ភ្នំពេញៈ បុរសម្នាក់ រួមជាមួយសង្សារបានធ្វើអត្តឃាតដោយបាញ់សម្លាប់ខ្លួននៅក្នុងបន្ទប់នៃផ្ទះ ១ កន្លែង ស្ថិតនៅក្រុមទី ១៨ ភូមិ ៥ ក្រុងខេត្តព្រះសីហនុ ធ្វើឱ្យមានការភ្ញាក់ផ្អើលកាលពីល្ងាចថ្ងៃទី ១៦ ខែមករា ឆ្នាំ ២០២៤។ បណ្តាញព័ត៌មានក្នុងស្រុកបានផ្សាយថា ការធ្វើអត្តឃាតរបស់អ្នកទាំង ២ នេះ ទំនងជាកើតឡើងដោយសារភ្លើងប្រចណ្ឌ ខាងប្រុសបាញ់សម្លាប់នារីជាសង្សាររួចហើយក៏បាញ់សម្លាប់ខ្លួនឯងតាមក្រោយតែម្តង។
ករណី ១ ទៀតដែរ ដោយសារតែការប្រចណ្ឌ បុរសម្នាក់មានលំនៅភូមិព្រៃឈើទាល ឃុំប្រភ្នំ ស្រុកអង្គរជ័យ ខេត្តកំពត បានថតវីដេអូគំរាមចងកសម្លាប់កូនប្រុសរបស់ខ្លួន ដែលទើបមានអាយុ ៥ ឆ្នាំ បង្ហោះតាមបណ្តាញសង្គមហ្វេសប៊ុក ដើម្បីឱ្យប្រពន្ធបានឃើញ និងត្រឡប់មករកខ្លួនវិញ។ ចំពោះរឿងនេះ លោក ហ៊ន ប៊ុនស៊ីដេត អធិការនគរបាលស្រុកអង្គរជ័យ បានដាស់តឿនដល់ប្រជាពលរដ្ឋផ្សេងៗទៀត បើមានករណីស្រដៀង ឬដូចគ្នានេះ ឬបញ្ហាក្នុងគ្រសារផ្សេងៗ ត្រូវចេះអត់ធ្មត់ ហើយស្វែងរកដំណោះស្រាយដែលល្អ កុំធ្វើសកម្មភាពដោយមិនបានគិតវែងឆ្ងាយនាំឱ្យមានបញ្ហាប្រឈមនឹងផ្លូវច្បាប់។
លោកអធិការបានលើកឡើងថា ការធ្វើតាមកំហឹងមិនមែនជាដំណោះស្រាយល្អនោះទេ ហើយរឿងរ៉ាវទាំងអស់ក៏មិនមែនគ្មានដំណោះស្រាយនោះដែរ គ្រាន់តែថា តើអ្នកជួបបញ្ហាអាចរៀនដោះស្រាយបញ្ហាឱ្យបានល្អប្រសើរដោយរបៀបណាប៉ុណ្ណោះ។
លោកថ្លែងថា៖ «យើងចង់ឱ្យប្រជាពលរដ្ឋធ្វើម៉េច ឱ្យមានភាពអត់ធ្មត់ ហើយការប្រចណ្ឌហ្នឹងធ្វើម៉េចឱ្យកាត់បន្ថយ កុំឱ្យប្រចណ្ឌហើយដល់ថ្នាក់ធ្វើរបៀបនេះ អាហ្នឹងជារឿងមិនត្រឹមត្រូវទេ។ មានកិច្ចការអីគឺយើងជំនុំគ្នាពិភាក្សាគ្នារកដំណោះស្រាយទៅ ក្នុងរង្វង់គ្រួសារកុំឱ្យមានបញ្ហាអ៊ីចឹងទៀត ព្រោះបើមានបញ្ហាបែបហ្នឹងវាប្រឈមនឹងផ្លូវច្បាប់ហើយ»។
ការសម្លាប់ជីវិតឆៅៗ ភ្លាមៗដោយមិនបានគិតគូរវែងឆ្ងាយ ឧទាហរណ៍ដូចក្នុងករណីនេះ អាចបណ្តាលមកពីចិត្តរបស់បុគ្គលនោះ មិនធ្លាប់បានអប់រំ ជាពិសេសមិនធ្លាប់ហ្វឹកហាត់ធ្វើសេចក្តីល្អដាក់អ្នកដទៃ ហេតុនេះ នៅពេលជួបប្រទះរឿងរ៉ាវក្តៅក្រហាយផ្សេងៗ ចិត្តនោះស្ទុះចេញទៅធ្វើនូវអំពើអាក្រក់ ដោយគ្មានអ្វីជារបាំងអាចរារាំងបានឡើយ។
