.jpg)
សត្វផ្សោត ១ ក្បាល មានអាយុប្រមាណ ២០ ឆ្នាំ និងមានទម្ងន់ជាង ១០០ គីឡូក្រាម ត្រូវបានប្រជានេសាទប្រទះឃើញងាប់អណ្តែតទឹកទន្លេមេគង្គក្នុងភូមិសាស្ត្រអន្លង់ស្វាយ ឃុំព្រះរំកិល។ រូបថត សហការី
ស្ទឹងត្រែង៖ សត្វផ្សោត ១ ក្បាល មានអាយុប្រមាណ ២០ ឆ្នាំ និងមានទម្ងន់ជាង ១០០ គីឡូក្រាម ត្រូវបានប្រជានេសាទប្រទះឃើញងាប់អណ្តែតទឹកទន្លេមេគង្គក្នុងភូមិសាស្ត្រអន្លង់ស្វាយ ឃុំព្រះរំកិល ស្រុកអូរស្វាយសែនជ័យ។ ស្ថានភាពសត្វផ្សោតងាប់នេះ គឺកន្ទុយរបស់វាទាក់ជាប់ក្នុងគុម្ពព្រៃរ៉ៃ (ប្រភេទស្មៅទឹក)។ នេះបើតាមមន្ត្រីខណ្ឌរដ្ឋបាលខេត្តស្ទឹងត្រែង។
លោកស្រី សម វិចិត្រ នាយខណ្ឌរដ្ឋបាលជលផលស្តីទីខេត្តស្ទឹងត្រែងប្រាប់ ភ្នំពេញ ប៉ុស្តិ៍ នាថ្ងៃទី ២៣ មេសាថា កាលពីព្រឹកថ្ងៃទី ២២ មេសា ក្រុមមន្ត្រីខណ្ឌជលផលស្ទឹងត្រែង សហការជាមួយអង្គការ WWF ចុះទៅស្រង់យកសាកសពសត្វផ្សោតដ៏កម្រនោះ មកពិនិត្យ និងរក្សាទុកសម្រាប់ការសិក្សាស្រាវជ្រាវ ក្រោយពីទទួលបានសេចក្តីរាយការណ៍ពីឆ្មាំទន្លេ និងប្រជាសហគមន៍នេសាទ អំពីសត្វផ្សោតនេះងាប់។
លោកបញ្ជាក់ថា៖ "សត្វផ្សោត ១ ក្បាលនេះ បានងាប់ជាច្រើនថ្ងៃមកហើយ ដោយសារកន្ទុយវាទាក់ជាប់នឹងគុម្ពព្រៃរ៉ៃ ហើយសាច់របស់វាមានសភាពហើម និងស្អុយរលួយ ដែលមិនអាចកំណត់ថា ជាផ្សោតញី ឬក៏ឈ្មោលនោះទេ"។
លោកថា តាមរយៈការពិនិត្យអង្កេតទៅលើធ្មេញរបស់វា ដែលមានសភាពសឹករេចរឹល ក្រុមមន្ត្រីជំនាញនៃស្ថាប័នទាំង ២ គឺខណ្ឌរដ្ឋបាលជលផលខេត្តស្ទឹងត្រែង និង WWF បានសន្និដ្ឋានថា ផ្សោតនោះមានអាយុប្រមាណជាង ២០ ឆ្នាំ។ ក្រុមការងារបានថ្លឹង និងវាស់វែងឃើញមានទម្ងន់ជាង ១០០ គីឡូក្រាម និងមានប្រវែង ២,២៧ ម៉ែត្រ។
សត្វផ្សោត ១ ក្បាល មានអាយុប្រមាណ ២០ ឆ្នាំ និងមានទម្ងន់ជាង ១០០ គីឡូក្រាម ត្រូវបានប្រជានេសាទប្រទះឃើញងាប់អណ្តែតទឹកទន្លេមេគង្គក្នុងភូមិសាស្ត្រអន្លង់ស្វាយ ឃុំព្រះរំកិល។ រូបថត សហការី
ក្រោយពីពិនិត្យរួចហើយ អាជ្ញាធរឃុំព្រះរំកិល បានស្នើសុំរក្សាទុកដាក់តាំងឲ្យភ្ញៀវទេសចរទស្សនា និងសិក្សាស្វែងយល់ពីសត្វផ្សោតទន្លេមេគង្គដ៏កម្រនេះ។ ឯសាច់របស់វាត្រូវបានក្រុមមន្ត្រីជំនាញបង្គាប់ឲ្យប្រជាសហគមន៍នេសាទយកទៅកប់ចោល។
យោងតាមរបាយការណ៍ពីអង្គកា WWF ខេត្តក្រចេះ និងស្ទឹងត្រែង ក្នុងឆ្នាំ ២០១៨ មានសត្វផ្សោតងាប់ចំនួន ៥ ក្បាល។ ឆ្នាំ ២០១៩ មានផ្សោតងាប់ចំនួន ៨ ក្បាល ឆ្នាំ ២០២០ ផ្សោតងាប់ចំនួន ៩ ក្បាល និងឆ្នាំ ២០២១ មានផ្សោតងាប់ចំនួន ៤ ក្បាល។ ចំពោះសត្វផ្សោតដែលរស់នៅលើទឹកដីខេត្តស្តឹងត្រែងមានប្រមាណពី ៣១ ទៅ ៣៦ ក្បាលសព្វថ្ងៃនេះ៕
