.jpg)
អតីតតំណាងរាស្ត្រលោក កង គឹមហាក់ ពេលផ្ដល់បទសម្ភាសដល់កាសែតភ្នំពេញ ប៉ុស្ដិ៍។ ហុង មិនា
ការប៉ងប្រាថ្នា បូកនឹងការតស៊ូ ពេលខ្លះនឹងទទួលបានជោគជ័យដូចក្តីបំណង ប៉ុន្តែភាពជោគជ័យ នោះស្ថិតនៅជាមួយបុគ្គលអ្នក ប៉ងប្រាថ្នារយៈពេលយូរប៉ុនណាមិនអាចកំណត់បានឡើយ។ យ៉ាងណាមិញយុវជន កង គឹមហាក់ បានជួបនឹងភាពជោគជ័យក្នុងជីវិតដូចក្តីប្រាថ្នា ដែលការស្រមៃនោះ គឺលោកចង់ក្លាយជាតំណាងរាស្ត្រតាំងពីលោកស្ថិតក្នុងភាពជាយុវវ័យ ហើយក៏បានសម្រេចដូចបំណងមែន ប៉ុន្តែការពិតដែលកើតឡើងសម្រាប់លោកមិនស្ថិតស្ថេរក្នុងរយៈពេលមួយដែលចង់បាន។
ពិតណាស់អតីតតំណាងរាស្ត្រ កង គឹមហាក់ មុនជាប់ឆ្នោតក្លាយជាតំណាងរាស្ត្រ លោកធ្លាប់បានស្រមៃគិតដល់រឿងធ្វើនយោបាយដើម្បីបានក្លាយជាតំណាងរាស្ត្រ។ មិនយូរប៉ុន្មានក្តីប្រាថ្នារបស់លោកបានក្លាយជាការពិតដែលនាំឲ្យលោកក្លាយជាតំណាងរាស្ត្រនៅមណ្ឌលខេត្តកំពង់ចាមកាលពីបោះឆ្នោតឆ្នាំ ២០១៣ ក្នុងអាណត្តិទី ៥។
ប៉ុន្តែភាពជោគជ័យនេះនៅជាមួយលោកប្រមាណជាង ២ ឆ្នាំប៉ុណ្ណោះពោលគឺលោកបានអង្គុយកៅអីតំណាងរាស្ត្ររយៈពេលប្រមាណពាក់កណ្តាលអាណត្តិ ៥ ឆ្នាំ។ ខណៈពេលដែលកំពុងស្រមៃចង់ក្លាយជាតំណាងរាស្ត្រកាលពីជាង ១០ ឆ្នាំមុនលោក កង គឹមហាក់ ធ្លាប់ធ្វើជាជំនួយការអតីតតំណាងរាស្ត្រលោក ជាម ច័ន្ទនី។
កាលនោះលោកនៅក្រោមដំបូលគណបក្សប្រឆាំង សម រង្ស៊ី ប៉ុន្តែដោយសារតែមហិច្ឆតាចង់ទៅអង្គុយកៅអីក្នុងរដ្ឋសភាដែលជាតំណាងរាស្ត្រ លោកបានចាកចេញពីការងារជាជំនួយការ ហើយមកធ្វើជាសមាជិកគណបក្សនយោបាយក្នុងបក្សប្រឆាំងមួយទៀតគឺបក្សសិទ្ធិមនុស្សរបស់លោក កឹម សុខា ។
ក្រោយពីចាកចេញពីលោក ជាម ច័ន្ទនី ក្នុងដំបូលគណបក្ស សម រង្ស៊ី ជាមួយគ្នានោះលោក កង គឹមហាក់ បានភ្ជាប់ទំនាក់ទំនងដើម្បីបន្តធ្វើនយោបាយជាមួយអតីតតំណាងរាស្ត្រលោក ម៉ៅ មុនីវណ្ណ នាឆ្នាំ ២០១១។
កាលនោះលោក ម៉ៅ មុនីវណ្ណ បានចាកចេញពីបក្សប្រឆាំងសម រង្ស៊ី ទៅបន្តនយោបាយជាមួយគណបក្សប្រឆាំងមួយទៀតដែរ គឺបក្សសិទ្ធិមនុស្ស ដែលដឹកនាំដោយលោក កឹម សុខា ហើយពេលនោះលោក កង គឹមហាក់ ក៏បានទៅបន្តជីវិតនយោបាយជាមួយគ្នាក្រោមដំបូលគណបក្សសិទ្ធិមនុស្សដោយបានទទួលតួនាទីជាប្រធានបក្សប្រចាំខេត្តបន្ទាយមានជ័យ មុនគណបក្សទាំង ២ រួមកម្លាំងគ្នានាឆ្នាំ ២០១២ ដែលដាក់ឈ្មោះគណបក្សសង្គ្រោះជាតិដើម្បីតទល់នឹងគណបក្សកាន់អំណាចរបស់លោកនាយករដ្ឋមន្ត្រី ហ៊ុន សែន នោះ។