បញ្ហាផ្លូវចិត្តតែងកើតមានលើមនុស្សគ្រប់គ្នា គ្រាន់តែខ្លះមានតិច ខ្លះច្រើនប៉ុណ្ណោះ។ដំណោះស្រាយ នៃការគ្រប់គ្រងចិត្តឱ្យបានល្អ ភិក្ខុសង្ឃ និងអ្នកជំនាញចិត្តសាស្ត្រ ណែនាំឱ្យរៀនអប់រំចិត្តតាមព្រះពុទ្ធសាសនា ហាត់ពត់លត់ដំចិត្ត រៀនព្រមល្មមក្នុងជីវិត ចេះទទួលយកការពិតផង និងចេះរកការពិភាក្សាជាមួយអ្នកជំនាញផ្លូវចិត្តផង ដើម្បីជាពន្លឺបន្ថែមក្នុងការដោះស្រាយបញ្ហា មិនត្រូវយកការស្លាប់ដាក់មុខនោះទេ។
សម្តេចព្រះមហាអរិយវង្ស យ៉ន សេងយៀត សាកលវិទ្យាធិការរង នៃពុទ្ធិកសាកលវិទ្យាល័យព្រះសីហនុរាជ និងជាព្រះបាឡាត់គណរាជធានីភ្នំពេញ បានឱ្យដឹងថា ដើម្បីកុំឱ្យចិត្តស្ទុះទៅឃាត់មិនឈ្នះតួយ៉ាងដូចករណីអត្តឃាតនេះជាដើម បុគ្គលគួរតែហាត់ពត់ចិត្ត ដោយយកខ្លួនឯងជាឧបមា ចំពោះសេចក្តីស្រឡាញ់ នៃជីវិតរបស់ខ្លួន កុំបណ្តោយឱ្យភាពល្ងង់ខ្លៅគ្របដណ្តប់ចិត្តរហូតគិតថា ការធ្វើអត្តឃាតគឺជារឿងត្រឹមត្រូវ។
សម្តេចសង្ឃបញ្ជាក់ថា៖ «ត្រូវគិតថា ជីវិតនេះមានតម្លៃណាស់ ជនដទៃណា ដែលរស់នៅជុំវិញយើង ជនទាំងឡាយនោះគឺមានការស្រឡាញ់ជីវិតរបស់ខ្លួន ដូចយើងស្រឡាញ់ជីវិតរបស់យើងដែរ»។
ប្រភពដដែលបានឱ្យដឹងទៀតថា ការធ្វើអត្តឃាតមិនបាននាំមកនូវប្រយោជន៍អ្វីសូម្បីតែបន្តិចសម្រាប់ខ្លួនឯង និងអ្នកដទៃ ហេតុនេះ គ្រប់គ្នាត្រូវតែចៀសវាង នូវការធ្វើអំពើជាអកុសលជាឃាតកម្មណាមួយ ហើយធ្វើអត្តឃាតខ្លួនឯង ពីព្រោះទង្វើទាំង ២ នេះ មិនត្រឹមតែគ្មានផលចំណេញទេ ប៉ុន្តែថែមទាំង នាំមកនូវសេចក្តីទុក្ខដល់គ្រួសារជនរងគ្រោះផង គ្រួសារខ្លួនឯងផង និងនាំទុក្ខដល់សង្គមជាតិទៀតផង។
បើតាមសម្តេចសង្ឃ យ៉ន សេងយៀត បញ្ហាស្មុគស្មាញផ្លូវចិត្តជាផ្នែក ១ នៃជីវិតមនុស្ស ហើយវាមិនមែនជារឿងថ្មីនោះទេ។នេះជាធម្មជាតិមួយ ដែលតែងតែប្រាកដមានឡើងសម្រាប់គ្រប់គ្នា ដែលមានជីវិតតាំងនៅ។ ដើម្បីប្រឈមមុខចំពោះបញ្ហាទាំងនោះ តាមទស្សនវិជ្ជាព្រះពុទ្ធសាសនា អ្នកមានបញ្ហាផ្លូវចិត្ត ជាដំបូងត្រូវទទួលស្គាល់ថាខ្លួនមានបញ្ហា បន្ទាប់មកត្រូវដឹងថា បញ្ហាដែលកើតឡើងនោះជាអ្វី ហើយកើតចេញមកពីប្រភពណា។
