ភ្នំពេញៈ មន្រ្តីជំនាញរបស់សហព័ន្ធកីឡាវ៉ូស៊ូកម្ពុជា បានឱ្យដឹងថា ក្រុមការងារបច្ចេកទេសរបស់សហព័ន្ធនឹងធ្វើការពិនិត្យ និងវាយតម្លៃឱ្យបានច្បាស់លាស់ទៅលើកីឡាករ កីឡាការិនី ដែលទើបបានបញ្ចប់ការប្រកួត ក្នុងព្រឹត្តិការណ៍កីឡាជាតិ លើកទី៣ ឆ្នាំ ២០២២ នេះ ដើម្បីរកអ្នកមានសមត្ថភាព និងបច្ចេកទេស ចំនួន ៦ នាក់ សម្រាប់ត្រៀមចូលរួមការប្រកួតស៊ីហ្គេមលើកទី៣២ ឆ្នាំ ២០២៣ ជាមួយកីឡាករ កីឡាការិនីវ៉ូស៊ូជម្រើសជាតិកម្ពុជា ១ ក្រុមទៀត ដែលកំពុងធ្វើការហ្វឹកហាត់ នៅប្រទេសចិន។
បើទោះបីជាការប្រកួតកីឡាវ៉ូស៊ូ ក្នុងព្រឹត្តិការណ៍កីឡាជាតិ លើកទី៣ នេះ ត្រូវបានធ្វើឡើង ដោយមិនសូវមានអ្នកទស្សនា ហើយគ្មានអ្នកមុខអ្នកការចូលរួមជួយឧបត្ថម្ភគាំទ្រ ដូចប្រភេទកីឡាផ្សេងៗទៀតក្តី ប៉ុន្តែអគ្គលេខាធិការសហព័ន្ធកីឡាវ៉ូស៊ូកម្ពុជា លោក ម៉ៅ ចន្ថាវុធ បានមើលឃើញថា កម្រិតបច្ចេកទេសនៃការប្រកួតប្រជែងរបស់កីឡាករ កីឡាការិនីវ៉ូស៊ូ ក្នុងព្រឹត្តិការណ៍នេះ មានការកើនឡើង។
លោក ម៉ៅ ចន្ថាវុធ បានប្រាប់ ភ្នំពេញ ប៉ុស្តិ៍ នៅក្រោយពិធីបិទការប្រកួត កាលពីថ្ងៃទី ២៧ ខែវិច្ឆិកាថា៖ «តាមរយៈការប្រកួតកីឡាជាតិ លើកទី៣ ឆ្នាំ ២០២២ នេះ កីឡាវ៉ូស៊ូរបស់យើង មានការរីកចម្រើន ហើយការរីកចម្រើននេះ ធ្វើឱ្យយើងបានស្គាល់កីឡាករ កីឡាការិនី ដែលមានសក្តានុពល ឈានឆ្ពោះទៅហ្វឹកហាត់ ត្រៀមចូលរួមការប្រកួតស៊ីហ្គេម លើកទី៣២ ឆ្នាំ ២០២៣»។
តាមរបាយការណ៍របស់គណៈកម្មការប្រកួត បានឱ្យដឹងថា ការប្រកួតកីឡាវ៉ូស៊ូ ក្នុងព្រឹត្តិការណ៍កីឡាជាតិ លើកទី៣នេះ មានប្រតិភូកីឡា តំណាងឱ្យក្រសួង និងខេត្តចំនួន ៦ បានចូលរួម ហើយពួកគេបានធ្វើការប្រកួតនៅលើវិញ្ញាសាចំនួន ១៥ ដោយបានចាប់ផ្តើមពីថ្ងៃទី ២២ ដល់ថ្ងៃទី ២៧។
ជាលទ្ធផលនៃការប្រកួត ដែលធ្វើនៅក្នុងវិមានពហុកីឡដ្ឋានជាតិនេះ ក្រុមអត្តពលិករបស់ក្រសួងមហាផ្ទៃ ដណ្តើមបានមេដាយមាសច្រើនជាងគេ គឺមេដាយមាស ៦ ប្រាក់ ៦ សំរឹទ្ធ ១ ដើម្បីឈរនៅលេខ ១ រីឯលេខ ២ បានទៅក្រុមអត្តពលិកខេត្តកំពត ដោយឈ្នះបានមេដាយមាស ៤ ប្រាក់ ១ សំរឹទ្ធ៣ លេខ៣ ខេត្តព្រះវិហារ បានមាស ២ ប្រាក់ ៥ សំរឹទ្ធ ៤ លេខ ៤ ខេត្តសៀមរាប បានមាស ២ ប្រាក់ ២ សំរឹទ្ធ ៤ លេខ ៥ ខេត្តប៉ៃលិន បានមាស ១ សំរឹទ្ធ ៧ និងលេខ ៦ ខេត្តកណ្តាល បានមេដាយប្រាក់ ១ សំរឹទ្ធ ៥។
