ទិដ្ឋភាពនៅពហុកីឡដ្ឋានជាតិមរតកតេជោ។ សហការី
ភ្នំពេញៈ ក្រោមម្លប់ដើមឈើដ៏ត្រជាក់ ក្បែរសាលដំបូលទូកនៃពហុកីឡដ្ឋានជាតិអូឡាំពិក បុរស ១ ក្រុម បានចែកបារីឱ្យគ្នា ហើយបាននាំគ្នាជក់ផ្លុំផ្សែងហុយទ្រលោម និងបានជជែកគ្នា ដោយមិនបានខ្វល់ពីអ្វីទាំងអស់ ចំណែកបុរសម្នាក់ទៀត ដែលគេស្គាល់ថា ជាមន្ត្រីកីឡា ក៏បានសម្ងំជក់បារីយ៉ាងស្ងៀមស្ងាត់នៅក្បែរសាលនោះផងដែរ។ យ៉ាងណាក៏ដោយ ការចែកបារីឱ្យគ្នាជក់ នៅក្នុងបរិវេណពហុកីឡដ្ឋាន និងទីកន្លែងហ្វឹកហាត់ និងប្រកួតកីឡានេះ វាបានកើតមានឡើងច្រើនទសវត្សរ៍មកហើយ ហើយមនុស្សមួយចំនួនធំ បានប្រែក្លាយសកម្មភាពនេះ ទៅជាទម្លាប់ ដោយមិនអាចអត់បារីបានទេ បើទោះបីជាពួកគាត់ដឹងថា ការជក់បារី ធ្វើឱ្យខូចសុខភាព និងប៉ះពាល់ដល់អ្នកជុំវិញខ្លួនក៏ដោយ។
«ខ្ញុំដឹងថា ការជក់បារីវាមិនល្អ ព្រោះប៉ះពាល់ដល់សុខភាពទាំងអ្នកជក់ និងអ្នកនៅជុំវិញខ្លួន ប៉ុន្តែបើអត់ជក់ វានៅអត់សុខ! វាដូចជាជូរមាត់យ៉ាងម៉េចមិនដឹងទេ តែដល់ជក់ ១ ដើមទៅដូចធូរតែម្តង»។ នេះជាការបញ្ជាក់របស់មន្ត្រីកីឡាម្នាក់ ដែលបានប្រាប់ភ្នំពេញប៉ុស្តិ៍ ដោយសុំមិនបញ្ចេញឈ្មោះ ប៉ុន្តែគាត់បានអះអាងថា នៅពេលជក់បារី គាត់តែងទៅឈរនៅដាច់ឆ្ងាយពីគេ មិនឱ្យផ្សែងបារីរបស់គាត់ប៉ះដល់អ្នកផ្សេងឡើយ។
តែទោះបីជាយ៉ាងណា សកម្មភាពជក់បារី និងចែកចាយបារីគ្រប់រូបភាព នៅកន្លែងស្នាក់នៅរបស់កីឡាករ កីឡាការិនី កន្លែងហ្វឹកហាត់ បរិវេណប្រកួត កន្លែងទស្សនា និងបរិវេណ កីឡដ្ឋានជាដើម នឹងត្រូវហាមឃាត់ មិនឱ្យមានទៀតទេ ព្រោះក្រសួងអប់រំ យុវជន និងកីឡា ទើបតែបានចេញនូវសេចក្តីណែនាំស្តីពីការអនុវត្តគោលការណ៍ “កីឡាគ្មានថ្នាំជក់” ដោយជំរុញគ្រប់ភាគីពាក់ព័ន្ធនៅក្នុងវិស័យកីឡា ត្រូវលុបបំបាត់ឱ្យបាននូវគ្រប់ទម្រង់រូបភាព ដែលទាក់ទងទៅនឹងការជក់បារី ការចែកចាយបារី និងការផ្សព្វផ្សាយផលិតថ្នាំជក់។
លោកឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ហង់ជួន ណារ៉ុន បានចេញសេចក្ដីណែនាំស្តីការអនុវត្តគោលការណ៍ “កីឡាគ្មានថ្នាំជក់-TOBACCO-FREE SPORTS" នេះ កាលពីថ្ងៃទី ២៧ ខែធ្នូ ឆ្នាំ ២០២៣ ហើយត្រូវបានចែកចាយ កាលពីថ្ងៃទី ៤ ខែមករា ឆ្នាំ ២០២៤។