ក្រោយគណបក្សសង្គ្រោះជាតិបង្កើតឡើងលោកត្រូវបានថ្នាក់ដឹកនាំផ្លាស់ប្តូរឲ្យមកជួយក្រុមការងារបក្សខេត្តកំពង់ចាមដោយឈរឈ្មោះជាបេក្ខជនតំណាងរាស្ត្រលេខរៀងទី ១០ ហើយក៏បានជាប់ឆ្នោតជាតំណាងរាស្ត្រនៅ ខេត្តកំពង់ចាម ឆ្នាំ ២០១៣។
លោកនិយាយថា៖ «បើខ្ញុំនៅជាមួយឯកឧត្តម ជាម ច័ន្ទនី ទៀតខ្ញុំមានឱកាសត្រឹមតែធ្វើជាសហការីជំនួយការអីគាត់ប៉ុណ្ណឹង ប៉ុន្តែខ្ញុំមានសេចក្តីស្រមៃរបស់ខ្ញុំថា ខ្ញុំថ្ងៃណាមួយនឹងក្លាយខ្លួនទៅជាតំណាងរាស្ត្រដូច ជាម ច័ន្ទនី ដែរ។ ខ្ញុំចាំមិនភ្លេច ពេលដែលឯកឧត្តម ជាម ច័ន្ទនី ឲ្យខ្ញុំដើរមើលសភាហ្នឹងពីបន្ទប់មួយទៅបន្ទប់ មួយរហូតទៅដល់សាលប្រជុំដែលគេកំពុងតែរៀបចំ ព្រោះសភាហ្នឹងគេកំពុងដេគ័រក្នុងសាលប្រជុំសភាហ្នឹង»។
លោកបន្ថែមថា៖ «ពេលហ្នុងខ្ញុំនឹកភ្នក ហើយស្រមៃថាថ្ងៃណាមួយខ្ញុំនឹងមានឱកាសមកអង្គុយកៅអីនៅក្នុងសភាហ្នឹងដែរ។ ក្រោយមកបានខ្ញុំកើតគំនិតថា ខ្ញុំនឹងទៅប្រកបមុខរបរអីដើម្បីឲ្យមានចំណូល ហើយមានធនធានអាចទៅធ្វើសកម្មភាពនយោបាយបាន ហើយឲ្យក្លាយខ្លួនជាអ្នកនយោបាយ»។
បើទោះបីស្ថិតក្នុងស្ថានភាពនយោបាយមិនអំណោយផលយ៉ាងណាក៏ដោយ ប៉ុន្តែអតីតតំណាងរាស្ត្ររូបនេះបានប្តេជ្ញាមិនដកថយពីសង្វៀននយោបាយនោះឡើយ។ ក្នុងកាលៈទេសៈដែលស្ថានភាពនយោបាយវិលរកភាពប្រក្រតីវិញលោកនឹងបន្តជីវិតជាអ្នកនយោបាយឡើងវិញដោយរំពឹងយ៉ាងមុតមាំថា អតីតគណបក្សសង្គ្រោះជាតិនឹងឈ្នះឆ្នោតដឹកនាំប្រទេស ប្រសិនបើបរិយាកាសនយោបាយល្អ ហើយដំណើរការបោះឆ្នោតប្រកបដោយយុត្តិធម៌ត្រឹមត្រូវដែលមានការចូលរួមពីគណបក្សសង្គ្រោះជាតិនោះ។
ងាកមកស្ថានភាពនយោបាយបច្ចុប្បន្នវិញ អតីតតំណាងរាស្ត្រ ៥៥ រូប និងមន្ត្រីជាន់ខ្ពស់ឯទៀតៗសរុបចំនួន ១១៨ រូបនៃគណបក្សសង្គ្រោះជាតិដែលត្រូវបានបិទសិទ្ធិធ្វើនយោបាយរយៈពេល ៥ ឆ្នាំក្រោយបក្សរបស់ពួកគេត្រូវបានរំលាយជិត ៤ ខែមកនេះគឺត្រូវសំងំស្ងៀមមិនហ៊ាននិយាយ ឬក៏ធ្វើសកម្មភាពផ្សេងៗពាក់ព័ន្ធនឹងរឿងនយោបាយនោះទេនៅក្នុងប្រទេសកម្ពុជាសូម្បីប្រព័ន្ធផ្សព្វផ្សាយក៏មានការលំបាកក្នុងការទំនាក់ទំនងពួកគេដើម្បីធ្វើកិច្ចសម្ភាសន៍ដែរ។
