ក្រុមគុនដាវកម្ពុជា បង្ហាញមេដាយ ដែលពួកគេដណ្តើមបាន។ ស្រេង ម៉េងស្រ៊ុន
ភ្នំពេញៈ ក្រុមកីឡាគុនដាវកម្ពុជាបាននាំយកមេដាយប្រាក់ ១ និងសំរឹទ្ធ ២ ពីការប្រកួតកីឡាគុនដាវជើងឯកអាស៊ាន ប្រចាំឆ្នាំ ២០១៨ នៅម៉ាឡេស៊ី មកដល់មាតុប្រទេសវិញកាលពីព្រឹកថ្ងៃអង្គារ ហើយលោក សុខ អាង បានប្រាប់ថា លទ្ធផលដ៏ល្អនេះបានធ្វើឲ្យប្រទេសមួយចំនួនដែលធ្លាប់មើលស្រាលក្រុមគុនដាវកម្ពុជា មានការភ្ញាក់ខ្លួន ឯហ្វីលីពីនបាក់ស្បាតតែម្តង។
លោក សុខ អាង ដែលជាគ្រូបង្វឹកធំ បានប្រាប់ពេលលោកមកដល់ព្រលានយន្តហោះអន្តរជាតិភ្នំពេញថា៖ «ការប្រកួតលើកនេះ យើងទទួលបានលទ្ធផលល្អ ដោយយើងបានប្រើសមត្ថភាពសុទ្ធសាធ។ កន្លងមកប្រទេសដទៃ ធ្លាប់មើលយើងក្នុងកម្រិតទាបបំផុត ដែលគេអត់ដែលគិតថា យើងជាដៃគូប្រជែងរបស់គេនោះទេ ប៉ុន្តែលើកនេះយើងធ្វើឲ្យហ្វីលីពីនបាក់ស្បាតដែរ ព្រោះគាត់រំពឹងខ្លាំងជាងយើង តែបែរជាមកចាញ់កីឡាការិនីយើង»។
លោកបន្តថា៖ «ចំណែក ប្រទេសឥណ្ឌូនេស៊ី និងសិង្ហបុរី ក៏ចាប់ផ្តើមកោតសរសើរថា ពួកយើងមានការកើនឡើង ជាពិសេសខាងម្ចាស់ផ្ទះ ព្រោះប្រធានសហព័ន្ធកីឡាគុនដាវអាស៊ីរបស់ម៉ាឡេស៊ី បានមកនិយាយជាមួយខ្ញុំ ហើយគាត់ថា គាត់នឹងមកលេងកម្ពុជា មើលការហាត់របស់ពួកយើង»។
សម្រាប់ការប្រកួតកីឡាគុនដាវជើងឯកអាស៊ានលើកនេះ កម្ពុជា បានបញ្ជូនអត្តពលិក ៩ នាក់ (ស្រី ៣ នាក់) ទៅប្រកួត ហើយជាលទ្ធផល កម្ពុជាបានឈ្នះមេដាយប្រាក់ ១ លើវិញ្ញាសាឯកត្តជននារី ដែលរកបានដោយកីឡាការិនី ឆាយ លីនលី ដោយក្នុងនោះ កញ្ញាបានយកឈ្នះកីឡាការិនីរបស់ហ្វីលីពីន ក្នុងវគ្គ ១៦ នាក់ រួចបន្តឈ្នះសិង្ហបុរី ក្នុងវគ្គ ៨ នាក់ និងឈ្នះកីឡាការិនីសិង្ហបុរីម្នាក់ទៀត ក្នុងវគ្គពាក់កណ្តាលផ្តាច់ព្រ័ត្រ ប៉ុន្តែបានចាញ់កីឡាការិនីរបស់ឥណ្ឌូនេស៊ី នៅវគ្គផ្ដាច់ព្រ័ត្រ។
ចំណែកការប្រកួតជាក្រុមនារី របស់កីឡាការិនី ឆាយ លីនលី ស៊ន និច, យី លីហ្សា និងប្រកួតជាក្រុមបុរស របស់កីឡាករ ឃីម សាមាន, ប៉ូល វ៉ាហ្គ ហ្រ្វេនធិសិដ្ឋ អូរមិនស្កី, ថុង តាំងជីន, ជឹម ធារ៉ា គឺឈ្នះបានមេដាយសំរឹទ្ធដូចគ្នា ប៉ុន្តែការប្រកួតវិញ្ញាសាឯកត្តជនបុរសដាវធំ យើងមិនទទួលបានលទ្ធផលល្អទេ។
លោក សុខ អាង ដែលជាអគ្គលេខាធិការសហព័ន្ធកីឡាគុនដាវកម្ពុជាបានចាត់ទុកការឈ្នះបានមេដាយប្រាក់ ១ និងសំរឹទ្ធ ២ ពីការប្រកួតជើងឯកអាស៊ាន ដែលមាន ៧ ប្រទេសចូលរួមលើកនេះជាលទ្ធផលដែលស្របទៅនឹងផែនការមេដាយរបស់សហព័ន្ធ ក្នុងការឆ្ពោះទៅកាន់ការប្រកួតស៊ីហ្គេមឆ្នាំ ២០២៣ នៅកម្ពុជា។
លោកបានបញ្ជាក់ថា៖ «កាលពីឆ្នាំទៅ ការប្រកួតកម្រិតអាស៊ាននេះ យើងបានមេដាយសំរឹទ្ធ ២ ប៉ុន្តែលើកនេះយើងបានមេដាយសំរឹទ្ធ ២ ហើយថែមទាំងបានមេដាយប្រាក់ ១ ទៀត គឺស្របទៅតាមផែនការមេរបស់យើង ហើយតាមរយៈជ័យជម្នះនេះ ខ្ញុំសង្ឃឹមថា យើងនឹងទទួលបានការគាំទ្រច្រើនពីប្រជាជនកម្ពុជា»៕
