ភ្នំពេញៈ ប្រធានសហព័ន្ធកីឡាតេក្វាន់ដូអាយធីអែហ្វកម្ពុជា (ITF) លោក កែវ រ៉េមី បានបង្ហាញការខកចិត្តជុំវិញការដក ITF របស់កូរ៉េខាងជើងចេញពីការប្រកួតកីឡាស៊ីហ្គេម លើកទី៣២ ឆ្នាំ ២០២៣ នៅកម្ពុជា។
លោក រ៉េមី ថ្លែង នៅក្នុងពិធីបិទការប្រកួតកីឡាតេក្វាន់ដូ ITF ក្នុងព្រឹត្តិការណ៍កីឡាជាតិ លើកទី៣ ឆ្នាំ ២០២២ នៅវិមានពហុកីឡដ្ឋានជាតិ កាលពីថ្ងៃទី ២៣ ខែវិច្ឆិកាថា៖ «វាជារឿងដែលសោកស្តាយបំផុតសម្រាប់កម្ពុជា ដែលប្រភេទកីឡាមានសក្តានុពលបំផុតរបស់ខ្លួន ត្រូវបានដកចេញវិញ នៅក្នុងការកំណត់ប្រភេទកីឡាចុងក្រោយរបស់ក្រុមប្រឹក្សាកីឡាអាស៊ីអាគ្នេយ៍ កាលពីដើមខែតុលា ឆ្នាំ ២០២២ នេះ ប៉ុន្តែដំណឹងដ៏ក្តៅគគុកនេះ មិនត្រូវបានផ្សព្វផ្សាយឱ្យបានទូលំទូលាយ ជាសាធារណៈនោះទេ»។
លោក កែវ រ៉េមី បានថ្លែងដោយសម្តែងការខកចិត្តខ្លាំង ដែលការព្យាយាមរបស់សហព័ន្ធកីឡាតេក្វាន់ដូអាយធីអែហ្វកម្ពុជា ព្រមទាំងគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍ លើកទី៣២ ឆ្នាំ ២០២៣ (CAMSOC) និងភាគីពាក់ព័ន្ធមួយចំនួនទៀត ក្នុងការដាក់ប្រភេទកីឡាតេក្វាន់ដូ ITF ចូលក្នុងព្រឹត្តិការណ៍ស៊ីហ្គេម ជាលើកដំបូង នៅឆ្នាំ ២០២៣ អស់រយៈពេលជាង ៣ ឆ្នាំមកនេះ ត្រូវបានរលាយបាត់ទៅវិញទាំងបែបនេះ។
លោកបានថ្លែងថា៖ «ពេលវេលា ស្ថិរភាព និងសន្ដិភាព ពិតជាមានសារៈសំខាន់ ដែលធ្វើឱ្យកីឡារបស់យើង កំពុងតែបោះពួយនៅលើឆាកអន្ដរជាតិ គេទទួលស្គាល់ ហើយយើងត្រៀមធ្វើម្ចាស់ផ្ទះស៊ីហ្គេម ឆ្នាំក្រោយ ក៏ប៉ុន្ដែអ្វីដែលអកុសលសម្រាប់សហព័ន្ធកីឡាតេក្វាន់ដូ ITF របស់យើង មិនបានចូលរួមស៊ីហ្គេម ហើយការមិនបានចូលរួម នៅស៊ីហ្គេម ឆ្នាំ ២០២៣ នេះ មិនមែនមានន័យថា យើងខ្សោយទេ តែដោយសារយើងខ្លាំងពេក»។ «ITF មានភាពល្បីល្បាញ តាមរយៈការឈានទៅដណ្តើមបានមេដាយមាស ទាំងកម្រិតអាស៊ាន អាស៊ី និងការប្រកួតជើងឯកពិភពលោក»។
គួររំឭកថា លោកនាយករដ្ឋមន្ត្រី ហ៊ុន សែន គឺជាអ្នកផ្តួចផ្តើម និងគាំទ្រខ្លាំងបំផុត ក្នុងការដាក់ប្រភេទកីឡាតេក្វាន់ដូ ITF របសកូរ៉េខាងជើង ចូលទៅក្នុងការប្រកួតស៊ីហ្គេម លើកទី៣២ ឆ្នាំ ២០២៣ នេះ ដោយលោកបានបញ្ជាក់ថា ការដាក់បញ្ចូលប្រភេទកីឡាតេក្វាន់ដូកូរ៉េខាងជើង (International Taekwondo Federation) និងតេក្វាន់ដូកូរ៉េខាងត្បូង (World Taekwondo Federation) នៅក្នុងស៊ីហ្គេម ឆ្នាំ ២០២៣ នេះ ដើម្បីបង្រួមបង្រួបឧបទ្វីបកូរ៉េ។
