ភ្ញៀវទេសចរនៅព្រលានយន្តហោះសៀមរាប-អង្គរ នាពេលកន្លងទៅ។ រូបថត ហ្វេសប៊ុក
ភ្នំពេញៈ ស្របពេលចរន្តនៃការធ្វើដំណើររបស់ភ្ញៀវទេសចរកំពុងមានភាពប្រសើរបន្ទាប់ពីវិបត្តិសុខភាពសកល ប្រទេសកម្ពុជា បានទទួលភ្ញៀវបរទេសប្រមាណជាង ៥,៤ លាននាក់នៅក្នុងឆ្នាំ ២០២៣ កើនឡើងជិត ១៤០ ភាគរយ បើធៀបនឹងឆ្នាំ ២០២២ ក្នុងនោះភ្ញៀវមកពីប្រទេសចំនួន ៤ ក្នុងតំបន់អាស៊ីបានគ្របដណ្តប់ជិត ៧០ ភាគរយនៃចំនួនភ្ញៀវបរទេសសរុប។ នេះបើតាមក្រសួងទេសចរណ៍។
ទិន្នន័យក្រសួងទេសចរណ៍បង្ហាញថា នៅក្នុងឆ្នាំ ២០២៣ កម្ពុជាទទួលបានភ្ញៀវបរទេសសរុប ៥ ៤៥៣ ២៣១ នាក់កើនឡើង ១៣៩,៥ ភាគរយបើធៀបនឹងឆ្នាំ២០២២ ដែលមានចំនួន ២ ២៧៦ ៦២៦ នាក់។ ក្នុងចំណោមភ្ញៀវទាំងអស់ គឺភ្ញៀវមកពីប្រទេសចំនួន ៤ បានគ្របដណ្តប់ ៦៨,៩ ភាគរយនៃចំនួនភ្ញៀវសរុប ដោយក្នុងនោះភ្ញៀវមកពីប្រទេសថៃមានចំនួនច្រើនជាងគេ គឺ ១ ៨២០ ៤៦០ នាក់ ស្មើនឹង ៣៣,៤ ភាគរយនៃចំនួនភ្ញៀវបរទេសសរុប, វៀតណាម ១ ០១៩ ៨១២ នាក់ ស្មើនឹង ១៨,៧ ភាគរយ, ចិន ៥៤៧ ៧៩៨ នាក់ ស្មើនឹង ១០ ភាគរយ និងឡាវ ៣៧២ ២៨៥ នាក់ស្មើនឹង ៦,៨ ភាគរយ។ ក្រៅពីប្រទេសទាំង ៤ ខាងលើក៏មានភ្ញៀវមកពីប្រទេសជាច្រើនទៀតដូចជា អាមេរិក កូរ៉េ ឥណ្ឌូនេស៊ី បារាំង ចក្រភពអង់គ្លេស និងម៉ាឡេស៊ី ជាដើម។
បើពិនិត្យតាមអត្រាកំណើន គឺភ្ញៀវជនជាតិថៃ កើន ១១៣,៣ ភាគរយ, វៀតណាមចំនួន ១១៩,៨ ភាគរយ, ចិន ៤១២,៦ ភាគរយ និងជនជាតិឡាវ ៣០២ ភាគរយ។
ចំនួនភ្ញៀវទេសចរបរទេសនឹងបន្តភាពវិជ្ជមានក្នុងឆ្នាំ ២០២៤
ប្រធានសមាគមមគ្គុទ្ទេសក៍ទេសចរអង្គរ (ខេត្តសៀមរាប) លោក ខៀវ ធី បានប្រាប់ ភ្នំពេញ ប៉ុស្តិ៍ថា ភ្ញៀវទេសចរបរទេសដែលធ្វើដំណើរមកកម្ពុជាក្នុងឆ្នាំ ២០២៣ បានកើនឡើងគួរឱ្យកត់សម្គាល់បើធៀបនឹងអំឡុងឆ្នាំ ២០២០- ២០២២ ដែលពិភពលោកស្ថិតក្រោមការគំរាមកំហែងខ្លាំងពីវិបត្តិកូវីដ ១៩។ ភាគច្រើននៃភ្ញៀវបរទេសចូលមកកម្ពុជានាអំឡុងពេល ៣-៤ ឆ្នាំចុងក្រោយ គឺជាប្រជាជននៅប្រទេសជិតខាង ឬក្នុងតំបន់អាស៊ី។
