កីឡាការិនី ខាន់ ចេសា បានគាបករបស់កីឡាការិនី Alhinnaai Mahra ដើម្បីយកឈ្នះដោយពិន្ទុ ១០០-០ ក្នុងវគ្គផ្តាច់ព្រ័ត្រ ទម្ងន់ក្រោម៤៩គីឡូក្រាម។ រូបថត AFP
ភ្នំពេញៈ កីឡាករម៉ូតូទឹក សាលី អ៊ូមើត និងកីឡាការិនីជឺជីតស៊ូ ខាន់ ចេសា បានរួមគ្នាដណ្តើមបានមេដាយមាស ២ និងសំរឹទ្ធ ១ ដើម្បីបំបែកកំណត់ត្រាប្រវត្តិសាស្រ្តថ្មីឲ្យកម្ពុជា ក្នុងការប្រកួតកីឡាអាស៊ី លើកទី១៨ ឆ្នាំ ២០១៨ (Asian Games) នៅប្រទេសឥណ្ឌូនេស៊ី ហើយលោកនាយករដ្ឋមន្រ្តី ហ៊ុន សែន បានចាត់ទុកជ័យជម្នះដ៏ធំនេះថា ជាមោទនភាពថ្មីមួយទៀតសម្រាប់កម្ពុជា។
លោកនាយករដ្ឋមន្រ្តី ហ៊ុន សែន បានសរសេរបង្ហោះនៅផេចហ្វេសប៊ុកផ្ទាល់ខ្លួនរបស់លោក កាលពីព្រឹកថ្ងៃអាទិត្យនេះថា៖«អបអរសាទរ! កម្ពុជាឈ្នះមេដាយមាស ជាលើកទី ២ ក្នុងការប្រកួតព្រឹត្តិការណ៍កីឡាអាស៊ី (Asian Games) លើកទី ១៨ នៅប្រទេសឥណ្ឌូនេស៊ី ហើយនេះជាមោទនភាពថ្មីមួយទៀត សម្រាប់ប្រទេសកម្ពុជា ដែលកីឡាការិនី ខាន់ ចេសា និងកីឡាករ សាលី អ៊ូមើត ឈ្នះបានមេដាយមាស»។
កម្ពុជា បានបំបែកកំណត់ត្រាប្រវត្តិសាស្រ្ត ចំពោះការឈ្នះបានមេដាយមាស ជាលើកទី ១ កាលពីឆ្នាំ ២០១៤ គឺនៅពេលដែលវីរនារីកីឡាការិនីតេក្វាន់ដូ ស៊ន សៀវម៉ី បានឈ្នះមេដាយមាស ក្នុងប្រភេទទម្ងន់ ៦៧ គីឡូក្រាមឡើង ប៉ុន្តែសម្រាប់ការប្រកួតលើកនេះ ស៊ន សៀវម៉ី បានធ្លាក់ត្រឹមវគ្គជម្រុះ៨នាក់ ក្រោយចាញ់កីឡាការិនី Osipova Svetlana របស់អ៊ូបេគីស្ថាន ជាមួយពិន្ទុ ៥-៣ កាលពីថ្ងៃអង្គារ ទី ២១ ខែសីហានេះ។
កីឡាករ សាលី អ៊ូមើត បានបើកបរម៉ូតូទឹកយ៉ាងលឿន ដើម្បីឈ្នះមេដាយមាសឲ្យកម្ពុជា លើវិញ្ញាសា Ski Modified កាលពីថ្ងៃសៅរ៍។
យ៉ាងណាក៏ដោយ សម្រាប់ការប្រកួតកាលពីថ្ងៃសុក្រ កន្លងមកនេះ កីឡាការិនីខ្មែរ-អាមេរិក ខាន់ ចេសា (Jessa Khan) បានធ្វើឲ្យប្រទេសក្នុងតំបន់អាស៊ី មានការភ្ញាក់ផ្អើលខ្លាំង ខណៈកីឡាការិនីមានវ័យត្រឹម ១៦ ឆ្នាំរូបនេះ បានឈ្នះមេដាយមាស ក្នុងទម្ងន់ក្រោម ៤៩ គីឡូក្រាម ក្រោយឈ្នះកីឡាការិនីអេវីរ៉ាត់អារ៉ាប់រួម Alhinaai Mahra ជាមួយពិន្ទុ ១០០-០នោះ។
