ក្រុងពោធិ៍សាត់: ដើរលើស្ពានប្រគងមែកឈើ និងដើមឫស្សីកម្ពស់ប្រផិតៗទឹកអូរ ដែលជាជម្រកក្រពើភ្នំរាប់សិបក្បាលបំណងដើរទស្សនាក្រពើពិតជាធ្វើឲ្យអារម្មណ៍ព្រឺព្រួច ស្រៀវអស់ឆ្អឹងខ្នង។ អ្នកឆ្លងស្ពានគ្រប់រូបរមែងសង្ឃឹមថាក្រពើភ្នំទាំងនេះមិនស្រេកឃ្លានក្នុងពេលនេះទៅចុះ។
បឹងក្រពើស្ថិតក្នុងភូមិអូរសោមជាតំបន់សហគមន៍អេកូទេសចរណ៍កំពុងពេញនិយមពីសំណាក់ភ្ញៀវជាតិ និងអន្ដរជាតិនៅចំគោលដៅចន្លោះរវាងកោះកុងចម្ងាយប្រមាណ ១០០ គីឡូម៉ែត្រ និងទីរួមខេត្ដពោធិ៍សាត់ចម្ងាយ ១៧០ គីឡូម៉ែត្រ គឺជាគោលដៅទេសចរណ៍ដ៏ទាក់ទាញមួយចំពោះភ្ញៀវទេសចរដែលមកស្នាក់អាស្រ័យក្នុងសហគមន៍ហ៊ុមព័ទ្ធដោយសម្រស់ធម្មជាតិបៃតងស្រស់នេះ។
ចម្ងាយប្រមាណ ១៣ គីឡូម៉ែត្រភាគខាងត្បូងភូមិអូរសោមនៃតំបន់ជួរភ្នំក្រវាញអូរដៃព្រែក ឬបឹងក្រពើ ភូមិអូរសោម ឃុំអូរសោម ស្រុកវាលវែង ជាជម្រកអភិរក្សក្រពើភ្នំចំនួនប្រមាណ ៤០ ទៅ ៦០ ក្បាលដែលជាសត្វស្ទើរតែផុតពូជនៅក្នុងពិភពលោក។ ភ្ញៀវទេសចរអាចមានឱកាសបានឃើញសត្វស៊ីត្រី និងដី (មិនធ្លាប់វាយប្រហារមនុស្ស) ចាប់ពីខែធ្នូដល់ខែឧសភា។
រថយន្តដឹកភ្ញៀវទស្សនាតំបន់អេកូទេសចរណ៍សហគមន៍ អូរសោម។ រូបថត សហការី
លោក នួន លីម ម្ចាស់ផ្ទះស្នាក់មជ្ឈមណ្ឌលសហគមន៍ភ្នំក្រវាញអូរសោម និងជាសមាជិកសហគមន៍ដ៏សកម្មម្នាក់ដែលជាអ្នកចាត់ចែងក្រុមម៉ូតូជូនភ្ញៀវដល់គោលដៅបាននិយាយថា៖ «ភ្ញៀវទេសចរភាគច្រើនទាំងខ្មែរ និងបរទេសមិនភ្លេចដំណើរទៅទស្សនាក្រពើភ្នំជាសត្វកម្រដែលត្រូវបានអភិរក្សឡើយ»។
បរម៉ូតូតាមផ្លូវកាត់រទេះកាត់វាលចូលព្រៃ កាត់ព្រៃចូលវាលប្រមាណជិតមួយម៉ោង យើងបានទៅដល់ផ្ទះអ្នកភូមិជនជាតិដើមភាគតិចជងរួចដើរ ៥០០ ម៉ែត្រទៅកាន់អូរបឹងក្រពើ។ ពន្លឺព្រះសុរិយាចាប់ផ្ដើមអស់រស្មីបន្ដិចម្ដងៗជាវេលាដែលមគ្គុទ្ទេសក៍អះអាងថាជាឱកាសទស្សនាក្រពើភ្នំច្រើនបំផុត។
លោក ហេង ឈុន ហៅ ឆ្លូញ អាយុ ៥០ ឆ្នាំមានបទពិសោធនាំភ្ញៀវ ពី ២ ទៅ ៥ ជើងក្នុងមួយសប្ដាហ៍រយៈពេល ៥ ឆ្នាំបានប្រាប់ថា៖ «ជាទូទៅក្រពើឧស្សាហ៍ងើបនាពេលយប់ជាជាងពេលថ្ងៃ។ ដូច្នេះឱកាសពេលយប់គួរតែស័ក្ដិសម» ។