ប្រភពក្នុងន័យនេះ ព្រះពុទ្ធសាសនា ចង់សំដៅលើ ចិត្តរបស់មនុស្សគឺគ្របដណ្តប់ដោយលោកធម៌ ៨ យ៉ាង គឺលាភ អលាភ យស អយស និន្ទា សរសើរ សុខ ទុក្ខ នៅពេលដឹងពីប្រភពបញ្ហាហើយ ចុងក្រោយគឺត្រូវរកដំណោះស្រាយដែលត្រឹមត្រូវ។
ព្រះតេជគុណបន្ថែមថា បញ្ហាផ្លូវចិត្តរមែងជះឥទ្ធិពលដល់ផ្លូវកាយ ព្រោះចិត្តនិងកាយមានការទាក់ទងគ្នា ពោលគឺបើចិត្តឈឺ នោះកាយក៏ឈឺទៅតាមនោះដែរ ហេតុនេះពេលឈឺចិត្តត្រូវស្វែងរកការពិភាក្សាជាមួយព្រះសង្ឃ ដែលមានការយល់ដឹងអំពីការអប់រំចិត្ត ឬក៏អាចស្វែងរកការពិភាក្សាជាមួយគ្រូពេទ្យ ដែលប្រឹក្សាយោបល់ផ្លូវចិត្ត។ ដោយឡែកពេលឈឺកាយ ក៏គួរណាស់តែទៅស្វែងរកពេទ្យផងដែរ ព្រោះគេមិនអាចទៅពឹងខុសទំនង ដូចជាទៅពឹងការរកស្រោចទឹក ឬគ្រូហ្ម វត្ថុស័ក្តិសិទ្ធិ បន់ស្រន់ឱ្យជាបាននោះទេ។
សម្តេចមានសង្ឃដីកាថា៖ «នៅក្នុងព្រះពុទ្ធសាសនាមិនមានណែនាំឱ្យបួងសួងដើម្បីព្យាបាលរោគទេ។ព្រះពុទ្ធជាម្ចាស់ពេលលោកអាពាធ លោកឱ្យពេទ្យមកមើលអ៊ីចឹងដែរ ពរ ពាក់ព័ន្ធនឹងរាងកាយព្រះអង្គ អ៊ីចឹង ការទៅស្នើសុំបួងសួងដើម្បីឱ្យជារោគ មិនគួរមានទេ ពរ ព្រោះវានាំមកនូវផលអវិជ្ជមានមិនផ្តល់អ្វីជាដុំកំភួននោះទេ គួរជឿលើខ្លួនឯង និងវិធីសាស្ត្រព្យាបាលរបស់គ្រូពេទ្យ»។
ភិក្ខុអគ្គធម្មោ ជ្រួញ ពិសី គង់នៅវត្តបឹងរាំង សង្កាត់អូរម៉ាល់ ក្រុង-ខេត្តបាត់ដំបង មានសង្ឃដីកាថា នៅពេលមានបញ្ហាស្មុគស្មាញក្នុងជីវិត បញ្ហាផ្លូវចិត្តផ្សេងៗ អ្នកជួបបញ្ហាផ្ទាល់ត្រូវសិក្សាស្វែងយល់ សង្កេតពិនិត្យមើលខ្លួនឯង ជាដំបូងត្រូវដឹងពីមូលហេតុនៃបញ្ហា ហើយត្រូវពិនិត្យមើលលទ្ធភាពជាក់ស្តែងក្នុងការដោះស្រាយ។បើដោះមិនចេញក៏មិនត្រូវបង្ខំនោះដែរ គឺត្រូវសម្រាកហើយរិះរកវិធីសាស្ត្រផ្សេងៗ ឬរកអ្នកណាដែលអាចផ្តល់ប្រឹក្សា ផ្តល់ដំណោះស្រាយល្អបាន។
