កំពង់ធំៈ អ្នកលក់ប្រមាណជា ២០ នាក់ បានប្រមូលផ្ដុំគ្នាតវ៉ា សុំរក្សាសិទ្ធិលក់នៅក្នុងផ្សារសេរីស្ទោងដដែល ក្រោយពីអាជ្ញាធរហាមពួកគេមិនឱ្យលក់នៅលើទីតាំងចាស់នេះ ដោយហេតុផល ដើម្បីរៀបចំសណ្ដាប់ធ្នាប់ផ្សារ។
នៅព្រឹកថ្ងៃទី ១៣ ឧសភានេះ មានអាជីវករជាង២០ នាក់បានប្រមូលផ្តុំគ្នាស្រែកតវ៉ានៅមុខផ្សារសេរីស្ទោង ដោយមានអ្នកខ្លះ ស្រែកស្នើទៅដល់លោកនាយករដ្ឋមន្ត្រី ហ៊ុន សែន និងអ្នកខ្លះទៀត ទាមទារឲ្យអាជ្ញាធរខេត្ត ជួយផ្តល់ដំណោះស្រាយជុំវិញករណីនេះ។ យោងតាមសំឡេងសម្រែកអ្នកលក់ នៅក្នុងវីដេអូដែលត្រូវបានបង្ហោះនៅលើបណ្តាញសង្គមនៅថ្ងៃនេះ។
សំឡេងស្ត្រីអ្នកលក់ម្នាក់នៅក្នុងវីដេអូដែលត្រូវបានគេបង្ហោះនោះ បានឲ្យដឹងថា នាងបានលក់ដូរនៅផ្សារនេះជាង ៣០ ឆ្នាំមកហើយ ដោយមិនមានបញ្ហាអ្វីនោះទេ។ ប៉ុន្តែបន្ទាប់ពីផ្សារនេះ ត្រូវបានប្រកាសបើកដំណើរការឡើងវិញ ក្រោយត្រូវបានបិទបណ្តោះអាសន្នដោយសារតែបញ្ហាកូវីដ ១៩ ក៏មានកម្លាំងអាជ្ញាធរ ចុះមកធ្វើការហាមប្រាមក្រុមអាជីវករមិនឲ្យចូលលក់នៅកន្លែងដែលធ្លាប់លក់ពីមុននោះទេ។
អ្នកស្រីបានបញ្ជាក់ថា៖ «គេចាប់ផ្តើមបង្កើតផ្សារថ្មី ក៏ចាប់ផ្តើមដេញពួកខ្ញុំ ដេញអ្នកលក់ម្លូរ ដេញអ្នកលក់តាមល្អី តាមកន្ទេលអី មិនឲ្យចូលទេ គេឲ្យទៅលក់នៅផ្សារថ្មី។ ខ្ញុំសុំ សំណូមពរទៅដល់សម្តេចហ៊ុន សែន ឲ្យជួយប្រជារាស្ត្រនៅផ្សារសេរីស្ទោង ឲ្យមានសិទ្ធិសេរីភាពដូចពីមុនវិញមក»។
បើតាមក្រុមអាជីវករដែលបានរៀបរាប់ក្នុងអំឡុងពេលតវ៉ា បានឲ្យដឹងថា នៅគ្រប់ច្រកល្ហកផ្សារ គឺមានការដាក់ប៉ារ៉ាស និងការហាមឃាត់ការចេញចូលក្នុងផ្សារ ដែលធ្វើឲ្យអាជីវករ មិនអាចលក់ដូរ ដើម្បីចិញ្ចឹមជីវិតបាននោះទេ។
លោក ណែត សារី អភិបាលស្រុកស្ទោង បានប្រាប់ភ្នំពេញប៉ុស្តិ៍នៅថ្ងៃនេះថា អាជ្ញាធរមិនបានបិទផ្សារសេរីស្ទោងនោះទេ ដោយក្រុមអាជីវករ ដែលលក់ដូរក្នុងតូប ឬកន្លែងដែលមានរបៀបរៀបរយ គឺនៅតែអាចបន្តលក់ជាធម្មតា។ ការដែលអាជ្ញាធរ ហាមអាជីវករទាំងនេះ ក៏ព្រោះតែក្រុមអាជីវករមួយចំនួន បានយកផ្លូវសាធារណៈមកលក់ដូរ ដែលបង្កជាការកក់ស្ទះ និងបាត់បង់សណ្តាប់ធ្នាប់។
លោក រៀបរាប់ថា៖«យើងមិនហាមឃាត់គាត់ មិនឲ្យលក់ដូរទេ គ្រាន់តែរៀបចំសណ្តាប់ធ្នាប់នៅជុំវិញផ្សារសេរីស្ទោង កុំឲ្យពួកគាត់ លក់ដូរលើដីចំណីផ្លូវតទៅទៀត។ ពួកគាត់ដែលលក់ដូចបន្លែត្រីសាច់នៅតាមផ្លូវនេះ គឺភាគច្រើន អត់មានទីតាំងច្បាស់លាស់ទេ គឺគាត់យកចំណីផ្លូវ។ មួយទៀត មនុស្សច្រើនចឹង វា ប្រឈមណាស់ នឹងការឆ្លងជំងឺក្នុងពេលនេះ»។
លោក ណែត សារី បានឲ្យដឹងទៀតថា ការដែលតម្រូវឲ្យអាជីវករទាំងនេះ ទៅលក់ដូរកន្លែងថ្មី ក៏មិនខាតបង់នោះទេ ពួកគាត់នឹងទទួលបានផលប្រយោជន៍ទៅវិញទេ ព្រោះកន្លែងថ្មី បានរៀបចំសណ្តាប់ធ្នាប់ និងរបៀបរៀបរយបានល្អជាងកន្លែងចាស់ ហើយពួកគាត់ ក៏មិនចាំបាច់ចំណាយថវិកា ដើម្បិទិញកន្លែង ឬត្រូវបង់សេវាផ្សេងៗនោះដែរ។
លោកបានបញ្ជាក់ថា៖ «មានប្រជាពលរដ្ឋច្រើន ដែលគាត់បានសប្បាយចិត្ត នឹងការទៅលក់ដូរនៅទីតាំងថ្មី ព្រោះមិនមានការយកភាស៊ី ឬតម្លៃជួលកន្លែងអីនោះទេ គឺឲ្យពួកគាត់ ទៅលក់នៅទីនោះអស់មួយជីវិត។ មាន តែអាជីវករមួយចំនួនតូចទេ ដែលគាត់មិនយល់ព្រម ព្រោះតែប៉ះពាល់ប្រយោជន៍របស់ពួកគេ បានជានាំគ្នាតវ៉ា។
ផ្សារថ្មី ត្រូវបានបង្កើតឡើងដោយក្រុមហ៊ុនឯកជន សហការជាមួយអាជ្ញាធរស្រុក ដែលមានចម្ងាយមិនឆ្ងាយពីផ្សារសេរីស្ទោងនោះទេ ខណៈតូបក្នុងផ្សារជាង ១០០ តូប គឺបានដាក់លក់ជូនពលរដ្ឋ និងបរិវេណផ្សារជុំវិញ គឺផ្តល់ជូនពលរដ្ឋ ដោយមិនគិតថ្លៃ។ នេះបើតាមការអះអាងរបស់អាជ្ញាធរស្រុក៕