ការឱ្យអនុវត្តគោលការណ៍កីឡាគ្មានថ្នាំជក់នេះ ដោយសារតែក្រសួង បានមើលឃើញថា ផលប៉ះពាល់នៃផលិតផលថ្នាំជក់មានទំហំធំធេង ជាពិសេសបំផ្លាញសុខភាព ទាំងអ្នកប្រើប្រាស់ និងអ្នកនៅជុំវិញ ដែលទាមទារឱ្យមានការយកចិត្តទុកដាក់ និងការចូលរួមទាំងអស់គ្នា ព្រោះ ជាតិនីកូទីន និងសារធាតុគីមីផ្សេងទៀត ដែលមាននៅក្នុងផ្សែងថ្នាំជក់ ធ្វើឱ្យអន់ថយដល់រាងកាយ បង្កការរំខានដល់ការស្រូបយកអុកស៊ីហ្ស៊ែន ប៉ះពាល់ដល់ចរន្តឈាម សួត សាច់ដុំ សន្លាក់ និងខួរក្បាល។
ជាមួយផលប៉ះពាល់ដ៏ធ្ងន់ធ្ងរនេះ គណៈកម្មាធិការជាតិអូឡាំពិកអន្តរជាតិ (IOC) បានចុះកិច្ចព្រមព្រៀងជាមួយអង្គការសុខភាពពិភពលោក (WHO) ដោយបានអនុម័ត កីឡាគ្មានថ្នាំជក់នេះ តាំងពីឆ្នាំ ១៩៨៨ សម្រាប់ការប្រកួតកីឡាអូឡាំពិក ហើយបានក្លាយជាវប្បធម៌នៃការប្រកួតកីឡារហូតដល់បច្ចុប្បន្ន។
ប៉ុន្តែសកម្មភាពជក់បារី ការចែកចាយបារី និងការផ្សព្វផ្សាយផលិតថ្នាំជក់ នៅកន្លែងស្នាក់នៅរបស់កីឡាករ កីឡាការិនី កន្លែងហ្វឹកហាត់ បរិវេណប្រកួត កន្លែងទស្សនា និងបរិវេណ កីឡដ្ឋានជាដើម នៅតែកើតមានឡើង ខណៈប្រភេទកីឡាខ្លះលេងបណ្តើរ ជក់បារីបណ្តើរក៏មាន ព្រោះក្រុមអត្តពលិក រួមទាំងគ្រូបង្វឹក និងមន្ត្រីកីឡាមួយចំនួន ជាអ្នកជក់បារី ចំណែកអ្នកមកទស្សនាមួយចំនួនធំ ក៏ជាអ្នកជក់បារីដូចគ្នា។
ជាមួយភាពអសកម្មទាំងអស់នេះហើយ ទើបក្រសួងអប់រំ យុវជន និងកីឡា បានណែនាំឱ្យអនុវត្តគោលការណ៍ “កីឡាគ្មានថ្នាំជក់” ដោយក្រសួងបានបញ្ជាក់ថា៖ «ដើម្បីលើកកម្ពស់វប្បធម៌កីឡាគ្មានថ្នាំជក់ និងពង្រឹងសមត្ថភាពប្រកួតជាអតិបរមា និងទប់ស្កាត់ផលប៉ះពាល់ដល់សុខភាពរបស់កីឡាករ កីឡាការិនី អ្នករៀបចំ និងទស្សនិកជនពីការប្រើប្រាស់ផលិតផលថ្នាំជក់»។
ជាមួយការដាក់ចេញនូវសេចក្តីណែនាំ ស្ដីពីការអនុវត្តគោលការណ៍ “កីឡាគ្មានថ្នាំជក់”នេះ ក្រសួងអប់រំ បានកំណត់ចំណុចគោលចំនួន ៧ ដើម្បីឱ្យគ្រប់ភាគីពាក់ព័ន្ធចូលរួមអនុវត្តជាមួយគ្នា គឺទី១ បិទស្លាក ឬដាក់បម្រាមអំពីការហាមជក់ ឬបង្ហុយផ្សែងផលិតផលថ្នាំជក់ បារីអេឡិចត្រូនិក ឬផលិតផលអេចឈ៍ធីភី (HTPs) នៅកន្លែងស្នាក់នៅកីឡាករ កីឡាការិនី កន្លែងហ្វឹកហាត់ បរិវេណប្រកួត កន្លែងទស្សនា និងបរិវេណ កីឡដ្ឋានជាដើម។
ទី២ ហាមឃាត់ការប្រើប្រាស់ផលិតផលថ្នាំជក់ បារីអេឡិចត្រូនិក ឬផលិតផល HTPs នៅកន្លែងស្នាក់នៅកីឡាករ កីឡាការិនី កន្លែងហ្វឹកហាត់ បរិវេណប្រកួត កន្លែងទស្សនា និងបរិវេណកីឡដ្ឋានជាដើម។
ទី៣ ចំពោះជនណាល្មើសសេចក្តីណែនាំ ត្រូវសហការជាមួយសមត្ថកិច្ចបញ្ឈប់ និងចាត់វិធានការឱ្យទាន់ពេលវេលា។