ប្រភពដដែលបន្តថា សំខាន់គឺត្រូវចេះទទួលស្គាល់ការពិត ទទួលស្គាល់រឿងរ៉ាវដែលកើតមានឡើងក្នុងជីវិត និងចេះរក្សាចិត្តកុំឱ្យបែកគំនិតគិតរកទៅបញ្ចប់ជីវិត ព្រោះថាទោះបីជីវិតត្រូវបញ្ចប់ ក៏មិនអាចដោះស្រាយបញ្ហាបានដែរ។ ការដោះស្រាយបញ្ហាឱ្យអស់ពីលទ្ធភាពជារឿងល្អបំផុត។
បើតាមភិក្ខុអគ្គធម្មោ ជ្រួញ ពិសី ផ្នត់គំនិតជំនឿរបស់ប្រជាពលរដ្ឋខ្មែរដែលមានតាំងពីយូរមកហើយ គឺពេលមានបញ្ហាទៅពឹងរក គ្រូពូកែ វត្ថុស័ក្តិសិទ្ធិ ការបន់ស្រន់ផ្សេងៗ ដែលសកម្មភាពទាំងនោះការពិតមិនបានជួយអ្វីឱ្យត្រូវត្រង់តាមសេចក្តីពិតនៃការដោះស្រាយបញ្ហាឡើយ ពេលខ្លះបែរជាបន្ថែមបន្ទុកបញ្ហាទៅវិញ។
ព្រះតេជគុណបញ្ជាក់ថា៖ «វិធីសាស្ត្រនៃការដោះស្រាយបញ្ហាយើងមិនអាចរកគ្រូស្រោចទឹក ឬក៏រកវត្ថុស័ក្តិសិទ្ធិ មកដើម្បីឱ្យរួចរំដោះពីរឿងទាំងអស់ហ្នឹងបានទេ ជួបបញ្ហាណាដោះស្រាយបញ្ហាហ្នឹងព្រោះបញ្ហានេះ យើងអាចដោះស្រាយដោយសមត្ថភាពរបស់ខ្លួនឯងផ្ទាល់ យើងមិនអាចទៅរកវត្ថុស័ក្តិសិទ្ធិបារមីគ្រូពូកែមកជួយបានទេ»។
ចំពោះការពឹងរកវត្ថុស័ក្តិសិទ្ធិគ្រូបារមីផ្សេងៗនេះ ក៏មានបុគ្គលខ្លះឈឺកាយ ប៉ុន្តែបែរជាមិនព្រមទៅរកពេទ្យព្យាបាលក៏មាន ព្រោះគេជឿថា ការឈឺនោះបណ្តាលមកពីខុសនេះខុសនោះ ហើយក៏ទៅរកគ្រូមើល។ ចំណុចនេះភិក្ខុអគ្គធម្មោ ជ្រួញ ពិសី ប្រាប់ថា ជឿអ្វីក៏ជឿចុះ ប៉ុន្តែយ៉ាងណាក៏ដោយ កុំភ្លេចយកអ្នកជំងឺទៅពិនិត្យនៅមន្ទីរពេទ្យផង ដើម្បីពិនិត្យឱ្យដឹងការពិត និងអាចព្យាបាលទាន់ពេលវេលា។
ព្រះតេជគុណមានសង្ឃដីកាថា៖ «រឿងជំនឿ ជនគ្រប់រូបមានសិទ្ធិនៅក្នុងការជ្រើសរើស ប៉ុន្តែសូមប្រាកដដោយការថ្លឹងថ្លែង កុំឱ្យចោលវិទ្យាសាស្ត្រ ព្រោះសម័យកាលយើងនេះជាសម័យកាលដែលដើរបែបវិទ្យាសាស្ត្រ សូម្បីការអប់រំក៏បែបវិទ្យាសាស្ត្រដែរ»។
លោក ទូច បូរិទ្ធ ប្រធានមន្ទីរពិសោធន៍វេជ្ជសាស្ត្របេសឡាប បាននិយាយថា ទាក់ទងនឹងបច្ចេកទេសសុខាភិបាល ដើម្បីឱ្យសុក្រឹតលុះត្រាតែអ្នកជំងឺមកធ្វើការពិនិត្យជាក់ស្តែងជាពិសេសឆ្លងកាត់ការពិនិត្យតាមរយៈមន្ទីរពិសោធន៍ ប៉ុន្តែបើអ្នកជំងឺ មិនបានទៅរកការពិនិត្យបានត្រឹមត្រូវតាមវិទ្យាសាស្ត្រសុខាភិបាល បែរទៅជាទៅពឹងរកគ្រូមន្តអាគម គ្រូបារមីផ្សេងៗព្យាបាលនោះ គឺគ្រូទាំងនោះបានត្រឹមតែព្យាបាលតាមទម្លាប់របស់ពួកគាត់ប៉ុណ្ណោះ ហើយកត្តានេះមិនត្រឹមតែមិនជា ពេលខ្លះនាំឱ្យអ្នកជំងឺកាន់តែឈឺធ្ងន់ធ្ងរ។
