យុវវ័យកំពុងបើកមើល «ត្រីវិស័យ» Trey Visay App នៅលើទូរស័ព្ទស្មាតហ្វូន។ រូបថត តុង សុប្រាជ្ញ
PassApp, Grab, Uber, WeGo និង 711Go គឺជាប្រភេទសេវាធ្វើដំណើរបែបឌីជីថលទំនើបតាមរយៈស្មាតហ្វូនដែលកំពុងពេញនិយមក្នុងយុគសម័យប្រើប្រាស់បច្ចេកវិទ្យាបច្ចុប្បន្ន ដោយមិនចាំបាច់រង់ចាំបក់ដៃហៅ ឬក៏ទូរស័ព្ទរកនោះទេគឺមធ្យោបាយឌីជីថល (App) បានដើរតួនាទីបង្ហាញផ្លូវ និងទីតាំងដែលអ្នកដំណើរបានបញ្ជាអ្នកបើកបរឱ្យមកដឹកដល់កន្លែងនៅក្នុងរាជធានីភ្នំពេញនិងទីក្រុងខ្លះ ខណៈសកម្មភាពឌីជីថល App នេះគេច្រើនប្រើពេញនិយមទៅលើសេវាកម្មក្នុងប្រព័ន្ធធនាគារ និងមីក្រូហិរញ្ញវត្ថុនោះ។
ការប្រើប្រាស់ស្មាតហ្វូន (Smart phone) តាមឌីជីថលទំនើបនេះក៏ជាទីពេញនិយមសម្រាប់សិស្ស និងនិស្សិតផងដែរ ហើយក៏កំពុងលើកទឹកចិត្តដល់សិស្សានុសិស្សឲ្យកាន់តែខិតខំរៀន និងសិក្សាស្រាវជ្រាវបន្ថែមពីអ្វីដែលលោកគ្រូ-អ្នកគ្រូ បានបង្ហាត់បង្រៀននៅក្នុងថ្នាក់មានដូចជាប្រើប្រាស់អ៊ីនធឺណិត ព័ត៌មានអនឡាញ បណ្តាញសង្គមហ្វេសប៊ុក តេឡេក្រាម និង App ជាដើម។
ជាមួយគ្នានេះដែរ ឌីជីថលក៏ជាប្រព័ន្ធបច្ចេកវិទ្យាធ្វើឲ្យសិស្សានុសិស្សដឹងពីវិធីសាស្ត្រក្នុងការបកស្រាយ ឬក៏ដំណោះស្រាយតាមបែបវិទ្យាសាស្ត្រថ្មីដែលកំពុងធ្វើបច្ចុប្បន្នភាពនៅប្រទេសនានានៅលើពិភពលោកផងដែរ នៅពេលដែលអ្នកជំនាន់មុនរៀនតែពីគ្រូពោលគឺគាត់ឲ្យប៉ុន្មានបានត្រឹមប៉ុណ្ណឹង ហើយយ៉ាងច្រើនរៀនតាមសៀវភៅថែមបន្តិចបន្តួចប៉ុណ្ណោះ។
ម្យ៉ាងវិញទៀតកាលពីទសវត្សរ៍ឆ្នាំ ៨០ និង ៩០ នៅតាមវិទ្យាល័យក៏គ្មានគោលការណ៍ណែនាំតម្រង់ទិសត្រឹមត្រូវដល់សិស្សានុសិស្សថា តើនៅពេលរៀនចប់ពីវិទ្យាល័យទៅចង់បន្តការសិក្សានៅសាកលវិទ្យាល័យតាមមុខវិជ្ជាណាដែលខ្លួនពេញចិត្ត ឬក៏មុខវិជ្ជាតម្រូវការចាំបាច់សម្រាប់សិស្សានុសិស្ស ឬក៏រៀនចង់ធ្វើការងារអ្វីនោះទេ។ មានន័យថាទាំងខ្ញុំ ទាំងគេជំនាន់នោះគឺរៀនតាមគ្នាស្រចុះ ស្រឡើង ឧទាហរណ៍៖ បើក្នុងគ្រួសារមានឪពុក ឬក៏ម្តាយធ្វើគ្រូ គឺកូនមកយ៉ាងហោចណាស់ក៏មានម្នាក់ចង់ធ្វើជាគ្រូបង្រៀនដែរ។