ទី៤ ហាមឃាត់ការលក់ ការចែកចាយ ឬការផ្សាយពាណិជ្ជកម្មផលិតផលថ្នាំជក់ រួមទាំងបារីអេឡិចត្រូនិក ឬផលិតផល HTPs ទោះក្នុងទម្រង់ណាក៏ដោយ នៅកន្លែងស្នាក់នៅ កីឡាករកីឡាការិនី កន្លែងហ្វឹកហាត់ បរិវេណប្រកួត កន្លែងទស្សនា និងបរិវេណកីឡដ្ឋានជាដើម។
ទី៥ មិនទទួលការឧបត្ថម្ភពីក្រុមហ៊ុនថ្នាំជក់ ក្រុមហ៊ុនបារីអេឡិចត្រូនិក ឬក្រុមហ៊ុនផលិតផល HTPs ទោះក្នុងទម្រង់ ឬគោលបំណងណាក៏ដោយ។
ទី៦ មិនសហការ ឬមិនអនុញ្ញាតផ្តល់ទីកន្លែង សម្រាប់រៀបចំកម្មវិធីណាមួយរបស់ក្រុមហ៊ុនថ្នាំជក់ ក្រុមហ៊ុនបារីអេឡិចត្រូនិក ឬផលិតផល HTPs និងទី៧ ចុងក្រោយ គឺក្រសួងអប់រំ ណែនាំឱ្យសហព័ន្ធកីឡា និងក្លិបកីឡាទាំងអស់ រៀបចំបញ្ចូលគោលការណ៍ “កីឡាគ្មានថ្នាំជក់” នៅក្នុងបទបញ្ជាផ្ទៃក្នុងរបស់ខ្លួនដូចៗគ្នា។
ជាមួយការណែនាំឱ្យអនុវត្ត គោលការណ៍ទាំង ៧ ចំណុចនេះ លោក ហង់ជួន ណារ៉ុន បានបញ្ជាក់ នៅក្នុងសេចក្តីណែនាំនេះថា៖ «ប្រធានអង្គភាព ក្រោមឱវាទទីស្តីការក្រសួង ប្រធានមន្ទីរអប់រំ យុវជន និងកីឡារាជធានីខេត្ត អភិបាលនៃគណៈអភិបាលក្រុង ស្រុក ខណ្ឌ ប្រធានសហព័ន្ធកីឡា ក្លិបកីឡា និងកន្លែងប្រកួតកីឡាទាំងអស់ ត្រូវផ្សព្វផ្សាយគោលការណ៍ «កីឡាគ្មានថ្នាំជក់» និងអនុវត្តតាមសេចក្ដីណែនាំនេះ ឱ្យមានប្រសិទ្ធភាពដោយស្មារតីទទួលខុសត្រូវខ្ពស់»។
ចំពោះការណែនាំស្តីពីការអនុវត្តគោលការណ៍ កីឡាគ្មានថ្នាំជក់ របស់ក្រសួងអប់រំនេះ លោក ប៉ុន សុខ អគ្គនាយកនៃអគ្គនាយកដ្ឋានកីឡា និងជាប្រធានមជ្ឈមណ្ឌលជាតិហ្វឹកហ្វឺនកីឡា បានប្រាប់ថា៖«ការងារនេះ យើងបានផ្សព្វផ្សាយដល់អង្គភាពពាក់ព័ន្ធរួចហើយ ជាពិសេសសហព័ន្ធកីឡាជាតិ ព្រោះនេះជាការចូលរួមលើកកម្ពស់ពីបញ្ហាសុខភាពជាសកល ដែលយើងយកចិត្តទុកដាក់ដល់កីឡាករ កីឡាការិនីរបស់យើង និងកីឡាគ្មានផ្សែងបារី ហើយគេនឹងបើកសិក្ខាសាលា ដើម្បីផ្សព្វផ្សាយពីគោលការណ៍ណែនាំនេះ ជាបន្តបន្ទាប់ទៀត»។
លោក នូ ចំរើន អគ្គលេខាធិការ សហព័ន្ធកីឡាទោចក្រយានកម្ពុជា បានគាំទ្រពេញទំហឹង ចំពោះសេចក្តីណែនាំស្តីពីការអនុវត្តគោលការណ៍ “កីឡាគ្មានថ្នាំជក់” របស់ក្រសួងអប់រំ ព្រោះវានឹងធ្វើឱ្យវិស័យកីឡា កាន់តែមានការរីកចម្រើន ជាមួយនឹងបរិយាកាសល្អបរិស្ថានស្អាត គ្មានផ្សែងបារី និងកន្ទុយបារីចោលនៅពាសពេញទីលានប្រកួតដូចពេលកន្លងមក។
