ខ្សែការពារ Maguire នឹងក្លាយជាសមាជិកថ្មីរបស់ Man Udt ក្នុងរដូវកាលថ្មីនេះ។ AFP
ក្រុងឡុងដ៍ៈ កីឡាករ Harry Maguire បានក្លាយជាខ្សែការពារមានតម្លៃខ្លួនថ្លៃជាងគេបំផុតក្នុងពិភពលោក បន្ទាប់ពីក្លិប Man Utd បានចុះកុងត្រាជាមួយរូបគេក្នុងតម្លៃខ្លួនចំនួន ៨០ លានផោនស្មើនឹង ៩៧ លានដុល្លារអាមេរិកកាលពីថ្ងៃចន្ទ។
ក្លិប Man Utd បាននិយាយក្នុងរបាយការណ៍តាមគេហទំព័ររបស់ខ្លួនថា៖ «ក្លិប Man Utd សូមធ្វើការបញ្ជាក់ពីការចុះកុងត្រាទិញយកកីឡាករ Harry Maguire ពីក្លិប Leicester City»។
របាយការណ៍ដដែលនេះបានបន្តថា៖ «កីឡាករ Maguire បានចុះកុងត្រារយៈពេល ៦ ឆ្នាំដោយអាចបន្តបាន ១ ឆ្នាំទៀត»។
ខ្សែការពារជម្រើសជាតិអង់គ្លេសវ័យ ២៦ ឆ្នាំរូបនេះត្រូវបានក្លិបនៅទីក្រុង Manchester ទាំង ២ នេះចរចាគ្នាយ៉ាងខ្លាំងនៅរដូវកាលកន្លងមកនេះ ប៉ុន្តែក្លិប Leicester បានដាក់តម្លៃខ្លួនរបស់រូបគេឲ្យលើសពីចំនួន ៧៥ លានផោនដែលក្លិប Liverpool បានចំណាយទៅឲ្យក្លិប Southampton ដើម្បីទិញយកខ្សែការពារ Virgil Van Dijk កាលពីខែមករា ឆ្នាំ ២០១៨។
កីឡាករ Maguire បានប្រាប់គេហទំព័រផ្លូវការរបស់ក្លិបនេះថា៖ «ខ្ញុំសប្បាយចិត្តណាស់ដែលបានចុះកុងត្រាជាមួយក្លិបដ៏អស្ចារ្យនេះ។ ខ្ញុំសប្បាយនឹងពេលវេលារបស់ខ្ញុំនៅក្លិប Leicester និងសូមអរគុណអ្នកគ្រប់គ្នានៅក្លិបនេះ និងអ្នកគាំទ្រទាំងអស់ចំពោះការគាំទ្រដ៏អស្ចារ្យរបស់ពួកគេនៅរយៈពេល ២ រដូវកាលកន្លងមកនេះ»។
ខ្សែការពាររូបនេះបាននិយាយទៀតថា៖ «ទោះយ៉ាងណាក៏ដោយនៅពេលក្លិប Manchester United មកគោះទ្វាររបស់អ្នក វាជាឱកាសដ៏ល្អមួយមិនគួរឲ្យជឿទាល់តែសោះ»។
កីឡាកររូបនេះបានបន្ថែមថា៖ «ជុំវិញការសន្ទនាជាមួយអ្នកគ្រប់គ្រងនោះ ខ្ញុំពិតជារំភើបចិត្តពីចក្ខុវិស័យ និងផែនការដែលគាត់មានសម្រាប់ក្រុមនេះ»។
កីឡាករ Maguire បានបញ្ជាក់ទៀតថា៖ «វាច្បាស់ណាស់ដែលគ្រូបង្វឹកក្លិបលោក Ole Gunnar Solskjaer កំពុងបង្កើនសមត្ថភាពក្រុមដើម្បីឈ្នះពានមួយចំនួននៅរដូវកាលថ្មីនេះ ហើយខ្ញុំកំពុងទន្ទឹងរង់ចាំជួបមិត្តរួមក្រុមថ្មីរបស់ខ្ញុំ និងចាប់ផ្ដើមរដូវកាលថ្មីផងដែរ»៕ SN