លោកបានបន្តថា មូលហេតុដែលភ្ញៀវភាគច្រើនជាអ្នកនៅក្នុងតំបន់ គឺដោយសារកំណើនសេដ្ឋកិច្ចពិភពលោកមិនទាន់ល្អដែលជំរុញឱ្យអ្នកទេសចរមិនចង់ធ្វើដំណើរទៅឆ្ងាយ និងចំណាយច្រើន។
លោកបានថ្លែងថា៖ «ក្នុងឆ្នាំកន្លងមកយើងពិតជាឃើញមានកំណើនភ្ញៀវបរទេសច្រើនបើធៀបនឹងឆ្នាំ ២០២២ ប៉ុន្តែភ្ញៀវដែលមកកម្សាន្តនៅកម្ពុជាភាគច្រើន គឺជាអ្នកមកពីប្រទេសជាប់ព្រំដែន ឬនៅក្នុងតំបន់តែប៉ុណ្ណោះ»។
ទោះយ៉ាងណាលោក ខៀវ ធី លើកឡើងថា ចំនួនភ្ញៀវបរទេសមកកម្ពុជាក្នុងឆ្នាំ ២០២៣ គឺនៅមានអត្រាទាបនៅឡើយបើធៀបនឹងប្រទេសជាប់ព្រំដែន (ថៃ និងវៀតណាម)ដែលការណ៍នេះទាមទារឱ្យអាជ្ញាធរ និងផ្នែកឯកជនត្រូវតែខិតខំបន្ថែមទៀតក្នុងការបង្កើតបរិយាកាសល្អៗ និងថ្មីៗ ដើម្បីទាក់ទាញភ្ញៀវបរទេសឱ្យមកកម្ពុជាកាន់តែច្រើន។
លោកបន្ថែមថា ជាក់ស្តែងប្រទេសជិតខាង គេកំពុងដាក់ចេញយុទ្ធសាស្ត្រថ្មីៗ និងបង្កើតផលិតផលថ្មីៗ ព្រមទាំងរមណីយដ្ឋានជាបន្តបន្ទាប់ ដើម្បីផ្តល់ជម្រើសកាន់តែច្រើនដល់ភ្ញៀវដែលទៅកម្សាន្ត ដែលការណ៍នេះក៏ជួយឱ្យភ្ញៀវស្នាក់នៅបានកាន់តែយូរផងដែរ។
លោកបានបញ្ជាក់ថា៖ «សម្រាប់ឆ្នាំ ២០២៤ នេះ ខ្ញុំរំពឹងថា ចំនួនភ្ញៀវបរទេសចូលមកកម្ពុជានឹងបន្តកើនឡើងទៀត ហើយភាគច្រើនគឺជាភ្ញៀវនៅក្នុងតំបន់។ វិស័យទេសចរណ៍នៅត្រូវការពេលបន្ថែមទៀត»។
បើតាមលោក ខៀវ ធី សកម្មភាពដើម្បីទាក់ទាញភ្ញៀវទេសចរមានដូចជា ការរៀបចំបរិស្ថាន អនាម័យ ហេដ្ឋារចនាសម្ព័ន្ធ សន្តិសុខ កន្លែងស្នាក់នៅ កន្លែងលក់វត្ថុអនុស្សាវរីយ៍ និងរមណីយដ្ឋានទេសចរណ៍ ជាដើម។
ប្រធានសមាគមមគ្គុទេសក៍ទេសចរណ៍ភាសាចិនកម្ពុជា (ខេត្តសៀមរាប) លោក អនហេង សុភ័ក្រ បានប្រាប់ថា បើនិយាយពីចំនួនភ្ញៀវទេសចរបរទេស ពិសេសជនជាតិចិនក្នុងឆ្នាំ ២០២៣ គឺពិតជាកើនឡើងច្រើនធៀបនឹងឆ្នាំ ២០២២ ប៉ុន្តែបើធៀបមុនឆ្នាំ ២០២០ គឺនៅមានកម្រិតតិចនៅឡើយ។ លោកបន្តថា កំណើនភ្ញៀវបរទេសដែលធ្វើដំណើរមកកម្សាន្តកម្ពុជា ក៏មានការប្រែប្រួលទៅតាមស្ថានភាពសេដ្ឋកិច្ច និងជើងហោះហើរអន្តរជាតិផងដែរ។