បើមានឪពុក ឬក៏ម្តាយធ្វើគ្រូពេទ្យគឺកូនចង់ទៅរៀននៅសាលាពេទ្យដើម្បីធ្វើពេទ្យដែរ។ ដូចគ្នានេះដែរបើមានឪពុកធ្វើជាប៉ូលិស ឬក៏ទាហានគឺកូនប្រុសហ្នឹងចង់ធ្វើជាកម្លាំងសមត្ថកិច្ចផងដែរ។ មិនមានអ្វីជាសេចក្តីណែនាំ ឬក៏ការគណនាបែបវិទ្យាសាស្ត្រកំណត់ទៅតាមឧបនិស្ស័យរបស់សិស្សានុសិស្សថា តើជ្រើសរើសវិជ្ជាជីវៈសម្រាប់បន្តទៅមុខទៀតយ៉ាងដូចម្តេចនោះទេ។
រហូតមកទល់ឆ្នាំ ២០០០ ផ្នត់គំនិតតាមគ្នានេះបានចាប់ផ្តើមសាបរលាបបន្តិចម្តងៗ ដោយមានបងៗរបស់ពួកគេមករៀននៅភ្នំពេញ មុខវិជ្ជាច្បាប់ សេដ្ឋកិច្ច សំណង់ បច្ចេកវិទ្យា កសិកម្ម និងពាណិជ្ជសាស្ត្រជាដើម។
ការយល់ដឹងអំពីមុខវិជ្ជាដែលត្រូវរៀនគឺមានបណ្តើរៗហើយតែមកដល់ឆ្នាំ ២០១០ បែរជាសិស្សានុសិស្សភាគច្រើនទៅជានាំគ្នាផ្អើលឈូឆរក៏ត្រៀមឯកសារ ត្រៀមចម្លងហើយពេលប្រឡងក៏បើកចាក់ចម្លងតាមឯកសារ និងសូកលុយអនុរក្សទៅវិញ។
ឯខ្លះទៀតនាំគ្នាភ្លូកទឹកភ្លូកដី មានជំនឿតាមគ្នាលែងចង់រៀនសូត្រដោយខ្លួនឯងគឺមិនថា ប្រឡងឌីប្លូម ឬក៏បាក់ឌុបទេគឺនាំគ្នាទៅបន់ស្រន់ទៅរកព្រះសង្ឃស្រោចទឹកដើម្បីឲ្យជួយប្រឡងជាប់ទៅវិញ។ តែការបន់ស្រន់ទាំងនេះបានត្រឹមតែជួយកម្លាំងចិត្តឲ្យមានអារម្មណ៍ស្រស់ថ្លាទៅតាមជំនឿទេ មិនមែនមានន័យថាទៅស្រោចទឹកប្រឡងជាប់នោះឡើយ។
ការកែទម្រង់វិស័យអប់រំម្តងឡើងម្តងចុះ ទៅតាមឆន្ទៈរបស់ថ្នាក់ដឹកនាំក្រសួង មកដល់អាណត្តិទី ៥ ចុងក្រោយនេះ ក្រសួងអប់រំមានការកែទម្រង់រីកចម្រើនគួរឲ្យកត់សម្គាល់រួមទាំងការរឹតបន្តឹងពេលប្រឡង ការធ្វើគោលនយោបាយថ្មីៗ ការធ្វើបច្ចុប្បន្នភាពនៃកំណែទម្រង់ប្រព័ន្ធអប់រំ ជាពិសេសគឺការទទួលយកនូវការអភិវឌ្ឍនូវព័ត៌មានវិទ្យា ទំនាក់ទំនង និងបច្ចេកវិទ្យា (ICT) ដើម្បីធ្វើយ៉ាងណាដើរឲ្យទាន់ការវិវត្តស្របតាមបច្ចុប្បន្នភាព។
ជាលទ្ធផលឃើញថា កូនសិស្សកាត់បន្ថយនូវជំនឿទៅស្រោចទឹក ងាកមកខំប្រឹងប្រែងសិក្សាវិញផង និងស្តាប់ដំបូន្មានពីលោកគ្រូ-អ្នកគ្រូក្នុងការសិក្សា និងការតម្រង់ទិសថាតើពួកគេនឹងធ្វើអ្វី និងរៀនអ្វីឲ្យត្រូវតាមឧបនិស្ស័យរបស់ខ្លួនដូចជា ការជ្រើសរើសមុខវិជ្ជាសង្គម ឬក៏វិទ្យាសាស្ត្រសម្រាប់ប្រឡងយកសញ្ញាបត្រទុតិយភូមិជាដើម។
បច្ចុប្បន្ននេះក្រសួងអប់រំកំពុងសហការជាមួយដៃគូអភិវឌ្ឍន៍ អង្គការក្រៅរដ្ឋាភិបាល និងក្រុមហ៊ុនឯកជនដែលចូលរួមចំណែកក្នុងការអភិវឌ្ឍឌីជីថល ជួយសម្រួលដល់វិស័យអប់រំ។
