The Phnom Penh Post Search

Search form

Logo of Phnom Penh Post newspaper Phnom Penh Post - សហព័ន្ធប្រដាល់គុនខ្មែរ ស្វាគមន៍ ធឿន ធារ៉ា ឱ្យចូលជម្រើសជាតិគ្រប់ពេល និងធានាផ្តល់ជូនក្របខ័ណ្ឌ

សហព័ន្ធប្រដាល់គុនខ្មែរ ស្វាគមន៍ ធឿន ធារ៉ា ឱ្យចូលជម្រើសជាតិគ្រប់ពេល និងធានាផ្តល់ជូនក្របខ័ណ្ឌ

Content image - Phnom Penh Post
ធឿន ធារ៉ា បានបង្ហាញ​ពាន និង​ខ្សែ​ក្រវាត់ ដែល​រូបគេ​ដណ្តើមបាន​ពីការ​ប្រកួត Thai Fight ពេលថតជាមួយ​លោក អេ ភូថង។ រូប​ថត សហការី

សហព័ន្ធប្រដាល់គុនខ្មែរ ស្វាគមន៍ ធឿន ធារ៉ា ឱ្យចូលជម្រើសជាតិគ្រប់ពេល និងធានាផ្តល់ជូនក្របខ័ណ្ឌ

ភ្នំពេញ៖ ថ្នាក់ដឹកនាំសហព័ន្ធ​កីឡាប្រដាល់គុនខ្មែរបានអះអាង​ថា ចំពោះ​បេក្ខភាព​កីឡាករ ធឿន ធារ៉ា គឺសហព័ន្ធ ស្វាគមន៍ឱ្យ​ចូល​ជម្រើសជាតិ ជា​និច្ច ហើយថែមទាំង​មានការ​ផ្តល់ជូននៅ​ក្របខ័ណ្ឌ ជាមន្រ្តី​រាជការជូន​​ផងដែរ ប៉ុន្តែរឿងដែលសំខាន់បំផុត គឺ​ខ្លាច​តែគ្រូ​បង្វឹក និង​​ម្ចាស់​ក្លិប មិន​ព្រម​ឱ្យ ធារ៉ា ចូលជម្រើសជាតិ។

ជុំវិញបញ្ហា​នេះ លោក ហេង សុខឃន អគ្គលេខាធិការសហព័ន្ធ​កីឡា​ប្រដាល់គុនខ្មែរ បាន​ទម្លាយ​ថា លោក តែម ម៉ឺន ប្រធានសហព័ន្ធ​កីឡា​ប្រដាល់គុនខ្មែរ បានចរចា​យក​កីឡាករ ធឿន ធារ៉ា ចូលក្រុម​ជម្រើសជាតិ​ប្រដាល់​គុនខ្មែរ តាំងពី​ ធឿន ធារ៉ា មិនទាន់ល្បីឈ្មោះ កាលពី​ឆ្នាំ​ ២០១៧ ប៉ុន្តែ​គ្រូ​បង្វឹក និងម្ចាស់​ក្លិប​មិនព្រម បើទោះបីជា លោកបាន​សន្យា​ផ្តល់​ក្របខ័ណ្ឌ​ឱ្យ​ក៏​ដោយ។

លោក សុខឃន បាន​និយាយ ក្នុង​សន្និសីទកាសែត កាលពី​ថ្ងៃទី​៤ ខែមករា ថា៖ «ចំពោះ ធឿន ធារ៉ា សហព័ន្ធ កំពុងតែ​គិតគូរ ខ្លាចតែ​គាត់មិនចូល មិន​ទទួល។ ដូច​ខ្ញុំប្រាប់អ៊ីចឹង យើង​​បាន​គិតគូរ​ និងហៅគាត់ចូលជម្រើសជាតិ តាំងពីឆ្នាំ​២០១៧ ប៉ុន្តែគាត់ថា អាស្រ័យលើ​លោកគ្រូ និងអ្នក​គ្រូ​របស់​គាត់ ហើយមុនស៊ីហ្គេម នៅ​វៀតណាម ក៏​យើងបានអញ្ជើញ​ឱ្យគាត់​ចូល​ដែរ តែគាត់មិនចូល ព្រោះ​កាលណា​មិន​មានកិច្ចសហការ​ពីគ្រូ និង​​ម្ចាស់​ក្លិបទេ គឺ​យើងមិនអាច​យក​គាត់​​ចូល​ជម្រើសជាតិបាន​ទេ»។

