កុមារីតារាចម្រៀងរលកក្រោយព្រះនាង នរោត្តម ជេនណា នាថ្ងៃប្រកាសក្លាយជាទូតសុច្ឆន្ទៈក្រុមហ៊ុន អ&អេហ្វ។ រូបថត អ៊ីនស្តាក្រាម និង ហ្វេសប៊ុក
ភ្នំពេញៈ នៅឆ្នាំ ២០២០ នេះ កុមារីតារាចម្រៀង និងតារាសម្តែង ដែលជាប់សែស្រឡាយរាជវង្ស ព្រះនាងតូច នរោត្តម ជេនណា មានរាសីឡើងខ្ពស់ក្រឺតៗ ដោយក្តោបបានឱកាសទីផ្សារសិល្បៈស្ទើរគ្រប់ទម្រង់ក្នុងពេលជិត ១ ឆ្នាំ ក្រៅពីបានក្លាយជាទូតសុច្ឆន្ទៈនៃក្រុមហ៊ុនទូរស័ព្ទ Cellcard នោះ ទ្រង់ក៏ក្លាយជាទូតសុច្ឆន្ទៈរបស់ក្រុមហ៊ុនអចលនទ្រព្យ អ&អេហ្វ និងផលិតផលនំម៉ាក ម៉ារីរីហ្គល Marie Regal ដែលជាផលិតផលប្រទេសឥណ្ឌូនេស៊ីថែមទៀតផង។
កុមារីជាតារាចម្រៀង សម្តែង និងម៉ូដែលពន្លកថ្មី ទើបតែមានព្រះជន្ម ៨ ឆ្នាំក៏នឹងត្រៀមយាងចេញដំណើរទៅកាន់ប្រទេសកូរ៉េខាងត្បូង ដើម្បីជួបជាមួយក្រុមតារាចម្រៀង K-pop ល្បីប្រចាំនៅកូរ៉េខាងត្បូងដែលទ្រង់សព្វព្រះទ័យគាំទ្រ ក្រោយពីទ្រង់បង្ហើបពីក្រុមនានាទាំងនោះរួមមានដូចជា ក្រុម Momo Land ក្រុម Twice ក្រុម Black Pink និងតារាសម្តែងប្រុសល្បីលោក Lee Min Ho ផងដែរ។
សម្រាប់កិត្តិសព្ទព្រះនាងតូច នរោត្តម ជេនណា ទ្រង់មានទេពកោសល្យ និងដុងពីកំណើតលើវិស័យសិល្បៈទាំងបុរាណ និងសម័យ ហើយទ្រង់ក៏ចេះនិយាយដល់ទៅ ៥ ភាសាឯណោះបានបញ្ចេញសូរសៀងនៃបទចម្រៀងថ្មីដំបូងមានចំណងជើងថា «ដួងចន្ទ» ដែលជាការនិពន្ធបទភ្លេង និង ទំនុកច្រៀងវិញដោយ Kelly នៅផលិតកម្ម 7G Entertainment។
ខណៈពេលក្រោយៗមកគេឃើញមានបទ «កន្ទ្រឹមខែចេត្រ» បទ «ក្តៅណាស់» និងពេលថ្មីៗនេះ ក៏ផ្ទុះមានការគាំទ្រលើបទចម្រៀងមួយ ដែលមានចំណងជើងថា «វាសនាធីតាព្កុលមាស» ជាបទចម្រៀងថ្មី សម្រាប់ការចាក់ក្នុងខ្សែភាពយន្តបុរាណរឿង «ទេពធីតាថ្កុលមាស» ក្នុងឆ្នាំ ២០២០ សម្រាប់កុនចាក់បញ្ចាំងនៅទូរទស្សន៍ស៊ីធីអិន។
ដោយឡែកកាលពីថ្ងៃទី ១០ ខែតុលា ឆ្នាំ ២០២០ កន្លងមកថ្មីៗនេះ ព្រះនាងតូច នរោត្តម ជេនណា ត្រូវបានក្រុមអចលនទ្រព្យខ្នាតយក្ស អ&អេហ្វ ប្រផឹធី (ខេមបូឌា) ក៏បានតែងតាំងទ្រង់ធ្វើជាទូតសុច្ឆន្ទៈ និងបានរៀបចំកម្មវិធីចុះហត្ថលេខាជាផ្លូវការជាមួយព្រះនាងតូចជាទូតសុច្ឆន្ទៈរបស់ក្រុមហ៊ុននោះ។
សមិទ្ធផលដែលកើតចេញពីការមើលឃើញទេពកោសល្យសិល្បៈល្អរបស់ទ្រង់កំពុងតែបានក្លាយជាទីភ្នាក់ងារភ្ជាប់ទំនាក់ទំនងនៃវប្បធម៌សិល្បៈរវាងប្រទេសទាំង ២ គឺកម្ពុជា និងកូរ៉េខាងត្បូងនេះក៏ត្រូវបានបណ្តាញសារព័ត៌មានប្រទេសកូរ៉េ www.nbnnews.co.kr ចុះផ្សាយកាលពីកន្លងមក។
សារព័ត៌មាននេះបានចុះផ្សាយថា វត្តមានព្រះនាងតូចខ្មែរ នរោត្តមជេនណា កំពុងតែធ្វើឱ្យមានការភ្ញាក់ផ្អើលតាមរយៈបណ្តាញសង្គមជាមួយអ្នកភ្ជាប់ទំនាក់ទំនងសង្គម ដែលមាន 800 000 followers និងមានចំនួន 6 million YouTube views៕