ទាក់ទងនឹងប្រព័ន្ធឌីជីថលនេះលោក សុក ថា ប្រធាននាយកដ្ឋានបច្ចេកវិទ្យាព័ត៌មាននៃក្រសួងអប់រំបានបញ្ជាក់ប្រាប់ ភ្នំពេញ ប៉ុស្តិ៍ថា លោកកំពុងពិនិត្យមើលសំណើ «ត្រីវិស័យ» Trey Visay App នៅវិទ្យាល័យរបស់អង្គការ KAPE ជាដៃគូអប់រំរបស់ក្រសួងថា តើ Trey Visay App ដែលជាឌីជីថលជួយផ្តល់ជាមគ្គុទ្ទេសក៍តម្រង់ទិសដល់សិស្សានុសិស្សនេះ អាចមានលទ្ធភាពផ្សព្វផ្សាយកម្រិតថ្នាក់ជាតិដោយត្រូវសហការជាមួយអង្គភាពពាក់ព័ន្ធ និងក្រសួងដើម្បីពិនិត្យមើលពីភាពបន្ស៊ីគ្នារវាង «ត្រីវិស័យ» និងគោលការណ៍ណែនាំរបស់ក្រសួងដោយ App នេះគឺធ្វើឡើងដោយអង្គការ KAPE ហើយបានផ្សព្វផ្សាយសាកល្បងធ្វើនៅវិទ្យាល័យគោលដៅរបស់អង្គការ KAPE។
ជាមួយគ្នានេះដែរលោកស្រី ហែម ម៉ារី ប្រធានកម្មវិធីអប់រំនៃអង្គការ KAPE ធ្លាប់បានលើកឡើងថា «ត្រីវិស័យ» Trey Visay App បានសាកល្បងផ្សព្វផ្សាយនៅវិទ្យាល័យជំនាន់ថ្មី «គំរូ» ចំនួន ៣ នៅស្រុកក្រូចឆ្មារ ខេត្តត្បូងឃ្មុំ តាំងពីខែកុម្ភៈកន្លងទៅនេះ។ លោកស្រីបានធ្វើតេស្តកូនសិស្សឡើងវិញដោយរកឃើញថាពួកគេពេញចិត្តនឹង «ត្រីវិស័យ» ដោយផ្តល់ពិន្ទុនៃការជ្រើសរើសថាតើយក «វិទ្យាសាស្ត្រសង្គម» និង «វិទ្យាសាស្ត្រពិត» សម្រាប់ប្រឡងសញ្ញាបត្រទុតិយភូមិខាងមុខនេះ។
ជាងនេះទៅទៀត គឺពួកគេពេញចិត្តមាតិកានៅក្នុង «ត្រីវិស័យ» ទាំងអស់រួមទាំងមុខវិជ្ជាដែលត្រូវរៀនត្រូវចិត្ត ការប្រាប់ឈ្មោះសាកលវិទ្យាល័យប្រាប់ពីមុខរបរដែលត្រូវជ្រើសរើសទៅតាមឧបនិស្ស័យរបស់យុវសិស្សក្នុងការសិក្សាបន្តទៅមុខទៀត។ វិធីដែលទាញយក «ត្រីវិស័យ» Trey Visay App តាមរយៈកម្មវិធី Android ចុច Play Store ហើយចុច Install។
លោកស្រីបានលើកឡើងថា KAPE បានសម្រេចចិត្តជាមួយអង្គការ INSTEDD នៃគម្រោង SPIDER របស់ប្រទេសស៊ុយអែតដែលអភិវឌ្ឍផ្នែកទន់របស់ឌីជីថល «ត្រីវិស័យ» នេះថានឹងផ្ទេរ «ត្រីវិស័យ» Trey Visay App ជូនក្រសួងអប់រំទាំងស្រុងក្នុងការពង្រីកវិសាលភាពឲ្យកាន់តែទូលំទូលាយដល់សិស្សានុសិស្សនៅទូទាំងប្រទេស៕
ចូលរួមផ្តល់យោបល់តាមរយៈ soprach.tong@phnompenhpost.com
