថភាព ក៏ដូចជាវាស់ស្ទង់គុណភាពបច្ចេកទេស ដែលបានហ្វឹកហាត់កន្លងមក និងជាដំណើរឆ្ពោះទៅស៊ីហ្គេម លើកទី៣២ ឆ្នាំ ២០២៣។
លោកបន្ថែមថា៖ «លទ្ធផលរបស់កីឡាករ កីឡាការិនី ដែលទទួលបានជយលាភី នាពេលនេះ ពិតជាបានមកពីការខិតខំប្រឹងប្រែងហ្វឹកហាត់ជាប្រចាំ មានការព្យាយាមតស៊ូ គោរពវិន័យបានល្អ យកចិត្តទុកដាក់ និងគោរពតាមបទដ្ឋានបច្ចេកទេសក្នុងការប្រកួត។ ចំណែកគណៈកម្មការរៀបចំការប្រកួតរបស់យើង ក៏ទទួលបានឱកាសដកស្រង់ និងពង្រឹងនូវបទពិសោធន៍ ជាពិសេសបានបំពេញនៅចំណុចខ្វះខាត ក្នុងការគ្រប់គ្រងការរៀបចំការប្រកួតបន្ថែម ដើម្បីត្រៀមឆ្ពោះធ្វើម្ចាស់ផ្ទះស៊ីហ្គេម ឆ្នាំ ២០២៣ ដូចគ្នា»៕
