.jpg)
ទិដ្ឋភាពអគារខ្ពស់ៗនៅភ្នំពេញឆ្លុះបញ្ចាំងពីការរីកចម្រើនអចលនទ្រព្យ។ ហុង មិនា
ភ្នំពេញៈ ក្រុមហ៊ុនក្នុងស្រុក ២ គឺក្រុមហ៊ុន វីត្រាស់ អឹព្រេហ្សល និងក្រុមហ៊ុន ក្រេឌីត ប្យួរ៉ូ ខេមបូឌា (ស៊ីប៊ីស៊ី) សហការគ្នា ដើម្បីផ្តល់សេវាកម្មវាយតម្លៃអចលនទ្រព្យតាមឌីជីថលដល់គ្រឹះស្ថានហិរញ្ញវត្ថុដំបូងគេនៅកម្ពុជាដែលនេះជាការបោះជំហានមួយកម្រិតថែមទៀតទៅក្នុងវិស័យអចលនទ្រព្យរបស់កម្ពុជា។
ការសហការគ្នារវាងក្រុមហ៊ុនទាំង ២ ត្រូវចុះអនុស្សរណៈនៃការយោគយល់គ្នា (MoU) តាមប្រព័ន្ធវីដេអូ Zoom ដោយការព្រមព្រៀងធ្វើសមាហរណកម្មកម្មវិធីវាយតម្លៃអចលនទ្រព្យ តាមអ៊ីនឌីខេសិន ផ្លើស ភ្លេតហ្វម (Indication Plus Platform) របស់ក្រុមហ៊ុន វីត្រាស់ អឹព្រេហ្សល ទៅ ភ្លេតហ្វម នៃឧបករណ៍វាយតម្លៃឥណទានរបស់ក្រុមហ៊ុន ក្រេឌីត ប្យួរ៉ូ ខេមបូឌា (ស៊ីប៊ីស៊ី)។
លោក វង្ស សុខាល ប្រធានក្រុមប្រឹក្សាភិបាលក្រុមហ៊ុន វីត្រាស់ អឹព្រេហ្សល បានថ្លែងនៅក្នុងពិធីចុះហត្ថលេខាថា កិច្ចសហការនេះនឹងបង្កើនប្រសិទ្ធភាពប្រតិបត្តិការក្នុងវិស័យហិរញ្ញវត្ថុ និងជំរុញឱ្យការប្រើប្រាស់សេវាវាយតម្លៃអចលនទ្រព្យកាន់តែទូលំទូលាយដល់ស្ថាប័នហិរញ្ញវត្ថុទាំងអស់។
លោកបានអះអាងថា វីត្រាស់ ជាក្រុមហ៊ុនផ្តល់សេវាកម្មវាយតម្លៃអចលនទ្រព្យទំនើបបែបឌីជីថលដែលអាចវិភាគ និងចេញជារបាយការណ៍វាយតម្លៃអចលនទ្រព្យសង្ខេប និងមានលក្ខណៈពេញលេញដោយស្វ័យប្រវត្តិដោយមានការរៀបចំចងជាប្រព័ន្ធរូបមន្តត្រឹមត្រូវដោយអ្នកជំនាញ និងតាមស្តង់ដាវាយតម្លៃអចលទ្រព្យអន្តរជាតិ។ លើសពីនេះអ្នកប្រើប្រាស់អាចពិនិត្យមើលការវិវត្តនៃដំណើរការវាយតម្លៃចាប់ពីពេលបានដាក់បញ្ជូនសំណើរហូតដល់ចេញជារបាយការណ៍វាយតម្លៃសង្ខេបជាស្ថាពរ។
លោកថ្លែងថា៖ «តាមរយៈសេវា អ៊ីនឌីខេសិន ផ្លើស ភ្លេតហ្វម នេះ លោកអ្នកអាចចូលប្រើ និងស្នើ [ការវាយតម្លៃអចលនទ្រព្យ] បានគ្រប់ពេលវេលា ងាយស្រួល ឆាប់រហ័សប្រកបដោយទំនុកចិត្តខ្ពស់ ព្រមទាំងបានដឹងពីតម្លៃអចលនទ្រព្យគ្រប់ទីកន្លែងនៅទូទាំងប្រទេស ដែលអ្វីៗស្ថិតក្នុងដៃរបស់លោកអ្នកតែម្តង»។
លោក សុខាល បញ្ជាក់ថា ភ្លេតហ្វមដែលបានបង្កើតឡើងមានផ្ទុកទិន្នន័យទូលំទូលាយ និងមានវិសាលភាពនៅទូទាំងប្រទេស។
លោក អឿ សុធារ័ត្ន នាយកប្រតិបត្តិក្រុមហ៊ុន ក្រេឌីត ប្យួរ៉ូ (ខេមបូឌា) ខូអិលធីឌី (ស៊ីប៊ីស៊ី) និង លោក វង្ស សុខាល ប្រធានក្រុមប្រឹក្សាភិបាលក្រុមហ៊ុន វីត្រាស់ អឹព្រេហ្សល ពេលចុះអនុស្សរណៈនៃការយោគយល់គ្នា (MoU) តាមប្រព័ន្ធវីដេអូ Zoom។ រូបថត សហការី
