កញ្ញា Ng Bee Sun ជានាយកសាលានៃមជ្ឈមណ្ឌលមូលដ្ឋានគ្រឹះសម្រាប់សាកលវិទ្យាល័យ ចែករំលែកពីភាពជាអ្នកដឹកនាំដល់អ្នកចូលរួមកម្មវីធី Leadership Boot Camp ។
សាលាអន្តរជាតិសិង្ហបុរី SCIA កំពុងជួយជំរុញសិស្សានុសិស្សឲ្យត្រៀមខ្លួនរួចជាស្រេចក្នុងអាជីពការងារនាពេលអនាគតតាមរយៈមជ្ឈមណ្ឌលមូលដ្ឋានគ្រឹះសម្រាប់សាកលវិទ្យាល័យ FSC ។
វាពិតជាមានសារៈសំខាន់ខ្លាំងណាស់សម្រាប់សិស្សានុសិស្សក្នុងការបំពាក់នូវចំណេះដឹងជាមូលដ្ឋានផ្នែកគ្រប់គ្រង និងអាជីវកម្ម ដើម្បីត្រៀមខ្លួនសម្រាប់ការងារនៅពេលពួកគេបញ្ចប់ការសិក្សា។
ដើម្បីសម្រេចបាននូវគោលដៅនេះមជ្ឈមណ្ឌលមូលដ្ឋានគ្រឹះសម្រាប់សាកលវិទ្យាល័យរបស់សាលា SCIA បានរៀបចំកម្មវិធីសិក្សាចំនួន ២ គឺ កម្មវិធីមូលដ្ឋានគ្រឹះបែបអន្តរជាតិ (IFP) និងកម្មវិធីមូលដ្ឋានគ្រឹះផ្នែកគ្រប់គ្រង(MFP)។
កម្មវិធីទាំងពីរនេះមានវគ្គសិក្សាទាំងក្នុង និងក្រៅស្រុក ដើម្បីផ្តល់ឱកាសដល់សិស្សានុសិស្សធ្វើទស្សនកិច្ចសិក្សានៅក្រុមហ៊ុន សាជីវកម្ម និងស្ថាប័នអប់រំល្បីៗ។
សិស្សានុសិស្សក៏អាចសង្កេតមើលដំណើរការអាជីវកម្មនៅតាមស្ថាប័នផ្សេងៗដែលអាចជួយបណ្តុះជំនាញវិភាគ ការត្រិះរិះ និងទស្សនវិស័យជាសកល ព្រមទាំងបង្កើនការយល់ដឹងពីវប្បធម៌ចម្រុះផងដែរ។
សាលាអន្តរជាតិ SCIA ត្រូវបានជ្រើសរើសដោយសាកលវិទ្យាល័យឡុងដ៍ (University of London) ជាមជ្ឈមណ្ឌលបង្រៀនដ៏ល្អបំផុតដំបូងគេបង្អស់ និងតែមួយគត់នៅក្នុងប្រទេសកម្ពុជាក្នុងការផ្តល់ជូននូវកម្មវិធីសិក្សាថ្នាក់មូលដ្ឋានគ្រឹះបែបអន្តរជាតិ (IFP)។
សិស្សានុសិស្សនៃមជ្ឈមណ្ឌលមូលដ្ឋានគ្រឹះសម្រាប់សាកលវិទ្យាល័យនឹងត្រូវបានបំពាក់នូវចំណេះដឹងមូលដ្ឋាននៃការគ្រប់គ្រង និងអាជីវកម្ម។
នៅពេលបញ្ចប់វគ្គសិក្សា សិស្សអាចបន្តការសិក្សាថ្នាក់បរិញ្ញាបត្រនៅតាមសាកលវិទ្យាល័យល្បីៗដូចជាសាកលវិទ្យាល័យ SIM Global Education នៅប្រទេសសិង្ហបុរី និងស្ថាប័នឈានមុខគេនៅចក្រភពអង់គ្លេសដូចជា សាកលវិទ្យាល័យ London School of Economics and Politics សាកលវិទ្យាល័យ King’s College London សាកលវិទ្យាល័យ Warwick និងសាកលវិទ្យាល័យល្បីៗជាច្រើនទៀតនៅអូស្ត្រាលី កាណាដា និងសហរដ្ឋអាមេរិក។