លោក ទូច បូរិទ្ធ បានលើកឡើងថា មានជំងឺមួយចំនួនដែលនៅក្នុងផ្នត់គំនិតប្រជាពលរដ្ឋខ្មែរយល់ថា ត្រូវខ្មោចកាច់ ឬត្រូវអំពើគេ ហើយក៏ប្រញាប់ទៅរកគ្រូមន្តអាគមឱ្យជួយព្យាបាល ក្នុងនោះមានជំងឺមួយដែលឧស្សាហ៍ឈឺចុកចាប់តាមសាច់ដុំ តាមសន្លាក់ផ្សេងៗ ដែលតាមការពិតជំងឺទាំងនេះកើតឡើងដោយសារការលើសអាស៊ីត និងបញ្ហាសន្លាក់ប៉ុណ្ណោះ ក្រៅពីនេះនៅមានជំងឺស្កន្ទជាន់ ឆ្កួតជ្រូកជាដើម ក៏ពលរដ្ឋមួយចំនួនយល់ថា ត្រូវខ្មោចធ្វើ ឬត្រូវអំពើគេដែរ។
លោកប្រធានមន្ទីរពិសោធន៍វេជ្ជសាស្ត្របេសឡាប បានលើកឡើងថា ដើម្បីកុំឱ្យជំងឺកាន់តែធ្ងន់ សាច់ញាតិអ្នកជំងឺគួរតែឆ្លៀតយកអ្នកជំងឺទៅពិនិត្យតាមវិទ្យាសាស្ត្រសុខាភិបាលឱ្យបានច្បាស់លាស់ ដើម្បីទទួលបានការព្យាបាលត្រឹមត្រូវតាមក្បួនវិជ្ជសាស្ត្រទាន់ពេលវេលា ជាជាងទៅរកគ្រូមន្តតអាគម ឬគ្រូដោះអំពើផ្សេងៗ ។
លោកបញ្ជាក់ថា៖ «សម័យមុនយើងអត់ទាន់មានភាពជឿនលឿនផ្នែកសុខាភិបាល តែឥឡូវយើងឈានចូលដល់ចំណុចខ្ពស់ហើយ រហូតដល់សូម្បីយើងឈឺក្បាលមិនបាត់ មិនជា ក៏មានបច្ចេកទេសក្នុងងការពិនិត្យមើលច្រើនដែរ ពីមុនយើងឈឺក្បាលយល់ថាគេធ្វើអំពើធ្វើអី តែការពិតដុះដុំសាច់ក៏ឈឺក្បាល ខ្វះគ្រាប់ឈាមក៏ឈឺក្បាល យើងអាចវិភាគមើលបាន»។
លោក ម៉េត តារាមូន វេជ្ជបណ្ឌិតឯកទេសជំងឺផ្លូវចិត្ត និងគ្រឿងញៀន នៃមន្ទីរសម្រាកព្យាបាលជំងឺផ្លូវចិត្ត អាម៉ារី បានឱ្យដឹងថា ជំងឺផ្លូវចិត្តមានជាង ២០០ ប្រភេទ ក្នុងនោះអ្នកជំងឺផ្លូវចិត្តមួយចំនួនមិនអាចផ្សាភ្ជាប់រវាងការពិត និងការស្រមើលស្រមៃបានទេ ហេតុនេះនៅពេលអ្នកជំងឺមានរោគសញ្ញា និងការគិតប្លែកៗ មិនថាតែនៅកម្ពុជាទេ ជាពិសេសនៅតំបន់អាស៊ីអាគ្នេយ៍តែម្តង តែងគិតទៅដល់រឿងជំនឿអរូបិយ ពោលគឺពេលឈឺតែងគិតថា ត្រូវអំពើគេ ឬក៏ត្រូវខ្មោចធ្វើជាដើម។
លោកបន្តថា ការយកអ្នកជំងឺទៅគ្រូព្យាបាលតាមជំនឿ មិនអាចជួយឱ្យអ្នកជំងឺបានជាសះស្បើយត្រឹមត្រូវនោះទេ ផ្ទុយទៅវិញអាចបណ្តាលឱ្យអ្នកជំងឺកាន់តែធ្ងន់ធ្ងរនិងពិបាកព្យាបាល រហូតមានអ្នកខ្លះ ហួសពេលសម្រាប់ការព្យាបាលតាមវេជ្ជសាស្ត្រតែម្តង។