លោក អឿ សុធារ័ត្ន នាយកប្រតិបត្តិក្រុមហ៊ុន ក្រេឌីត ប្យួរ៉ូ (ខេមបូឌា) ខូអិលធីឌី (ស៊ីប៊ីស៊ី) បានលើកឡើងថា ការវាយតម្លៃអចលនទ្រព្យជាចំណុចមួយដ៏សំខាន់នៅក្នុងការចូលរួមចំណែកក្នុងការវាយតម្លៃឥណទាន ហើយការផ្តោតសំខាន់របស់ ស៊ីប៊ីស៊ី គឺធ្វើឱ្យការវាយតម្លៃឥណទានអាចឱ្យអ្នកប្រើប្រាស់ទិន្នន័យងាយស្រួលជាងមុន។
លោកថ្លែង៖ «បើយើងមើលទំហំឥណទានសរុបនៅក្នុងវិស័យហិរញ្ញវត្ថុទៀត យើងឃើញថា ជាង ៥០ ភាគរយនៃឥណទានដែលបានបញ្ចេញលើទីផ្សារគឺជាឥណទានដែលមានការធានាដោយមានទ្រព្យបញ្ចាំ ហើយក្នុងនោះទ្រព្យបញ្ចាំភាគច្រើនទៀតគឺជាដីធ្លីនិងផ្ទះ ដែលប្រតិបត្តិការនេះមានប្រហែល ១៥០ ០០០ ទៅ ២០០ ០០០ ប្រតិបត្តិការ ក្នុង ១ ខែ»។
លោកបានបន្តថា ក្រុមហ៊ុន វីត្រាស់ ជាក្រុមហ៊ុនមួយក្នុងចំណោមក្រុមហ៊ុនដែលមានជំហរច្បាស់លាស់យូរអង្វែង ហើយជាក្រុមហ៊ុនមួយដែលបានបម្រើនៅក្នុងវិស័យអចលនទ្រព្យតាំងពីឆ្នាំ ២០០៤ ហើយដំណើរការនៃការកសាងគ្រឹះឌីជីថលរបស់ក្រុមហ៊ុននេះគឺជាដំណោះស្រាយដ៏ឈ្លាសវៃមួយនៅក្នុងការវាយតម្លៃអចលនទ្រព្យ ដែលអាចផ្លាស់ប្តូរនូវរបៀបនៃការវាយតម្លៃអចលនទ្រព្យដែលកំពុងតែប្រើប្រាស់ក្នុងទីផ្សារសព្វថ្ងៃប្រកបដោយប្រសិទ្ធភាពជាងមុន។
លោកបន្តថា៖ «យើងទាំង ២ មានលទ្ធភាពរឹងមាំមែនទែនក្នុងការស្វែងរកឱកាសក្នុងការសហប្រតិបត្តិការជាមួយគ្នា ហើយដោយសារតែក្រុមហ៊ុនទាំង២ យើងមានដំណោះស្រាយ ដែលអាចបំពេញគ្នាទៅវិញទៅមកដែលអាចផ្តល់តម្លៃបន្ថែមដល់វិស័យហិរញ្ញវត្ថុទាំងមូល។ អនុស្សរណៈថ្ងៃនេះ គឺជាសក្ខីកម្មមួយដែលបង្ហាញអំពីកិច្ចសហការរបស់យើង ហើយខ្ញុំជឿថាវាកាន់តែបង្ហាញពីកិច្ចសហប្រតិបត្តិការយ៉ាងជិតស្និទ្ធដើម្បីឱ្យយើងអាចស្វែងរកនូវគំរូអាជីវកម្មរួមគ្នាមួយ ដែលអាចធ្វើម៉េចឱ្យមានប្រសិទ្ធភាពខ្ពស់ទៅដល់វិស័យហិរញ្ញវត្ថុ»។
របាយការណ៍ត្រីមាសទី ១ ឆ្នាំ ២០២១ របស់ ស៊ីប៊ីស៊ី បានបង្ហាញថា គិតត្រឹមដំណាច់ខែមីនាឆ្នាំ ២០២១ នេះ ឥណទានអចលនទ្រព្យមានចំណែកដល់ទៅ ៥១,៧២ ភាគរយនៃសមតុល្យឥណទានបុគ្គលសរុបនៅកម្ពុជា ១០,៣៩ ពាន់លានដុល្លារ។
របាយការណ៍ក្រសួងរៀបចំដែនដី នគរូបនីយកម្ម និងសំណង់ឱ្យដឹងថា ទុនវិនិយោគវិស័យសំណង់ក្នុងរយៈពេល ៩ ខែ ឆ្នាំ ២០២០ មានតម្លៃ ៥ ៨៦៨ លានដុល្លារ ថយចុះ ៩,៦ ភាគរយពី ៦ ៤៩៤ លានដុល្លារក្នុងរយៈពេលដូចគ្នាឆ្នាំ ២០១៩៕ LA