មនុស្សគិតមិនដូចទេវតាគិត។ អង្គុយសំកុករហូតដល់ថ្ងៃលិចបាត់ ផ្ទៃមេឃឃើញតែហ្វូងតារារយពាន់ រីឯព្រៃគុម្ពោត និងវាលស្រែប្រែជាងងឹតអស់ពន្លឺ។ ក្រុមការងារចាប់ផ្ដើមផ្សងព្រេងដោយត្រូវដើរឆ្លងកាត់ស្ពានប្រគងឈើលើដងអូរទៅកាន់ត្រើយម្ខាងដើម្បីស្វែងរកកែវភ្នែកក្រហមទាំងគូៗរំលេចផុសនៅលើផ្ទៃទឹក។
ជាអកុសលម្នាក់ៗខំដើរបណ្ដើរ ភ្នែករំពៃមើលឆ្វេងស្ដាំបណ្ដើរ ក្រែងលោប្រទះឃើញវត្ដមានសម្លាញ់ធ្មេញស្រួចនៅក្បែរៗខ្លួនដោយចៃដន្យរហូតដល់ចម្ងាយផ្លូវជិត ១ គីឡូម៉ែត្រ ប្រ៉បតាមដងអូរនៅតែមិនឃើញតួឯកផុសខ្លួនឡើយ។
ភ្ញៀវបរទេសបោះជំរំ និងអង្គុយជុំវិញភ្នក់ភ្លើងជាផ្នែកមួយនៃដំណើរកម្សាន្តផ្សងព្រេងនៅតំបន់អេកូទេសចរណ៍។ រូបថត សហការី
ស្ទើរតែពេញ ១ យប់យើងគ្រាន់តែអាចបានឃើញកែវភ្នែកក្រហម ១ គូផុសលើផ្ទៃទឹក ១ ភ្លែត និងលាមកក្រៀមពណ៌សរបស់វាបណ្ដែតលើដីវាលស្រែក្បែរទឹកអូរប៉ុណ្ណោះ។
លោក ហេង ឈុន បានសារភាពថាមួយរយៈចុងក្រោយនេះក្រពើហាក់មិនសូវបង្ហាញខ្លួនដូចសព្វ ១ ដងទេ បន្ទាប់ពីអ្នកភូមិឧស្សាហ៍មករំខានការរស់នៅរបស់ពួកវា។
លោកបាននិយាយថា៖ «អ្នកភូមិតែងតែនាំគ្នាមកនេសាទត្រីនាពេលយប់ជាញឹកញាប់ ហើយប៉ុន្មានខែមុននេះមានមនុស្ស ១ ក្រុមនាំគ្នាមកជីកកកាយគល់គ្រញូងដែលពួកគេប្រទះឃើញដោយចៃដន្យ ប៉ុន្មានថ្ងៃជាប់ៗគ្នា។ ខ្ញុំគិតថា ម៉ាស៊ីនគោយន្ដទាញគ្រញូងបានធ្វើឲ្យផ្អើលដល់ហ្វូងក្រពើ» ។
លោក លីម បានប្រាប់ថាបច្ចុប្បន្នចំនួនក្រពើភ្នំក្នុងបឹងក្រពើនេះមានប្រមាណតែ ១០ ក្បាលប៉ុណ្ណោះ ដោយសារតែពលរដ្ឋនាំគ្នានេសាទដោយខ្លះប្រើឧបករណ៍ឆក់ រំខានដល់ការរស់នៅរបស់ក្រពើ ហើយពួកវាជាច្រើនក៏ធ្វើការបំផ្លាស់ទីទៅកន្លែងផ្សេង។
នៅមិនអស់ចិត្ដក្រុមការងារភ្នំពេញប៉ុស្ដិ៍ វិលមកកាន់បឹងក្រពើជាថ្មីនៅរាត្រីថ្ងៃបន្ទាប់ដោយប្រទះឃើញក្រពើភ្នំ ៣ ក្បាលសម្ងំខ្លួនក្នុងគុម្ពោតព្រៃចេក។
យ៉ាងណាមិញការប៉ុនប៉ងចង់ឃើញក្រពើភ្នំក្នុងបឹងក្រពើទាមទារភាពអំណត់ដោយត្រូវរង់ចាំពេលវេលាដ៏ស័ក្ដិសមរបស់វា។ បើអាចភ្ញៀវទេសចរគួរឆ្លៀតពេលបោះតង់ស្នាក់នៅក្បែរបឹងក្រពើ ១ រាត្រីក្រោមការជួយនាំផ្លូវពីមគ្គុទ្ទេសក៍ភូមិមានបទពិសោធ៕
ភ្ញៀវទេសចរបញ្ចាំងភ្លើងពិលប្លុងៗរង់ចាំមើលក្រពើភ្នំ។ផា លីណា
វីដេអូ៖