យ៉ាងណា​ក៏​ដោយ សម្រាប់ផែនការនៅចំពោះមុខ សម្រាប់ត្រៀម​ចូលរួមការ​ប្រកួត​ស៊ីហ្គេម លើកទី​៣២ ឆ្នាំ​២០២៣ នៅកម្ពុជា ដែលនឹងត្រូវ​ធ្វើ​ឡើង នៅក្នុង​ខែឧសភា ខាង​មុខ​នេះ សហព័ន្ធ​កីឡាប្រដាល់គុនខ្មែរ នៅតែ​ចិញ្ចឹម​ចិត្ត ចង់បាន ធឿន ធារ៉ា ចូល​ក្នុង​ក្រុម​ជម្រើស​ជាតិ ដើម្បីត្រៀមចូលរួមប្រកួតប្រជែង​យកមេដាយជូនជាតិ ក្នុងព្រឹត្តិការណ៍​ជា​ប្រវត្តិ​សាស្រ្ត នៅ​កម្ពុជា​​នេះ។

លោក ហេង សុខឃន បាន​បញ្ជាក់​ថា៖ «ទិសដៅ​បន្ទាប់ សម្រាប់ ធឿន ធារ៉ា គឺ​យើង​ស្វាគមន៍​ឱ្យគាត់​​ចូល​ជម្រើសជាតិ និង​ស្វាគមន៍​​ក្នុង​ការ​ផ្តល់​នូវ​ក្របខ័ណ្ឌ ប៉ុន្តែ​ខ្លាចតែ​ក្លិប​មិន​ឱ្យចូល ព្រោះ​កាលណា​ចូល​ជំរំ​ជម្រើស​ជាតិ ចេញ​ទៅប្រកួតតឹង។ ចេញ​ទៅប្រកួត ទាល់​តែ​សហព័ន្ធ សិក្សា​បាន​ច្បាស់លាស់ គឺ​ចាញ់ ឬ​ឈ្នះ​​​ក៏ដោយ សហព័ន្ធ​គិត ហើយមានកម្រិត មិនមែន​​ចង់ចេញ ចេះតែ​ចេញ​ទៅ​ប្រកួតនោះទេ។ សំខាន់កីឡាករជម្រើស​​ជាតិ ត្រូវប្រកួតកម្ម​វិធី​ជាតិ និង​​​ត្រូវ​លប់​ចោល​កម្ម​វិធី​ប្រកួត​ឯកជន ក្នុង​ករណី​កម្មវិធីជាន់គ្នា ប៉ុន្តែ​បើកីឡាករ​មិនមែន​ជម្រើស​ជាតិ ចេញ​ម៉ោងណា​ក៏បា​នដែរ»។

ជាមួយគ្នានេះអគ្គលេខាធិការសហព័ន្ធ​កីឡាប្រដាល់គុនខ្មែរ រូបនេះបានអះអាងថា ការ​ចង់បាន ធឿន ធារ៉ា ចូលជម្រើសជាតិ និងផ្តល់​ជូននូវ​ក្របខ័ណ្ឌ​នោះ មិនមែនជាការស៊ីសំណូក​នោះទេ ប៉ុន្តែ​ជា​ការ​លើកទឹកចិត្តដល់កីឡាករ មានសមត្ថភាព ដែលអាច​បង្កើតស្នាដៃ​ជូនជាតិ ព្រោះ​ពេលនេះ ធារ៉ា មានសមត្ថ​ភាពកាន់តែ​ខ្លាំង និងកាន់តែ​ល្បី​ឈ្មោះ បន្ទាប់ពី​រូបគេ ដណ្តើម​បាន​ខ្សែ​ក្រវាត់ នៅ Thai Fight កាលពី​ពេលថ្មីៗ​នេះ។

លោក ហេង សុខឃន បាន​សង្កត់ធ្ងន់​​ថា៖​ «មិនមានការ​ស៊ីសំណូក​ឱ្យក្របខ័ណ្ឌ​អ្វីនោះទេ គឺ​​ឱ្យតែ​កីឡាករ​ហ្នឹង មានសមត្ថភាពពិតប្រាកដ ចូលជម្រើសជាតិ​ពិតប្រាកដ ទទួលបាន​មេដាយ​ជូនជាតិ។ ដូច​កីឡាករ អេ អាំម៉ារីន និង ម៉ឺន មេឃា អ៊ីចឹង គឺគាត់ចេញ​ទៅ​ប្រកួត​បាន​មេដាយ​ជូន​ជាតិ​​ទាំងអស់ អ៊ីចឹង​នេះជាការ​លើកទឹកចិត្ត មិនមែនថា អ្នកហ្នឹងមិន​បានចូល​រួមប្រកួត យក​មេដាយ​ជូនជាតិ​​ផង​ ស្រាប់​តែ​លើក​ទឹកចិត្តដែរ ដូច្នេះ​គេ​ផ្តល់​ឱ្យសម្រាប់អ្នកទទួលបានជោគជ័យ ដើម្បីឱ្យ​កីឡាករ​ផ្សេងៗ​ទៀត យកជា​គំរូតាម»៕

អត្ថបទគួរចាប់អារម្មណ៍