លោក នូ ចំរើន បាននិយាយថា៖ «កន្លងមកបញ្ហាជក់បារីនេះ យើងបានហាមតែក្រុមជម្រើសជាតិទេ ព្រោះប្រភេទកីឡាជិះកង់នេះ ទាមទារឱ្យមានភាពអំណត់ខ្លាំង ពិសេសស៊ូនឹងការហត់ អ៊ីចឹងបើយើងជក់បារី កម្លាំងរបស់យើងក៏ថមថយ និងឆាប់ហត់ មិនអាចស៊ូនឹងការហ្វឹកហាត់ខ្លាំង និងប្រកួតបានល្អនោះទេ ហេតុនេះកម្រិតបច្ចេកទេសរបស់ក្រុមអត្តពលិកយើង ក៏មិនអាចកើនឡើងខ្ពស់ដូចគ្នា»។
អគ្គលេខាធិការរូបនេះ បានបន្ថែមថា៖ «ចំណែកកីឡាករ កីឡាការិនីក្រៅពីជម្រើសជាតិ ដែលបានចូលរួមក្នុងការប្រកួតជើងឯកថ្នាក់ជាតិក្តី និងព្រឹត្តិការណ៍ផ្សេងៗទៀតក្តី យើងមិនបានហាមឃាត់ឡើយ ព្រោះមិនទាន់មានគោលការណ៍ ប៉ុន្តែពេលនេះក្រសួងអប់រំ បានចេញសេចក្តីណែនាំហើយ អ៊ីចឹងយើងនឹងយកការអនុវត្តគោលការណ៍កីឡាគ្មានថ្នាំជក់នេះ ទៅណែនាំបន្តដល់បណ្តាក្លិបចំណុះឱ្យសហព័ន្ធ និងភាគីពាក់ព័ន្ធផ្សេងៗទៀត ដើម្បីធ្វើឱ្យវិស័យកីឡារបស់យើងកាន់តែមានសុវត្ថិភាព សុខភាព និងភាពរីកចម្រើនទៅមុខជាមួយគ្នា»។
អតីតកីឡាករជម្រើសជាតិកីឡាអត្តពលកម្ម ពីឆ្នាំ ២០១២ ដល់ ២០១៩ ម៉ា វីរ៉ូ បានសាទរចំពោះសេចក្តីណែនាំឱ្យអនុវត្តគោលការណ៍ “កីឡាគ្មានថ្នាំជក់” នៅក្នុងប្រទេសកម្ពុជា ព្រោះក្នុងនាមជាកីឡាករជំនាញរត់ពាក់កណ្តាលម៉ារ៉ាតុង និងម៉ារ៉ាតុង អស់រយៈពេលជាង ១០ ឆ្នាំនេះ វីរ៉ូ បានមើលឃើញថា ការជក់បារី ពិតជាបានបង្ហាញរូបភាពមិនល្អ និងប៉ះពាល់ដល់កីឡាករ កីឡាការិនី ទាំងក្នុងពេលពួកគេហ្វឹកហាត់ និងប្រកួត។
ម៉ា វីរ៉ូ ដែលធ្លាប់ឈ្នះបានមេដាយមាស និងពានជាច្រើន សម្រាប់ការប្រកួតនៅក្នុងស្រុកនោះ បានប្រាប់ថា៖ «សកម្មភាពជក់បារី នៅបរិវេណកន្លែងហ្វឹកហាត់ និងទីលានប្រកួត ខ្ញុំធ្លាប់បានឃើញច្រើន ហើយពេលខ្លះខ្ញុំក៏មានអារម្មណ៍ផងដែរ ប៉ុន្តែយើងមិនអាចស្តីថា ឱ្យគាត់បានទេ ព្រោះជាសិទ្ធិរបស់ពួកគាត់ អ៊ីចឹងហើយខ្ញុំសប្បាយចិត្ត និងគាំទ្រនូវការអនុវត្តគោលការណ៍ កីឡាគ្មានថ្នាំជក់»។
តើការជក់បារី មានផលប៉ះពាល់បែបណា ដល់សុខភាពអ្នកហាត់កីឡា? ម៉ា វីរ៉ូ បានឆ្លើយតបថា៖ «យើងដឹងហើយថា ផឹកស្រាខូចថ្លើម ជក់បារីខូចសួត តែអ្នកហាត់កីឡា ត្រូវមានសួតល្អ ជាពិសេសផ្នែករត់ប្រណាំង ព្រោះបើយើងខ្សោយសួត មិនអាចអត់ធន់ជាមួយការ រត់បានទេ អ៊ីចឹងការជក់បារី គ្មានផលចំណេញអ្វីឡើយ ចំពោះកីឡាករ កីឡាការិនីរបស់យើង ជាពិសេសក្រុមជម្រើសជាតិ គួរឈប់ជក់បារី បើសិនជាចង់ឱ្យសមត្ថភាពខ្លួនឯង មានការរីកចម្រើនទៅមុខ»៕