កម្មវិធីមូលដ្ឋានគ្រឹះផ្នែកគ្រប់គ្រង (MFP) ត្រូវបានទទួលស្គាល់ដោយវិទ្យាស្ថានគ្រប់គ្រងសិង្ហបុរី (SIM) ហើយនៅពេលបញ្ចប់ការសិក្សា សិស្សអាចបន្តការសិក្សាកម្រិតឧត្តមសិក្សាជាច្រើនទៀតដែលផ្តល់ដោយសាកលវិទ្យាល័យ SIM Global Education នៅសិង្ហបុរី និងសាកលវិទ្យាល័យដៃគូរបស់ SIM មកពីចក្រភពអង់គ្លេស សហរដ្ឋអាមេរិក និងអូស្ត្រាលី។
មជ្ឈមណ្ឌលមូលដ្ឋានគ្រឹះសម្រាប់សាកលវិទ្យាល័យ FSC របស់សាលាអន្តរជាតិ SCIA ផ្តល់ជូនសិស្សដែលបញ្ចប់ការសិក្សាថ្នាក់វិទ្យាល័យនូវចំណេះដឹងជាមូលដ្ឋានគ្រឹះ និងការយល់ដឹងស៊ីជម្រៅលើមុខវិជ្ជាសំខាន់ៗក្នុងកម្មវិធីឧត្តមសិក្សាតាមសាកលវិទ្យាល័យនានានៅទូទាំងពិភពលោក។
ក្រៅពីការកសាងសមត្ថភាព និងជំនាញការងារជាក់ស្តែង មជ្ឈមណ្ឌលក៏ផ្តល់ការប្រឹក្សាយោបល់ការងារដើម្បីជួយសិស្សឲ្យចាប់យកអាជីពការងារក្នុងក្តីស្រមៃដែលផ្សារភ្ជាប់ជាមួយនឹងការជ្រើសរើសមុខជំនាញសិក្សានៅក្នុងសាកលវិទ្យាល័យ។
សិក្ខាសាលាត្រូវបានធ្វើឡើងសម្រាប់សិស្សដើម្បីបណ្តុះអាប្បកិរិយាជំនាញជាអ្នកដឹកនាំ និងអភិវឌ្ឍទស្សនវិស័យជាសកលក្នុងការប្រាស្រ័យទាក់ទង ជំនាញសង្គម ការធ្វើការជាក្រុម ក្រមសីលធម៌ ព្រមទាំងការត្រិះរិះពិចារណា។
សិស្សសាលាអន្តរជាតិ SCIA ក៏មានឱកាសចុះធ្វើកម្មសិក្សាផងដែរដើម្បីឲ្យពួកគេកសាងទំនាក់ទំនងជាមួយក្រុមហ៊ុននានា។ ពួកគេនឹងស្វែងយល់ពីប្រតិបត្តិការអាជីវកម្មប្រចាំថ្ងៃ និងរៀនពីការងារជាក់ស្តែងដើម្បីជួយពង្រឹងសមត្ថភាពរបស់ពួកគេសម្រាប់តម្រូវការការងារនាពេលអនាគត។
នៅពេលដែលសិស្សអាចផ្សារភ្ជាប់ទ្រឹស្តីទៅនឹងការអនុវត្តជាក់ស្តែងនោះពួកគេនឹងអាចយល់ដឹងកាន់តែស៊ីជម្រៅអំពីការងារ និងបរិបទការងារ។
ការសិក្សាអប់រំទាំងអស់នេះនឹងជួយឲ្យសិស្សត្រៀមខ្លួនបានយ៉ាងល្អនៅពេលដែលពួកគេចូលប្រឡូកក្នុងការងារជាក់ស្តែង។
មជ្ឈមណ្ឌលសិក្សាមូលដ្ឋានគ្រឹះសម្រាប់សាកលវិទ្យាល័យ FSC របស់សាលាអន្តរជាតិ SCIA មានទីតាំងស្ថិតនៅក្នុងបរិវេណមជ្ឈមណ្ឌល Phnom Penh City Center-One Park Condominium៕