លោកថ្លែងថា៖ «នៅពេលដែលយើងផ្សាភ្ជាប់ជាមួយជំងឺ និងជំនឿហ្នឹង វាធ្វើឱ្យជះឥទ្ធិពលមិនល្អខ្លាំង ប៉ះពាល់ខ្លាំងណាស់ដល់អ្នកជំងឺ។ ជំងឺគាត់ត្រូវញ៉ាំថ្នាំជាសះស្បើយ បែរជាទៅរកគ្រូខ្មែរ ៤-១០ នាក់ ធ្វើបាបគាត់គ្រប់យ៉ាង នាំឱ្យអ្នកជំងឺកាន់តែពិបាកទៅៗ»។
ប្រភពដដែលបានឱ្យដឹងថា ការព្យាបាលតាមរយៈការអប់រំផ្លូវចិត្តតាមបែបព្រះពុទ្ធសាសនា គឺមានអំណោយផលល្អនិងអាចជួយបានយ៉ាងច្រើនចំពោះអ្នកជំងឺផ្លូវចិត្ត ដូចជាការធ្វើសមាធិជាដើម។ អ្នកជំនាញរូបនេះប្រាប់ថា មានមូលហេតុ ៣ យ៉ាងដែលនាំឱ្យមនុស្សមានបញ្ហាផ្លូវចិត្ត គឺ កត្តាផ្លូវចិត្ត ផ្លូវកាយ និងសង្គម។
លោកបញ្ជាក់ថា កត្តាទី១ គឺបញ្ហាផ្លូវចិត្តអាចកើតឡើងដោយសារបុគ្កលិកលក្ខណៈរបស់មនុស្សពីកំណើត ចូលចិត្តគិតច្រើន បារម្មណ៍និងខ្វល់ខ្វាយច្រើន ចំណែកទី២ ទាក់ទងនិងកត្តាផ្លូវកាយ គឺទាក់ទងនឹងភាពមិនធម្មតានៃខួរក្បាល កាលណាខួរក្បាលមានភាពមិនធម្មតាផ្នែកណាមួយក៏ជះឥទ្ធិពលនាំឱ្យមានបញ្ហាផ្លូវចិត្តផងដែរ។
លោកបន្ថែមថា ដោយឡែកចំពោះកត្តាមួយទៀតដែលទាក់ទងនឹងសង្គម ក៏អាចបណ្តាលឱ្យមនុស្សមានជំងឺផ្លូវចិត្តកើតឡើងផងដែរ ឧទាហរណ៍ដូចជាពេល សង្គមត្រូវបិទខ្ទប់ដោយជំងឺរាត្បាតសកលផ្សេងៗ ឬក៏អាចកើតឡើងដោយសារទំនាក់ទំនងផ្សេងៗដែលកើតឡើងក្នុងសង្គម។
បើតាមលោក ម៉ែត ដារាមូន ដើម្បីដោះស្រាយបញ្ហាទាំងនេះ គ្រប់គ្នាត្រូវតែមានការចាប់អារម្មណ៍ដឹងពីភាពប្លែកខុសធម្មតារបស់ខ្លួន ហើយត្រូវកំណត់ដឹងថា សុខភាពផ្លូវចិត្តក៏ចេះឈឺដូចផ្លូវកាយដែរ។ មួយវិញទៀតរបៀបរបបនៃការរស់នៅល្អ ក៏ជាជ្រុងមួយជួយកុំឱ្យមានបញ្ហាជំងឺផ្លូវចិត្ត។ បន្ថែមលើនេះការស្វែងយល់ពីវិធីសាស្ត្រក្នុងការទប់ទល់កំហឹង កាត់បន្ថយការតានតឹង វិធីសាស្ត្រដោះស្រាយបញ្ហានៅពេលប្រឈមមុខនឹងបញ្ហាផ្សេងៗ ការគេងឱ្យបានគ្រប់គ្រាន់ ហាត់ប្រាណ និងទទួលទានអាហារឱ្យបានទៀងទាត់ ក៏ជាផ្នែក១ ជួយកុំឱ្យមានបញ្ហាផ្លូវចិត្តផងដែរ៕