ថ្លែងក្នុងពិធីប្រគល់ប្រាក់រង្វាន់ដល់កីឡាការិនី អ៊ុក ស្រីមុំ កាលពីថ្ងៃទី ៥ ខែមករា ឆ្នាំ ២០២២ លោក ហ៊ុន សែន បានបញ្ជាក់ថា៖ «យើងដាក់ឱ្យប្រកួតទាំង ITF របស់កូរ៉េខាងជើង និង WT របស់កូរ៉េខាងត្បូង ព្រោះនេះជាផ្នែកមួយនៃការខិតខំ ដើម្បីឱ្យកូរ៉េទាំង ២ ឈានខ្ពស់ទៅរកការបង្រួបបង្រួមជាតិ»។
លោកនាយករដ្ឋមន្ត្រីបានបន្ថែមថា ការដាក់បញ្ចូលប្រភេទកីឡាទាំង ២ ក្នុងការប្រកួតស៊ីហ្គេមលើកទី៣២ ឆ្នាំ ២០២៣ នេះ ក៏ស្របតាមគោលបំណងរបស់ប្រធានធិបតីកូរ៉េខាងត្បូង លោក មូន ជេអុីន ដែលខិតខំប្រឹងប្រែងឱ្យមានកិច្ចព្រមព្រៀងសម្របសម្រួលរវាងកូរ៉េទាំង ២ មុនខ្លួនចប់អាណត្តិ។ «ក្នុងដំណើរការឆ្ពោះទៅកាន់ការសម្របសម្រួលនេះ វាគួរតែយើងដែលជាអ្នកខាងក្រៅ ដែលចង់ឃើញឧបទ្វីបកូរ៉េ មានសុខសន្តិភាព គួរគាំទ្រឱ្យកីឡាទាំង ២ នេះ បានចូលទៅប្រកួត។ បើ ១ បានចូល ហើយ ១ អត់បានចូល វាមានចរិតរើសអើងរបស់វា»។
តែទោះបីជាយ៉ាងណា ការព្យាយាមសម្រុះសម្រួលរបស់លោកនាយករដ្ឋមន្ត្រី ហ៊ុន សែន រវាងប្រទេសកូរ៉េខាងត្បូង និងកូរ៉េខាងជើង តាមរយៈរូបភាពជាការប្រកួតកីឡានេះ នៅតែមិនអាចទៅរួច ដោយសារតែវិវាទរបស់ប្រទេសទាំង២នេះ ចាប់ផ្តើមឡើងកម្តៅជាថ្មីធ្វើឱ្យទំនាក់ទំនងរបស់ប្រទេសជាបងប្អូនមួយនេះ មិនអាចស្រោចស្រង់់ ក្នុងការឈានទៅរកការបង្រួបបង្រួមឧបទ្វីបកូរ៉េ បាននោះទេ។
គួរបញ្ជាក់ថា សម្រាប់ការប្រកួតកីឡាស៊ីហ្គេម លើកទី៣២ ឆ្នាំ ២០២៣ នៅកម្ពុជានេះ បានកំណត់យក៣៨ប្រភេទកីឡាឱ្យប្រកួត រួមមានអត្តពលកម្ម (Track&Fieldនិង ម៉ារ៉ាតុង) កីឡាលើទឹក (ហែលទឹក, លោតទឹក, បាល់ទឹក និងហែលទឹកជើងទា) វាយសី បាល់បោះ (៥×៥ និង ៣×៣) ប៊ីយ៉ា ស្នូកឃ័រ ប្រដាល់សកល កាយវប្បកម្មអុក(អុកចត្រង្គ និងអុកចិន) ទោចក្រយាន (កង់គួក និងកង់ភ្នំ) គ្រីកឃីត (T20/Sixes និង T50/T20) កីឡារាំ កីឡាអេឡិចត្រូនិក គុនដាវ Floorball បាល់ទាត់ (បុរស-នារី) វាយកូនគោលកាយសម្ព័ន្ធ (Aerobic និង Artistic)។
ចំណែក ១៨ កីឡាហុកគី (រួមបញ្ចូលក្នុងសាល និងក្រៅសាល) ម៉ូតូទឹក យូដូ ការ៉ាតេ យុទ្ធគុនចម្រុះ (គុនល្បុក្កតោ, Arnis គុនដំបងរបស់ហ្វីលីពីន, ជឺជីតស៊ូ, ឃីកបុកសីង, វ៉ូវីណាម, គុនខ្មែរ) កីឡាឧបសគ្គ បញ្ចសីលា ប៉េតង់ ទូកក្ដោង សីដក់ សូហ្វតិន្នីស វាយកូនឃ្លីលើតុ តេក្វាន់ដូ WT វាយកូនបាល់ ប្រណាំងទូកប្រពៃណី ទ្រីយ៉ាត្លុង (រួមទាំង អាគ័រត្លុង និងឌូអាត្លុង) បាល់ទះ (ក្នុងសាល និងលើឆ្នេរខ្សាច់) លើកទម្ងន់ ចំបាប់ វ៉ូស៊ូ និងទី៣៨ គឺជាកីឡាសម្ដែង (Demonstration Sport) ឬកីឡា Teqball៕