ជាមួយគ្នានេះ សម្រាប់អត្តពលិក ដែលមានសមត្ថភាពលេចធ្លោ និងទទួលបានជយលាភី នៅក្នុងការប្រកួតកីឡាជាតិ លើកទី៣ នេះ គឺក្រុមការងារបច្ចេកទេសរបស់សហព័ន្ធកីឡាវ៉ូស៊ូកម្ពុជា នឹងធ្វើការពិនិត្យបន្ថែមទៀត ដើម្បីធ្វើឱ្យមានភាពប្រាកដប្រជាទៅលើសមត្ថភាព និងបច្ចេកទេសរបស់ពួកគេ ដើម្បីដាក់ឱ្យចូលហ្វឹកហាត់ ក្នុងក្រុមជម្រើសជាតិ សម្រាប់ត្រៀមចូលរួមប្រកួតស៊ីហ្គេម ឆ្នាំ ២០២៣ ជាមួយក្រុមជម្រើសជាតិវ៉ូស៊ូកម្ពុជា ចំនួន ៩ នាក់ទៀត (ស្រី ១ នាក់) ដែលកំពុងធ្វើការហ្វឹកហាត់នៅប្រទេសចិន។
លោក ម៉ៅ ចន្ថាវុធ បានបញ្ជាក់ថា៖ «ដោយសារតែបច្ចុប្បន្ននេះ ក្រុមជម្រើសជាតិរបស់យើង គាត់កំពុងហ្វឹកហាត់ នៅប្រទេសចិន អ៊ីចឹងយើងនឹងជ្រើសរើសអ្នកមានសមត្ថភាព និងបច្ចេកទេសចំនួន៦នាក់ ចេញពីការប្រកួតកីឡាជាតិលើកនេះ ដាក់ចូលបន្ថែម នៅក្នុងក្រុមជម្រើសជាតិ សម្រាប់ត្រៀមការប្រកួតស៊ីហ្គេម ដោយយើងត្រូវប្រឹងប្រែងធ្វើយ៉ាងណា ឈានទៅយកមេដាយ នៅក្នុងស៊ីហ្គេម ឆ្នាំ ២០២៣ ឱ្យបាន»។
ទន្ទឹមនឹងនេះ លោក ម៉ៅ សុផល អគ្គលេខាធិការរងនៃអគ្គលេខាធិការដ្ឋានក្រុមប្រឹក្សាកីឡាក្រសួងមហាផ្ទៃ ដែលជាអធិបតីភាព ក្នុងពិធីបិទការប្រកួតកីឡាវ៉ូស៊ូ ក្នុងព្រឹត្តិការណ៍កីឡាជាតិលើកទី៣ កាលពីថ្ងៃទី ២៧ ខែវិច្ឆិកានេះ ក៏បានមើលឃើញដែរថា កីឡាករ កីឡាការិនីទាំងអស់ បានបង្ហាញពីការប្រកួតប្រជែងគ្នា ដោយស្មារតីកីឡា និងចេញពីឆន្ទៈដ៏ពិតប្រាកដ ដែលអាចមានសមត្ថភាពទៅប្រកួតតំណាងឱ្យជាតិបាន។
លោក ម៉ៅ សុផល បានថ្លែងថា៖ «តាមរយៈសមិទ្ធផល ដែលកើតចេញពីការខិតខំប្រឹងប្រែងរៀបចំរបស់លោកគ្រូ អ្នកគ្រូ និងមន្រ្តីបច្ចេកទេស ក្នុងរយៈពេល៥ថ្ងៃមកនេះ បានបង្ហាញនូវឆន្ទៈរបស់កីឡាករ កីឡាការិនីគ្រប់រូប ហើយសូមចូលរួមបន្តហ្វឹកហាត់ ដើម្បីឈានទៅប្រកួតតំណាងឱ្យជាតិ ក្នុងស៊ីហ្គេម ឆ្នាំ ២០២៣»។
យ៉ាងណាក៏ដោយ លោក សុផល បានជំរុញ និងលើកទឹកចិត្តដល់ក្រុមគ្រូបង្វឹក ត្រូវខំប្រឹងបន្ថែមជំនាញដល់កីឡាករ កីឡាការិនីរបស់ខ្លួន ទើបអាចឈានទៅដណ្តើមយកមេដាយជូនជាតិបាន។ «ខ្ញុំសង្ឃឹម និងជឿជាក់ថា បន្ទាប់ពីការប្រកួតកីឡាជាតិ លើកទី៣ នេះ លោកគ្រូ អ្នកគ្រូ និងខិតខំប្រឹងប្រែងបង្វឹកដល់កីឡាករ កីឡាការិនីរបស់យើងឱ្យបានកាន់តែខ្លាំង និងល្អថែមទៀត ដើម្បីយើងអាចឈានទៅបង្កើតស្នាដៃ តាមរយៈការដណ្តើមបានមេដាយ នៅស៊ីហ្គេម ឆ្នាំ ២០២៣»៕