កញ្ញា Tashnuva អាយុ ២៩ ឆ្នាំ ជានារីកែភេទដំបូងបង្អស់ដែលបម្រើការជាអ្នកអានព័ត៌មានតាមកញ្ចក់ទូរទស្សន៍។ AFP
ក្រុងដាកា៖ សម្លេងហ៊ោរអបអរសាទរពីមិត្តរួមការងារបានបន្លឺឡើង នៅពេលដែលសហការីអ្នកអានព័ត៌មានទូរទស្សន៍ ជានារីកែភេទរំភើបទប់ទឹកភ្នែកពុំបានក្រោយពីបញ្ចប់ការអានព័ត៌មានហើយកាមេរ៉ាថតក៏បានបិទជាស្ថាពរ។
បង់ក្លាដេសជាប្រទេសដែលមានប្រជាជនកែភេទ ១,៥ លាននាក់ ដោយពួកគេសុទ្ធសឹងតែប្រឈមនឹងហិង្សា ការរើសអើង និងការបង្ខំឲ្យដើរសុំទាន លក់ខ្លួន និងប្រព្រឹត្តិអំពើឧក្រិដ្ឋកម្ម។
បទពិសោធរបស់អ្នកអានព័ត៌មាន Tashnuva Anan Shishir ជានារីកែភេទ ដែលបានបញ្ចប់កម្មវិធីព័ត៌មានខ្លីរយៈពេល ៣នាទីឲ្យស្ថានីទូរទស្សន៍ឯកជន Boishakhi TV រូបនេះក៏មិនសូវខុសពីពលរដ្ឋបង់ក្លាដេសភេទទីបីឯទៀតដែរ។
នារីកែភេទដំបូងបង្អស់ដែលអានព័ត៌មានតាមកញ្ចក់ទូរទស្សន៍ មានខ្សែជិវិតមិនខុសពីអ្នកកែភេទខ្ទង់លាននាក់នៅបង់ក្លាដេស។ AFP
ដោយមានឈ្មោះពីកំណើតថា Kamal Hossain Shishir នាងបានដឹងខ្លួនតាំងពីនៅជំទង់ថា នាងជានារីភេទក្នុងរាងកាយបុរស។ នាងរំឭកថា នាងតែងតែត្រូវបានគេធ្វើបាប និងមាក់ងាយផ្លូវភេទអស់រយៈពេលជាច្រើនឆ្នាំមកហើយ។
កញ្ញាកែភេទវ័យ ២៩ឆ្នាំរូបនេះបានរំឭកការឈឺចាប់គ្រានោះទៀតថា៖ «ទង្វើធ្វើបាបមកលើរូបខ្ញុំកាលណោះ សឹងតែពុំអាចទ្រាំទ្របាន ហើយខ្ញុំធ្លាប់ប៉ុនប៉ងសម្លាប់ខ្លួន ៤ដងមកហើយ។ ឪពុករបស់ខ្ញុំឈប់និយាយរកខ្ញុំរាប់ឆ្នាំហើយ»។
ដោយទ្រាំលែងបាន នាងក៏បានចាក់ចេញពីផ្ទះ ដោយនាងលើកឡើងថា៖ «ខ្ញុំលែងចង់ឃើញអ្នកជិតខាងខ្ញុំដែលតែងតែនិយាយដើមខ្ញុំ រិះគន់ខ្ញុំប្រាប់ឪពុកខ្ញុំថា ខ្ញុំគួរតែហាត់ដើរឲ្យស្វាហាប់ដូចប្រុស ខ្ញុំគួរតែធ្វើចរិតប្រុស»។
កញ្ញា Tashnuva រំភើបទប់ទឹកភ្នែកមិនបាន ក្រោយពីបញ្ចប់ការអានព័ត៌មាន។ AFP
នាងបានដើរពនេចររហូតទៅដល់ស្រុកមួយនៅតំបន់ឆ្នេរសមុទ្រភាគខាងត្បូង ដោយកសាងជីវិតថ្មីតែម្នាក់ឯងនៅរដ្ឋធានីដាកា មុននឹងបន្តខ្សែជីវិតទៅរស់នៅទីក្រុង Narayanganj។
ទៅដល់ទីនោះ នាងបានឆ្លងកាត់ការចាក់អ័រម៉ូនកែភេទ នឹងចាប់ផ្ដើមការងារនៅអង្គការមនុស្សធម៌ រួមទាំងឆ្លៀតសម្ដែងនៅរោងមហស្រព ដើម្បីរកថវិកាបន្តការសិក្សា។
កាលពីខែមករា ដើមឆ្នាំ ២០២១ នាងបានក្លាយជានារីកែភេទដំបូងបង្អស់ ដែលបានបន្តការសិក្សាអនុបណ្ឌិតផ្នែកសុខាភិបាលសាធារណៈ នៅសាកលវិទ្យាល័យ James P Grant School of Public Health ឯទីក្រុងដាកា។
បន្ទាប់មកនាងក៏បានចូលបម្រើការជាអ្នកអានព័ត៌មានឲ្យទូរទស្សន៍។
លោក Julfikar Ali Manik ជាអ្នកនាំពាក្យស្ថានីយ៍ Boishakhi TV បានឲ្យដឹងថា ប៉ុស្ដិ៍ទូរទស្សន៍នេះព្យាយាមផ្ដល់ឱកាសដល់ Shishir បើទោះជាស្ថានីយ៍ទូរទស្សន៍របស់ខ្លួនអាចប្រឈមនឹងការរិះគន់ចាស់ដៃពីមនុស្សក្នុងសង្គមដ៏អភិរក្ស។
លោកបានបញ្ជាក់យ៉ាងខ្លីថា៖ «វត្តមានបើកឆាករបស់នាង គឺជាការបោះជំហានមួយក្នុងប្រវត្តិសាស្ត្រ»៕ AFP/HR
សហការីរបស់នាង ថតរូបអនុស្សាវរីយ៍ជាមួយកញ្ញា Tashnuva ជានារីកែភេទ៕ AFP
សហការីថតរូបអនុស្សាវរីយ៍ជាមួយនារីកែភេទដែលជាបុគ្គលិកអានព័ត៌មានទូរទស្សន៍ដំបូងបង្អស់នៅបង់ក្លាដេស។ AFP
កញ្ញា Tashnuva តាក់តែងកាយមុនចូលស្ទូឌីយោអានព័ត៌មាន។ AFP
