ក្រុងប្រ៊ីសបាន៖ ក្រុមអ្នកស្រាវជ្រាវអូស្ដ្រាលីកំពុងសិក្សា «ការទទួលស្គាល់មុខ» សត្វកូអាឡា ដែលមានបំណងអង្កេតពីអត្ដចរិតរបស់ថនិកសត្វនេះ ក៏ដូចជាការផ្ដល់ជំនួយអភិរក្សពួកវា។
ក្រុមការងារមកពីសាកលវិទ្យាល័យ Griffith University ព្យាយាមប្រើប្រាស់បច្ចេកវិទ្យាវៃឆ្លាតដើម្បីសង្ខេតមើលមុខសត្វកូអាឡានីមួយៗ ពេលពួកវាឆ្លងកាត់ផ្លូវព្រៃក្នុងរដ្ឋឃ្វីនលែន។
ផ្លូវក្រោមដី និងស្ពានពិសេសសម្រាប់សត្វត្រូវបានតម្លើងនៅតាមវិថីមមាញឹកនានាក្បែរជម្រកសត្វកូអាឡា ដើម្បីឱ្យពួកវាធ្វើដំណើរដោយសុវត្ថិភាពចៀសឆ្ងាយពីកង់រថយន្ដ។
ជំនួយការសាស្ដ្រាចារ្យ ជុន ហ៊្សូ ដែលដឹកនាំការសិក្សា បាននិយាយថា គេជឿថា បច្ចេកវិទ្យាវៃឆ្លាត AI នឹងបញ្ចប់តម្រូវការត្រួតពិនិត្យកាមេរ៉ាដោយដៃ ដើម្បីកំណត់ពូជណាដែលត្រូវធ្វើដំណើរឆ្លងផ្លូវ។
លោកបាននិយាយថា៖ «បច្ចុប្បន្ន ជាមួយការអភិវឌ្ឍបច្ចេកវិទ្យាវៃឆ្លាតយ៉ាងឆាប់រហ័សរយៈពេល ១០ ឆ្នាំចុងក្រោយនេះ វាមានប្រសិទ្ធភាពគ្រប់គ្រាន់ក្នុងការជួយឱ្យស្គាល់មុខសត្វកូអាឡានីមួយៗពេលពួកវាឆ្លងផ្លូវ»។
ក្រុមអ្នកស្រាវជ្រាវធ្លាប់បានប្រើស្លាកឈ្មោះ និងបច្ចេកវិទ្យា GPS ដើម្បីតាមដានកូអាឡា។ សាកលវិទ្យាល័យ Griffith University បានឱ្យដឹងថា ក្រុមការងារនឹងធ្វើការជាមួយក្រុមអភិរក្សលើការបណ្ដុះបណ្ដាល AI ក្នុងការបែងចែករវាងសត្វនីមួយៗដោយអាស្រ័យលើរូបរាង និងចលនារបស់ពួកវា។
ពួកគេសង្ឃឹមថា ទិន្នន័យនេះនឹងបង្ហាញលទ្ធផលកាន់តែច្បាស់ពីរបៀបសត្វកូអាឡាឆ្លងផ្លូវប្រសព្វក្នុងព្រៃ ហើយថាតើផ្លូវប្រសព្វទាំងនោះអាចការពារដល់សត្វពីបញ្ហារបួសស្នាមបង្កើតឡើងដោយយានយន្ដ។
គម្រោងឧបត្ថម្ភដោយរដ្ឋាភិបាលកំពុងត្រូវបានស្ថាបនិកនៅតំបន់បំពាក់កាមេរ៉ាចំនួន ២០ក្បែរទីក្រុងប្រ៊ីសបាន ក្នុងខែកក្កដា។
កូអាឡា រស់នៅតាមឆ្នេរភាគខាងកើតប្រទេសអូស្ដ្រាលី តែត្រូវបានចាត់ទុកជាសត្វងាយរងគ្រោះចំពោះការផុតពូជ និងប្រឈមការគំរាមកំហែងជាច្រើន រួមទាំង ការបាត់បង់ជម្រកពីការកាប់បំផ្លាញព្រៃឈើ ការអភិវឌ្ឍ និងភ្លើងឆេះព្រៃ ដែលបំផ្លាញព្រៃឈើអស់ជាច្រើនចន្លោះឆ្នាំ ២០១៩ ឆ្នាំ ២០២០៕ AFP/HR