លោកបានអះអាងថា៖ «ខ្ញុំពុំសូវស៊ីជម្រៅនឹងចំនួនភ្ញៀវទេសចរមកពីប្រទេសណាទេ ប៉ុន្តែបើសម្រាប់ភ្ញៀវទេសចរចិន គឺពិតជាកើនឡើងជាងឆ្នាំ ២០២២ ហើយក៏សង្ឃឹមថា នៅក្នុងឆ្នាំ ២០២៤ នេះនឹងបន្តមានការកើនឡើងថែមទៀត»។
ការតភ្ជាប់ជើងហោះហើរត្រង់នឹងជួយឱ្យកម្ពុជាទាក់ទាញភ្ញៀវទេសចរបរទេសកាន់តែច្រើន
ប្រធានសមាគមទីភ្នាក់ងារទេសចរណ៍កម្ពុជា លោកស្រី ឆាយ ស៊ីវលីន កន្លងមកបាននិយាយថា ចំនួនភ្ញៀវទេសចរបរទេសដែលធ្វើដំណើរមកកម្ពុជាបានកើនឡើងជាបន្តបន្ទាប់ ជាពិសេសមួយរយៈចុងក្រោយនេះ។ ការបើកដំណើរកាន់តែច្រើននៃជើងហោះហើរអន្តរជាតិត្រង់មកកម្ពុជា និងការរៀបចំព្រឹត្តិការណ៍ផ្សេងៗក្នុងស្រុក គឺជាចំណែកដែលនាំមកនូវភាពវិជ្ជមានទាំងនេះ។ លោកស្រីបន្តថា សម្រាប់ភ្ញៀវទេសចរបរទេសដែលមកកម្សាន្តនៅកម្ពុជាភាគច្រើនគឺមកពីប្រទេសជិតខាង និងក្នុងតំបន់អាស៊ី។
លោកស្រីបន្ថែមថា ការកសាងព្រលានយន្តហោះថ្មី និងការរៀបចំហេដ្ឋារចនាសម្ព័ន្ធកាន់តែល្អ ក៏ជាចំណែកសំខាន់ក្នុងការទាក់ទាញភ្ញៀវទេសចរ និងអ្នកវិនិយោគឱ្យធ្វើដំណើរមកកម្ពុជាកាន់តែច្រើនផងដែរ។
លោកស្រីថ្លែងថា៖ «ចំនួនភ្ញៀវបរទេសដែលមកកម្ពុជាបានបង្ហាញពីការងើបឡើងវិញជាបណ្តើរៗហើយ ខណៈបច្ចុប្បន្នទាំងថ្នាក់ដឹកនាំក្រសួងទេសចរណ៍ និងផ្នែកឯកជនកំពុងខិតខំយ៉ាងខ្លាំងក្នុងទាក់ទាញឱ្យភ្ញៀវទេសចរបរទេសឱ្យមកកម្ពុជាកាន់តែច្រើនៗ»។
ចំណូលពីវិស័យទេសចរណ៍កំពុងកើនឡើង
សេចក្តីប្រកាសព័ត៌មានរបស់គ្រឹះស្ថានអង្គរ ឱ្យដឹងថា ក្នុងឆ្នាំ ២០២៣ មានភ្ញៀវបរទេស ៧៩៨ ០៦៩ នាក់ បានទិញសំបុត្រចូលទស្សនារមណីយដ្ឋានអង្គរ ដោយកើនឡើង ១៧៧,៦៣ ភាគរយ បើធៀបទៅនឹងឆ្នាំ ២០២២ ចំណែកទឹកប្រាក់ដែលប្រមូលបានពីការលក់សំបុត្រ មានសរុប ៣៧,២ លានដុល្លារ កើនឡើង ២២២,៦៨ ភាគរយ។
ក្រៅពីចំណូលខាងលើគ្រឹះស្ថានអង្គរ ក៏ទទួលបានភ្ញៀវចំនួន ១៤ ៨០៦ នាក់ ស្មើនឹងប្រាក់ ២២២ ០៩០ ដុល្លារ ពីការលក់សំបុត្រឱ្យភ្ញៀវបរទេសចូលទស្សនាតំបន់ប្រាសាទកោះកេរ, និងប្រាក់ចំនួន ៥៦៤ ៦៧១ ដុល្លារ ពីការលក់សំបុត្រទូកនៅកំពង់ផែចុងឃ្នៀស៕