ប៉ុន្តែកាលពីថ្ងៃទី ២៦ ខែកុម្ភៈអតីតតំណាងរាស្ត្រលោក កង គឹមហាក់ បានផ្តល់កិច្ចសម្ភាសន៍ដល់ភ្នំពេញប៉ុស្តិ៍ ដោយបង្ហាញនូវក្តីរំពឹងទៅលើការវិលត្រឡប់មកវិញរបស់អតីតគណបក្សសង្គ្រោះជាតិក្នុងការចូលរួមប្រកួតប្រជែងក្នុងការបោះឆ្នោតខែកក្កដាឆ្នាំនេះជាមួយគូប្រកួតរបស់ខ្លួនដែលមានទម្ងន់ប្រហាក់ប្រហែលគ្នា គឺគណបក្សប្រជាជនកម្ពុជាដែលជាបក្សកាន់អំណាចរបស់លោកនាយករដ្ឋមន្ត្រី ហ៊ុន សែន។
ការវិលត្រឡប់មកវិញនូវវត្តមានគណបក្សសង្គ្រោះជាតិនេះគឺលោកមើលឃើញថាប្រទេសកម្ពុជាក៏ជាប្រទេសដែលប្រកាន់នូវរបបប្រជាធិបតេយ្យ សេរី ពហុបក្ស ដែលបានអនុវត្តនូវគោលការណ៍ប្រជាធិបតេយ្យនេះតាំងពីការបោះឆ្នោតឆ្នាំ ១៩៩៣ ដោយមានការខិតខំជួយជំរុញពីអន្តរជាតិផងដែរ ដើម្បីឲ្យមានការបោះឆ្នោតដោយសេរី ក្រោមកិច្ចព្រមព្រៀងទីក្រុងប៉ារីសឆ្នាំ ១៩៩១។ លើសពីនេះទៀតខ្មែរ និងខ្មែរក៏អាចនិយាយគ្នារកដំណោះស្រាយរួមបានដែរដើម្បីប្រយោជន៍ជាតិ។
លោក កង គឹមហាក់ ថ្លែងថា៖ «ហើយខ្ញុំមានជំនឿថា ខ្មែរយើងអាចជជែកគ្នាបាននៅក្នុងកាលៈទេសៈមួយដើម្បីចូលរួមធ្វើការអភិវឌ្ឍប្រទេសហ្នឹងឲ្យបានរីកចម្រើនទាំងអស់គ្នាទៅហើយខ្ញុំជឿថា បើសិនជាមិនមានវត្តមានគណបក្សសង្គ្រោះជាតិបោះឆ្នោតឆ្នាំ ២០១៨ ទេ នេះបង្ហាញថាស្ថានភាពប្រទេសកម្ពុជា នឹងរអិលធ្លាក់ចេញពីប្រព័ន្ធប្រជាធិបតេយ្យពិភពលោកហើយ»។
បើតាមលោក កង គឹមហាក់ ក្រោយពីគណបក្សសង្គ្រោះជាតិត្រូវបានរំលាយ ហើយមន្ត្រីជាន់ខ្ពស់ជាង ១០០ នាក់ត្រូវបានដកសិទ្ធិមិនឲ្យធ្វើនយោបាយនោះ ទាំងថ្នាក់ដឹកនាំបក្សក៏ដូចជាសមាជិកនៅមូលដ្ឋានមានការព្រួយបារម្ភពីសុវត្ថិភាពរៀងៗខ្លួនដោយសារតែមានការគំរាមកំហែងផង និងការអូសទាញផង។
ការព្រួយបារម្ភនេះ គឺដោយសារថាភាគច្រើននៃថ្នាក់ដឹកនាំក៏ដូចជាសកម្មជន និងសមាជិកសមាជិការបស់គណបក្សសង្គ្រោះជាតិ មិនព្រមចុះចូលទៅតាមការលួងលោម ឬអូសទាញពីសំណាក់មន្ត្រីរបស់គណបក្សកាន់អំណាច។ ហេតុដូច្នេះបានជាថ្នាក់ដឹកនាំថា្នក់ជាតិក៏ដូចជាថ្នាក់ដឹកនាំតាមមូលដ្ឋានសម្រេចចិត្តភៀសខ្លួនចេញក្រៅប្រទេស ឬភៀសខ្លួនចេញពីភូមិឋានដើម្បីគេចវេះពីការគំរាមកំហែង។
(សូមរង់ចាំអានភាគបន្តសប្តាហ៍ក្រោយ)