ខាន់ ចេសា ដែលមានឱពុកឈ្មោះ Peter El Khan ជាជនជាតិខ្មែរ កើតនៅរាជធានីភ្នំពេញ និងម្តាយឈ្មោះ April Marie Khan ជាជនជាតិអេស្ប៉ាញ បានបង្ហាញការរីករាយយ៉ាងខ្លាំង ចំពោះការឈ្នះបានមេដាយមាសនេះ។ នាងបានសេរសេរបង្ហោះនៅលើផេចហ្វេសប៊ុករបស់ខ្លួនថា៖ «ខ្ញុំជាស្រ្តីដំបូងគេ ដែលបានឈ្នះមេដាយមាស ក្នុងកីឡាជឺជិតស៊ូ ក្នុងការប្រកួតកីឡាអាស៊ីនេះ ហើយខ្ញុំក៏ជាស្រ្តីដំបូងគេ ដែលបានហ្វឹកហាត់កីឡាជឺជីតស៊ូ ផងដែរ»។
កីឡាការិនី ដែលធ្លាប់ឈ្នះបានមេដាយមាសចំនួន ១៩ ក្នុងការប្រកួតលក្ខណៈ Champion ទាំងកម្រិតពិភពលោក និងថ្នាក់តំបន់ ខាន់ ចេសា បានបន្ថែមថា៖ «ខ្ញុំបានប្រកួតចំនួន ៥ ដង ដើម្បីឈ្នះមេដាយមាសឲ្យកម្ពុជា ហើយខ្ញុំពិតជាមានមោទនភាពខ្លាំងបំផុត ហើយជ័យជម្នះដ៏ធំនេះ វាមិនមែនសម្រាប់តែខ្ញុំម្នាក់ទេ ប៉ុន្តែសម្រាប់ប្រជាជនកម្ពុជាទាំងអស់ និងគ្រួសាររបស់ខ្ញុំ»។
បន្ថែមទៅលើការឈ្នះមេដាយមាសរបស់ ខាន់ ចេសា នេះ គឺកីឡាករម៉ូតូទឹក សាលី អ៊ូមើត បានធ្វើឲ្យប្រទេសកម្ពុជា កាន់តែមានភាពលេចធ្លោ នៅលើឆាកអន្តរជាតិ ខណៈរូបគេបានឈ្នះមេដាយមាស ១ និងសំរឹទ្ធ ១ បន្ថែមទៀត។ អ៊ូមើត បានឈ្នះមេដាយមាសលើវិញ្ញាសា Ski Modified និងឈ្នះមេដាយសំរិទ្ធ លើវិញ្ញាសា Runabout 1100 Stock។
ការឈ្នះបានមេដាយមាស ២ និងសំរិទ្ធ ១ ដែលរកបានដោយកីឡាករ សាលី អ៊ូមើត និងកីឡាការិនី ខាន់ ចេសា នេះ បានជួយឲ្យកម្ពុជា អាចបំបែកកំណត់ត្រាប្រវត្តិសាស្រ្ត ៦៤ ឆ្នាំ នៃការមិនដែលឈ្នះបានមេដាយមាស ២ ក្នុងព្រឹត្តិការណ៍កីឡាអាស៊ីនេះ។ លើសពីនេះជ័យជម្នះដ៏ធំនេះ បានជួយឲ្យកម្ពុជា កំពុងឈរនៅលេខរៀងទី ១៧ ជាបណ្តោះអាសន្ន ក្នុងចំណោមប្រទេសចំនួន ៣៣ ដែលបានឈ្នះមេដាយកីឡាអាស៊ីលើកនេះ៕
